IiLwimi, Ukuthetha ngazo

Ingcaciso: Bubuchule obukhethekileyo obanikelwa ngomoya oyingcwele kubafundi abathile kwibandla lamaKristu okuqala obabenza bakwazi ukushumayela okanye bazukisa uThixo ngolwimi olungelolwabo.

Ngaba iBhayibhile ithi bonke ababeza kuba nomoya kaThixo babeya ‘kuthetha ngeelwimi’?

1 Kor. 12:13, 30: “Thina sonke sabhaptizelwa mzimbeni mnye . . . banezibabalo zeziphiliso bonke yini na? Bathetha ngalwimi zimbi bonke yini na?” (Kwaneyoku-1 yabaseKorinte 14:26)

1 Kor. 14:5: “Ndiyathanda ke ukuba nithethe ngalwimi zimbi nonke, noko ke ndithanda ngokukodwa ukuba niprofete. Kuba yena oprofetayo mkhulu kunalowo uthetha ngalwimi zimbi, xa lo angayicacisiyo intetho, ukuze ibandla libe nokwakheka.”

Ngaba intetho yokuba nemincili ngolwimi oluthile umntu angazange walufunda kungqina ukuba unomoya oyingcwele?

Ngaba ubuchule ‘bokuthetha ngeelwimi’ bunokuvela kumthombo ongenguwo uThixo oyinyaniso?

1 Yoh. 4:1: “Zintanda, musani ukukholwa ngoomoya bonke [“yimbonakaliso yonke ephefumlelweyo,” NW], bacikideni oomoya ukuba ngabakaThixo na.” (Bona kwanoMateyu 7:21-23; 2 Korinte 11:14, 15.)

Phakathi kwabo ‘bathetha ngeelwimi’ namhlanje kukho amaPentekoste namaBhaptizi, kwanamaRoma Katolika, amaEpiscopalia, amaWesile, amaLuthere, namaRhabe. UYesu wathi umoya oyingcwele wayeya ‘kubakhokela abafundi bakhe kuyo yonke inyaniso.’ (Yoh. 16:13) Ngaba amalungu enkonzo nganye kwezi ayakholelwa ukuba abanye ‘abakwathetha ngeelwimi’ baye bakhokelelwa kuyo “yonke inyaniso”? Kunokwenzeka njani oko, ekubeni bonke bengavumelani? Nguwuphi umoya obabangela ukuba ‘bathethe ngeelwimi’?

Kwinkcazelo eyenziwa ngokumanyeneyo yiFountain Trust neBhunga Labavangeli leCawa yaseTshetshi kwavunywa oku: “Kwakhona siyaqonda ukuba into efanayo inokwenzeka phantsi kwempembelelo yobugqwirha bomlingo/yobudemon.” (Gospel and Spirit, Aprili 1977, eyapapashwa yiFountain Trust neBhunga labaVangeli leCawa yaseTshetshi, iphe. 12) Incwadi ethi Religious Movements in Contemporary America (eyahlelwa nguIrving I. Zaretsky noMark P. Leone, eyayicaphula uL. P. Gerlach) ithi ‘ukuthetha ngeelwimi’ eHaiti kuyinto eyenzeka kwiiCawa zomoya nezamaGqirha.—(Princeton, N.J.; 1974), iphe. 693; bona kwaneyesi-2 yabaseTesalonika 2:9, 10.

Ngaba ‘ukuthetha ngeelwimi’ okwenziwayo namhlanje kuyafana noko kwakusenziwa ngamaKristu enkulungwane yokuqala?

Ngenkulungwane yokuqala, izipho ezingummangaliso zomoya, kuquka ubuchule ‘bokuthetha ngeelwimi,’ zazingqina ukuba uThixo wayengakholiswa yinkqubo yamaYuda yonqulo ibe wayekholiswa libandla lamaKristu elalisandul’ ukusekwa. (Heb. 2:2-4) Ekubeni loo njongo yathi yafezwa ngenkulungwane yokuqala, ngaba kuyimfuneko ukungqina into efanayo ngokuphindaphindiweyo ngomhla wethu?

Ngenkulungwane yokuqala, ubuchule ‘bokuthetha ngeelwimi’ bahambisela phambili umsebenzi wezizwe ngezizwe wokunikela ubungqina uYesu awayalela abalandeli bakhe ukuba bawenze. (Ize. 1:8; 2:1-11; Mat. 28:19) Ngaba yiloo ndlela abo ‘bathetha ngeelwimi’ ababusebenzisa ngayo obo buchule namhlanje?

Ngenkulungwane yokuqala, xa amaKristu ‘athetha ngeelwimi,’ awakuthethayo kwakunentsingiselo ebantwini ababezazi ezo lwimi. (Ize. 2:4, 8) Namhlanje, akuyonyaniso na ukuba ‘ukuthetha ngeelwimi’ ngokuqhelekileyo kuquka ukudubuleka okubangelwa yimincili ngamazwi angaqondakaliyo?

