Amazwe Ekuthethwa Ngawo EBhayibhileni
NJENGOKO uSirayeli wayelungiselela ukungena kwiLizwe Lesithembiso, uMoses wachazela uThixo ngomnqweno wakhe onzulu esithi: “Nceda undivumele ndiwele, ndilibone ilizwe elo lihle, liphesheya kweYordan, loo mmandla mhle weentaba.”—Dut 3:25.
UMoses akazange avunyelwe ukuba awele, kodwa wayinyuka intaba emelene neYeriko waza walibona elo lizwe—‘ukususela eGiliyadi ukusa kwaDan, nelizwe lakwaYuda ukusa kulwandle lwasentshona, neNegebhi nentlambo yaseYordan.’ (Dut 3:27; 34:1-4) Ngaba wakha weva ngaloo mazwe? Ngaba uyawazi apho akhoyo?
Kule mihla bambalwa abantu bakaYehova abakwaziyo ukutyelela amazwe amaninzi abafunda ngawo eBhayibhileni. Abakwazi ukwenza oko uThixo wayalela uAbraham ukuba akwenze, esithi makalihambahambe ngobude nangobubanzi balo iLizwe Lesithembiso. (Gen 13:14-17) Sekunjalo, amaKristu okwenyaniso anomdla wokwazi ngeendawo ekuthethwa ngazo eBhayibhileni nangendlela ezihlobene ngayo.
Le mpapasho ithi ‘Khawubone Eli Lizwe Lihle,’ inokukunceda uziqonde ngakumbi iZibhalo. Inemifanekiso yeendawo ezikhoyo, njengeGiliyadi, eboniswe kuqweqwe lwayo. Iimaphu ezikuyo zinikela inkcazelo engakumbi, enokukunceda uzazi ngakumbi iindawo ekuthethwa ngazo eBhayibhileni.
Imaphu ekwiphepha 2 nelesi-3 ibonisa amazwe okanye imimandla emikhulu. Ngokomzekelo, xa ubona umgama eyayimi kuwo iAsiriya neYiputa ukusuka kwiLizwe Lesithembiso, unokuziqonda ngakumbi iziprofeto ezithetha ngaloo mazwe. (Isa 7:18; 27:13; Hos 11:11; Mik 7:12) Iindlela zamandulo zazidibana kwesi siqwengana somhlaba sibizwa ngokuba liLizwe Lesithembiso, yaye ezinye iintlanga zazifuna ukuthimba amasimi alo achumileyo engqolowa, aweediliya, naweminquma.—Dut 8:8; ABa 15.5.
Mhlawumbi usengathanda nokuthelekisa iimaphu. Ngokomzekelo, uYona wathunywa kwikomkhulu lama-Asiriya, iNineve, kodwa yena waya eTarshishe. (Yon 1:1-3) Ngaba uyazibona ezi ndawo kulaa maphu isekuqaleni? Kodwa ungabhidanisi iTarshishe neTarso, ndawo leyo awazalelwa kuyo umpostile uPawulos. ITarso kunye nezinye izixeko ezidumileyo zikho kule maphu.
Khawuthelekelele ubude bomgama nendlela eyathatyathwa nguAbraham kuhambo lwakhe njengoko ujonge iUre, iHaran neYerusalem. Emva kokuba uYehova ethe makanduluke eUre, waya kuhlala kwelakwaHaran, ukusuka apho waya kwiLizwe Lesithembiso. (Gen 11:28–12:1; IZe 7:2-5) Uya kuluqonda nangakumbi uhambo luka-Abraham xa ufundisisa umxholo othi “Amazwe Oosolusapho,” kwiphepha 6-7.
Imaphu esekuqaleni kwakunye nale ilapha azisekelwanga kwiziganeko zexesha elithile. Kodwa zonke ezinye ezilandelayo, zisekelwe kwiziganeko zembali ngokokulandelelana kwazo. Izixeko okanye iinkcukacha ezikwezo maphu zihlobene neziganeko zexesha elithile. Nangona iSalathisi (esikwiphepha 34-5) singenazo zonke iindawo eziboniswe kwezi maphu, sinokukunceda ubone imaphu eneenkcukacha zombandela ophanda ngawo.
