“Ifumaneka Phi Yonke Le Mali?”

ABO babukela ividiyo yeWatch Tower Society ethi “Jehovah’s Witnesses—The Organization Behind the Name” abayivali imilomo. Babona amadoda namabhinqa asempilweni eentlanga neemvelaphi ezahlukahlukeneyo, bencumile yaye besebenza kunye ngemvisiswano. Ingqalelo yabo ayithinjwa ngaloo mawaka abasebenzi abonwabileyo kuphela kodwa kwanazizakhiwo ezikhulu ezikwikomkhulu loMbutho eliseBrooklyn nakwiifama zalo eziseWallkill, eNew York. Le vidiyo ibonisa ukuba ngaphakathi kwezi zakhiwo kukho oomatshini bobugcisa bezi mini—izixhobo zokushicilela nokudibanisa iincwadi ezisebenza ngesantya esiphezulu ezivelisa izigidi ezininzi zeempapasho nyanga nganye, iintlobo ngeentlobo zeekhompyutha, nezinye iinkonzo ezininzi ezenza lo msebenzi uqhubele phambili.

Oku kubonakala ngathi bekuya kufuna intywenka yemali. Ngoko bambi bayabuza, “Ifumaneka phi yonke le mali?”

Abantu abatyelela kwikomkhulu lehlabathi loMbutho nabo abayivali imilomo. Abakhenkethi batsala iintamo zabo bebuka isakhiwo esinemigangatho engama-30 esineendawo zokuhlala, esinye sezakhiwo ezininzi ezihlala abalungiseleli bokuzithandela abangaphezu kwama-3 000 abasebenza apho. Ukutyelela iZiko Lemfundo leWatchtower elitsha elimalunga neekhilomitha ezili-110 ngentla kweBrooklyn kubashiya abaninzi bebamb’ ongezantsi. Nangona kusakhiwa, kuhlala abasebenzi abali-1 200 kulo. Kuza kuqeqeshwa iiklasi ezimbini zabavangeli basemazweni apho nyaka ngamnye baze bathunyelwe kwizabelo zabo kwamanye amazwe. Ulwalathiso olunikwa amabandla amaNgqina kaYehova aseUnited States angaphezu kwe-10 000 luphuma kwalapha. Kutshanje, namasebe amaninzi ehlabathini jikelele aye azandisa izakhiwo zawo okanye enjenjalo sithetha nje. Ukwenza zonke ezi zinto kufuna imali eninzi. Abantu bayabuza, “Ifumaneka phi yonke le mali?”

Impendulo kukuba ivela kubantu abaqhelekileyo abafana nathi. Ngabantu abasehlabathini lonke, abanqwenela ukwenza okusemandleni abo ukuhambisela phambili umsebenzi obalulekileyo wamaKristu wokushumayela nokufundisa. Umoya wokuzithandela onjalo awunto iqala namhlanje.

Umzekelo Owamiselwa NguSirayeli Wamandulo

Ngaphezu kweminyaka engama-3 500 eyadlulayo, kwabakho imfuneko yeminikelo yokuzithandela. UYehova wayalela uMoses ukuba akhe umnquba, okanye ‘intente yokuhlangana,’ ukuze isetyenziselwe unqulo Lwakhe. Lo msebenzi wawucetywe nguThixo wawufuna iintlobo ngeentlobo zezinto ezixabiso likhulu. UYehova wayalela oku: “Thabathani phakathi kwenu, nise umrhumo kuYehova; bonke abantliziyo zibaqhubayo mabazise umrhumo kaYehova.” (Eksodus 35:4-9) Basabela njani abantu? Ingxelo ithi “beza bonke abantu abantliziyo yabavuselelayo, abo bonke bamoya wabaqhubayo, bawuzisa umrhumo kaYehova emsebenzini wentente yokuhlangana, nasenkonzweni yayo yonke, nasezambathweni ezingcwele.” Ngokuthe ngcembe lo ‘mnikelo wokuqhutywa yintliziyo’ waba mkhulu kangangokuba waba ‘ngaphezulu kakhulu kokwanele ukusetyenzwa komsebenzi, awayewise umthetho wokuba wenziwe uYehova.’ (Eksodus 35:21-29; 36:3-5) Onjani wona umoya wokungazingci nowokuzithandela owabonakaliswa ngabantu!

