Isahluko 19
‘Imfazwe Esondelayo Yaloo Mini Inkulu KaThixo USomandla’
1. (a) Iintlanga ziya kunyanzela uThixo uSomandla ukuba abhale ntoni kungekudala “encwadini yeemfazwe zikaYehova,” ibe yayiyintoni loo ncwadi? (b) Loo ncwadi iya kufikelela incopho ezukileyo ngayiphi imfazwe?
EKUGQIBELENI iintlanga zifikelele kwixesha ezinyanzela ngalo uThixo onguSomandla ukuba abhale inxalenye enkulu yokugqibela “encwadini yeemfazwe zikaYehova.” (Numeri 21:14) Loo ncwadi yokoqobo yayiyingxelo yeemfazwe uYehova awazilwela abantu bakhe. Kucacile ukuba uMoses wayifunda. Kusenokwenzeka ukuba le ncwadi yaqalisa ngemfazwe enempumelelo ka-Abraham awayilwa nookumkani ababethimbe uLote, njengoko uYehova wayesilwela uAbraham. (Genesis 14:1-16, 20) Kungekudala ngoku, ‘incwadi yeemfazwe zikaYehova’ iya kubekwa kwincopho ezukileyo ngokongezelelwa kwesahluko esitsha—ingxelo yolona loyiso lwakhe luzukileyo. Oko kuya kwenzeka “emfazweni yaloo mini inkulu kaThixo, uSomandla” eArmagedon, esisiganeko sokugqibela kule nkqubo yezinto. (ISityhilelo 16:14, 16) Yonke le ‘ncwadi’ iya kubonisa ukuba uThixo uSomandla akazange woyiswa emfazweni, okanye edabini.
2, 3. (a) Ukususela ekuqaliseni kobuKristu, kwenzeke ntoni ngokubhekisele ekulweni kukaYehova ‘kwiimfazwe’ zomkhosi? (b) Yintoni eya kushukumisa uYehova ekulweleni abakhonzi bakhe kwixesha lethu?
2 Kuyinyaniso ukuba, ukususela ekuqalekeni kobuKristu kude kube ngoku, uYehova ubalondolozile abantu bakhe ngezinye iindlela ezingezizo ezeemfazwe zomkhosi. Akazange uYehova awalwele amangqina akhe angamaKristu njengoko wenzayo kuSirayeli phantsi koMthetho kaMoses. Kodwa liza kufika ixesha kwikamva elingekude laxa eya kubalwela ngomkhosi abakhonzi bakhe abazinikeleyo bamaxesha anamhla. Yintoni eya kuqhwaya loo mfazwe yaseArmagedon?
3 Ngaphambi kokuqhambuka kwemfazwe kaThixo, iBhabhiloni Enkulu, ubukhosi behlabathi bonqulo lobuxoki, iya kuba itshatyalalisiwe. USathana uMtyholi nabatshabalalisi beBhabhiloni Enkulu abangabobupolitika nabangengabo abonqulo baya kusithiya isibakala sokuba amaNgqina kaYehova eya kuba kuphela kweqela lonqulo elikhoyo. Abalawuli behlabathi baya kube bengalufikelelanga usukelo lwabo lokuba nehlabathi elingahloneli Thixo. Ke ngoko, baya kusebenzisa amandla abo onke ekuhlaseleni abanquli bakaYehova, ulongamo lwakhe lwendalo iphela abalukhanyelayo nabaludelelayo! Ngaloo ndlela ngokwenene baya kuba besilwa noThixo.—ISityhilelo 17:14, 16; thelekisa IZenzo 5:39.
“UYehova Wemikhosi” Uqalisa Imisebenzi Yezomkhosi
4. (a) UYehova usabela njani kuhlaselo lukaGogi? (b) Oko kusabela kuya kungqina ntoni, ngokuvisisana negama elithi “uYehova wemikhosi”?
4 USathana uMtyholi, uGogi wakwaMagogi ongokomfuziselo, ngobukrelekrele uya kuphembelela ukuhlaselwa kwabantu bakaYehova. Xa uGogi esebenzisa imikhosi yakhe engakholelwayo kubukho bukaThixo ukuba ihlasele abantu bakaYehova, ibacinezele ize ibatshabalalise, uYehova uya kungenelela aze abalwele abantu bakhe, njengoko kwaxelwa kwangaphambili kuHezekile 38:2, 12, 18-20. Indlela uYehova aya kusabela ngayo yakwaxelwa kwangaphambili kuZekariya 14:3: “Uya kuphuma ke uYehova, alwe nezo ntlanga, njengemini yokulwa kwakhe, ngemini yomdibaniso.” Ngale ndlela uThixo weBhayibhile uya kunikela ubungqina kuzo zonke iintlanga zanamhla bungqina obo obubonisa ukuba usenguThixo Oligorha, kanye njengokuba wayenjalo ngemihla kaSirayeli wamandulo, xa, njengoko kubhalwe kwiZibhalo zesiHebhere, wachazwa ‘njengoYehova wemikhosi’ izihlandlo ezingama-260.—INdumiso 24:10; 84:12.
