Ukuzukisa Uthixo Wethemba
“Utsho uYehova ukuthi, . . . ‘Ondizukisayo ndiya kumzukisa, abandidelayo bacukucezwe.”—1 SAMUWELI 2:30.
1. Sisiphi isizathu esinaso sokufuna ukuzukisa uYehova? (1 Timoti 1:17; ISityhilelo 4:11)
NGENXA yamathemba esinokuba nawo, asekelwe eBhayibhileni, kufaneleke ngokupheleleyo ibe kusengqiqweni ukuba sizukise “uThixo wethemba,” “uThixo onika ithemba.” (Roma 15:13, IBhayibhile yesiXhosa; New World Translation) Kutheni kunjalo nje? Singamzukisa njani uMdali Ozukileyo wendalo iphela, sakugqiba ukuba bancinane kangaka yaye singabantu abangafezekanga? Ibe ngaba naye uza kusizukisa ngokwembuyekezo?
2. UYesu wavakalelwa njani mayela nokuzukisa uThixo?
2 Sinokufunda koko kwathi kwenzeka kuYesu. Akukho namnye kuthi onokuyikhanyela into yokuba uYesu wayesoloko efuna ukuba uYise azukiswe aze adunyiswe. (Yohane 5:23; 12:28; 15:8) Eneneni, uYesu wabagxeka abaFarisi nababhali ‘ababebeka uThixo ngemilebe yomlomo wabo ibe yona intliziyo yabo ikude lee kuye.’ Phawula ukuba, ukungamzukisi kwabo uThixo kwabandakanya iintshukumisa nezenzo zabo ezingafanelekanga. (Mateyu 15:7-9) Noko ke, ngaba sinokuthi ekuzukiseni kukaKristu uThixo, kwakubandakanyeke ithemba lakhe? Ibe uYehova wasabela njani ekuzukisweni ngolo hlobo?
3. Sazi njani ukuba uYesu wathembela ngoYehova?
3 UYesu wawafak’ entliziyweni amazwi kaDavide akwiNdumiso 16:10: “Akuyi kuwushiya umphefumlo wam kwelabafileyo; akuyi kumyekela owakho wenceba ukuba abonane nesihogo.” Ngenxa yokuba wayeneli themba lokuvuswa, uYesu Kristu wayenokuthetha la mazwi achulumancisayo kumenzi wobubi owayexhonywe ecaleni kwakhe: “Inene ndithi kuwe namhlanje, Uya kuba nam eParadisi.” (Luka 23:39-43, NW) Loo menzi wobubi wafa ngokukhawuleza, ngoko akazange akwazi ukukungqina ukuqiniseka kwethemba likaYesu lokuvuswa emva kweentsuku ezintathu. Kodwa elinye ingqina lokuzibonela lathi: “UThixo wamvusa lo Yesu, esingamangqina ako oko thina sonke.” (IZenzo 2:31, 32) Oko kwakuyinyaniso.
4. Luzuko olunjani uYesu awayelufanelekele nawathi walufumana? (ISityhilelo 5:12)
4 Abantu abaninzi abaqhelekileyo awashumayela kubo uYesu babesazi ukuba wayefanele ukunikwa imbeko, okanye axatyiswe. (Luka 4:15; 19:36-38; 2 Petros 1:17, 18) Emva koko wafa njengesaphuli-mthetho. Ngaba oko kwaziguqula izinto? Akunjalo, kuba uYesu wayekholisekile kuThixo awayethembele kuye. Ngaloo ndlela, uYehova wambuyisela ebomini. Isibakala sokuba “uThixo wethemba” wamvusela ebomini uNyana wakhe waza wamenza waba ngongenakufa kummandla womoya singqina ukuba uYise wayeqhubeka emzukisa uNyana wakhe. UPawulos uthi: “Sibona . . . uYesu ke, ethe ngenxa yeentlungu zokufa wathweswa uzuko nembeko, ukuze ngobabalo lukaThixo eve ukufa ngenxa yabo bonke.”—Hebhere 2:7, 9; Filipi 2:9-11.
