Imibuzo Evela Kubafundi
◼ Ngaba uPawulos wayebhekisela kuYehova okanye kuYesu xa wabhala oku: ‘Yathi iNkosi kum, Amandla am azalisekiswa ekuswelekeni kwamandla’?
Kubonakala ukuba umpostile uPawulos wayebhekisela kwiNkosi uYehova. Ngokuphawula amazwi kaPawulos akwesi sicatshulwa, asinakubona kuphela nje isizathu sokuba kube njalo oku, kodwa sikwanokukwenza nzulu ukuluqonda kwethu ulwalamano olukhoyo phakathi koThixo noNyana wakhe. UPawulos wabhala oku:
“Ukuze ndingaziphakamisi ngokungaphezulu ngenxa yezityhilelo eziyincamisa, ndanikwa uviko enyameni, isithunywa sikaSathana, ukuze sindintlithe, ukuze ndingaziphakamisi ngokungaphezulu. Ndayibongoza kathathu iNkosi ngaso isithunywa eso, ukuba sisuke kum. Ithe yona kum, Ubabalo lwam lukwanele; kuba amandla am azalisekiswa ekuswelekeni kwamandla. Ngoko kokukhona sendiya kuqhayisa kamnandi kakhulu ngokuswela kwam amandla, ukuze ahlale phezu kwam amandla kaKristu.”—2 Korinte 12:7-9.
Kusenokuba uviko olwalusenyameni kaPawulos lwalukukukhathazwa liliso okanye ngabapostile bobuxoki ababekucel’ umngeni ukuba ngumpostile kwakhe. (Galati 4:15; 6:11; 2 Korinte 11:5, 12-15) Enoba lwaluyintoni na, lwamtyhafisa uPawulos okanye lwamenza akavuya kubulungiseleli bakhe. Ngoko izihlandlo ezithathu wacela ukuba lushenxiswe. Kodwa wacela bani, yaye ngubani owaphendula ngokuthetha amazwi athi “amandla am”?
Ekubeni esi sicatshulwa sikhankanya “amandla kaKristu,” kusenokubonakala ngathi uPawulos wayecele iNkosi uYesu. Ngokungathandabuzekiyo, unamandla yaye unokuwanika abafundi bakhe. (Marko 5:30; 13:26; 1 Timoti 1:12) Enyanisweni, uNyana kaThixo ‘unokuzithwala zonke izinto ngalo ilizwi lamandla akhe.’—Hebhere 1:3; Kolose 1:17, 29.
Noko ke, iNkosi uThixo iyekuphela komthombo wamandla, anokuwanika abanquli bakhe nabanika wona. (INdumiso 147:5; Isaya 40:26, 29-31) Amandla anjalo avela kuThixo amenza uYesu wakwazi ukwenza imimangaliso yaye asaya kumenza akwazi ukwenza izinto. (Luka 5:17; IZenzo 10:38) Ngendlela efanayo, abapostile bakaYesu nabanye abafundi bafumana amandla avela kuYehova. (Luka 24:49: Efese 3:14-16; 2 Timoti 1:7, 8) Aba baquka noPawulos, owaba ngumlungiseleli ‘ngokwesipho sobabalo lukaThixo, awababalwa ngaso [umpostile] ngokokusebenza kwamandla akhe.’—Efese 3:7.
Ekubeni uPawulos wayecele ukuba kushenxiswe ‘uviko enyameni yakhe, isithunywa sikaSathana,’ isengqiqweni into yokuba wakhangela kwiNkosi uThixo ukuba ikwenze oku, ekubeni uYehova ingulowo imithandazo ibhekiswa kuye. (Filipi 4:6; INdumiso 145:18) Ngaphezu koko, ukukhuthaza kukaYehova uPawulos ngandlel’ ithile esebenzisa la mazwi athi, “Amandla am azalisekiswa ekuswelekeni kwa-mandla,” akumkhupheli ngaphandle uKristu. Amandla avela kwiNkosi uThixo anokuchazwa ‘njengamandla kaKristu awayehleli’ phezu kukaPawulos, kuba ‘uKristu ungamandla kaThixo, nobulumko bukaThixo.’ (1 Korinte 1:24) Ngaloo ndlela, eyesi-2 yabaseKorinte 12:7-9 isinceda siyiqonde kakuhle indlela uYehova amsebenzisa ngokubalulekileyo ngayo uNyana wakhe ekuphumezeni ukuthanda kukaThixo.