Ngaba Unikela Ngokuzincama?
Imbono Elungeleleneyo Ngeminikelo
EMVA kokufundisa abantu izinto ezininzi etempileni, uYesu “[wahlala] malungana nomkhumbi wokulondoloza imali, ekhangela ukuba sithini na isihlwele ukuphosa imali yobhedu emkhumbini wokulondoloza imali.” (Marko 12:41) Okwalandelayo yaba yingxelo eyaziwa kakhulu yemalana yomhlolokazi. Kodwa kwakutheni ukuze uYesu ahlale apho ebukele abantu abanikelayo? Ngaba wayengabaxelelanga abafundi bakhe ukuba kwakungafuneki nokuba isandla sabo sasekhohlo siyazi into eyayisenziwa sisandla sabo sasekunene xa beliza abantu?—Mateyu 6:3.
Ngaphambilana, uYesu wazigxeka kabukhali iinkokeli zonqulo ngokusebenzisa iindlela zobuqhetseba ukuze zizidle zizigqibe ‘izindlu zabahlolokazi.’ Wathi ezi nkokeli zonqulo ‘ziya kwamkela ugwebo olugqithisileyo.’ (Marko 12:40) Ukuze akwazi ukubafundisa, wathi ke waqwalasela okwakusenziwa ngabantu emkhumbini wokugcina imali. Namhlanje, ekubeni sisiva kangaka ngezixa ezikhulu zemali ezibandakanyekileyo kwiintlangano zonqulo, ukusetyenziswa kakubi kwezo mali, nendlela yokuphila etofo-tofo ngokugqithisileyo yabo baphambili, besiya kuba senza kakuhle ukuthi ngenyameko siphulaphule oko uYesu wayeza kukuthetha.—Nceda ufunde uMarko 12:41-44.
Imikhumbi Yokulondoloza Imali
Ingxelo ibalisa ukuba uYesu waye “ehleli malungana nomkhumbi wokulondoloza imali.” Kucacile ukuba oku kwakusenzeka kwiNdawo Yabafazi, apho imikhumbi, okanye iibhokisi eziliqela, zazibekwe khona zayame iindonga ukuze abantu baphose kuzo iminikelo yabo. Ngokwesiko lamaYuda siva ukuba zizonke iibhokisi ezazikho zazili-13. NgokwesiHebhere zazibizwa ngokuba ngamaxilongo, ngenxa yokuba ngaphezulu zazinomngxunyana owawufana nomboko wexilongo. Kuthiwa ‘kwakungekho mntu wayengena etempileni engakhange afake nto kuwo.’
Unjingalwazi ongumFrentshi uEdmond Stapfer, kwincwadi yakhe ethi Palestine in the Time of Christ (1885), wanikela ingcombolo ethande ukuba neenkcukacha ngale mikhumbi yokulondoloza imali. Ingxelo yakhe isenza siyiqonde indlela ababenqula ngayo abantu belo xesha, ingakumbi ngokuphathelele iminikelo yabo yentlonelo kwiinkonzo zasetempileni.
“Mkhumbi ngamnye wawusetyenziselwa injongo eyahlukileyo, uphawulwe ngombhalo wolwimi lwesiHebhere. Owokuqala wawubhalwe: Iishekele ezintsha; okuthetha ukuthi, iishekele ezibekelwe bucala ukwenzela iindleko zonyaka lowo. Owesibini: Iishekele ezindala; okuthetha ukuthi, iishekele ezinikelwa ngenxa yeendleko zonyaka ophelileyo. Owesithathu: Amahobe namagobo amavukuthu; imali eyayifakwa kulo mkhumbi yayilixabiso ekwakufuneka lihlawulwe ngabo kwakufuneka benikele ngamahobe amabini okanye ngamagobo amavukuthu amabini, elinye njengedini elinyukayo, elinye njengedini lesono. Ngentla komkhumbi wesine kwakubhalwe oku: Amadini anyukayo; ngale mali kwakuhlawulwa iindleko zamanye amadini anyukayo. Owesihlanu wawunombhalo othi: Iinkuni, ibe wawugcine iminikelo yabathembekileyo yokuthenga iinkuni zesibingelelo. Owesithandathu wawusithi: Isiqhumiso (imali yokuthenga isiqhumiso). Owesixhenxe usithi: Owasengcweleni (imali yesihlalo sokucamagusha). Imikhumbi emithandathu eseleyo yayinombhalo othi: Iminikelo yokuzithandela.”
