Abavakalisi BoBukumkani Bayabalisa
“Yibani Ngcwele”
ULWALATHISO uThixo alunika amaKristu lukukuba “ningamilisi okweenkanuko zangaphambili ekungazini kwenu; nithi ke, ngokokwalowo ungcwele wanibizayo, nibe ngcwele nani ngokwenu kuyo yonke ihambo. Ngenxa enokuba kubhaliwe kwathiwa, Yibani ngcwele, ngokuba ndingcwele mna.” (1 Petros 1:14-16) Ihambo engcwele ngolo hlobo idla ngokuba bubungqina obuhle kwabanye. (1 Petros 2:12) Emhlabeni jikelele, njengokuba amava alandelayo ebonisa, abantu abanyanisekileyo benza iinguqulelo ezifunekayo ukuze bavisisanise ihambo yabo nesi siluleko.
◻ E-Ecuador enye indoda yakuyeka ukufundisisa iBhayibhile xa iNgqina elalifundisisa nayo lathi lasuswa kubudlelane ngenxa yokuziphatha okubi. Ukulamba kwayo ngokomoya kwayikhokelela ekubeni iye kuphanda kwezinye iinkonzo. Yazimanyanisa nonqulo lwama Evangelist yaza yenza inkqubela ukusa kwinqanaba lokuba ibe ngumfundisi kwicawa eyayikuyo. Noko ke, isazela sayo sayikhathaza, njengoko umfazi eyayihlala naye yayingatshatanga naye. Xa yathi yadibana nabefundisi bezinye iicawa, bayiqinisekisa ukuba oku kwakungeyongxaki. Noko ke, yaba noluvo lokuba oku kwakungalungile, kanye njengokuba iNgqina elalifundisisa nayo lathi lashenxiswa kubudlelane ngenxa yokuziphatha okubi. Ayizange isiqonde isizathu sokuba ingohlwaywa yicawa yayo. Kamva, umfazi eyayihlalisana naye wadibana namaNgqina kaYehova waza waqallsa ukufundisisa nawo. Le ndoda yaqalisa ukumthelela kwisifundo. Ngoku bobabini bayaya kwiintlanganiso, benza inkqubela ekwazini imigaqo yeBhayibhIle, ibe bathabatha amanyathelo okuba batshate khon’ ukuze bamkhonze uYehova ngendlela ecocekileyo neyamkelekileyo.
◻ Kwamanye amava avela e-Ecuador, elinye iNgqina libalisa Oku: “NgoFebruwari 1984, elinye inenekazi esele liliqina lasicela ukuba sifundisise nalo.” Yintoni eyalishukumisela ukuba lenze esi sicelo? Umnakwabo weli nenekazi wathi waba ngomnye wamaNgqina kaYehova, ibe lona lalichukunyiswe gqitha yihambo yakhe entle. Kwisihlandlo sesibini kufundisiswa iBhayibhile, kwachatshazelwa umbandela ongokutshaya, owawuyenye yeengxaki zeli nenekazi. Phofu ke, kwisifundo esilandelayo kwiveki kamva lineqhayiya lavakalisa ukuba ukususela ekubeni lathi layiqonda imbono yeBhayibhile ngokutshaya alizange liwuchukumise umdiza! Lalinenye ingxaki—indlu yalo yayizaliswe yimlfanekiso yonqulo. Kodwa ngenxa yokufunda iDuteronomi 7:26, ethi: “Uze ungalingenisi isikizi endlwini yakho . . . yinto yokusingelwa phantsi,” laqalisa ukuyitshisa yonke.
Ukususela ngelo xesha ukuya phambili, laqalisa ukuya kwiintlanganiso ibe alizange liphoswe nayenye ukususela ngoko. Ngokukhawuleza emva koko, lakwazi ukoyisa owona mqobo wawunzima kulo—lakuyeka ukuziphatha kakubi nenye indoda etshatileyo. Ngoku, okwesihlandlo sokuqala kubomi bale, lakwazi ukufumana ulonwabo lokwenyaniso, njengokuba ngoku lalikwazi ukukhonza uYehova ngesazela esicocekileyo. Labhaptizwa ngoAprili 1985 ibe ngelo xesha laliqhuba izifundo zeBhayibhile ezine nabanye. Usukelo lwalo olulandelayo lukukuba nguvulindlela, njengokuba linoluvo lokuba le iyeyona ndlela elungileyo elinokubonakalisa ngayo umbulelo walo kuYehova, oye walikhulula ‘kubungantweni nakubomi bokuziphatha okubi.’
◻ Imiphumo emihle yehambo yokuhlonel’ uThixo yabonwa kwisikolo samantombazana ahlala ngaphakathi eKenya, apho yathi ihambo entle yeNgqina yaphawulwa ngendlela ebalaseleyo. Kweso sikolo kwaqeshwa abafundisi-ntsapho abangamadoda asithoba, kuquka nomnye oliNgqina likaYehova. Kodwa kwafuneka ukuba bagxothwe ngabanye ngabanye ngenxa yokuziphatha okubi ngokwesini ababekuqhuba nabafundi. Emva kwethuba elithile, mnye kuphela owayesele kweso sithoba—umfundisi-ntsapho owayengomnye wamaNgqina kaYehova!
Eneneni, kunokwenzeka ngabantu abaye baphila ubomi bokuziphatha okubi ukuba baguquke. Xa sisiba ‘ngcwele kwiihambo zethu,’ asinikeli nje kuphela ubungqina obuhle kwabanye kodwa sikwavuyisa intliziyo kaYehova. Ngaloo ndlela, sizenza sifanelekele ukufumana ubomi obungunaphakade.—IMizekeliso 27:11.
[Ibhokisi ekwiphepha 21]
“Ngokuba ndinguYehova uThixo wenu, ze nizingcwalise nibe ngcwele; ngokuba ndiyiNgcwele.”—Levitikus 11:44.
[Ibhokisi ekwiphepha 21]
“Masizihlambulule kuko konke ukudyobheka kwenyama nokomoya.’—2 Korinte 7:1.