Mbeke UYehova—Ngoba Yaye Njani?
“Abo bandibekayo ndiya kubabeka, kwaye abo bandidelayo baya kucukucezwa.”—1 SAMUWELI 2:30, “NW.”
1. Ngoobani abanikwa amabhaso kaNobel, ayintoni, ibe abaninzi bazijonga njani ezi mbasa?
NYAKA ngamnye amaziko amane aseScandinavia anikezela ngamabhaso kaNobel kwabo baye ‘basebenzela ukungenelwa koluntu ngendlela ephawulekayo kunyaka ongaphambili.’ La mabhaso anikezelwa ngenxa yempumelelo yemigudu kabani kwiinkalo ezintandathu ezahlukahlukeneyo. Abaninzi bakugqala ukuwongwa ngebhaso likaNobel njengeyona mbeko ibalaseleyo enokunikwa nawuphi na umntu.
2. Ngubani otyeshelwayo ngabathwesi bamabhaso kaNobel, yaye kutheni Yena ngokukhethekileyo efanelwe kukubekwa?
2 Ngoxa kungekho nto iphosakeleyo ngokunikela imbeko kubantu ebafaneleyo, ngaba abo banikela le mbeko bakhe bacinge ngokubeka oyena Mbabali mkhulu woluntu? Loo Mbabali ngulowo uye wazisela uluntu iingenelo ezininzi ukususela ekudaleni kwakhe indoda nomfazi bokuqala kwiminyaka engama-6 000 eyadlulayo. Ukusilela ngokufuthi ukumbeka kusenokusikhumbuza amazwi kaElihu, umhlobo kaYobhi wamandulo, owathi: “Ke abatsho ukuthi, Uphi na uThixo uMenzi wam [Ozukileyo, NW], osinika ingoma ebusuku?” (Yobhi 35:10) UMbabali wethu omkhulu uyaqhubeka esenza ‘okulungileyo, enika imvula evela ezulwini, namaxesha anendyebo, ezanelisa iintliziyo ngokutya nangemihlali.’ (IZenzo 14:16, 17; Mateyu 5:45) Kuyinyaniso ukuba uYehova unguMniki waso “sonke isipho esilungileyo, naso sonke isipho esigqibeleleyo.”—Yakobi 1:17.
Oko Kuthethwa Kukunikela Imbeko
3. Liliphi igama eliyintloko lesiHebhere nelesiGrike eliguqulelwe ngokuthi “imbeko,” ibe iyintoni intsingiselo yalo?
3 Igama eliyintloko lesiHebhere elithi ka·vohdhʹ, eliguqulelwa ngokuthi imbeko, ngokoqobo lithetha “ubunzima.” Ngoko umntu onikwa imbeko ugqalwa njengomntu osindayo, onesithunzi, okanye onguthile. Ngokuphawulekayo, eli gama lesiHebhere, uka·vohdhʹ, ngokufuthi eZibhalweni likwaguqulelwa ngokuthi “uzuko,” ukubonisa ngokubhekele phaya indlela agqalwa engonesithunzi okanye engobaluleke ngayo lowo unikwa imbeko. Elinye igama lesiHebhere, elithi yeqarʹ, eliguqulelwa ngokuthi “imbeko” eZibhalweni, likwaguqulelwa ngokuthi “xabisekileyo” nokuthi “izinto ezixabisekileyo.” Ngoko kwiZibhalo zesiHebhere, igama elithi imbeko lihlobene nozuko kunye nokuxabiseka. Igama lesiGrike eliguqulelwe ngokuthi “imbeko” eBhayibhileni nguti·meʹ yaye nalo likwadlulisela ingcamango yokuxabiseka, ukuba mkhulu nokuhlonipheka.
4, 5. (a) Kuthetha ukuthini ukubeka umntu othile? (b) Yiyiphi imeko echazwe kuEstere 6:1-9 ebonisa oko kubandakanyekileyo ekunikeleni imbeko?