5. UYesu wazukiswa ngayiphi indlela ekhethekileyo, nto leyo eyaphumela ekubeni uThixo azukiswe njani ngokongezelelekileyo?
5 UYesu, owathi wazukisa uYehova, wakhankanya indlela enye ekhethekileyo awathi uYise wamzukisa ngayo. Ekubonakaleni kwakhe kubapostile bakhe abathembekileyo, wathi: “Linikwe mna lonke igunya emazulwini nasehlabathini. Hambani ngoko niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele”. Niyabona, mna ndinani yonke imihla, kude kube sekuphelisweni kwephakade eli.” (Mateyu 28:18-20) Ngoko ngokongezelelekileyo uYise wamzukisa uNyana ngokumnika igunya elingenakuthelekiswa nanto. Eli gunya laliza kusetyenziswa kubantu ababeya kwenza umsebenzi ozisa uzuko kuLowo uYesu azabalazela ukumzukisa. Ngoko, ngaba oku kuthetha ukuba thina bantu bangafezekanga sinokuthi ngandlel’ ithile simzukise uYise size nathi sizukiswe nguye ngokwembuyekezo?
Abantu Abazukisa UThixo
6. Ngaba kufanelekile ukunqwenela ukuzukiswa, kodwa oku kunabuphi ubungozi? (Luka 14:10)
6 Abantu abaninzi abafane bacinge ngokuzukisa uThixo kuqala, kuba banomdla ongakumbi ekubeni kuzukiswe bona. Bambi basenokude bathi kuyinto eqhelekileyo ngathi ukufuna ukuzukiswa. Kukho ubunyaniso obuthile koku, njengokuba kuyinto eqhelekileyo ukunqwenela udumo oluhle, oluya kuthi luphelekwe luzuko oluthile. (1 Timoti 3:2, 13; 5:17; IZenzo 28:10) Kanti, umnqweno wokufuna ukuzukiswa ngabantu unokubaxwa ngokulula. Oku kwenziwe kwacaca ngabaninzi abaxolele ukutshona ezindlekweni kuba besukela udumo okanye abaxolele ukwenza nantoni na ukuze nje bangathelwa nqa.
7. Kutheni ukuzukiswa ngabantu kungeloncedo kangako nje?
7 Xa ucinga ngako oku, kwanolona zuko luphakamileyo luvela ebantwini lusuka luthi pheselele, kuba bonke bakhawuleza bafe. Amaqhawe ambalwa asakhunjulwayo asenokuzukiswa nje okwexeshana, kodwa inkoliso yabafileyo ilityelwe. Bangaphi abantu abawaziyo amagama ookhokho babo okanye abaziyo ukuba zazingoobani na iinkokeli zesizwe sabo kwiminyaka elikhulu eyadlulayo? Eneneni, enoba ubani wakhe waphila okanye akazange aphile oko akuyiguquli imicimbi. Ufana nje nothuli olukhawuleza luphele kwimilinganiselo yexesha, nethontsana kumsinga wobomi. Yaye kwanokuba uyazukiswa ithuba elifutshane emva kokuba efile, akakwazi oko. (Yobhi 14:21; 2 Kronike 32:33; INtshumayeli 9:5; INdumiso 49:12, 20) Ekuphela kwento enokwenza umahluko kukuba nethemba elilungiselelwa nguThixo, ukumzukisa nokuzukiswa nguye ngokwembuyekezo. Oku sinokukubona kubomi babantu ababini ababephila ngexesha elinye kuSirayeli wamandulo.
