Ngaba Unqulo Luphembelela Ukuziphatha Okuhle?

EKUPHENDULENI lo mbuzo, izigidi beziya kuvumelana noGeorge Bernard Shaw, owabhala oku: “Unqulo lunempembelelo enamandla—lukuphela kwempembelelo yokwenene neshukumisayo ehlabathini.” Ngokwahlukileyo koko, umbhali oliNgesi uJohn Ruskin wenkulungwane ye-19, ebhala ngombandela wokunyaniseka, wavakalisa la mazwi okugxeka, “Ukunganyaniseki konqulo kusoloko kuyeyona nto imbi kuye.” Yiyiphi imbono ocinga ukuba isondele ngakumbi enyanisweni?

Njengobungqina bokuba unqulo lunempembelelo entle, uthile usenokwalatha komnye owathi waba “ngumntu oguqukileyo” xa ‘wahlulela ubomi bakhe kuYesu Kristu.’ Kungaloo ndlela elathi iphephancwadi eliphuma kwizizwe ngezizwe lachaza “inguquko” kaCharles Colson, owayebandakanyeke kubuqhophololo baseWatergate. Uthile ongomnye usenokwalatha kwabo bathi unqulo lwabo lwabasindisa kubomi bobunongogo okanye ekukhotyokisweni butywala. Kumazwe anabantu abangengomaKristu, bekusasazwa izigidi zeeBhayibhile, ngokungathandabuzekiyo eziye zanceda abantu abaninzi ukuba baphucule ubomi babo ngokokuziphatha. Ngokucacileyo, unqulo lube nempembelelo yokuziphatha kakuhle kubantu abanjalo.

Inkalo Engentle

Kwelinye icala, unqulo lukaHitler lwalungesosithintelo singako kuye. Oku kwakhokelela ekubeni abantu abanyanisekileyo babuze isizathu sokuba isibongozo esenziwa kupopu Pius XII sokusika uHitler ecaweni singazange sisiwe so. Phantsi komxholo othi, “Wakhuliswa EngumKatolika Kodwa Waphelelwa Lukholo Lutsho Ucingo Oluya Kupopu,” iCatholic Telegraph-Register yaseCincinnati, eOhio, yanikela le ngxelo, “KuPius XII kwenziwa isibongozo sokuba uReichsfuehrer Adolph Hitler asikwe ecaweni.” Ukuba eli nyathelo lalithatyathiwe, ngaba ngelaliwuchaphazele umphumo wemfazwe laza lasindisa uluntu kwintlungu enkulu? Kulusizi ukuthi, upopu akazange akwamkele oko.

Ukuhlalisana kwesibini singatshatanga kuyinto exhaphakileyo kumazwe athile amaKatolika eMzantsi Merika. Kwaye kuMntla Merika umfundisi wamaRoma Katolika wabhala oku kwinqaku lomhleli: “Ubunongogo Mabuvunyelwe Ngokusemthethweni—Sisicombululo Esingcwele.” (Philadelphia Daily News) Kwakhona khawuqwalasele iimeko kumazwe athile amaProtestanti apho ukutshintshisana ngabafazi, iintlobano zesini ngaphambi komtshato nesini ngaphandle komtshato izizinto eziqheleke kunene. Isizathu soku sisifumana siboniswe kumazwi avela kwelinye iphephandaba: “Abefundisi Basibetha Ngoyaba Isini Sangaphambi Komtshato.” Inqaku lathi: “Abefundisi baseMerika ngendlela esisono baye abakhupha nelimdaka ekushumayeleni ngesini sangaphambi komtshato . . . Boyikela ukuba baya kuphulukana namanye amarhamente abo.” (ITelegraph, yakuMntla Platte, eNebraska) Ngoko ngaba lonke unqulo luphembelela ukuziphatha okuhle?

KwiNgqobhoko, ukusilela konqulo ekubeni nempembelelo entle kucaca ngakumbi ebudeni bexesha lemfazwe. Khawuphawule oko ukucingayo ngala mazwi avakala kamnandi. Owayesakuba ngunobhala wesebe leBhunga Lomanyano lwamaBandla kaKristu eMerika, ngowe-1934 uWalter W. Van Kirk, wabhala oku: “Abashumayeli nabefundisi abangekabekwa zandla baye bema ngokuqinileyo nxamnye nemfazwe . . . Eli phulo loxolo lenziwa ziicawa libangelwa yinkolelo yokuba imfazwe ichasene ngokupheleleyo nento eyayishunyayelwa neyayiqheliselwa nguYesu.” (Religion Renounces War) Emva kokuthetha ngeecawa nangabefundisi abaliqela, le ncwadi yaqukumbela ngelithi: “Ngokuyintloko, iicawa zikucacise ngokupheleleyo ukuba azisenakujongwa njengezifak’ isandla kumsebenzi wokubulala nokwenzakalisa abantu. Abashumayeli . . . bathi bamsulwa egazini labafo babo, bayazahlukanisa noKesare.”

Phofu ke, ezo ngxelo zinika ithemba azizange zibe yinyaniso ngendlela ebangel’ usizi. Xa kwaqhambuka iMfazwe Yehlabathi II, akukho nanye yeenkonzo eziphambili zeNgqobhoko eyema ngokuqinileyo ‘ekuchaseni imfazwe.’ Ngaba icawa ekummandla wakho yenjenjalo?

Ukutyeshelwa Kwemilinganiselo Yokuziphatha Okuhle

Ekubeni uqwalasele ubungqina obuthile kumacala omabini, ubungenakuvuma na ukuba kuzo zonke ezi meko zininzi, iinkonzo ezidumileyo zehlabathi azikhange zibe yimpembelelo enamandla yokuziphatha okuhle? Iphephancwadi iLook lavakalisa oku: “Iicawa . . . azikwazanga ukunikela ukhokelo olufanelekileyo, yaye kuba zineyona mbopheleleko inkulu, ukusilela kwazo kubi gqitha.” Ithetha ngokusilela konqulo lweNgqobhoko ekuthinteleni ukuziphatha okubi ngokwesini iThe Courier-Mail yaseBrisbane, eOstreliya, yanikela la magqabaza: “Xa ooBhishophu naBefundisi . . . bebhala ngokuthi iintlobano zesini ezingaphandle komtshato zinokuba sisenzo esihle ‘esivakalisa uZuko lukaThixo,’ . . . yaye besithi uhenyuzo alunto imbi nokukrexeza akuphosakele kangako; ngoko indoda nomfazi abaqhelekileyo, yaye ingakumbi inkwenkwe nentombi abafikisa ebuntwini, bayadideka bangazi ukuba yiyiphi na into elungileyo nembi. Umphumo wako konke oku kusasazwa kokuZiphatha Okutsha ube kukutyeshelwa kwemilinganiselo yokuziphatha okuhle.”

Ngokuyintloko, iinkonzo zehlabathi aziyompembelelo yokwenene yokuziphatha okuhle. Ngokwahlukileyo koko, zibophelelekile ngomlinganiselo wokuziphatha obangela usizi namhlanje. Phofu ke, ekubeni unqulo lufanele luthethe “ukukhonzwa nokunqulwa kukaThixo okanye kwamandla angaphezu kwawemvelo,” ngaba alufanele lube yimpembelelo elungileyo kuwo onke amazwe olunabalandeli abaninzi kuwo? Yintoni le isilelayo? Unqulo okulo lunganayo njani impembelelo enjalo namhlanje?