Ngenkulungwane yokuqala, iBhayibhile ibonisa ukuba, amabandla kwakufuneka akusikel’ umda ‘ukuthetha ngeelwimi’ kubantu ababini okanye abathathu ababenokwenza oko nakuyiphi na intlanganiso; babeza kukwenza oko “ngokulandelelana,” ibe ukuba kwakungekho toliki kwakufuneka bathule. (1 Kor. 14:27, 28) Ngaba koko okwenziwayo namhlanje?

Bona kwanephepha 197, 198, phantsi komxholo othi “UMoya.”

Ngaba umoya oyingcwele usenokuba walathisela abantu beecawa zomoya kuqheliselo olungaphaya koko kufunyanwa eZibhalweni?

2 Tim. 3:16, 17: “Sonke isibhalo, siphefumlelwe nguThixo nje, sikwancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke, exhobele wonke umsebenzi olungileyo.” (Ukuba uthile uthi unesigidimi esiphefumlelweyo esingqubanayo nezinto ezityhilwe ngumoya kaThixo ngoYesu nabapostile bakhe, ngaba oko kusenokwenzeka ukuba kuphuma kumthombo ofanayo?)

Gal. 1:8: “Nokokuba sisuke thina aba, nokokuba sisuke isithunywa sasezulwini sanishumayeza iindaba ezilungileyo ezinxamnye [“ezahlukileyo,” NE] nezo sanishumayezayo, masisingelwe phantsi.”

Ngaba indlela yobomi yamalungu eentlangano ezikuthandayo ‘ukuthetha ngeelwimi’ inikela ubungqina bokuba anomoya kaThixo?

Njengeqela ngaba ngokubalaseleyo bayazibonakalisa iziqhamo zomoya ezinjengobulali nokuzeyisa? Ngaba ezi mpawu zibonakala lula ebantwini abaya kwiintlanganiso zabo zonqulo?—Gal. 5:22, 23.

Ngaba ngokwenyaniso ‘abangabo abehlabathi’? Ngenxa yoku ngaba bazinikele ngokupheleleyo kuBukumkani bukaThixo okanye ngaba babandakanyeke kwimicimbi yehlabathi yobupolitika? Ngaba baye bahlala bemsulwa kwityala legazi ebudeni bexesha lemfazwe? Njengeqela ngaba banegama elihle ngenxa yokuphepha ihambo yehlabathi yokuziphatha okubi?—Yoh. 17:16; Isa. 2:4; 1 Tes. 4:3-8.

Ngaba amaKristu okwenyaniso namhlanje aqondwa ngobuchule ‘bokuthetha ngeelwimi’?

Yoh. 13:35: “Ngayo le nto baya kwazi bonke, ukuba ningabafundi bam, ukuba nithe nathandana.”

1 Kor. 13:1, 8: “Ndingafanelana ndithetha ngeelwimi zabantu nezezithunywa zezulu; uthando ke ndingenalo, ndisuke ndaba yixina ehlokomayo, necangci elikhenkcezayo. Uthando aluze lutshitshe; nokuba ke ziziprofeto, ziya kubhangiswa; nokuba ziilwimi, ziya kupheza.”

UYesu wathi umoya oyingcwele wawuya kuhla phezu kwabalandeli bakhe ibe babeza kuba ngamangqina akhe ukusa nakwezona ndawo zikude zomhlaba. (Ize. 1:8) Wabayalela ukuba ‘benze abafundi abantu bazo zonke iintlanga.’ (Mat. 28:19) Kwakhona waxela kwangaphambili ukuba ‘ezi ndaba zilungileyo zobukumkani zaziya kushunyayelwa kulo elimiweyo liphela zibe bubungqina kuzo zonke iintlanga.’ (Mat. 24:14) Ngoobani namhlanje, abathi njengeqela nanjengabantu ngabanye, benze lo msebenzi? Ngokuvisisana nokwathethwa nguYesu, ngaba asimele sikhangele oku njengobungqina bokuba iqela linomoya oyingcwele?

Ngaba ‘ukuthetha ngeelwimi’ kuza kuqhubeka de oko ‘kugqibeleleyo’ kufike?