8. UEli wawela kuwuphi umgibe ngokuphathelele ekunikeleni uzuko?
8 UEli wayengomnye wabo. Wakhonza uThixo kwisikhundla esikhethekileyo sokuba ngumbingeleli omkhulu iminyaka engama-40 ibe kwakhona wanikwa nelungelo lokugweba uSirayeli. (1 Samuweli 1:3, 9; 4:18) Sekunjalo, ekuhambeni kwexesha wabonisa ubuthathaka ngokuphathelele oonyana bakhe uHofeni noPinehasi. Nangona babengababingeleli, basisebenzisa kakubi isikhundla sabo ngokuba iinxalenye zeminikelo nangokubandakanyeka ekuziphatheni okubi ngokwesini. Xa uyise wabagxeka ngokuthambileyo, uThixo wathi uEli ‘wasuka wabazukisa oonyana bakhe ngaphezu kwam.’ UYehova wayethembise ukuqhubeka nobubingeleli bukaAron, kodwa wayeya kuyinqumla indiu kaEli kumsebenzi wobubingeleli obukhulu. Kwakutheni? UThixo wacacisa ngelithi: “Ondizukisayo ndiya kumzukisa, abandidelayo bacukucezwe.”—1 Samuweli 2:12-17, 29-36; 3:12-14.
9. USamuweli walinikwa njani ithuba lokuzukisa uYehova?
9 Ngokwahlukileyo koko kwakukho uSamuweli. Usenokuba uyazi ukuba abazali bakhe bamsa emnqubeni eShilo esemncinane ukuya kukhonza apho. Ngabusuku buthile uYehova wathetha neli gatyana lomfana. Usenokukunandipha ukufunda ngale ngxelo kweyoku-1 kaSamuweli 3:1-14, usiba nombono wale nkwenkwe ivuswa, kungekhona ngumgqumo omkhulu wendudumo, kodwa ivuswa lilizwi elitsholo phantsi eyathi ngokuphosakeleyo yacinga ukuba lelikaEli owalupheleyo. Yandula ke ucinge ngendlela amele ukuba wayesoyika ngayo uSamuweli oselula xa kwafuneka eye kuxelela umbingeleli omkhulu owalupheleyo ngesigqibo sikaThixo sokuyohlwaya indiu kaEli. Kanti uSamuweli wakwenza oko; wamzukisa uThixo ngokuzithoba.—1 Samuweli 3:18, 19.
10. Ngembuyekezo yokuba eye wazukiswa, uThixo wamzukisa njani uSamuweli?
10 USamuweli wamzukisa uYehova kuyo yonke loo minyaka yobuprofeti bakhe ibe noThixo wamzukisa. Kuphawule oku kweyoku-1 kaSamuweli 7:7-13. UYehova wasabela ngokukhawuleza kumthandazo kaSamuweli wokucela uncedo lokoyisa amaFilisti. Ngaba ubungayi kuziva uzukisiwe xa ubunokunikwa ingqalelo enjalo nguThixo? Xa oonyana bakaSamuweli bengazange balulandele ukhokelo lwakhe, uThixo akazange amgatye njengokuba wagatya uEli. Ngokucacileyo oku kungenxa yokuba uSamuweli wenza konke awayenako ukuzukisa uThixo. Oku kuboniswa ngokubhekele phaya kukuba, uSamuweli akazange asivume isicelo sabantu sokufuna ukumkani ongumntu. (1 Samuweli 8:6, 7) UThixo wasebenzisa uSamuweli ukuthambisa uSawule noDavide. Ekufeni kukaSamuweli, uSirayeli wamzukisa ngokuthi azile. Phofu ke, okubaluleke ngakumbi kukuba uThixo wamzukisa ngokumkhankanya eBhayibhileni phakathi kwamadoda okholo aya kusikelelwa ngovuko nangezinto ezilungileyo uThixo awagcinele zona. (INdumiso 99:6; Yeremiya 15:1; Hebhere 11:6, 16, 32, 39, 40) Ngaba oku akubonisi ukuba ukuzukisa “uThixo wethemba” kuxabiseke kakhulu?
Ngaba Uya Kumzukisa “UThixo Wethemba”?
11, 12. Yintoni esifanele siyiqwalasele mayela nokuzukisa uYehova, ibe yiyiphi enye indlela esinokukwenza ngayo oko?
