Kingdom News No. 36

Iwaka Leminyaka Elitsha—Ikamva Likuphathele Ntoni?

Iwaka Leminyaka Elitsha—Ngaba Lisisiqalo Sobomi Obutsha?

EZINZULWINI zobusuku ngomhla kaDisemba 31, 1999, kwakuphela inkulungwane yama-20.a Yeyona nkulungwane yakha yanesiphithiphithi. Kodwa ikwayeyona iye yavelisa ubugcisa obutsha, inkqubela ebalaseleyo kwezonyango, ukufumaneka kwenkcazelo eninzi nokukhula ngokukhawuleza kwezoqoqosho. Ngenxa yoko eli waka leminyaka litsha abaninzi baye balamkela njengomqondiso wethemba neenguqu. Ngaba kunokwenzeka ukuba kulo iphele imfazwe, ubuhlwempu, ukungcola kwemeko-bume nezifo?

Abaninzi banelo themba. Kodwa kunokwenzeka njani ukuba iwaka leminyaka elitsha lize neenguqu eziyingenelo kuwe—iinguqu eziya kwenza ubomi bukhuseleke uze unqabiseke wena nentsapho yakho? Khawuqwalasele nje olu dederhu lweengxaki ezimbalwa esijamelene nazo.

Ukungcoliswa Komoya

Amazwe ahambele phambili kwezoshishino “abangela umonakalo kwimeko-bume yehlabathi lonke nokusasazeka kokungcola nokuphazanyiswa kwezinto eziphilayo.” Ukuba olu tyekelo lukhoyo luyaqhubeka, “kuya kwanda ukuxinezeleka kwemeko-bume yendalo.”—“Global Environment Outlook—2000,” United Nations Environment Programme.

Ukugula

“Ngonyaka wama-2020, kulindeleke ukuba izifo ezingosuleliyo zibulale abantu abasixhenxe kwabalishumi kumazwe asakhasayo, xa kuthelekiswa nabo bangaphantsi kwesiqingatha namhlanje.”—“The Global Burden of Disease,” Harvard University Press, 1996.

Zimbi iingcali zithi “ngonyaka wama-2010, abantu abazizigidi ezingama-66 kumazwe angama-23 baya kube bebulewe ngubhubhani [uGawulayo].”—“Confronting AIDS: Evidence From the Developing World,” a report of the European Commission and the World Bank.

Ubuhlwempu

“Phantse babe sisi-1,3 sewaka lezigidi abantu abaphila ngemali engaphantsi kwedola [R6] ngemini, yaye baphantse babe liwaka lezigidi abangenako ukuzifikelela iintswelo zabo ezisisiseko.”—“Human Development Report 1999,” United Nations Development Programme.

Imfazwe

“Ugonyamelo [olukumazwe ahlukahlukeneyo] alunakulinganiswa nanto. Lubangelwa [yiyantlukwano] yobuhlanga, yobuzwe neyonqulo, . . . ugonyamelo olunjalo luya kubangela . . . olona ngquzulwano luxhaphakileyo kwikota yale nkulungwane elandelayo . . . , luze lubulale amakhulu amawaka abantu nyaka ngamnye.”—“New World Coming: American Security in the 21st Century,” U.S. Commission on National Security/21st Century.

Ngoko ke ukubhiyoza nokuba nemihlali ngenxa yewaka leminyaka elitsha kukusibetha ngoyaba isibakala sokuba ukungcola, ukugula, ubuhlwempu nemfazwe zisisisongelo ngeyona ndlela kunanini ngaphambili. Oyena nobangela uphambili wezi ngxaki kukubawa, ukungathembani nokuzingca—imikhwa engenakupheliswa nje lula luphando lwenzululwazi, ubugcisa, okanye ezobupolitika.

Iwaka Leminyaka Eliya Kuzisa Iintsikelelo Kuluntu

OMNYE umbhali wamandulo wakha wathi: “Ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yeremiya 10:23) Umntu akaswelanga amandla nje kuphela kodwa akanalo kwanelungelo lokulawula umhlaba. NguMenzi wethu, uYehova uThixo kuphela onelungelo noyaziyo indlela yokucombulula iingxaki zoluntu.—Roma 11:33-36; ISityhilelo 4:11.

Kodwa kuya kwenzeka nini oko? Njani? Kukho ubungqina obeyisayo bokuba sikufuphi kwisiphelo ‘semihla yokugqibela.’ Nceda uvule iBhayibhile yakho, uze ufunde eyesi-2 kuTimoti 3:1-5. Ichaza ngokucacileyo isimo sengqondo esasiya kuboniswa ngabantu ebudeni bala “maxesha amanqam.” UMateyu 24:3-14 noLuka 21:10, 11 bakwachaza “ngemihla yokugqibela.” Apho kugxininiswa kwiziganeko zokoqobo eziye zenzeka ukususela ngowe-1914, ezinjengemfazwe yehlabathi lonke, izifo, ukunqongophala kokutya okwande ngokubanzi.