Imaphu esembindini (kwiphepha 18-19) inezona dolophu nezixeko ezininzi zeLizwe Lesithembiso. Isicangca Semaphu siya kukunceda ubone iindawo ezazikuzo izixeko zabaLevi nezixeko ezithandathu zokusabela, yaye siya kukunceda wazi enoba indawo ebonisiweyo emaphini ikhankanywe kwiZibhalo zesiHebhere, kwiZibhalo zesiGrike, okanye kuzo zozibini.
Okwangoku ayaziwa eyona ndawo yayikuyo eminye imimandla ekuthethwa ngayo eBhayibhileni, ngenxa yoko uninzi lwayo aluboniswanga kwimaphu esembindini. Phofu ke, besingenakukwazi kakade ukufaka kuyo zonke izixeko needolophu, njengazo zonke ezo zikuludwe lwemida yezizwe ezahlukahlukeneyo. (Yos, isahl. 15-19) Noko ke, le maphu ibonisa izixeko ezikufuphi, nto leyo enceda ukwazi ukuqikelela indawo ezazikuyo. Iindawo ezithile (ezinjengeentaba, imilambo, neentlambo) ziphawuliwe, ibe zona iindawo ezinemixawuka ziboniswe ngemibalabala. Ezi nkcukacha zinokukunceda ube nomfanekiso-ngqondweni ocacileyo weziganeko ezichazwe eBhayibhileni.
Inkcazelo engakumbi ngeendawo ekuthethwa ngazo eBhayibhileni ifumaneka kwintyilalwazi i-Insight on the Scriptures, ekho ngeelwimi ezininzi.a Xa usebenzisa le ntyilalwazi nolunye uncwadi lweBhayibhile, le ncwadana inemifanekiso ithi ‘Khawubone Eli Lizwe Lihle’ mayibe kufutshane nawe. Yisebenzise ngalo lonke ixesha ufundisisa iZibhalo, eziyingenelo kakhulu kuwe.—2Ti 3:16, 17.
[Umbhalo osemazantsi]
a Ipapashwe ngamaNgqina kaYehova.
[Ibhokisi ekwiphepha 5]
IINCWADI ZEBHAYIBHILE ZABHALELWA
EBhabhiloni
EKesareya
EKorinte
EYiputa
E-Efese
EYerusalem
EMakedoni
KwaMowabhi
EPatmos
KwiLizwe Lesithembiso
ERoma
EShushan
[Imaphu ekwiphepha 4, 5]
(Ukuba ufuna inkcazelo ehlahlelwe kakuhle, yiya kwimpapasho)
Amazwe AseBhayibhileni Nezixeko Ezizintloko
A1 I-ITALI
A2 IROMA
A3 ISISILI
A3 IMALTAISISILI
C2 IMAKEDONIYA
C2 IFilipi
C2 IGRISI
C3 IATHENE
C3 IKorinte
C3 IKRETE
C4 ILIBHIYA
D3 Kwa-Antiyokwe (ePisidiya)
D3 IEfese
D3 IPATMOS
D3 IRODO
D4 IMEMFIS
D5 IYIPUTA
E2 IASIA MINOR
E3 ITarso
E3 Kwa-Antiyokwe (eSiriya)
E3 ISIPRO
E4 ISidon
E4 IDamasko
E4 ITire
E4 IKesareya
E4 ILIZWE LESITHEMBISO
E4 IYERUSALEM
E4 KWAMOWABHI
E4 IKadeshe
E4 KWAEDOM
F3 Umyezo Wase-Eden?
F3 IASIRIYA
F3 IHaran
F3 ISIRIYA
F5 IARABHIYA
G3 ININEVE
G4 IBHABHILONI
G4 IKHALEDI
G4 IShushan
G4 IUre
H3 IMEDI
[Iintaba]
E5 INtaba ISinayi
G2 IINTABA ZEARARATI
[Amanzi]
C3 Ulwandle LweMeditera (Ulwandle Olukhulu)
E1 Ulwandle Olumnyama
E5 Ulwandle Olubomvu
H2 Ulwandle LweCaspian
H5 IPersian Gulf
[Imilambo]
D5 Umlambo UmNayile
F3 Umlambo UmEfrate
G3 Umlambo ITigrisi