11 Iimeko zikaYesu noSamuweli, xa sinikela nje imizekelo emibini eseBhayibhileni, zingqina ukuba abantu banokwenza ukuzukisa ‘uThixo wabo wethemba’ kube yeyona nto yokuqala ebomini. Yaye ezo meko zimbini zibonisa ukuba ngokwenjenjalo nathi sinokuthi ngokufanelekileyo sifune size sifumane uzuko oluvela kuThixo. Kodwa unokukwenza njani oku unesiqinisekiso esisengqiqweni sokuba uya kumkholisa uThixo, uya kuzukiswa nguye nokuba ithemba lakho elisekelwe eBhayibhileni liya kuphunyezwa?
12 Enye indlela kukuba noloyiko lokwenene nolwentlonelo lokungamkholisi uThixo. (Malaki 1:6) Mhlawumbi sivumelana zisuka nje naloo mazwi. Kanti, khumbula oonyana bakaEli. Ukuba wawubabuzile enoba babekufuna na ukuzukisa uThixo ngokumoyika ngentlonelo, mhlawumbi ngebabethe ewe. Ingxaki iba kukubonisa ngezenzo umnqweno wethu wokuzukisa uThixo ngokumoyika kubomi bemihla ngemihla.
13. Zekelisa indlela ukuba nomnqweno wokuzukisa uThixo ngokumoyika okunokusinceda ngayo.
13 Ukuba sijamelene nemeko elingayo enokusenza ukuba sibe okanye sibandakanyeke kwizenzo ezingafanelekanga ezingokwesini sibe singenakubhaqwa, ngaba umnqweno wethu wokufuna ukuzukisa uThixo ubuya kuzishukumisa izenzo zethu? Sifanele sihlakulele le mvakalelo, ‘Kwanokuba ububi bunokuhlala bufihlakele, ukunikezela nje kwam ekwenzeni isono esilolo hlobo kukungamzukisi “uThixo wethemba” endithwele igama lakhe.’ Yaye inyaniso yeyokuba isiphoso asiyi kuhlala sifihlakele ngokungenasiphelo, njengokuba zingazange zifihlakale nezinto ezenziwa ngoonyana bakaEli. Oku kuqinisekiswa ngamazwi kaPawulos amayela ‘nomgwebo wobulungisa kaThixo’: “[Uya] kuvuza ulowo nalowo ngokwemisebenzi yakhe: abo bathi ngokomonde emsebenzini olungileyo bafune uzuko nembeko nokungonakali, abavuze ngobomi obungunaphakade; ke kwabo beyelenqe, bangayithambeliyo inyaniso, basuke bathambele intswela-bulungisa, kuya kubakho umsindo nengqumbo.”—Roma 2:5-8.
14. Yiyiphi enye indlela esinokumzukisa ngayo uThixo, ibe yintoni esinokuzibuza yona?
14 Kwelinye icala, uPawulos ukhankanya ukuba nenxaxheba “emsebenzini olungileyo,” ozukisa uThixo nophumela ‘kuzuko nembeko’ ezivela kuye. Umsebenzi obalulekileyo ololu hlobo namhlanje ngulowo uYesu wawukhankanya kuMateyu 28:19, 20: ‘Yenzani abafundi zonke iintlanga, nibabhaptiza nibafundisa ukuba bazigcine zonke izinto endiniwisele umthetho ngazo.’ Kuwo wonke umhlaba, izigidi zamaNgqina kaYehova ziwukhuthalele lo msebenzi wokuzukisa uThixo wokushumayela nowokufundisa. Abaninzi bade bazibhokoxele ukuba ngabalungiseleli bexesha elizeleyo njengoovulindlela, ngokusisigxina okanye ebudeni beeholide zomsebenzi wempangelo okanye ezesikolo. Ecinga ngoku, ngamnye wethu unokuzihlola ngokuluncedo ukuba uqhuba njani na kulo msebenzi. Ngokomzekelo, unokuzibuza ukuba, ‘Ngaba ndiyamzukisa “uThixo wethemba” ngokuba nesabelo esizeleyo kumsebenzi wokushumayela?’
