IsoNo

Ingcaciso: Ngokoqobo, kukusilela kuphawu, ngokutsho kweBhayibhile yesiHebhere neyesiGrike. NguThixo ngokwakhe omisela “uphawu” izidalwa zakhe ezinengqondo ezimele zilufikelele. Ukungalufikeleli olo phawu kusisono, okukwakukungalungisi, okanye ukuchas’ umthetho. (Roma 3:23; 1 Yoh. 5:17; 3:4) Isono yiyo nayiphi na into engavisisaniyo nobuntu bukaThixo, imilinganiselo, indlela, nokuthanda kwakhe, zinto ezo ezingcwele xa zizonke. Sisenokuquka ihambo ephosakeleyo, ukusilela ukwenza okumele kwenziwe, intetho yokungahloneli Thixo, iingcamango ezingcolileyo, okanye iinkanuko okanye iintshukumisa ezizezokuzingca. IBhayibhile yenza umahluko phakathi kwesono esizuzw’ ilifa nesono sangabom, phakathi kwesenzo sesono umntu aguqukileyo kuso nokuqhelisela isono.

Kwenzeka njani ukuba uAdam one ukuba wayefezekile?

Ngokubhekisele ekufezekeni kuka-Adam, funda iGenesis 1:27, 31 neDuteronomi 32:4. Xa uYehova uThixo wavakalisa indalo yakhe yasemhlabeni, kuquka indoda nomfazi, ukuba “kulungile,” wayethetha ukuthini? Ukutsho kwaLowo owayenomsebenzi owawugqibelele ukuthi ‘wawulungile,’ kumele ukuba kwakufikelele kwimilinganiselo yakhe yemfezeko.

Ngaba imfezeko yabangela ukuba uAdam noEva bangakwazi ukwenza okuphosakeleyo? Umenzi werobhothi ulindele ukuba yenze kanye oko icwangciselwe ukuba ikwenze. Kodwa irobhothi egqibeleleyo ibingayi kuba ngumntu ogqibeleleyo. Iimpawu ezijongwa njengeziyimfuneko azifani. UAdam noEva babengabantu, bengezorobhothi. UThixo wanika uluntu ubuchule bokukhetha phakathi kokulungileyo nokuphosakeleyo, phakathi kwentobelo nokungathobeli, ukuba benze izigqibo zokuziphatha. Ekubeni le iyindlela abantu abenziwa ngayo, ukungakwazi ukwenza izigqibo ezinjalo (ibe kungekhona izigqibo ezingezozabulumko) kuko okwakuya kubonisa ukungafezeki.—Thelekisa iDuteronomi 30:19, 20; Yoshuwa 24:15.

Ukuze uAdam noEva bafaneleke njengababedalwe befezekile, ngaba zonke izigqibo zabo emva koko zazimele ukuba zezifanelekileyo? Oko ngekwakufana nokuba babengenalukhetho. Kodwa uThixo akazange abenze ngendlela yokuba intobelo yabo ibe yezenzekelayo. UThixo wabanika ubuchule bokukhetha, ukuze bathobele ngenxa yokuba bemthanda. Okanye, ukuba babevumele iintliziyo zabo zibe zezizingcayo, babengayi kuthobela. Kukuphi okubalulekileyo kuwe—xa ubani ekwenzela into ngenxa yokuba enyanzelekile ukuyenza okanye ngenxa yokuba efuna ukwenjenjalo?—Thelekisa iDuteronomi 11:1; 1 Yohane 5:3.