Kungadlulanga neminyaka engama-500, amaSirayeli aphinda acelwa ukuba enze umnikelo wokuzithandela. Umnqweno kaKumkani uDavide wokwakhela uYehova indlu esisigxina eYerusalem wawuseza kuzalisekiswa ngunyana wakhe uSolomon. UDavide wahlanganisa waza wanikela ngenkoliso yezinto ezaziza kufuneka. Nabanye bafaka isandla xa uDavide wakhupha isicelo sokuzisa “isipho sikaYehova.” (NW) Waba yintoni umphumo? “Bakuvuyela abantu ukunikela kwabo ngokuqhutywa yintliziyo; ngokuba banikela ngokuqhutywa yintliziyo ephelelisileyo kuYehova. Kananjalo uDavide ukumkani wavuya ngovuyo olukhulu.” (1 Kronike 22:14; 29:3-9) Isilivere negolide iyodwa yayinokuxabisa malunga ne-180 lamawaka ezigidi zeerandi ngokwemali yanamhlanje!—2 Kronike 5:1.

Kule mizekelo siphawula ukuba akukho bani owanyanzelwayo ukuba anikele. ‘Babeqhutywa ziintliziyo’ yaye benikela ‘ngentliziyo epheleleyo.’ UYehova wayengayi kukholiswa ukuba kwakungenjalo. Ngokufanayo, xa kwavela ithuba lokunikela ngemali ukuze kuncedwe amaKristu awayeswele, umpostile uPawulos wabhala esithi kwakungamele kube ‘ngokuvimba.’ Wongezelela wathi: “Elowo makanike njengoko agqibe ngako entliziyweni; makungabi kokuphuma kabuhlungu, nangokunyanzelwa; kuba uThixo uthanda umphi ochwayithileyo.”—2 Korinte 9:5, 7.

Imfuneko Ekhoyo Namhlanje

Ngaba kukho imfuneko yeminikelo namhlanje? Ngenene ikho, yaye iseza kubakho ngakumbi njengoko ixesha lihamba. Ngoba?

AmaKristu anikwe imiyalelo engqalileyo kweli xesha lesiphelo. UYesu wabayalela oku abafundi bakhe: “Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele; nibafundisa ukuba bazigcine zonke izinto endiniwisele umthetho ngazo.”—Mateyu 28:19, 20.

Ukuphumeza lo msebenzi mkhulu wokufundisa nokushumayela njengoko sisondela ‘ekuphelisweni kweli phakade’ kufuna ixesha nobuncwane obuninzi. Ngoba? Ngenxa yezinto ezibandakanyekileyo ekudluliseleni isigidimi soBukumkani bukaThixo ukusa “ekupheleni komhlaba.” (IZenzo 1:8) Ngokwahlukileyo kumaYuda enkulungwane yokuqala, inkoliso yabantu ayizazi kakuhle iZibhalo. Eneneni, abemi bomhlaba abaninzi abaqhelananga konke konke neBhayibhile yaye abayigqali njengeLizwi likaThixo. Kumele kuqeqeshwe abashumayeli baze bathunyelwe kwamanye amazwe. (Roma 10:13-15) Yaye cinga ngenani leelwimi ezibandakanyekileyo! Abo bashunyayeziweyo kufuneka babe neeBhayibhile neempapasho ezisekelwe eBhayibhileni ukuze baqhubeke befundisisa ngolwimi lwabo. Ukuze bafikelelwe kakuhle bonke yaye bondliwe baze bakhule ngokomoya ukuze bancede abanye kufuneka ulungelelwano olungathethekiyo.—2 Timoti 2:2.

UYesu wathi kuqala ‘iindaba ezilungileyo zobukumkani zimele zivakaliswe kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.’ (Mateyu 24:14) Ngoku lixesha lokuba sinikele ngako konke esinako ukuze kuphunyezwe loo msebenzi ubalulekileyo. Le yeyona ndlela iyingenelo esinokubusebenzisa ngayo ubuncwane bethu ngaphambi kokuba ubutyebi bezinto eziphathekayo buphelelwe lixabiso.—Hezekile 7:19; Luka 16:9.

Isetyenziselwa Ntoni Le Mali?