15. Kuye kwenzeka ntoni kwamanye amaKristu ngokuphathelele ukuzukisa uYehova ngobulungiseleli basesidlangalaleni?
15 Wambi amaKristu awayekade engabashumayeli abakhutheleyo kangangeminyaka emininzi ngokuthe ngcembe aye ayekelela umxakatho. Aye aba nomkhwa wokuba nenxaxheba encinane okanye amane ukubhaqisa kulo msebenzi ubalulekileyo wokwenza abafundi. Asithethi ngabantu abaneziphene zomzimba baze bayekelele ngenxa yemiphumo yokwaluphala. Ngokwahluke mpela koko, ukuyekelela umxakatho kubonwa phakathi kwamaNgqina athile akubudala obahlukahlukeneyo. Okubangel’ umdla kukuba, uPawulos wayengabhekiseli kwiqela elikubudala obuthile xa walumkisa amaKristu ‘ngokutyhafa.’ Kunoko, bungakhathaliseki ubudala bomntu, into ebalulekileyo kulo mbandela kukuba ukuba nenxaxheba rhoqo kubulungiseleli kufuna umgudu. Njengoko ngokucacileyo kwenzekayo kumhla kaPawulos, bambi namhlanje baqiqa ngolu hlobo, ‘Ndiyiphumezile indima yam kwiminyaka edluleyo, ngoko ngoku amaKristu asematsha anokuzibhokoxa.’—Galati 6:9; Hebhere 12:3.
16. Kutheni le nto sinokuncedakala nje ekuzihlolisiseni kule nkalo?
16 Ngokuqinisekileyo liqaqobana nje labantu eliye lachatshazelwa ngale ndlela, kodwa usenokubuza ukuba, ‘Ngaba kukho naluphi na utyekelo olunjalo endiluphawula kakuhle kwimeko yam? Ndiqhuba njani kubulungiseleli xa ndithelekisa nexesha elidluleyo?’ Enoba siye sayekelela umxakatho okanye akunjalo, sonke sifanele sikhumbule ukuba ‘uThixo wethu wethemba’ uthembisa ukulungiselela ‘uzuko, nembeko, noxolo, kubantu bonke abasebenza okulungileyo.’ (Roma 2:10) UPawulos wasebenzisa igama lesiGrike elithetha “ukusebenza okuthile, ukuvelisa, ukwenza.” Hayi indlela ekubaluleke ngayo ukuba sikuphephe oko kwathi kwehlela abaFarisi nababhali, abasuka bamzukisa uThixo nje ngokunikela inkonzo yomlomo! (Marko 7:6; ISityhilelo 2:10) Ngokwahlukileyo koko, xa sisiba nesabelo ngokukhutheleyo nangokusuka entliziyweni kubulungiseleli basesidlangalaleni, siyaziqinisekisa thina kunye nabanye ukuba sinalo ithemba lokwenene. Sizukisa uMdali wethu noMniki-bomi. Ibe siba kwimeko yokuba sizukiswe nguye, ngoku nangonaphakade.—Luka 10:1, 2, 17-20.
Ngobuncwane Bethu
17, 18. Yiyiphi enye indlela esinokumzukisa ngayo uThixo, ibe kutheni le nto ukuba mathidala ekwenzeni njalo kungekho ngqiqweni nje?
17 Ngokuphathelele enye indlela esinokumzukisa ngayo ‘uThixo wethu wethemba,’ IMizekeliso 3:9 ithi: “Mzukise uYehova ngobuncwane bakho, nangentlahlela yongeniselo lwakho lonke.” USpurrell uguqulela le ndinyana ngokuthi: “Mzukise uYehova ngobutyebi bakho, nangeyona nxalenye inkulu yengeniso yakho.”—A Translation of the Old Testament Scriptures from the Original Hebrew.
