Ngaba Ukuthetha Ngeelwimi Kuvela KuThixo?
UDEVON uthi, “andiyazi ukuba yenzeka njani le nto. Xa ndisecaweni ndisoloko ndibona abanye abantu bebonakala ngathi bafumana umoya oyingcwele baze bathethe ngeelwimi. Abanye babo baziphethe kakubi. Mna ndizama ukuphila ngemithetho yeBhayibhile kodwa enoba ndithandaza kangakanani na, andide ndisifumane esi sipho somoya. Yenzeka njani le nto?”
NoGabriel ungena kwicawa enamarhamente abonakala engenwa ngumoya oyingcwele aze athethe ngeelwimi. Uthi: “Into endikhathazayo kukuba xa ndithandaza abantu bayandiphazamisa ngokungxola bethetha into engavakaliyo, phofu nabo abangayaziyo. Nale nto bayithethayo ayincedi nganto. Ngaba asifanele sibe nenjongo ethile isiphiwo somoya kaThixo?”
UDevon noGabriel basenza sicinge ngombuzo obalulekileyo nothi, Ngaba ukuthetha ngeelwimi okwenziwa kwezinye zecawa zanamhlanje kuvela kuThixo? Into eya kusinceda sikwazi ukuphendula lo mbuzo kukuhlola isiphiwo sokuthetha ngeelwimi samaKristu enkulungwane yokuqala.
“Baqalisa Ukuthetha Ngeelwimi Ezahlukileyo”
EBhayibhileni sifunda ukuba amadoda nabafazi abathile banikwa amandla baza bathetha ngeelwimi ababengazifundanga. Le nto yenzeka okokuqala ngePentekoste yowama-33 C.E. emva kweveki ezimbalwa efile uYesu Kristu. Ngaloo mini abafundi bakaYesu abali-120 ababeseYerusalem ‘bazaliswa ngumoya oyingcwele baza baqala ukuthetha ngeelwimi ezahlukileyo.’ Abantu ababevela kwamanye amazwe ‘bamangaliswa, ngenxa yokuba ngamnye wabeva bethetha ngolwimi lwakhe.’—IZenzo 1:15; 2:1-6.
IBhayibhile ithetha nangabanye abalandeli bakaYesu ababekwazi ukuthetha ngeelwimi. Ngokomzekelo, umpostile uPawulos wancedwa ngumoya oyingcwele ukuze akwazi ukuthetha iilwimi ezininzi. (IZenzo 19:6; 1 Korinte 12:10, 28; 14:18) Kodwa ke kufanele kubekho isizathu sokunika umntu eso siphiwo somoya oyingcwele kaThixo. Ngoko ke yayiyintoni injongo yokuthetha ngeelwimi ngamaxesha okubhalwa kweBhayibhile?
Uphawu Lokuxhaswa NguThixo
Xa wayebhalela amaKristu aseKorinte ekwakukho kuwo awayekwazi ukuthetha ngeelwimi, uPawulos wachaza ukuba “iilwimi zingumqondiso. . .kwabangakholwayo.” (1 Korinte 14:22) Ngenxa yoko, ukuthetha ngeelwimi kunye nezinye iziphiwo zomoya kwakubonisa abantu baloo maxesha ukuba ibandla lamaKristu elitsha lalixhaswa nguThixo. Esi siphiwo sasingumqondiso wokwalathisa abantu abafuna inyaniso kubantu abakhethwe nguThixo.
Ngenxa yoko iBhayibhile ayitsho ukuba uYesu okanye abaprofeti ababephila ngaphambi kokusekwa kwebandla lamaKristu babekwazi ukuthetha ngeelwimi ababengazifundanga. Kucacile ke ngoko ukuba isiphiwo seelwimi esanikwa abafundi bakaYesu sasenzelwe injongo ethile.
Isixhobo Sokusasaza Iindaba Ezilungileyo
Xa wayeqalisa ukushumayela, uYesu wathuma abafundi bakhe ukuba bashumayele iindaba ezilungileyo zoBukumkani bukaThixo kumaYuda kuphela. (Mateyu 10:6; 15:24) Ngenxa yoko abafundi babengafane bashumayele kwimimandla engeyoyamaYuda. Kodwa loo nto yayiza kutshintsha kungekudala.
Emva nje kokuvuswa kwakhe ngowama-33 C.E., uYesu wayalela abafundi bakhe ukuba ‘benze abafundi abantu beentlanga zonke.’ Kwakhona, waxelela abalandeli bakhe ukuba babeza kuba ngamangqina akhe “nakwezona nxalenye zikude zomhlaba.” (Mateyu 28:19; IZenzo 1:8) Kwakuza kufuneka abafundi bangazi nje isiHebhere kuphela kodwa kwanezinye iilwimi ukuze bakwazi ukusasaza iindaba ezilungileyo ngaloo mkhamo.
Noko ke, abaninzi kwabo bafundi “babengabantu abangenamfundo nabaqhelekileyo.” (IZenzo 4:13) Babeza kukwazi njani ukushumayela kumazwe akude ekwakuthethwa kuwo iilwimi ababengazanga bakha baziva ngaphambili? Umoya oyingcwele wanceda abanye babo bashumayeli ukuze bakwazi ukuthetha ezo lwimi.
Ngoko ke isiphiwo sokuthetha ngeelwimi safeza iinjongo ezimbini ezibalulekileyo. Okokuqala, sasingumqondiso wokuba elo bandla lalixhaswa nguThixo. Okwesibini, sanceda amaKristu enkulungwane yokuqala ukuze akwazi ukushumayela kubantu beelwimi ezahlukeneyo. Ngaba ukuthetha ngeelwimi okwenziwa ezicaweni namhlanje kufeza ezi njongo zimbini?