Babenokuzingca njani abantu abafezeke ngolo hlobo, nto leyo eyayinokukhokelela kwizenzo zesono? Nangona babedalwe befezekile, imizimba yabo yokwenyama yayingayi kuqhubeka isebenza ngokufezekileyo ukuba yayinganikwanga ukutya okufanelekileyo. Ngoko ngokukwanjalo, ukuba babenokuvumela ingqondo izondle ngeengcamango eziphosakeleyo, oku kwakuya kubangela ukuwohloka ngokokuziphatha, ukungabi ngcwele. UYakobi 1:14, 15 ucacisa ngokuthi: “Elowo uhendwa akutsalwa, abanjiswe, yeyakhe inkanuko. Ithi inkanuko, yakuba ithabathile, izale isono.” Kwimeko kaEva, iinkanuko eziphosakeleyo zaqalisa ukuvela xa waphulaphula ngomdla kuSathana, owasebenzisa inyoka njengesithethi sakhe. UAdam wasamkela isibongozo somfazi wakhe sokuthelela yena ekudleni isiqhamo esalelweyo. Kunokuba bazichase iingcamango eziphosakeleyo, bobabini bazondla ngeenkanuko zokuzingca. Umphumo waba zizenzo zesono.—Gen. 3:1-6.

Ngaba isono sika-Adam sasiyinxalenye “yecebo likaThixo”?

Bona iphepha 27, phantsi komxholo othi “UAdam NoEva,” kwanephepha 325, 326, phantsi komxholo othi “IliShwa.”

Ngaba ngokwenene ikho into “esisono” kumhla wethu?

Imizekeliso: Ukuba umntu ogulayo ebeza kwaphula ithermometer, ngaba oko bekuya kungqina ukuba ebengenawo umkhuhlane? Ukuba isela lithe belingakukholelwa okubhalwe kwiincwadi zomthetho, ngaba oko bekuya kulenza libe msulwa kulwaphulo-mthetho? Ngokufanayo, isibakala sokuba abantu abaninzi bengakholelwa ukuba kuyimfuneko ukuphila ngokuvisisana nemilinganiselo yeBhayibhile akusiphelis’ isono.—Bona eyoku-1 kaYohane 1:8.

Bambi abantu basenokukhetha ukwenza okwalelweyo liLizwi likaThixo. Kodwa oko akungqini ukuba iBhayibhile iphosakele. AmaGalati 6:7, 8 alumkisa ngelithi: “Musani ukulahlekiswa; uThixo yena asingowokuhlekisa. Kuba into athe wahlwayela yona umntu, wovuna kwayona; ngokuba lowo uhlwayelela eyakhe inyama, wovuna ukonakala ngokwasenyameni.” Ubhubhani wezifo ezidluliswa ngesini, amakhaya awohlokileyo, njalo njalo, zinikel’ ubungqina bobunyaniso bento ethethwa yiBhayibhile. UThixo wenza umntu; Nguye okwaziyo okuya kusizisela ulonwabo oluhlala luhleli; Nguye osixelelayo eBhayibhileni. Ngaba akunangqiqo ukuphulaphula Yena? (Ngobungqina bobukho bukaThixo, bona umxholo omkhulu othi “UThixo.”)

Ngaba okuninzi okubizwa ngokuba sisono asikuko na ukwenza nje oko kungokwemvelo ebantwini?

Ngaba isini sisisono? Ngaba uAdam noEva bona ngokuba neentlobano zesini? Oku asikuko okuthethwa yiBhayibhile. IGenesis 1:28 ithi nguThixo ngokwakhe owaxelela uAdam noEva ukuba ‘baqhame bande bawuzalise umhlaba.’ Oko kwakuya kuquka neentlobano zesini phakathi kwabo, akunjalo na? Ibe INdumiso 127:3 ithi “ilifa likaYehova ngoonyana,” ‘ngumvuzo.’ Kumele kuphawulwe ukuba uEva nguye owadla kuqala kwisiqhamo esalelweyo ibe wenjenjalo xa wayeyedwa; kuphela kukamva awathi wanika uAdam esinye. (Gen. 3:6, NW) Ngokucacileyo, umthi ekwakhula kuwo isiqhamo esalelweyo yayingowokoqobo. Okwalelwa yiBhayibhile asizontlobano zesini eziqhelekileyo phakathi kwendoda nomfazi kodwa luqheliselo olunjengohenyuzo, ukrexezo, ubufanasini nokulala nezilwanyana. Isiqhamo esibi soqheliselo olunjalo sibonisa ukuba isalelo sibubungqina benkxalabo enothando yaLowo uyaziyo indlela esenziwe ngayo.