5, 6. (a) Yiyiphi imfazwe eqhambukayo ngoku, ibe ngubani okhokela imikhosi yasezulwini ukusinga edabini? (b) Yiyiphi ingxelo umpostile uYohane ayinikelayo ngemikhosi yasezulwini eya edabini?
5 Xa ‘imini enkulu kaThixo uSomandla’ ifika, iya kuba lixesha ‘lemfazwe’ eya kuphawula loo mhla. UYehova unikel’ umqondiso kwiNganga yakhe Yemikhosi, uYesu Kristu. Egameni likaYehova, yena nemikhosi yasezulwini yezithunywa zezulu ezizizigidi ngezigidi baya kungenelela edabini, ngokungathi bakhwele kumahashe emfazwe. (Yuda 14, 15) Njengombhali wemfazwe, umpostile uYohane usinik’ ingxelo yangaphambili yoloyiso oluhlekezayo oluya kuzuzwa yiNganga Yemikhosi kaYehova “emfazweni yaloo mini inkulu kaThixo, uSomandla”:
6 “Ndalibona izulu livulekile, nalo ihashe elimhlophe; lowo uhleli phezu kwalo kusithiwa, nguThembekile, nguNyaniso; ugweba, enze imfazwe, ngobulungisa. Amehlo akhe ke aye enjengelangatye lomlilo, entloko izizithsaba ezininzi . . . Yaye imikhosi esemazulwini imlandela, ikumahashe amhlophe, bambethe ilinen ecikizekileyo, eqaqambileyo, emhlophe. Emlonyeni wakhe kuphuma ikrele elibukhali, ukuze azithi qwaka ngalo iintlanga. Yena uya kuzalusa ngentonga yentsimbi; yena unyathela isixovulelo sewayini yomsindo neyengqumbo kaThixo uSomandla. Engutyeni yakhe nasethangeni lakhe wayenegama libhaliwe kwathiwa, UKUMKANI KAKUMKANI, UNKOSI KANKOSI.”—ISityhilelo 19:11-16.
7. Ukunyathelwa kwesixovulelo sewayini yokomfuziselo yomsindo kaThixo kubonisa ntoni kwiintlanga?
7 INganga Yemikhosi nengokwasebukhosini, uYesu Kristu, ikhokela imikhosi yasezulwini ekuzoyiseni ngokupheleleyo zonke iintshaba ezihlanganiseneyo eArmagedon. Iphethulela elo thafa ledabi libe sisixovulelo esikhulu sewayini! Ekubeni uKumkani wookumkani ‘enyathela isixovulelo sewayini yomsindo nengqumbo kaThixo uSomandla,’ oku kubonisa ukuba iintlanga ziya kuhlekezwa ngokupheleleyo. Ziya kuphoswa njengeediliya ezivuthiweyo ‘kwisixovulelo sewayini’ esikhulu, apho ‘umsindo nengqumbo kaThixo uSomandla’ ziya kubonakaliswa kuzo nto leyo eya kuthetha ukutshatyalaliswa kwazo. Imikhosi yasezulwini iya kuthelela ekunyathelweni ‘kwesixovulelo sewayini esikhulu somsindo kaThixo.’—ISityhilelo 14:18-20.
8. UYehova ubuchaza njani ubuchule bakhe bemfazwe?
8 AmaNgqina kaYehova emhlabeni akaliphakamisi “ikrele” nxamnye nemikhosi kaGogi, kodwa nguYehova okwenzayo oko. Lo ngumlo wakhe! Ibe ekugqibeleni iintlanga zeli hlabathi lihambele phambili ngokwenzululwazi ziya kumbona esilwa! Khawuphulaphule njengoko echaza ubuchule bakhe bemfazwe: “Ndombizela [uGogi] ikrele ezintabeni zam zonke, itsho iNkosi uYehova; ikrele lomntu liya kuma kumzalwana wakhe. Ndiya kumgweba ngendyikitya yokufa nangegazi; nangesiphango esikhukulayo, nangamatye esichotho, umlilo nesulfure ndiwunise phezu kwakhe, naphezu kwamahlelo akhe, naphezu kwezizwe ezininzi ezinaye. Ndiya kuzikhulisa, ndizingcwalise, ndizazise ngokwam emehlweni eentlanga ezininzi; zazi ukuba ndinguYehova.”—Hezekile 38:21-23.