18 Ekubeni abefundisi abahlukahlukeneyo baye baduma kakubi ngokubawa kwabo okungasikelwe mda nekhondo lobomi lokuthand’ ubutyebi, abantu abaninzi baba mathidala ukuzinikela ezicaweni nakwiintlangano zonqulo ekubonakala ngokucacileyo ukuba iinjongo zazo zikukufumana nje ubutyebi kuphela. (ISityhilelo 18:4-8) Phofu ke, ukuxhaphaza okulolo hlobo akuyiguquli indlela esebenza ngayo IMizekeliso 3:9. Ngokuvisisana neso siluleko siphefumlelweyo, sinokubusebenzisa njani ‘ubuncwane’ bethu ‘ukuzukisa uYehova,’ ‘uThixo wethu wethemba’?
19. Zekelisa indlela bambi abaye bayisebenzisa ngayo IMizekeliso 3:9.
19 AmaNgqina kaYehova afumanisa ukuba inani elandayo labantu abasabelayo kwisigidimi soBukumkani lifunisa ukuba kwandiswe iiHolo zoBukumkani okanye kwakhiwe ezintsha. Ngoko, oku kuyenye indlela ‘yokuzukisa uYehova ngobutyebi bakho.’ Abaselula nabakhulileyo baye baba nesabelo ekwenzeni oku, ngokuthi benze isigqibo sobuqu sokunikela ngesixa esithile semali yokwakha. Ukubambelela kwisigqibo esinjalo sangasese kusenokufuna ukuziqeqesha okanye ukuzincama, ingakumbi ukuba amalungiselelo okwakha nokugqitywa kwesakhiwo kuthabatha ixesha elide. (2 Korinte 9:6, 7) Sekunjalo, ukusebenzisa imali ngolu hlobo ngokwenene kuyamzukisa uYehova, kuba iiHolo zoBukumkani ziziindawo apho amaKristu amnqula khona nalapho wona nezinxulumani zawo bazuza khona ulwazi ngoThixo. Amazwi kaYesu akuMateyu 6:3, 4 asinika isizathu esilungileyo sokuba nentembelo yokuba uThixo uya kubazukisa abo baye bamzukisa ngaloo ndlela.
20. (a) Kutheni le nto kulungile nje ukuzigocagoca ekusebenziseni IMizekeliso 3:9? (b) Yiyiphi imibuzo esinokuzibuza yona?
20 Noko ke, nasi isilumkiso: AbaFarisi nababhali, uYesu awathi babengakubeki tanci ukuzukisa uThixo, babeqinisekisa ukuba babengabokuqala ukufumana iingenelo zobutyebi babo. Ngoko isiluleko esikuMateyu 15:4-8 sincomela ukuba sizigocagoce enoba ‘siyamzukisa na uYehova ngobuncwane bethu.’ (Yeremiya 17:9, 10) Ngokomzekelo, umKristu oye wathi ngandlel’ ithile waba sisityebi ngenxa yeshishini lakhe usenokukwenza kubonakale kusengqiqweni ukuqhubeka kwakhe esebenza ixesha elizeleyo ukuze enze ingeniso engakumbi. Usenokuqiqa ngolu hlobo, ‘Abanye bangenela ubulungiseleli bobuvulindlela okanye bafuduke baye kukhonza apho bafuneka ngokukhethekileyo khona abashumayeli, kodwa eyam indlela ekhethekileyo yokukhonza uThixo kukwenza ingeniso engakumbi ndize ke ndibe nokuninzi endinganikela ngako.’ Iminikelo yakhe inokuba luncedo kakhulu. Kodwa unokuba wenza kakuhle ukuzibuza ukuba, ‘Ngaba indlela endiphila ngayo ibonisa ukuba ukusebenzisa imali ekuzukiseni uThixo kuyeyona nto endishukumisela ukuba ndifune inzuzo engakumbi nangakumbi?’ (Luka 12:16-19; thelekisa uMarko 12:41-44.) Yaye, ‘Ngaba ndinokuyihlengahlengisa imicimbi yam ukuze ndibe nesabelo esithe chatha kowona msebenzi ubalulekileyo kumhla wethu—ukuvakalisa iindaba ezilungileyo?’ Eneneni, zingakhathaliseki ukuba ziyintoni na iimeko zethu ebomini, sinokuzihlolisisa iintshukumisa nezenzo zethu size sizibuze oku, ‘Ndinokumzukisa njani ngokupheleleyo uMniki-bomi ‘noThixo wam wethemba’?’