Umbhalo owawukwimikhumbi yokuqala emibini wawubhekisela kwirhafu yentloko esisiqingatha seshekele (iidrarhima ezimbini ngokwemali yamaGrike) ekwakufuneka indoda nganye ngokomthetho iyihlawule ukuze kugcinwe itempile isemgangathweni, iinkonzo ezaziqhutywa apho nemibingelelo yemihla ngemihla eyayinikelwa ngenxa yohlanga luphela. Ngokufuthi le rhafu yayiqokelelwa kubantu basekuhlaleni ize iziswe etempileni.—Mateyu 17:24.
Kwakhona abantu kwakufuneka ngokoMthetho banikele amadini ahlukahlukeneyo abo. Amanye ayengawezono ezenziweyo, amanye engawesithethe, kanti amanye ayengenxa yokuzinikela nokubulela. Ibhokisi eyayiphawulwe ngokuthi “Amahobe namagobo amavukuthu” kunye neyayisithi “Amadini anyukayo” zazilungiselelwe kanye ezo njongo. Incwadi iThe Temple, Its Ministry and Services ithi: “Abo bafazi ekwakufuneka bezise amahobe edini elinyukayo nedini lesono babephosa imali elingene wona kwixilongo III, eyayisithi suku ngalunye ikhutshwe kuze kwenziwe idini ngamahobe alingene loo mnikelo.” Kunokwenzeka ukuba yile nto eyenziwa ngabazali bosana olunguYesu.—Bona uLuka 2:22-24; Levitikus 12:6-8.
Kwakukwakho neminikelo yeenkuni nesiqhumiso eyayisetyenziswa esibingelelweni yaye iyiminikelo yokuzithandela. Kwakhona, ngokutsho kukaNjingalwazi uStapfer, “nabani na owayenikele ngemali endaweni yeenkuni okanye isiqhumiso, kwakukho umlinganiselo eyayingamele ibe ngaphantsi kwawo, ibe xa yayingaphantsi koku kwakungenakunikelwa ngayo. Kwakufuneka ubuncinane unikele ngemali elingana nesandla esizeleyo sesiqhumiso, okanye izikhuni ezibini eziyikubhite ubude yaye zibe zikhulu.”
Yintoni esiyifundayo kuko konke oku? Kucace gca ukuba amaSirayeli ayeneembopheleleko ezininzi ekugcineni umnquba ufanelekile ibe kamva itempile eYerusalem, indawo ephambili yonqulo lokwenyaniso. Amadini neminikelo ayeyinxalenye ebalulekileyo yonqulo lwawo. Enyanisweni, uMthetho wayalela ukuba “makangabonakali ke engaphethe lutho ebusweni bukaYehova.” (Duteronomi 16:16) Kodwa ngaba bona babezijonga njani ezi mbopheleleko?
Iimbono Ezingafaniyo
Ingxelo yeBhayibhile ibonisa ukuba abantu babenesisa kakhulu ibe benobuntu ngexesha likaMoses noDavide nasemva koko ngexesha lokulawula kukaYowashe noYosiya. (Eksodus 36:3-7; 1 Kronike 29:1-9 2 Kronike 24:4-14; 34:9, 10) Babekuvuyela ukuba nesabelo ekwakheni indlu kaYehova nokuyigcina ifanelekile kwanasekuhambiseleni phambili unqulo lokwenyaniso. Indlela ababevakalelwa ngayo yaboniswa kakuhle ngamazwi kaDavide xa wathi: “Ndavuya bakuthi kum, Masiye endlwini kaYehova.”—INdumiso 122:1.
