“Izinto Ezibubuncwane Belizwe Elingcwele” — IWatchtower LAYBRARI EKWI-INTANETHI

“Izinto Ezibubuncwane Belizwe Elingcwele”

IMANHATTAN exakekileyo iyindawo engaqhelekanga enengqokelela yezinto ezenziwe ngobugcisa ezithi ziqinisekise imbali yeBhayibhile. Kanti, kwiCentral Park yesiXeko saseNew York kukho imuziyam ebizwa ngokuba yiThe Metropolitan Museum of Art, ekuthe kutshanje kwenziwa kuyo umboniso othi “Izinto Ezibubuncwane Belizwe Elingcwele: Izinto Ezenziwe Ngobugcisa Zamandulo Ezivela KwiMuziyam YakwaSirayeli.” Kulo mboniso kwakukho izinto eziphantse zibe ngama-200 ezazibolekwe kwiMuziyam yakwaSirayeli eYerusalem.

Abemi bamandulo belizwe ekuthethwe ngalo eBhayibhileni babalisa ibali labo ngezi zinto zobugcisa. Khawuze, sikhangele, siphulaphule size sifunde. Noko ke, kuqala, umele unyuke ngezinyuko ezingama-28 ezikukhokelela kumnyango weMetropolitan Museum oxhaswe ngeentsika. Wakuba ungaphakathi, unokuqalisa ukhenketho ubona izinto zembali yeBhayibhile ezinamawaka aliqela eminyaka zikho. Uya kuthi ke ubone oku kulandelayo:

Inkcazelo kaHabhakuki—ngumsongo wephepha elenziwe ngesikhumba sebhokhwe okanye segusha obude buphantse bube yi-1,5 yeemitha, apho igama likaThixo libonakala izihlandlo eziliqela. Lo msongo ungomnye weMisongo Yolwandle Olufileyo eyathi yafunyanywa kuqala yaza yalondolozwa kakuhle, neye yabizwa ngokuba “yeyona nto ibalulekileyo yakha yafunyanwa kule nkulungwane ngabembl bezinto zakudala.” (Le misongo inamacandelo azo zonke iincwadi zeZibhalo zesiHebhere ngaphandle koEstere yaye yavela ngexesha lenkulungwane yesibini Ngaphambi kweXesha Eliqhelekileyo. Ngaloo ndlela, ngaphandle kwamaqhekeza emibhalo-ngqangi, le misongo yabakho kwithuba leminyaka eliwaka ngaphambi kokubakho kweyona mibhalo yaziwa ngobudala yeBhayibhile.) Inkcazelo kaHabhakuki equlethe phantse isibini kwisithathu sencwadi kaHabhakuki (1:4-2:20), yakhutshelwa esiteneni ngokubhalwa ngolwimi lwesiAramiki ekupheleni kwenkulungwane yokuqala Ngaphambi kweXesha Eliqhelekileyo, yaza yadityaniswa nenkcazelo yencwadi iphela. Iqweqwe lenkcazelo lasemuziyam lithi, “Kodwa oonobumba abane begama likaYehova, itetragrammaton, babhalwe kuyo yonk’ indawo ngombhalo wamandulo wesiHebhere.” Ewe, unokuyibona ngokucacileyo iTetragrammaton!

Iqhekeza lezitya zodongwe elibizwa ngokuba yi-“House of God” kulapho igama likaThixo libonakala kabini likuhlobo lweTetragrammaton. Eli qhekeza lezitya zodongwe elafunyanwa emazantsi akwaSirayeli laliyileta eyayibhalelwe indoda egama linguEliyashibhi kwisiqingatha sesibini senkulungwane yesixhenxe Ngaphambi kweXesha Eliqhelekileyo. Le leta iqalisa ngokuthi, “Kwinkosi yam uEliyashibhi: Wanga uYehova angakunika uxolo.” Iphela ngokuthi: “Ohleli endlwini kaYehova.”—Bona iphepha 12 lencwadana ethi Igama LikaThixo Eliya Kuhlala Likho Ngonaphakade, eyapapashwa yiWatchtower Bible and Tract Society of New York, Inc.

Umbhalo othi Pontiyo Pilato—luxwebhu olukhethekileyo lwembali olwabakho ngenkuiungwane yokuqala, lona lwafunyanwa eKesareya. Ngaphambi kowe-1961 uPontiyo Pilato wayekhankanywe eBhayibhileni nakwimibhalo yenkulungwane yokuqala yababhali abangamaRoma namaYuda kuphela. Noko ke, ngoku unokubona umbhalo wesiLatini onamagama angasabonakali kakuhle othi “UPontiyo Pilato UMphathi welakwaYuda” okwisitena esenziwe ngelitye lekalika. Oku kuqinisekisa ubukho bendoda eyagunyazisa ukubulawa kukaYesu Kristu.