Kweyoku-1 yabaseKorinte 13:8 kuthethwa ngezipho eziliqela ezingummangaliso—ukuprofeta, iilwimi, nokwazi. Indinyana 9 kwakhona ithetha ngezibini kwezi zipho—ukwazi nokuprofeta—isithi: “Kuba siyazi ngokuyinxenye, siprofeta ngokuyinxenye.” (BX) Okanye, njengoko iRS ifundeka ngolu hlobo: “Kuba ulwazi lwethu alugqibelelanga nokuprofeta kwethu akugqibelelanga.” Ngoko indinyana 10 ithi: “Kodwa ke xa kuthe kwafika oko kugqibeleleyo okungagqibelelanga kuya kuphuthiswa konke.” (TE) Igama elithi ‘okugqibeleleyo’ liguqulelwe kwelesiGrike elithi teʹlei·on, elidlulisela ingcamango yokukhula ngokupheleleyo, ukuphelela, okanye ukugqibelela. IRo, By, neNW apha zithi “okupheleleyo.” Phawula ukuba asisosipho seelwimi ekuthiwa ‘asigqibelelanga,’ ‘siyinxenye,’ okanye asiphelelanga. Kubhekiswa ‘ekuprofeteni’ ‘nakukwazi.’ Ngamanye amazwi, kwanakwezo zipho zingummangaliso, amaKristu okuqala ayeyiqonda ngokungagqibelelanga okanye ngokungaphelelanga injongo kaThixo. Kodwa xa ezi ziprofeto zaziya kuzaliseka, xa injongo kaThixo yayiya kufezwa, ngoko “oko kugqibeleleyo,” okanye kupheleleyo, kwakuya kufika. Ngoko, ngokucacileyo oko akuthethi kuba ‘isipho seelwimi’ sasiya kuqhubeka ixesha elide kangakanani na.

Noko ke, iBhayibhile iyabonisa ukuba ‘isipho seelwimi’ sasiya kuqhubeka ithuba elingakanani siyinxalenye yamava amaKristu. Ngokwendlela ebonisa ngayo ingxelo, esi sipho nezinye izipho zomoya zazisoloko zidluliselwa ebantwini ngokubekwa izandla ngabapostile bakaYesu okanye ngokubakho kwabo. (Ize. 2:4, 14, 17; 10:44-46; 19:6; bona kwaneZenzo 8:14-18.) Ngaloo ndlela, emva kokufa kwabo kwanaxa bathi bafa abantu abathi ngaloo ndlela bafumana izipho, izipho ezingummangaliso ezabangelwa kukusebenza komoya kaThixo kumele ukuba zafikelela esiphelweni sazo. Imbono enjalo ivumelana nenjongo yezo zipho njengoko ichazwe kumaHebhere 2:2-4.

Ngaba uMarko 16:17, 18 (BX) akabonisi ukuba ubuchule ‘bokuthetha ngeelwimi’ babuya kuba ngumqondiso ofanisa amakholwa?

Kumelwe kuphawulwe ukuba ezi ndinyana azibhekiseli kuphela ‘ekuthetheni ngeelwimi ezintsha’ kodwa zikwabhekisela nasekuphatheni iinyoka nasekuseleni ityhefu ebulalayo. Ngaba bonke ‘abathetha ngeelwimi’ bayalukhuthaza olu qheliselo?

Ukuze sifumane amagqabaza angezizathu zokuba ezi ndinyana zingamkelwa ngabo bonke abaphengululi beBhayibhile, bona iphepha 290. phantsi komxholo othi “UkuPhilisa.”

Ukuba ubani uthi—

‘Uyakholelwa na ekuthetheni ngeelwimi?’

Usenokuphendula uthi: ‘AmaNgqina kaYehova ayathetha ngeelwimi ezininzi, kodwa asibandakanyeki ekuthetheni ngendlela ebonakalisa imincili ‘ngeelwimi ezingaziwayo.’ Kodwa mhlawumbi makhe ndikubuze ndithi, Ngaba uyakholelwa ukuba ‘ukuthetha ngeelwimi’ okwenziwayo namhlanje kuyafana noko kwakuqheliselwa ngamaKristu enkulungwane yokuqala?’ Mhlawumbi usenokongeza uthi: ‘Nazi iingongoma ezithile ongazithelekisa nendizifumene zibangel’ umdla gqitha. (Mhlawumbi ungasebenzisa umbandela okwiphepha 180.)’

Okanye unokuthi: ‘Siyakholelwa ukuba amaKristu enkulungwane yokuqala ‘ayethetha ngeelwimi’ ibe oku kwanelisa iintswelo ezithile emva apho. Uyazazi na ukuba zaziyintoni na ezo ntswelo?’ Mhlawumbi usenokongeza uthi: (1) ‘Oko kwaba ngumqondiso wokuba uThixo wayengakholiswa yinkqubo yamaYuda ibe wayekholiswa libandla lamaKristu elalisandul’ ukusekwa. (Heb. 2:2-4)’ (2) ‘Le yayiyindlela eluncedo yokusasaza iindaba ezilungileyo ngomlinganiselo wezizwe ngezizwe nangexesha elifutshane. (Ize. 1:8)’