Ukusetyenziswa Kwezixhobo Zobuthixo Nxamnye Notshaba
9. Ziziphi ezinye izixhobo zemfazwe uYehova aya kuzisebenzisa kwiintshaba zakhe?
9 Njengezixhobo zemfazwe, uYehova uya kukhupha imikhosi yendalo: isiphango semvula ekhukulayo, amatye esichotho abulalayo, nemvula yomlilo ohla ngamandla nesulfure, amanzi aphuma ngamandla enzulwini yomhlaba nemibane esikayo. Ekubanekeni kweendlela zikaThixo zokubulala iintshaba zakhe, ukukhanya kuya kuba namandla gqitha emini nasebusuku kangangokuba ilanga nenyanga zokwemvelo ziya kubonakala zingasafuneki ukuze zikhanyise. Kuya kubonakala ngokungathi zimile, azisebenzi njengezikhanyisi kodwa ziyekele kwiintolo zikaYehova eziqaqambileyo ukuba zibonakalise amandla okukhanyisa. (Habhakuki 3:10, 11) UYehova uneendlela zokwemvelo eziliqela anokuzisebenzisa xa esilwa.—Yoshuwa 10:11; Yobhi 38:22, 23, 29.
10. Ngokutsho kukaZekariya 14:12, yiyiphi enye into uYehova aya kuyisebenzisa “ngemini yemfazwe” ezayo?
10 “Ngemini yemfazwe” ezayo, uYehova kwakhona uya kusebenzisa indyikitya yokufa ‘nesibetho.’ Umprofeti uZekariya wabhala ngoku: “Siso esi isibetho aya kuzibetha ngaso uYehova zonke izizwe eziyiphumele umkhosi iYerusalem: uya kuyingcungcuthekisa inyama yomntu, emi ngeenyawo zakhe, aphelele amehlo akhe emakrolomeni awo, luphelele ulwimi lwakhe emlonyeni wakhe.”—Zekariya 14:12.
11. Kuya kwenzeka ntoni xa “isibetho” sintlitha amagorha ahlasela abantu bakaYehova?
11 Enoba “isibetho” siya kuba sesokoqobo okanye akuyi kuba njalo, siya kuyivala imilomo elungele ukukhupha izisongelo ezoyikisayo! Ulwimi lophelela emilonyeni yabo! Amandla okubona aya kuphelelwa, kangangokuba abahlaseli abanamehlo awoyikekayo baya kubetha nje bengaboni. Amehlo aya kuphelela emakrolomeni abo! Izihlunu zamagorha anamandla ziya kuphelelwa ngamandla ngoxa emi ngeenyawo zawo—kungekhona ngoxa elele phantsi ezizidumbu. Inyama esemathanjeni abo iya kungcungcuthekiswa!—Thelekisa uHabhakuki 3:5.
12. “Isibetho” siya kuzichaphazela njani iikampu zomkhosi wotshaba nezixhobo?
12 “Isibetho” sontlitha ngequbuliso kwiikampu zabo zomkhosi. Izixhobo ezihambayo zokuhlasela zokwenziwa zingasebenzi ngendlela engenakuncedakala! (Zekariya 14:15; thelekisa iEksodus 14:24, 25.) Okubonisa indlela ezingayi kusebenza ngayo izixhobo zabo zomkhosi ngamazwi kaZekariya 14:6: “Kothi ngaloo mini kungabi mhlophe, iinkwenkwezi ezinendili zibe luzizi.” Akukho kukhanya kwasezulwini okubonisa ukukholiseka kwabo kuThixo okuya kukhanya kubo. Ukukhanya okwenziwe ngumntu kwenzululwazi yanamhla akuyi kubuphelisa ubumnyama bengqumbo kaThixo. Izinto ezisebenzayo ziya kwenziwa zingasebenzi, ngokungathi zithintelwe yingqele—zoqina okomkhenkce.
13. Yintoni eya kongeza kuloyiko uYehova aya kuluqhwaya phakathi kwabahlaseli?
13 Konke oku koyikisa gqitha! Kodwa into eyongezelela kolu loyiko sisiphithiphithi uThixo aya kusiqhwaya phakathi kwabahlaseli. Ukumanyana kwabo nxamnye namaNgqina kaYehova kuya kuchithwa. Njengabadlali bamakrele abaneminqwazi esithayo kwiintloko zabo kwibala lemidlalo laseRoma, baya kubethana bengaboni. Isiphithiphithi esibulalayo siya kunaba njengoko bebulalana.—Zekariya 14:13.