4 Ngaloo ndlela ubani umbeka omnye umntu ngokumhlonela ngokunzulu nangokumxabisa. Ngokomzekelo, qwalasela imeko ebaliswa eBhayibhileni emayela nomYuda othembekileyo uMordekayi. Ngasihlandlo sithile uMordekayi wayebhence iyelenqe lokubulala uKumkani uAhaswerosi wasePersi yamandulo. Kamva, ngobusuku ukumkani awayephuthelwe ngabo, uKumkani wakhunjuzwa ngesenzo sikaMordekayi. Ngoko wawabuza oku amadodana awayemlungiselela: “Wenzelwe mbekoni na, nabukhulu buni na uMordekayi ngenxa yoko?” Aphendula athi: “Akenzelwanga nto.” Hayi indlela okumcingisa nzulu ngayo oku! UMordekayi wayesindise ubomi bokumkani, ukanti ukumkani wasilela ukubonakalisa uxabiso.—Estere 6:1-3.
5 Ngoko ke, ngexesha elifanelekileyo, uAhaswerosi wabuza inkulumbuso yakhe, uHaman, eyona ndlela ifanelekileyo yokubeka embekweni lowo ukumkani amthandayo. Ngokukhawuleza uHaman wacinga entliziyweni yakhe: “Ukumkani angathanda ukubeka bani na embekweni, agqithe mna?” Ngoko uHaman wathi loo mntu ufanele ambathiswe “isambatho sobukumkani” aze akhwele “nehashe akhwela kulo ukumkani.” Waqukumbela ngokuthi: “Bayikhwelise ehasheni elo, icande ezitratweni zomzi, badanduluke phambi kwayo, bathi, Kwenjiwa nje, kwindoda athanda ukuyibeka embekweni ukumkani.” (Estere 6:4-9) Umntu onikwe imbeko ngolo hlobo wayeya kuhlonitshwa kakhulu ngabo bonke abantu.
Isizathu Sokuba UYehova Efanelwe Yimbeko
6. (a) Ngubani esifanele simbeke ngaphezu kwabantu bonke? (b) Kutheni igama elithi “ozukileyo” limchaza ngokufanelekileyo uYehova?
6 Ukutyhubela imbali abantu baye banikwa imbeko, ngokufuthi ngokungafanelekanga. (IZenzo 12:21-23) Kanti ngubani ofanelwe yimbeko ngaphezu kwabantu bonke? Kaloku, nguYehova uThixo! Ufanelwe yimbeko yethu ngenxa yokuba ungozukileyo. Ngokufuthi kubhekiselwa kuye ngegama elithi “ozukileyo.” UngOzukileyo, uMenzi Ozukileyo, uMdali Ozukileyo, uKumkani Ozukileyo, uMyaleli Ozukileyo, iNkosi Ezukileyo. (INdumiso 48:2; INtshumayeli 12:1; Isaya 30:20; 42:5; 54:5; Hoseya 12:14, thelekisa i-NW) Umntu ozukileyo unesithozela, unesihomo, uphakamile, wongamile, unobungangamsha yaye uyoyikeka. UYehova ungongenakuthelekiswa ngezo zinto, akalingani namntu, wongamile. Usingqina ngokwakhe esi sibakala esithi: “Ninokundifanisa, nindilinganise, nindinxulumanise nabani na, ukuba sifane?”—Isaya 46:5.
7. Ubuncinane kungeendlela ezingaphi ezahlukahlukeneyo ekunokuthiwa uYehova ubalasele kuzo, ibe kutheni kunokuthiwa ungongenakulinganiswa namntu ngegunya?
7 UYehova uThixo ungongenakuthelekiswa namntu ubuncinane ngeendlela ezisixhenxe eziphawulekayo, nto leyo esenza sibe nezizathu ezingqalileyo zokumbeka. Okokuqala, uYehova uThixo ufanelwe yeyona mbeko inkulu, ngenxa yokuba engenakulinganiswa namntu ngegunya analo. INkosi uYehova inguMongami Wendalo Iphela—uphakamile. UnguMgwebi, uMmisi-mthetho noKumkani wethu. Bonke abantu ezulwini nasemhlabeni baya kuphendula Kuye; kanti yena akaphenduli nakubani. Uchazwa kakuhle ‘njengomkhulu, oligorha nowoyikekayo.’—Duteronomi 10:17; Isaya 33:22; Daniyeli 4:35.