Umbhalo othi “Indawo Yokuvuthel’ Ixilongo”—lo mbhalo wawukhe wayinxalenye yodonga olusemzantsi-ntshona olwalubiyele itempile eYerusalem. Xa itempile yatshatyalaliswayo ngowama-70 C.E., eli ceba lelitye lawela esitratweni ngezantsi. Amazwi athi “kwindawo yokuvuthel’ ixilongo” abhalwe ngesiHebhere kweli litye lithande ukuba buxande, nelibude buyimitha enye yaye abhekisela kwindawo ekwakusima kuyo umbethi-xilongo, mhlawumbi xa ephawula ukuqalisa nokuphela kweSabatha ngesandi sexilongo. Lo mbhalo kuphela kwento ebalulekileyo eyathi yasala xa kwakutshatyalaliswa izakhiwo zetempile, ngaloo ndlela uqinisekisa ukuzaliseka kwesiprofeto sikaYesu esikuMateyu 24:1, 2.

Umbhalo Ongomngcwabo KaUziya, UKumkani WakwaYuda—icwecwe elincinane lelitye elinamacala alinganayo angama-30 eesentimitha lilinye nelinalo mbhalo obhalwe ngolwimi lwesiAramiki: “Apha kweziswa amathambo kaKumkani u-Uziya wakwaYuda. Musani ukuvula.” Esi silumkiso sinokubhekisela kwiqhenqa lakhe, okanye sinokubhekisela kwisalelo esasiqhelekile esinxamnye nokuvulwa kwamangcwaba. (2 Kronike 26:16-23) Eli cwecwe, elabhalwa malunga nenkulungwane yokuqala Ngaphambi kweXesha Eliqhelekileyo, lafunyanwa kufutshane neYerusalem yaye laphawula ukungcwatywa kwesibini kwamathambo alo kumkani kwiinkulungwane emva kokufa kwakhe, ekubeni kuqala wayengangcwatyelwanga kwindawo ekungcwatyelwa kuyo ookumkani beso sixeko.

Umfanekiso Oqingqiweyo Ekwakuzotywe Kuwo iimvumi—umfanekiso ongaqhelekanga owenziwe ngodongwe omalunga nama-30 eesentimitha ukuphakama noyibonisa ngokucacileyo imigidi yamaPalestina engokwesithethe yonqulo. Intsika yawo yayibonisa iimvumi ezintlanu, iyileyo ikhalisa isixhobo somculo—amacangci akhenkcezayo, iimbande, uhadi negubu. Lo mfanekiso uqingqiweyo wafunyanwa eAshdode yaye wabakho ngasekupheleni kwenkulungwane ye-11 ukuya ekuqaleni kweye-10 B.C.E.

Umfanekiso Oqingqiweyo WamaKanan—umfanekiso obunjwe ngodongwe nofana nebhokisi evulekileyo waza wahonjiswa ngemifanekiso yabantu nezilwanyana. Lo mfanekiso ukwabonisa izithixo ezinqulwa kakhulu ngamaKanan uAshera, owenziwe ngokohlobo lomthi okanye ipali engcwele, noBhahali, owenziwe ngohlobo lwethole ekumiswe phezu kwalo umqondiso ofuzisela uthixo welanga. (Eksodus 34:12-14; 2 Kumkani 23:4, 5) Umfanekiso obude buphantse bube ngama-60 eesentimitha, osenokuba wawenzelwe ukuba kubingelelwe kuwo okanye kuziswe iminikelo ethululwayo, wafunyanwa kufuphi neMegido yaye wabakho ngasekupheleni kwenkulungwane ye-10 B.C.E.—Thelekisa eyesi-2 yeziKronike 34:4.

Iimpondo Zendlovu Ezivela ESamariya—le yimifanekiso eqingqiweyo eyavela ngexesha lenkulungwane yesi-9 ukuya kweyesi-8 B.C.E. Isikhumbuza enye ‘yezindlu zeempondo zeendlovu’ ezakhiwa nguAhabhi eSamariya okanye esinye sezihombiso ‘zezingqengqelo zeempondo zeendlovu’ esasiluphawu lohlobo lobomi olonakeleyo awathi umprofeti uAmos wabugxeka. (1 Kumkani 22:39; Amos 3:15; 6:4) Ekubeni amaFeniki awayengamagcisa ayezincutshe ekuhombiseni ngeempondo zendlovu, ezinye zezi zinto zincinane awayezenza ngobuchule zihambisana nonqulo lobuhedeni lukaBhahali, mhlawumbi olwaqaliswa ngumfazi kaAhabhi owayengumFeniki, ulzebhele.

Inkoliso yezinto eziboniswayo zintle ngohlobo ezenziwe ngalo nangebala. Kodwa zimbi zazo, ezinjengemifanekiso yezithixokazi zokuziphatha okubi ngokwesini, zibonisa uqheliselo lonqulo olonakeleyo olwenziwa kwelo lizwe. Ezinye zisinceda siqonde indlela ezathi iimpembelelo zamanye amazwe zayichaphazela ngayo imeko yelo lizwe. Umboniso othi “Izinto Ezibubuncwane Belizwe Elingcwele” neminye efana nawo yongeza ekuqondeni kukabani abantu, iipolitiki, unqulo nobuchule obufumaneka kwilizwe ekuthethwe ngalo eBhayibhileni.

[Imifanekiso ekwiphepha 24, 25]

Inkcazelo KaHabhakuki

[Inkcazelo]

Shrine of the Book, Imyuziyam YakwaSirayeli, EYerusalem

Iqhekeza lezitya zodongwe ekuthiwa “House of God”

[Inkcazelo]