IWatch Tower Society ipapasha uncwadi lweBhayibhile ngeelwimi ezingaphezu kwama-230, kwanangeBraille ukulungiselela abaziimfama yaye ivelisa iividiyo zabathetha ngezandla ukwenzela abazizithulu. Oko kufuna amaqela abaguquleli nawabo bahlola iimpazamo zabaguquleli kulwimi ngalunye. Ukucinga nje ngawo wonke lo msebenzi, ngokukodwa owenziwa kwiphephancwadi IMboniselo, elipapashwa nyanga nganye ngeelwimi ezili-121 neliphuma ngaxeshanye ngeelwimi ezili-101 kuzo, akukholeleki. Sekunjalo kuyimfuneko oku ukuze abantu abasemhlabeni wonke bafumane baze bafunde inkcazelo efanayo. Nyaka ngamnye amaxabiso amaphepha nawezinye izinto ezisetyenziswayo ekushicileleni isigidimi soBukumkani okanye ekusiveliseni kwiikhasethi okanye kwiividiyo ayenyuka. Ezo ndleko zifanele zihlawulwe ngeminikelo evela kubazalwana.

Umsebenzi wokushumayela nokufundisa wenziwa ngamabandla amaNgqina kaYehova angaphezu kwama-75 000 ehlabathini lonke. Ukuze ahlale emanyene yaye ekhuthele, abaveleli abahamba-hambayo abaqeqeshwe kakuhle batyelela ibandla ngalinye malunga nezihlandlo ezibini ngonyaka. Neendibano ziphumeza indima ebalulekileyo ekufundiseni. Kufanele kuqeshwe izakhiwo ezikhulu ukulungiselela ezo ndibano zomelez’ ukholo. Iminikelo yakho ikwasetyenziselwa ukuphumeza ezi njongo.

Ngoxa ngokuqhelekileyo iindibano ziqhutywa kathathu ngonyaka, amabandla asekuhlaleni ayadibana kwiintlanganiso zeeveki ngeeveki ezintlanu. (Thelekisa iEksodus 34:23, 24.) Ukuthontelana kwabatsha abasabela kwiindaba ezilungileyo kuye kwakhokelela ekubeni kongezeleleke amabandla amatsha angamawaka nyaka ngamnye. Ngoncedo lwezigidi zeerandi ezibolekwa kuMbutho, kwakhiwa amakhulu eeHolo zoBukumkani ezintsha nyaka ngamnye, yaye ezinye ezininzi ziyahlaziywa zize zandiswe. Nangona kubolekiswana ngayo le ngxowa-mali yaye isetyenziswa izihlandlo ezininzi, abantu abayisebenzisayo bayaqhubeka besanda.

Omnye ummandla oye wanolwando ngendlela engazange ibonwe ngaphambili ngowamazwe akwiMpuma Yurophu awayengaphantsi kwelalisakuba yiSoviet Union. Hayi indlela ezivuyisa ngayo iindaba ezintsha zokuba umsebenzi wavulwa kwezi ndawo! Ngoku kuthunyelwa abavangeli basemazweni kwinkoliso yala mazwe. Kwamanye amazwe kusekwa amasebe amatsha, nto leyo eyandisa inani labalungiseleli bokuzithandela abayinxalenye yentsapho yaseBheteli yehlabathi lonke libe ngaphezu kwe-15 000. Kakade ke, izakhiwo zamasebe abahlala kuzo kufuneka zithengwe okanye zakhiwe. Iminikelo yakho iyanceda ekuvaleni le ntswelo.

USathana needemon zakhe bayawubona wonke lo msebenzi. Benza konke okusemandleni abo ukuphazamisa imigudu yabakhonzi bakaYehova abathembekileyo okanye ngokubafaka ezingxakini. (ISityhilelo 12:17) Oku kwenza umthwalo omninzi wamadabi asemthethweni ukuze kukhuselwe ilungelo labantu bakaThixo lokushumayela nokuphila ngokuvisisana nemithetho yakhe yobulungisa. Ukongezelela, ngenxa yeemfazwe ezitshabalalisayo zale nkqubo yezinto kaSathana, kunye neentlekele zokwemvelo, ngokufuthi kuye kufuneke kuthunyelwe izinto zokunceda abazalwana noodade wethu ababandezelekileyo kunye nabanye abakunye nabo. Iminikelo yakho iyasebenza ekuxhaseni olu ncedo lubalulekileyo.