8. Kutheni kunokuthiwa uYehova ungongenakulinganiswa ngokubhekisele (a) kwisikhundla sakhe? (b) kubukho bakhe obungunaphakade?
8 Okwesibini, uYehova uThixo ufanelwe yeyona mbeko inkulu ngenxa yokuba ungongenakulinganiswa ngesikhundla sakhe. ‘UngOphezulu nOwongamileyo,’ Osenyangweni. Ayinakuthelekelelwa indlela aphakame ngayo ngaphezu kwazo zonke izidalwa zakhe ezisemhlabeni! (Isaya 40:15; 57:15; INdumiso 83:18) Okwesithathu, uYehova uThixo umele anikwe imbeko ngaphezu kwabo bonke abanye ngenxa yokuba akukho mntu uyintanga yakhe ngobukho obungunaphakade. Nguye kuphela ongazange abe nasiqalo, ubekho ukususela ephakadeni kude kuse ephakadeni.—INdumiso 90:2; 1 Timoti 1:17.
9. Kungayiphi indlela uYehova angongenakuthelekiswa namntu ngayo (a) ngokubhekisele kuzuko lwakhe? (b) ngokubhekisele kwiimpawu zakhe ezisisiseko?
9 Okwesine, uYehova uThixo ufanele anikwe eyona mbeko inkulu ngenxa yokuzuka kozuko lwakhe lobuqu. ‘UnguYise wezikhanyiso.’ Ubuso bakhe bukhazimla kangangokuba akukho mntu unokumbona aze aphile. Woyikeka ngokwenene. (Yakobi 1:17; Eksodus 33:22; INdumiso 24:10) Okwesihlanu, sifanele simnike eyona mbeko inkulu uYehova uThixo ngenxa yeempawu zakhe ezimangalisayo. Ungumnini-mandla onke, unamandla angenasiphelo; wazi izinto zonke, unobulumko obungenasiphelo; ugqibelele ngokuba sesikweni; yaye usisimntwiso sothando.—Yobhi 37:23; IMizekeliso 3:19; Daniyeli 4:37; 1 Yohane 4:8.
10. Kungayiphi indlela uYehova angalingani namntu (a) mayela nemisebenzi yakhe yendalo nezinto anazo? (b) mayela negama nodumo lwakhe?
10 Okwesithandathu, uYehova uThixo ufanelwe yeyona mbeko sinokumnika yona ngenxa yemisebenzi yakhe emikhulu yendalo. NjengoMdali wezinto zonke ezisemazulwini nezisemhlabeni, ukwanguMnini-nto zonke Omkhulu. KwiNdumiso 89:11 sifunda oku: “Lelakho izulu, likwalelakho ihlabathi.” Okwesixhenxe, uYehova uThixo wethu ufanelwe yimbeko ngaphezu kwabantu bonke ngenxa yokuba engongenakulinganiswa, engenakuthelekiswa nanto ngokubhekisele kwigama nodumo lwakhe. Nguye kuphela onegama elinguYehova, elithetha ukuthi “Ubangela Kubekho.”—Bona umbhalo osemazantsi weGenesis 2:4, kwi-NW.
Indlela Yokubeka UYehova
11. (a) Ziziphi ezinye zeendlela esinokunikela imbeko ngazo kuYehova? (b) Sinokubonakalisa njani ukuba sinikela imbeko ngokwenene kuYehova ngokukholosa ngaye?
11 Ngenxa yazo zonke iimpawu zikaYehova, sinokumbeka njani? Njengoko siza kubona, sinokumbeka ngokumoyika nangokumhlonela, ngokumthobela, ngokumgqala kuzo zonke iindlela zethu, ngokunikela izipho, ngokumxelisa nangokwenza izicelo kuye. Sikwanokumbeka ngokukholwa kuye, ngokukholosa ngaye kungakhathaliseki ukuba kwenzeka ntoni na. Siyabongozwa, “Kholosa ngoYehova ngentliziyo yakho yonke.” Ngoko siyambeka uYehova uThixo ngokwenza njengokuba esitsho. Ngokomzekelo uthi: “Musa ukoyika, kuba ndinawe mna; musa ukubhekabheka [ngenxa yoloyiko], kuba ndinguThixo wakho; ndikukhaliphisile, ewe, ndikuncedile.” (IMizekeliso 3:5; Isaya 41:10) Ukusilela ukukholosa ngaye ngokupheleleyo ibiya kuba kukungambeki.
