Ukuthetha Ngeelwimi—Uqheliselo Olwandayo
“AMANDLA athile aye alawula ulwimi lwam yaye amagama aye asuka nje ampompoza njengamanzi. Olunjani lona uvuyo okwaba lulo oko! Kwabakho imvakalelo yokuhlambuluka ngokugqithisileyo. Ukususela ngoko andizange ndiphinde ndibe ngulaa mntu ndandinguye,” wadanduluka esitsho omnye owaba namava angaqhelekanga okuthetha “ngolwimi olungaziwayo.”
Kuloo mava ufumene inkcazelo yomntu oye wanamava obuqu okuthetha “ngolwimi olungaziwayo.” Ngokufanelekileyo bambi basenokubuza oku: ‘Kodwa kuyintoni oko?’ Kuluqheliselo okanye inkolelo ethile ekhoyo kwezinye iicawa apho amadoda namabhinqa azibanga engashukunyiswa ngumoya kaThixo ukuba athethe ngeelwimi zasemzini okanye ezingaqhelekanga angazaziyo.
Olo luqheliselo olwandayo lonqulo. Njengoko ukuthetha ngeelwimi kwakha kwajongwa njengento eyenzeka ngokukodwa kumakholwa eecawa zomoya, ngoku kudlulela ngaphaya kwemida yale mvaba ekusisithethe sayo oko kuze kuquke amaBhaptizi, amaEpiscopal, amaLuthere, amaWesile, amaRhabe namaRoma Katolika. Imeko aba kuyo umntu xa esenza oku iye yachazwa njengaleyo yokungaziva, eyempambano, eyokuba sebuthongweni neyokozela. Abanye bade bayibize ngokuthi yimeko yokuba ngathi uthile unesiphoso. Kukho ulwazi olufihlakeleyo namandla athile omoya anxulunyaniswa nokuthetha ngeelwimi.
Kutheni Namhlanje Kukho Umnqweno Wesipho Seelwimi?
Kwincwadi yakhe ethi Tongues of the Spirit, uCyril G. Williams uthi “imvakalelo yokusilela kokuthile inento yokwenza nokuba nomnqweno ‘wokuthetha ngeelwimi.’” Ukuchaza njengendlela yokuzikhulula “enomlinganiselo othile wokunyanga ngokunciphisa ucinezeleko nangokuthomalalisa umlo oqhubeka ngaphakathi.” Unxunguphalo kumsebenzi wecawa, uxinzeleko olungokweemvakalelo, ukusilela kumsebenzi othile, ukuphulukana nokuthile, ucinezeleko ngenxa yemeko ethile yasekhaya okanye ukugula entsatsheni kuthiwa zizinto ezifak’ isandla ekuthetheni ukwimeko yokungaziva.
Ngokufanayo, kwiThe Psychology of Speaking in Tongues, uJohn P. Kildahl uthi “umntu kufuneka abe nexhala ukuze avelise amandla okuthetha ngeelwimi.” Ngophando lobuqu nodliwano-ndlebe olwenziwa ngenyameko, kwafunyaniswa ukuba “ngaphezu kwama-85 ekhulwini abantu abathetha ngeelwimi baye kuqala banezinto ezicacileyo ezibaxhalabisayo ngaphambi kokuba bathethe ngeelwimi.” Ngokomzekelo, omnye umama wafuna ukuthetha ngeelwimi ukuze akwazi ukuthandazela unyana wakhe owayenomhlaza. Enye indoda yaqalisa ukuthetha ngeelwimi ngexesha eyayisathandabuza ngalo enoba ikwamkele kusini na ukunyuselwa emsebenzini. Omnye umfazi waqalisa ukuthetha ngeelwimi kwiveki emva kokuba umyeni wakhe engenelele uMbutho Wokunceda Amakhoboka Otywala.
Yintoni Ubani Ayivayo?
Omnye owathetha ngeelwimi okwesihlandlo sokuqala wanikela le ngxelo: “Ndeva into etshisayo ityhutyha umzimba wonke, nengqele namathontsi amakhulu okubila, ukungcangcazela nokuphelelwa ngamandla okuthile kwiingalo nasemilenzeni yam.” Ngokufuthi ukuthetha ngeelwimi kuhambisana nenye indlela engaqhelekanga yokwenza izinto abanye abayifumanisa iphazamisa. Ngokomzekelo, “enye intombazana yaphantsa yazitsarha ngamathe njengokuba yayizolule esihlalweni, intamo yayo iyame kumva waso, izithende zayo zisemgangathweni yaye nemilenze yayo iyiqinisile.” Ebudeni bentlanganiso yelinye ibandla “enye indoda yenza uqulukubhode ukusuka kwelinye icala lecawa ukuya kwelinye.”
UNjingalwazi uWilliam J. Samarin ubhala oku: “Kwabanye abantu ukuthetha ngeelwimi kuyinto efunekayo xa ubhaptizelwe kuMoya Oyingcwele.” Ngaphandle kwako, ‘benziwa bazive bengaphelelanga ncam.’ Kukwagqalwa ‘njengokuphendulwa komthandazo, njengesiqinisekiso sokuthandwa nesokwamkelwa nguThixo.’ Abanye baye bathi kubashiya benemvakalelo yemvisiswano, uvuyo noxolo lwangaphakathi, yaye ‘benemvakalelo engakumbi yokuba namandla’ ‘nemvakalelo enamandla yokufaniswa.’
Ngaba ngokwenene ukuthetha ukwimeko yokungaziva kububungqina bokusebenza komoya oyingcwele? Ngaba amava anjalo afanisa umntu njengomKristu wokwenyaniso? Ngaba ukuthetha ngeelwimi kuyinxalenye yonqulo olwamkelekileyo namhlanje? Le mibuzo ifanelwe kukuphendulwa ngokucokisekileyo. Ngoba? Kuba sifuna unqulo lwethu lwamkeleke luze lusikelelwe nguThixo.