Gen. 1:27: “Wamdala ke uThixo umntu [uAdam] ngokomfanekiselo wakhe; wamdala ngokomfanekiselo kaThixo.” (Ngoko ke, into eqhelekileyo, yayikukuba uAdam abonakalise iimpawu ezingcwele zikaThixo, asabele ngoxabiso kulwalathiso lukaThixo. Ukusilela koku yayikukungalufikeleli uphawu, yayikukona. Bona amaRoma 3:23, kwaneyoku-1 kaPetros 1:14-16.)

Efe. 2:1-3: “Nani [maKristu] unidlise ubomi, nifile nje ziziphoso nazizono; enanifudula nihamba kuzo ngokwesimo seli hlabathi, ngokomphathi wegunya lesibhakabhaka, womoya lo usebenzayo ngoku kubo abangevayo; esasifudula nathi sihleli phakathi kwabo ezinkanukweni zenyama yethu, sisenza ukuthanda kwenyama nokwengcinga, saye ngemvelo sikwangabantwana bengqumbo, njengabanye abo.” (Njengenzala yomoni onguAdam, sazalelwa esonweni. Ukususela ekuzalweni kuse phambili, utyekelo lwentliziyo yethu lubi. Ukuba asiloyisi olo tyekelo luphosakeleyo, ekuhambeni kwexesha sisenokuqhelana nendlela yobomi elolo hlobo. Isenokude ibonakale “iyeqhelekileyo” ngenxa yokuba abanye abasingqongileyo besenza izinto ezifanayo. Kodwa iBhayibhile iyakuchaza okufanelekileyo nokuphosakeleyo ngokwembono kaThixo, ngenxa yendlela awamenza ngayo umntu nenjongo yakhe ngoluntu. Ukuba siyamphulaphula uMdali wethu size ngothando simthobele, ubomi buya kuba nentsingiselo entle esingazange sayazi ngaphambili, ibe siya kuba nekamva elingunaphakade. Ngokufudumeleyo uMdali wethu uyasimema ukuba sive size sibone indlela alunge ngayo.—INdu. 34:8.)

Isono siluchaphazela njani ulwalamano lomntu noThixo?

1 Yoh. 3:4, 8: “Bonke abasenzayo isono benza okuchasene nomthetho; sona isono sikukuchasana nomthetho. Lowo usenzayo isono ungokaMtyholi.” (Hayi indlela okunamandla ngayo oku! Abo bathi ngabom bakhethe ikhondo lesono, basiqhelisele, uThixo ubajonga njengezaphuli-mthetho. Ikhondo abalikhethileyo lelo laqala lakhethwa nguSathana.)

Roma 5:8, 10: “Sakubon’ ukuba sisengaboni, uKristu [wasifela]. . . . besiziintshaba nje, saxolelaniswa noThixo ngako ukufa koNyana wakhe.” (Phawula ukuba aboni kubhekiselwe kubo njengeentshaba zikaThixo. Ngoko, hayi indlela ekububulumko ngayo ukuzenza sifumane ilungiselelo uThixo alenzele ukuba sixolelaniswe naye!)

1 Tim. 1:13: “Ndesuka ndenzelwa inceba [utsho njalo umpostile uPawulos], ngokuba ndakwenza oko ndingazi, ndisekungakholweni.” (Kodwa xa waboniswa indlela efanelekileyo yiNkosi, akazange arhoxobise ekuyilandeleni.)

2 Kor. 6:1, 2: “Sisebenzisana naye nje ke, siyaniyala, ukuba ubabalo lukaThixo ningafumane nilwamkele; kuba uthi, Ndakuva ngexesha elamkelekileyo, ndakusiza ngomhla wosindiso. Yabonani lingoku ixesha elamkeleke kakuhle; yabonani, ungoku umhla wosindiso.” (Eli lixesha lokufumaneka kwethuba losindiso. UThixo akayi kuthi ngonaphakade abonakalise ebantwini abanesono ubabalo olunjalo. Ngoko, kufuneka kulunyukwe ukuze singayiqondi phosakeleyo injongo yalo.)

Ukukhululwa kwimeko yethu yesono kunokwenzeka njani?

Bona umxholo omkhulu othi “INtlawulelo.”