12. Ukuthobela noloyiko kunayiphi indima ekunikeleni imbeko kuYehova?
12 Indlela esondeleyo esinokumbeka ngayo uYehova uThixo kungokumthobela. Yaye into ebalulekileyo ekuthobeleni luloyiko lobuthixo, ewe, ukoyika ukungamkholisi uThixo. Amazwi uYehova awawathetha kuAbraham emva kokuba uAbraham ngentobelo ezame ukubingelela ngoIsake, unyana wakhe, asibonisa ulwalamano olukhoyo phakathi kokoyika nokuthobela. UYehova wathi, “Ndiyazi ngoku ukuba uyamoyika uThixo.” (Genesis 22:12) Xa wayexubusha oko abantwana bamele bakwenze kubazali babo, umpostile uPawulos naye wabonisa ukuba ukuthobela kuhambisana nokunikela imbeko. (Efese 6:1-3) Ngoko ngokuthobela imithetho kaThixo, engekho nzima, siyambeka uYehova. Ngokungathandabuzekiyo, ukungamthobeli uYehova ibiya kuba kukungambeki.—1 Yohane 5:3.
13. Ukubeka uThixo kuya kusibangela ukuba sibe nasiphi isimo sengqondo mayela nemisebenzi yethu nezinto esizicebileyo?
13 Ngokubhekele phaya, sinokunikela imbeko efanelekileyo kuYehova uThixo ngokuthobela isiluleko esikwiMizekeliso 3:6 esithi: “Uze umazi yena [ewe, umqonde yena] ezindleleni zakho zonke; wowulungelelanisa umendo wakho.” Umfundi uYakobi usinika icebiso elihle mayela noku. Endaweni yokuqhubeka ngentembelo imihla ngemihla, sithembele kwawethu amandla, kufuneka sithi: “Ukuba iNkosi ithe yathanda, saphila, siya kwenza le nto, nalaa nto.” (Yakobi 4:15) Kwiminyaka eyadlulayo kwakuyinto eqhelekileyo ngaBafundi BeBhayibhile Bezizwe Ngezizwe ukongezelela kuwo nawaphi na amazwi angekamva amagama athi D.V., amela ibinzana elithi Deo volente, athetha ukuthi “uThixo evuma.”
14. (a) Sisiphi isimo sengqondo ngokuphathelele imigudu yethu esimele sibe naso ukuba siza kumbeka uThixo? (b) Sisiphi isimo sengqondo esibonakaliswayo mayela nokupapashwa koncwadi lweWatch Tower Society?
14 Kwakhona siyambeka uYehova uThixo ngokubonakalisa isimo sengqondo sokuthobeka, udumo silusa kuThixo ngayo nayiphi na impumelelo esisenokuba nayo. Ngokufanelekileyo umpostile uPawulos wathetha oku ngobulungiseleli bakhe: “Mna ndatyala, uApolo wankcenkcesha, ke nguThixo owahlumisayo. Ngoko ke lowo utyalayo akalutho, nalowo unkcenkceshayo akalutho; oyinto nguThixo lo uhlumisayo.” (1 Korinte 3:6, 7) Liyinyaniso elokuba, uPawulos wayekuxhalabele ukunikela imbeko efanelekileyo kuThixo, angazizukisi yena okanye nabani na ongomnye. Ngaloo ndlela, namhlanje iimpapasho zeWatch Tower Society azibachazi ababhali bazo, ibe ababhali bayakuphepha ukwazisa abanye ngoko babe negalelo kuko. Ngale ndlela, ingqalelo yalathiselwa kwinkcazelo, elungiselelwe ukuba kubekwe uYehova, kungazukiswa nabani na ongomnye.