Isiphelo ‘semihla yokugqibela’ sisemnyango. UDaniyeli 2:44 uthi: “UThixo wezulu uya kumisa ubukumkani obungenakuze bonakaliswe. . . . Buya kuzityumza buziphelise zonke ezi zikumkani [zomhlaba], buze bona bume ukusa kwixesha elingenammiselo.” Ngoko ke kwaxelwa kwangaphambili ukuba uThixo uya kumisa uBukumkani, okanye urhulumente, oza kulawula lo mhlaba. Ngokutsho kweSityhilelo 20:4, lo rhulumente ulawula kangangeminyaka eliwaka! Khawuqwalasele nje ezinye zeendlela ezimbalwa eziya kuphucuka ngayo iimeko zokuhlala koluntu ebudeni belo Waka Leminyaka lizukileyo:

Ezoqoqosho. “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye.”—Isaya 65:21, 22.

Impilo. “Ngelo xesha aya kuvulwa amehlo eemfama, zivulwe neendlebe zezithulu. Isiqhwala siya kutsiba njengexhama, nolwimi lwesimumu luya kumemelela ngochulumanco.” “Akakho ummi wakhona oya kuthi: ‘Ndiyagula.’”—Isaya 33:24; 35:5, 6.

Imeko-bume. UThixo uya ‘kubonakalisa abo bawonakalisayo umhlaba.’—ISityhilelo 11:18.

Ulwalamano Lwabantu. “Aziyi kwenzakalisa okanye zonakalise entabeni yam yonke engcwele; ngenxa yokuba umhlaba ngokuqinisekileyo uya kuzaliswa kukwazi uYehova.”—Isaya 11:9.

Izigidi zabantu zinokholo kula madinga eBhayibhile yaye ngaloo ndlela ziye zazuza ithemba elihle, imbono eyakhayo ngekamva. Ngenxa yoko, ziyakwazi ukumelana neengcinezelo kwaneengxaki zobu bomi. IBhayibhile inokuba sisikhokelo njani kubomi bakho?

Ulwazi Olukhokelela Ebomini!

MAXA wambi inzululwazi nobugcisa zinokubenza abantu bathabatheke ngokunzulu! Sekunjalo, ulwazi lomntu alukhange lwenze ubomi bunqabiseke yaye bube bobonwabisayo kwinkoliso yabantu. Ekuphela kolwazi olunokufeza oku luchazwe eBhayibhileni kuYohane 17:3, apho kuthiwa: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”

Olo lwazi lufumaneka kumaphepha eBhayibhile. Nakuba bebaninzi abavakalisa iimbono ezinzulu ngokuphathelele loo ncwadi ingcwele, bambalwa kubo abakhe bazihlolela yona. Kuthekani ngawe? Kuyavunywa ukuba, ukufunda iBhayibhile kufuna umgudu ophawulekayo. Kodwa kuwufanele loo mgudu. IBhayibhile kuphela kwencwadi ‘ephefumlelwe nguThixo neyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni.’—2 Timoti 3:16.

Ngoko ke, unokuqalisa njani ukuziqhelanisa neBhayibhile? Kutheni ungamkeli uncedo lwamaNgqina kaYehova? Afundisa izigidi zabantu kumakhaya abo ngesisa. Ukuze akuncede kule nkalo, asebenzisa iimpapasho ezahlukahlukeneyo ezisekelwe eBhayibhileni, ezinjengencwadana enemifanekiso ethi Yintoni UThixo Ayifunayo Kuthi? Inikela iimpendulo ezimfutshane kwimibuzo emininzi ekusenokwenzeka ukuba unayo ngokuphathelele iBhayibhile, njengethi: Ngubani uThixo? Yintoni injongo kaThixo ngomhlaba? Buyintoni uBukumkani bukaThixo? IBhayibhile inokubuphucula njani ubomi bentsapho yakho?

Ukuba ungathanda ukuba elinye lamaNgqina kaYehova likutyelele ekhayeni lakho, nceda uzalise eli phetshana lingezantsi. Aya kukuvuyela ukukunika inkcazelo engakumbi ngokuphathelele uLawulo LoBukumkani BukaThixo Lwewaka Leminyaka elizukileyo!

□ Ndifuna incwadana enemifanekiso ethi Yintoni UThixo Ayifunayo Kuthi? Chaza ulwimi olufunayo

□ Ncedani niqhagamshelane nam ngokuphathelele isifundo seBhayibhile sekhaya sesisa

[Umbhalo osemazantsi]