Noko ke, lo moya wokunikela, awuzange ubekho kubo bonke. Ngokomzekelo, sifunda ukuba ngemihla kaMalaki, ababingeleli babenikela kuYehova “izinto eziphangiweyo, neziziqhwala, nezifayo.” Kunokuba bavuyele ilungelo lenkonzo, basuka bathi: “Yabonani, yindinisa yani na le!”—Malaki 1:13.
Ngokufanayo, ngexesha likaYesu abanye balixhakamfula eli thuba ukuze bahambisele phambili izilangazelelo zabo zobuqu. Ngokomzekelo, abananisi bemali ababedume kakubi etempileni abazange babekho nje kuphela ukuze bananise ngemali. Kunoko, babambelela kwinto yokuba ziishekele zamaHebhere kuphela ezazisamkeleka njengeminikelo, ibe bonke ababenemali yamaRoma okanye yamaGrike kwakufuneka betshintshise ngayo. Ngokutsho kuka-Alfred Edersheim, oyingcali kwimbali yamaYuda, “abagcini-mali babevunyelwa ukuba babize imeah yesilivere, okanye malunga nekota yedenari [okanye idenariyo, umvuzo womsebenzi wemini] ngesiqingatha ngasinye seshekele.” Ukuba oku kunjalo, akunzima ukubona indlela ekumele ukuba lwaba nengeniso ngayo olu shishino nesizathu sokuba iinkokeli zonqulo zicaphuke gqitha xa uYesu wabakhuphela phandle abananisi bemali.
“Ekusweleni Kwakhe”
Kukonke oku kubethelela nje umzekeliso kaYesu ngomnikelo omncinane womhlolokazi olihlwempu, owathi ngokungathandabuzekiyo wawuphosa kwenye yeebhokisi ezazibhaIwe “Iminikelo Yokuzithandela.” Njengomhlolokazi, kwakungekho mfuneko yokuhlawula irhafu yentloko, yaye ekubeni engenamali, usenokuba wayengakwazi ukufikelela kumlinganiselo omiselweyo kumadini anyukayo okanye kwiinkuni okanye kwiminikelo yesiqhumiso. Kanti, wayefuna kubekho into ayenzayo ukubonakalisa uthando lwakhe ngoYehova. Wayengafuni ukungabalelwa enanini okanye ayekele nje kwabo ‘babenako ukunikela.’ UYesu wathi: “Yena ekusweleni kwakhe uphose konke abenako, impilo yakhe iphela.”—Marko 12:44.
Zininzi izinto ezibalulekileyo esinokuzifunda kule ngxelo. Mhlawumbi, eyona ibalaseleyo ikukuba ngoxa thina sonke sinelungelo lokuxhasa unqulo lokwenyaniso ngobuncwane bethu, eyona nto ixabisekileyo emehlweni kaThixo asikokunikela ngezinto esingazifuniyo kakade, kodwa kukunikela ngezinto ezixabisekileyo kuthi. Ngamanye amazwi, ngaba sinikela ngento ebesingayifuni kangako? Okanye ngaba sinikela ngokuzincama kokwenene?
Ukuhambisela Phambili Unqulo Lokwenyaniso Namhlanje
Namhlanje, amaNgqina kaYehova ahambisela phambili unqulo lokwenyaniso ngokushumayela ngenzondelelo, “ezi ndaba zilungileyo zobukumkani . . . kulo elimiweyo liphela.” (Mateyu 24:14) Ukuphumeza lo msebenzi wazwenibanzi kubandakanya kungekuphela nje umgudu wokuzinikela, ixesha namandla kodwa kwakhona neendleko ezinkulu. I1987 Yearbook of Jehovah’s Witnesses ibika ukuba “ebudeni bowe-1986 kwasetyenziswa imali engama-[R52 324 003,56] ukuxhasa . . . abavangeli basemazweni abangama-2 762, oovulindlela abakhethekileyo abali-13 351 nabaveleli nabafazi babo beziphaluka nezithili zehlabathi ezingama-3 353.” Oku kwakusongezelela kwiindleko ezinkulu ekuthengeni, ekwakheni nasekuhlaziyeni impahla, ekufakeni izinto ezifunekayo kwimizi-mveliso neeofisi ezikwikomkhulu nakumasebe oMbutho angama-93; nokulungiselela ngokweemfuno zenyama amatsha-ntliziyo angama-8 920 asebenza kwiintsapho zaseBheteli.”