15. Ngawaphi amava abonisa ubunzima abanye abantu ababa nabo ekuqondeni ukuthozama kwamaNgqina kaYehova?
15 Le nkqubo yokwalathisela ingqalelo kuYehova, ngaloo ndlela kubekwa yena, iyabamangalisa abathile. Kwiminyaka embalwa edluleyo, xa amaNgqina ayelungisa inkqubo yesandisi-lizwi ukwenzela intetho yesidlangalala eCentral Park kwisiXeko saseNew York, ayedlala enye yeekhasethi zeeKingdom Melodies ukuze avavanye inkqubo yesandisi-lizwi. Isibini esinxibe kakuhle sabuza elinye lamaNgqina ukuba yayinguwuphi na loo mculo. Licinga ukuba esi sibini sasingamaNgqina, laphendula: “YiKingdom Melodies No. 4.” Sabuza, “Ewe, kodwa uqanjwe ngubani la mculo?” INgqina laphendula: “Igama lomqambi liyimfihlo.” Esi sibini saphendula sathi: “Abantu abaqamba uhlobo olunjeya lomculo abazifihli.” INgqina laphendula: “Kodwa amaNgqina kaYehova enjenjalo.” Ewe, enza oku ukuze anikele yonke imbeko kuYehova uThixo!
16. Kungaziphi iindlela ezahlukahlukeneyo esinokuwasebenzisa ngazo amazwi ethu ekunikeleni imbeko kuYehova uThixo?
16 Enye indlela yokubeka uYehova kungokusebenzisa imilebe yethu ekunikeleni ubungqina ngaye. Ukuba sikuxhalabele ngokwenene ukumbeka, ngoko siya kuba nenkathalo ekusasazeni iindaba ezilungileyo zoBukumkani. Oku sinokukwenza ngokuya kwizindlu ngezindlu nangazo naziphi na ezinye iindlela esinokuzisebenzisa, singawatyesheli amathuba okunikela ubungqina ngokungacwangciswanga. (Yohane 4:6-26; IZenzo 5:42; 20:20) Ukongezelela, siba namathuba okumbeka uThixo wethu ngamazwi ethu kwiintlanganiso zethu zebandla, ngokugqabaza nangokuthelela ekuculeni ngokusuka entliziyweni iingoma zethu zoBukumkani. (Hebhere 2:12; 10:24, 25) Kwincoko yethu yemihla ngemihla, sikwanokunikela imbeko kuYehova uThixo wethu ngemilebe yethu. Ngomgudu ongephi, incoko sinokuyiqhubela kwimibandela yokomoya eyakhayo, ibe oku kuya kuphumela ekunikeleni imbeko kuYehova uThixo.—INdumiso 145:2.
17. (a) Ihambo efanelekileyo ikuchaphazela njani ukunikela kwethu imbeko kuYehova? (b) Ihambo ephosakeleyo inawuphi umphumo?
17 Njengokuba kulungile ukumbeka uYehova uThixo ngemilebe yethu, kukwayimfuneko ukumbeka ngehambo yethu. UYesu wabagxeka abo babesithi, ngoxa benikela imbeko kuThixo ngemilebe yabo, zibe iintliziyo zabo zikude lee Kuye. (Marko 7:6) Ihambo ephosakeleyo ngokuqinisekileyo iyamhlazisa uYehova uThixo. Ngokomzekelo, kumaRoma 2:23, 24, sifunda oku: “Wena ke uqhayisa ngomthetho, uyamhlazisa uThixo ngokugqitha umthetho? Kuba igama likaThixo linyeliswa ngenxa yenu phakathi kwazo iintlanga.” Kwiminyaka yakutshanje kuye kwasuswa abantu abaninzi kubudlelane kumabandla abantu bakaYehova. Kusenokwenzeka ukuba, abaninzi ngakumbi abaye babandakanyeka kwihambo ehlazisayo abazange basuswe kubudlelane ngenxa yokuba baye babonakalisa isimo sengqondo sokuguquka ngokwenene. Bonke aba bantu bebembeka uYehova ngemilebe yabo, kodwa basilela ukwenjenjalo ngehambo yabo.
18. (a) Yiyiphi inkxalabo abo banelungelo elikhulu abamele babe nayo ukuba baza kubonakalisa imbeko efanelekileyo kuYehova? (b) Imeko yababingeleli abathile bomhla kaMalaki iyibonisa njani imfuneko yokuxhalaba?