Ngaba Ukuthetha Ngeelwimi Kwanamhlanje Kungumqondiso Wokuxhaswa NguThixo?
Ubuya kulubeka phi uphawu lwento yokunceda abona bantu baninzi kwindawo ohlala kuyo? Ngaba ubuya kulubeka ngaphakathi kwesakhiwo esithile esincinane? Ngokuqinisekileyo ubungenakuyenza loo nto. IBhayibhile ithi ngePentekoste “inkitha” yabantu yalubona uphawu olwabonakaliswa ngokuthetha kwabafundi ngeelwimi. Ngenxa yoko “kongezelelwa imiphefumlo emalunga namawaka amathathu” kwibandla lamaKristu. (IZenzo 2:5, 6, 41) Ukuba abantu abathi bathetha ngeelwimi namhlanje bathetha bevalelene ezicaweni, loo nto iya kuba lulo njani uphawu kwinkitha yabangakholwayo?
ILizwi likaThixo lithi uhenyuzo neminye “imisebenzi yenyama” iyakuphazamisa ukusebenza komoya oyingcwele lize lithi “abo baqhelisela izinto ezinjalo abayi kubudla ilifa ubukumkani bukaThixo.” (Galati 5:17-21) Ukuba ubunokubona abantu abangaziphathanga kakuhle bethetha ngeelwimi ubunokuzibuza ukuba, ‘Ngaba akuphosakalanga ukuthululwa komoya oyingcwele kubantu abaphila ngendlela egatywa liLizwi likaThixo?’ Loo nto ibiya kufana nophawu lwendlela olulahlekisa iimoto.
Ngaba Ukuthetha Ngeelwimi Kwanamhlanje Kusisixhobo Sokusasaza Iindaba Ezilungileyo?
Kuthekani ngenye injongo yesiphiwo sokuthetha ngeelwimi ngenkulungwane yokuqala? Ngaba ukuthetha ngeelwimi okwenziwa ezicaweni namhlanje kunceda ekushumayeleni iindaba ezilungileyo kubantu bezinye iilwimi? Ukhumbule ukuba abantu ababeseYerusalem ngomhla wePentekoste yowama-33 C.E. babevela kumazwe amaninzi yaye babeziva iilwimi ezazithethwa ngabafundi. Kodwa ke abantu abathetha ngeelwimi namhlanje badla ngokuthetha into engavakaliyo.
Kucacile ke ngoko ukuba ukuthetha ngeelwimi kwanamhlanje kwahlukile koko umoya oyingcwele wakunika abafundi bakaYesu bokuqala. Enyanisweni ayikho into enokuthenjwa ebonisa ukuba kukho nabani na owafumana eso siphiwo somoya emva kokufa kwabapostile. Le nto ayibamangalisi abafundi beBhayibhile. Umpostile UPawulos waprofeta ngeziphiwo zemimangaliso kuquka nokuthetha ngeelwimi, esithi: “Ziya kuphela.” (1 Korinte 13:8) Ubonakala njani ke ngoko umntu onomoya oyingcwele namhlanje?
Ngoobani Abanobungqina Bokuxhaswa Ngumoya Oyingcwele?
UYesu wayesazi ukuba isiphiwo sokuthetha ngeelwimi sasiza kuphela kungekudala emva kokusekwa kwebandla lamaKristu. Ngaphambi nje kokuba afe, uYesu wachaza uphawu ababeza kuhlala bebonakala ngalo abalandeli bakhe. Wathi: “Bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Enyanisweni, kwakwivesi iLizwi likaThixo elaprofeta ukuba zaziza kuphela iziphiwo zemimangaliso, lathi: “Uthando aluze lutshitshe.”—1 Korinte 13:8.
Uthando lukhankanywa kuqala xa kudweliswa ‘isiqhamo’ somoya oyingcwele kaThixo. (Galati 5:22, 23) Ngoko ke abantu abanomoya kaThixo okanye abaxhaswa nguThixo babeza kuthandana ngokusuka entliziyweni. Ukongezelela koko, inkalo yesithathu yesiqhamo somoya, luxolo. Ngenxa yoko, abantu abanomoya oyingcwele namhlanje babeza kuluthanda uxolo baze bangabi nabuhlanga okanye ubundlobongela.
Kwakhona, khumbula isiprofeto sikaYesu esibhalwe kwiZenzo 1:8. Wathi abafundi bakhe babeza kufumana amandla okuba ngamangqina akhe “nakwezona nxalenye zikude zomhlaba.” UYesu waphinda wathi lo msebenzi wawuza kuqhubeka “de kufike isiphelo sehlabathi.” (Mateyu 28:20, King James Version) Ngoko oku kushumayela umhlaba wonke kwakuza kuqhubeka kuluphawu lwabo banomoya oyingcwele.
Ucinga ntoni ke ngoko? Ngoobani ababonakala benomoya oyingcwele namhlanje? Ngoobani ababonakala benesiqhamo somoya, ingakumbi uthando noxolo, abade batshutshiswe ngoorhulumente ngenxa yokwala ukuya emfazweni? (Isaya 2:4) Ngoobani abazabalazela ukuyiphepha imisebenzi yenyama enjengohenyuzo, nabade babagxothe ebandleni abantu abenza izinto ezinjalo bengaguquki? (1 Korinte 5:11-13) Ngoobani abashumayela emhlabeni wonke iindaba ezilungileyo zokuba buBukumkani bukaThixo kuphela obunokulungisa iingxaki zoluntu?—Mateyu 24:14.
Abapapashi beli phephancwadi balikhupha litsole elokuba ngamaNgqina kaYehova abantu abanomoya oyingcwele ochazwe eBhayibhileni. Kutheni ungakhe uwahlole ukuze ubone enoba axhaswa nguThixo ngokwenene kusini na?