UYehova Uya Kukuvuza

Ukusebenzisa ixesha nobuncwane bethu ngeentliziyo ezivumayo ukuhambisela phambili umsebenzi weNkosi kuzisa iintsikelelo ezinkulu ngakumbi. Njani? Ngenxa yokuba uThixo, ezizezakhe zonke izinto, uya kusivuza. IMizekeliso 11:25 ithi: “Umphefumlo osikelelayo uyatyetyiswa; oseza ahluthise abanye, uyasezwa ahluthe naye.” UYehova uvuya kunene xa siyiphumeza indima yethu ekuhambiseleni phambili unqulo lwakhe. (Hebhere 13:15, 16) Wawathembisa oku amaSirayeli amandulo awayeya kuzisa iminikelo eyayifuneka phantsi komnqophiso woMthetho: “Nindicikide ngale nto, utsho uYehova wemikhosi, ukuba andisayi kunivulela na iingcango zezulu, ndinithululele iintsikelelo, kude kungasweleki lutho.” (Malaki 3:10) Intabalala yokomoya enanditshwa ngabakhonzi bakaYehova namhlanje ingqina ukuba uThixo uyasigcina isithembiso sakhe.

Lo msebenzi uzukileyo wokuvakalisa imini yosindiso kubantu bonke nowokunceda abantliziyo zinyanisekileyo bangene kwindlela esa ebomini awusayi kuqhubeka ngonaphakade. (Mateyu 7:14; 2 Korinte 6:2) Kodwa bonke abayinxalenye ‘yezinye izimvu’ zeNkosi bamele bahlanganiswe. (Yohane 10:16) Hayi indlela ekubaluleke ngayo ukujamelana nolo celomngeni namhlanje! Yaye hayi indlela esiya kuvuya ngayo sonke, xa siya kukhangela emva sikwelo hlabathi litsha lobulungisa, size sithi, ‘Ndibe nesabelo ngokuzeleyo kwinxalenye yokugqibela yalaa msebenzi wokuhlanganisa’!—2 Petros 3:13.

[Ibhokisi ekwiphepha 30, 31]

INDLELA ABANYE ABANIKELA NGAYO KUMSEBENZI WOKUSHUMAYELA UBUKUMKANI

IMINIKELO EYA KUMSEBENZI OWENZIWA EHLABATHINI LONKE: Abaninzi benza uqingqo-mali okanye babekele bucala imali abaza kuyifaka kwiibhokisi zeminikelo ezikwiHolo yoBukumkani. Nyanga nganye amabandla adlulisela le mali kwikomkhulu lehlabathi eliseBrooklyn, eNew York, okanye kweyona ofisi yesebe ikufutshane.

IZIPHO: Iminikelo yokuzithandela yemali isenokuthunyelwa ngqo kwiWatch Tower Bible and Tract Society of Pennsylvania, 25 Columbia Heights, Brooklyn, New York 11201-2483, okanye kwiofisi yoMbutho enyamekela ilizwe lakho. Kusenokunikelwa nangamatye anqabileyo okanye ezinye izinto ezixabisekileyo. Le minikelo ifanele iphelekwe yileta emfutshane echaza ukuba ezi zizipho.

ILUNGISELELO LOMNIKELO WOXHOMEKEKO: Imali isenokunikelwa kwiWatch Tower Society ibe selugcinweni de afe lowo unikeleyo, phantsi kwelungiselelo lokuba xa kuvela ingxaki yobuqu, iya kubuyiselwa kulowo ebenikele ngayo.

I-INSHORENSI: IWatch Tower Society isenokubhaliswa njengaleyo eya kufumana imali kwi-inshorensi yobomi okanye kwilungiselelo lemali yomhlala-phantsi. UMbutho ufanele waziswe ngawo nawaphi na amalungiselelo anjalo.

IMALI ESELUGCINWENI NEEBOND: Imali eselugcinweni neebond zinokunikelwa kwiWatch Tower Society njengezipho okanye ngaphantsi kwelungiselelo lokuba ingeniso iqhubeke ihlawulwa kulowo wenze umnikelo.

ISIZA NEZINDLU EZIKUSO: Isiza esinokuthengiswa sinokunikelwa kwiWatch Tower Society mhlawumbi njengesipho okanye ngokusigcina elungelweni lalowo unikele ngaso, aqhubeke ehlala kuso ebudeni bokuphila kwakhe. Ubani ufanele aqhagamshelane noMbutho ngaphambi kokwenza isivumelwano sokunikela ngomhlaba kuMbutho.

IMINQOPHISO YAMAFA: Imihlaba okanye imali isenokushiyelwa iWatch Tower Bible and Tract Society of Pennsylvania ngokwenziwa komnqophiso welifa ongokwasemthethweni. Umbhalo waloo myolelo ufanele uthunyelwe kuMbutho.

Ukuze ufumane inkcazelo engakumbi ngokuphathelele imibandela enjalo, bhalela kwiTreasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, okanye kwiofisi yoMbutho enyamekela ilizwe lakho.