21. Liliphi ithemba esinalo ukuba sizukisa uYehova ngoku?
21 UYehova akasayi kusidanisa. Elinjani lona ukuyolisa ithemba lokuba usenokuthi, ngoku ukusa kwixesha elizayo, athethe ngathi oko wakuthethayo ngoSirayeli othembekileyo: “Ngenxa yokuba unqabile [uxabisekile, NW] emehlweni am, uzukile, mna ke ndikuthandile”! (Isaya 43:4) Ukwathembisa ‘ubomi obungunaphakade kwabo bafuna uzuko nembeko.’ Esi sithembiso usibhekisa kwabo banyamezelayo “emsebenzini olungileyo.” Onjani yena “uThixo wethemba”!
Ubuya Kuphendula Njani?
◻ Yintoni esinokuyifunda kumzekelo kaYesu, mayela nokuzukisa kwabantu uYehova?
◻ UEli noSamuweli babahlukene njani nokuphathelele ukuzukisa uYehova?
◻ Ziziphi ezinye iindlela onokukwandisa ngazo ukuzukisa kwakho uThixo, ibe unokufumana imbuyekezo enjani?
◻ Liliphi ikamva elilindelwe ngabo babeka tanci ukuzukisa ‘uThixo wethu wethemba’?
Ibhokisi ekwiphepha 20]
IILETA ZEMINIKELO
Nazi izicatshulwa ezithatyathwe kwiileta ezafunyanwa yiofisi yeWatch Tower Society, eBrooklyn, eNew York:
“Igama lam ndinguAbijah. Ndineminyaka esithoba ubudala. Ndifuna ukuninika ii-$4 [ii-R8] ukwenzela abazalwana abasebenza kwiiHolo zoBukumkani. Banokuzisebenzisela ukuthenga izinto zokwakha okanye iilekese, akundikhathazi oko.”—EOregon.
‘Niya kufumana ngaphakathi kufakwe itsheke yam. Ndingaphezu kweminyaka engama-96 ubudala yaye ndisisithulu kodwa ndikunandipha ngokwenene ukugcina imali yam ngenxa yoku. Ewe, ndiyazi ukuba, ndihamba ngenqwelo-mafulha engekho ntsha, yaye ubusika bam andibuchitheli eFlorida okanye eKhalifoniya. Ndinokwenza okuncinane kakhulu ekushumayeleni iindaba ezilungileyo zoBukumkani ngokungena ezindiwini. Kodwa ngokugcina imali yam nangokuthumela enye kuni, ndiba noluvo lokuba ndisenenxaxheba kuko.’—EOhio.
‘Ndithi maz’ enethole ngayo yonke into eniyenzileyo kwiHolo yoBukumkani. Ngale mali [R10] ndincedisana nani ekuveliseni iincwadi neeMboniselo zokuba sifunde. Le mali ivela kwibhokisana yam yokugclna imali. Ndiyabulela ngencwadana enemifanekiso ethi Isikolo esixelela ngeziyobisi.’
“Ncedani namkele le tsheke efakwe ngaphakathi. lidola ezingamakhulu amabini [ii-R400] zezeNgxowa-mali Yokwakha liHolo ZoBukumkani. Eseleyo inokusetyenziswa nangayiphi na indlela eniyibona ifanelekile ukuze kuhanjiselwe phambili umsebenzi wokushumayela.—EMissouri.