14. (a) Ukubulawa kwabantu kuya kunaba kangakanani ngelo xesha, ibe iintaka namarhamncwa ziya kuzifumana njani iingenelo zoloyiso lukaYehova? (b) Sisiphi isimo sengqondo abasindi abaya kuba naso ‘ngabo babulewe nguYehova’?
14 Ababuleweyo ngaloo mhla wemihla baya kuba baninzi, kuba imikhosi engakwicala likaGogi kwelo dabi iya kuba mininzi. (ISityhilelo 19:19-21) Ngokwenene leyo iya kuba yimfazwe yomhlaba wonke, kuba akukho candelo lomhlaba eliya kusaba kuloo ntshabalalo. Ngaphezu koko, abo babulewe eArmagedon abayi kufakwa emangcwabeni abhalwe bona ukuze bakhunjulwe. Zonke iintlobo zeentaka namarhamncwa asendle ziya kufumana iingenelo zoloyiso lukaThixo ibe, kwangaxeshanye, zincede ekucocweni komhlaba kushenxiswa izidumbu ezininzi eziya kuba zidunduluzile phezu komhlaba njengomgquba, zingakhalelwa, zingangcwatywa ibe zicekiswa ngabasindileyo. (Hezekile 39:1-5, 17-20; ISityhilelo 19:17, 18) “Ababuleweyo nguYehova” baya kuba bezizisele ihlazo elingunaphakade bona ngokwabo.—Yeremiya 25:32, 33; Isaya 66:23, 24.
Ukuzukiswa Kwegama LikaYehova
15. Sisiphi isiganeko esibalaseleyo esiya kube sifeziwe ngoko, ibe ngawuphi umphumo kwigama likaYehova?
15 Ngaloo ndlela, “uYehova wemikhosi” ngokusebenzisa iNganga yakhe Yemikhosi, uYesu Kristu, uya kuzizuzela uzuko olungapheliyo. Esona siganeko sikhulu kwimbali yendalo iphela siya kube sifeziwe—ukuthethelelwa kolongamo lukaYehova lwendalo iphela nokungcwaliswa kwegama lakhe elingcwele. (Hezekile 38:23; 39:6, 7) UYehova uya kuzenzela igama eligqwesa nantoni na eyachazwa “encwadini yeemfazwe zikaYehova” nakwiZibhalo zesiHebhere zeBhayibhile Engcwele. (Thelekisa uIsaya 63:12-14.) Elinjani igama ukuba lihle uYehova aya kuzenzela lona ngoloyiso lwakhe oloyikekayo “emfazweni yaloo mini inkulu kaThixo, uSomandla”! Benemincili, bonke abathandi belo gama baya kulidumisa ngonaphakade, bevuma iindumiso zalo!
16. Ngenxa ‘yemfazwe ezayo yaloo mini inkulu kaThixo uSomandla,’ nguwuphi umthandazo onikelwayo ngenxa ‘yesihlwele esikhulu’?
16 Ngoko, sithi qhubeka Yehova wemikhosi uye edabini, uhamba noNyana wakho wasemkhosini uYesu Kristu! (INdumiso 110:5, 6) Amangqina akho athembekileyo asemhlabeni makabe ngamangqina avuyayo oloyiso lwakho olungenakulinganiswa nanto ngoKumkani wakho uYesu Kristu “emfazweni yaloo mini inkulu kaThixo, uSomandla.” “Isihlwele esikhulu” ngemincili ‘masiphume embandezelweni enkulu’ ukuze sibe ngamangqina akho asemhlabeni ngonaphakade. (ISityhilelo 7:14) Phantsi kokunyanyekelwa nguwe ngothando, masisindele kuLawulo olungenamfazwe Lwewaka Leminyaka ‘loMthetheli wakho Woxolo’ owoyisileyo. Masibe bubungqina obubonakalayo kubafi abavusiweyo ekuthetheleleni ulongamo olulolwakho ngokufanelekileyo kwindalo iphela. Sibamba ngazibini ngokubhala inxalenye yokugqibela nezukileyo “encwadini yeemfazwe zikaYehova.” Le ngxelo yoloyiso lwakho olungenakuthelekiswa nanto mayihlale kwiingxelo zembali yendalo iphela kude kube lixesha elingunaphakade!
[Umfanekiso okwiphepha 156, 157]
“UYehova wemikhosi” uya kulwa neentlanga