Kudla ngokubuzwa lo mbuzo: ‘Ngaba le mali ingaka ivela phi?’ Ngokwahlukileyo kwiicawa zeNgqobhoko, amaNgqina kaYehova awaqokeleli nkongozelo okanye athumele iimvulophu zokuqokelela iminikelo. Kunoko iibhokisi zeminikelo—ezinjengemikhumbi yokugcina imali yamaxesha okubhalwa kweBhayibhile—zibekwa kwiiHolo zawo zoBukumkani. Ngamaxesha athile, kusenokubekwa ezinye iibhokisi ngenxa yezizathu ezikhethekileyo, ezinjengokwakhiwa kweeHolo zoBukumkani okanye iiHolo Zendibano okanye ukuncedisana nabavangeli basemazweni ukuba baye kwiindibano ezikumazwe abo okuzalwa. Iminikelo isenokuthunyelwa ngqo kwiWatch Tower Society, Private Bag 2067, Krugersdorp, 1740, ukuhambisela phambili umsebenzi wokushumayela zwenibanzi.
Uzijonga njani ezi ndlela zininzi nezahlukahlukeneyo zokunikela? Ngaba, njengabathile kwimihla kaMalaki, uzijonga njengomthwalo oyindinisa, mhlawumbi usithi entliziyweni yakho: “Yabonani, yindinisa yani na le!”? Okanye, ngaba ‘njengomhlolokazi olihlwempu’ uzijonga njengamathuba okubonakalisa inzondelelo yakho nomdla wakho kunqulo lokwenyaniso nomnqweno wakho wokuzukisa uYehova ngezinto zakho ezixabisekileyo? Musa ukuwulibala umbuzo osemxhoIweni othi: Ngaba unikela ngokuzincama?
“Nindicikide ngale nto, utsho uYehova wemikhosi, ukuba andisayi kunivulela na iingcango zezulu, ndinithululele iintsikelelo, kude kungasweleki lutho.” (Malaki 3:10) Ukuchuma okungokomoya nolwando lwazwenibanzi phakathi kwabantu bakaYehova kungqina ukuba uYehova sele ekwenza oko. Kwanga singaqhubeka sinikela kuYehova umnikelo obonakalisa ukuzincama ngokwenene.
[Ibhokisi ekwiphepha 30]
INDLELA ABANYE ABANIKELA NGAYO KUMSEBENZI WOBUKUMKANl
◻ IZIPHO: Iminikelo yokuzithandela yemali isenokuthunyelwa ngqo kwiWatch Tower Bible and Tract Society, Private Bag 2067, Krugersdorp, 1740. Usenokunikela nangezinto onazo ezinjengomhlaba, kuquka nezinto ezenziwe ngamatye anqabileyo okanye ezinye izinto ezixabisekileyo. Kufanele kubekho ileta emfutshane epheleka le minikelo nechaza ukuba lo ngumnikelo.
◻ ILUNGISELELO LOMNIKELO WOXHOMEKEKO: Imali isenokunikelwa kwiWatch Tower Society ibe selugcinweni, kulungiselelwe ukuba xa kufuneka isetyenziselwe ingxaki yobuqu, inikelwe kulowo wenze umnikelo.
◻ I-INSHORENSI: IWatch Tower Society isenokubhaliswa njengefumana Imali kwi-inshorensi okanye kumhlala-phantsi. UMbutho umele waziswe ngawo nawaphi na amalungiselelo anjalo.
◻ IMINQOPHISO YAMAFA: Impahla okanye imali isenokushiyelwa iWatch Tower Society ngokwenziwa komnqophlso welifa ngokusemthethweni. Umbhalo okhutshelweyo umele uthunyelwe kuMbutho.
Ukuze ufumane inkcazelo engakumbi namacebiso ngokuphathelele imibandela elolo hlobo, bhalela kwi-Treasurer’s Office, Watch Tower Bible and Tract Society, Private Bag 2067, Krugersdorp, 1740.