3. Kulungise Uze Ukugcine Kakuhle
UMPHEKI ongakhathaliyo kwaSirayeli wakha amathangazana, nangona ‘wayengaqhelananga nawo.’ Nakuba engaqhelananga nawo wawagalela kwisityu. Abantu ababeza kutya oko kutya, nababesoyikela ityhefu, bakhala besithi: “Ukufa kusembizeni.”—2 Kumkani 4:38-41.
Njengokuba lo mzekelo ungentla ubonisa, ukutya okuphekwa ngokungakhathali kumele kulunyukelwe, kuba kunokuba yingozi okanye kubulale. Ngoko ke, ukuze uphephe izifo zokutya, funda ukukulungisa uze ukugcine kakuhle. Khawucinge ngala macebiso mane:
● Sukugcina inyama kubushushu obuqhelekileyo bendlu.
ISebe Lezolimo laseUnited States lithi: “Nakuba embindini [inyama] isenokuba nomkhenkce njengoko inyibilika, umphandle wayo usenokuba ‘Sengozini,’ kaloku kubushushu obuphakathi kwe-40 [4°C] ne-140°F [60°C]—iintsholongwane zanda ngokukhawuleza.” Ngoko, xa unyibilikisa ukutya kufake efrijini, kunyibilikise ngemicrowave, okanye ukufake emanzini abandayo yaye uqiniseke ukuba ayakugquma.
● Kupheke Kuvuthwe.
Ngokutsho kweWorld Health Organization, “ukupheka ukutya kuvuthwe kuzibulala zonke iintsholongwane eziyingozi.” Xa upheka ukutya, ngakumbi isuphu nesityu, qiniseka ukuba amaqondo obushushu ayafika ku-70 degrees ngokukaCelsius.a Ekubeni kunokuba nzima ukwazi amaqondo obushushu ngaphakathi kokunye ukutya, abapheki abaninzi basebenzi ithermometer yenyama.
● Kuphake ngokukhawuleza.
Ukutya okuphekiweyo akumele kugcinwe endlwini ixesha elide, makuphakwe ngokukhawuleza, ukuze kuphetshwe izifo. Okubandayo makugcinwe kwindawo ebandayo okushushu kweshushu. Ungayigcina inyama eshushu kwiovini eshushu malunga ne-90 degrees ngokukaCelsius.
● Ukutya okuseleyo kuphathe ngocoselelo.
UAnita, umama ohlala ePoland, uthanda ukuphaka kwangoko emva kokupheka. Uthi, “Okuseleyo ndikhawuleza ndikufake efrijini ngezinto ezincinane ukuze kunyibilike lula xa ndikufuna.” Ukuba ugcina umbeko efrijini, wutye kwintsuku ezintathu okanye ezine.
Kwivenkile yokutyela, umele uxhomekeke komnye umntu. Ngoko, ungayikhusela njani intsapho yakho xa uye kutya ezivenkileni?
[Umbhalo osemazantsi]
a Okunye ukutya, okufana nenkuku kufuneka kuphekwe ngamaqondo aphakamileyo.
[Ibhokisi ekwiphepha 6]
QEQESHA ABANTWANA BAKHO: “Xa abantwana bam bepheka, ndiye ndibakhumbuze ukuba bayifunde baze bayilandele imiyalelo ebhalwe ngaphandle.”—UYuk Ling, eHong Kong