1. Thenga Ngobulumko
NGAPHANDLE kokuba uyakulima ukutya kwakho, indawo yokuqala okufumana kuyo yimarike okanye ivenkile. Xa uthenga, ungakukhetha njani ukutya okusempilweni?
● Cinga Ngexesha Omele Ukuthenge Ngalo Ukutya Okuthile.
IBhunga Lenkcazelo Ngokhuseleko Lokutya EOstreliya lithi: “Qala uthenge ukutya okukwaziyo ukuhlala ixesha elide kungonakali. Izinto [ezihlala] efrijini gqibela ngazo.” Ukuba uza kuthenga ukutya okuvuthiweyo, kuthathe xa ugoduka.
● Thenga ukutya okufreshi.
Zama ukuthenga izinto ezifreshi ukuba kunokwenzeka.a URuth, umama onabantwana ababini ohlala eNigeria uthi: “Ndithanda ukuya emarikeni ekuseni xa ukutya kusefreshi.” NoElizabeth ohlala eMexico, uthenga eMarikeni. Uthi: “Apho ndiyakwazi ukuzikhethela iziqhamo nemifuno esandul’ ukuvunwa. Ndisoloko ndithenga inyama esandul’ ukuxhelwa ngolo suku. Endingazi kuyisebenzisa, ndiyifaka efrijini.”
● Hlola ukutya kwakho.
Zibuze: ‘Ngaba amaxolo okutya asekwimeko entle? Ngaba inyama ayinavumba libi?’ Ukuba ukutya kusongelwe, yihlole loo nto. Ukuba loo nto kufakwe kuyo yonakele, iintsholongwane zinokungena lula.
UChung Fai, othenga ukutya evenkileni eHong Kong, uthi: “Kubalulekile nokujonga umhla okuphelelwa ngawo.” Ngoba? Iingcali zithi kwanokuba ukutya “okuphelelweyo” kubonakala kusalungile, akunuki, yaye kumnandi, kungakugulisa.
● Kupakishe kakuhle.
Ukuba ukusongela ngebhegi okanye iplastiki esetyenziswa kaninzi, yihlambe rhoqo ngamanzi ashushu anesepha. Inyama nentlanzi zifake kwizinto okanye iibhegi ezahlukileyo ukuze zingonakalisi okunye ukutya.
UEnrico noLoredana isibini saseItali, sithenga kwiivenkile zasekuhlaleni. Sithi, “Oko kusinceda singahambi nokutya imigama emide sikuchanabe kwizifo.” Ukuba uhamba ngaphezu kwemizuzu engama-30 xa ukuya ekhaya, kuphathe ngento eza kukugcina kubanda.
Kwinqaku elilandelayo, siza kufunda ngendlela yokugcina ukutya kukhuselekile xa kusekhaya.
[Umbhalo osemazantsi]
a Funda inqaku elithi “Eyoku-1—Yitya Ukutya Okunesondlo,” kuVukani! kaMatshi 2011.
[Ibhokisi ekwiphepha 4]
QEQESHA ABANTWANA BAKHO: “Abantwana bam ndibafundisa ukuba bajonge umhla wokuphelelwa kokutya ngaphambi kokuthenga.”—URuth, eNigeria