18 Abo baxakekileyo kwiinkalo ezahlukeneyo zenkonzo yexesha elizeleyo—enoba kuseBheteli, kumsebenzi wokuhambahamba okanye owobuvangeli basemazweni, okanye njengoovulindlela—banelungelo elikhulu ngamathuba abanawo okuba nesabelo ekunikeleni imbeko kuYehova. Imbopheleleko yabo ikukwenza okusemandleni abo kuwo nawuphi na umsebenzi abawabelweyo, ‘bethembekile kokuncinane nakokukhulu.’ (Luka 16:10) Ngezinye iindlela isikhundla sabo esibekekileyo saba nomzekelo waso, nangona singazange sifuziselwe seso sababingeleli nabaLevi kuSirayeli wamandulo. Noko ke, ngenxa yokungakhathali kwababingeleli abathile ngomhla kaMalaki, uYehova wathi kubo: “Ukuba ndinguyihlo, kuphi na ke ukubekwa kwam? Ukuba ndiyinkosi [ezukileyo, NW], kuphi na ukoyikwa kwam?” (Malaki 1:6) Abo babingeleli babedelela igama likaThixo ngokubingelela ngezilwanyana eziziimfama, eziqhwalelayo, nezigulayo ngaphandle kokuphenduliswa. Ngaphandle kokuba abo banamalungelo enkonzo akhethekileyo namhlanje bazabalazela ukwenza okusemandleni abo, nabo basenokuba bafanelwe ngokukodwa kukukhalinyelwa okufanayo noko uYehova uThixo wakhalimela ngako abo babingeleli. Baya kuba bayasilela ukumbeka uThixo.
19. (a) Njengoko kuphawuliwe kwiMizekeliso 3:9, yiyiphi enye indlela yokubeka uYehova? (b) Yiyiphi enye indlela ebalulekileyo yokunikela imbeko kuYehova?
19 Enye indlela yokunikela imbeko kuYehova uThixo kungokwenza iminikelo yemali kumsebenzi wokushumayela wazwenibanzi awugunyazisileyo. Siyabongozwa: “Mzukise [“mbeke,” NW] uYehova ngobuncwane bakho, nangentlahlela yongeniselo lwakho lonke.” (IMizekeliso 3:9) Ilungelo lokunikela ngolo hlobo lithuba lokubonakalisa imbeko kuYehova uThixo ekungekho namnye ofanele alityeshele. Sikwanokunikela imbeko kuYehova uThixo emithandazweni yethu, simdumisa yaye simbulela. (1 Kronike 29:10-13) Enyanisweni, ngenxa yokuba sisondela kuye ngokuzithoba nangentlonelo enzulu, kwaukusondela kuYehova ngomthandazo kukumnika imbeko.
20. (a) Ngokuqhelekileyo ngoobani ababekwa ngabantu behlabathi, yaye njani? (b) Kungokuthobela wuphi umyalelo esinokuthi sinikele imbeko kuYehova ngokubhekele phaya?
20 Namhlanje abantu abaninzi, ngokukodwa ulutsha, banikela imbeko kwabo babathandayo ngokubaxelisa—ngokuthetha njengabo nangokwenza izinto njengabo. Ngokufuthi abantu ababaxelisayo ngababalaseleyo kwezemidlalo okanye kwezolonwabo. Ngokwahlukileyo koko, njengamaKristu, sifanele simbeke uYehova uThixo ngokuzabalazela ukumxelisa. Umpostile uPawulos wabongoza ukuba senjenjalo, ebhala oku: “Yibani ngabaxelisa uThixo, ngokwabantwana abaziintanda; nihambe eluthandweni.” (Efese 5:1, 2) Ewe, ngokuzabalazela ukuxelisa uYehova, sinikela imbeko kuye.
21. (a) Yintoni eya kusixhobisela ukunikela imbeko kuYehova size simzukise? (b) Yiyiphi imivuzo uYehova ayinikelayo kwabo bambekayo?
21 Enyanisweni, kukho iindlela ezininzi esinokwenza ngazo nesifanele ngazo sinikele imbeko kuThixo size simzukise. Masingaze silibale ukuba ngokuzondla rhoqo ngeLizwi lakhe nangokuba ngabaqhelene ngakumbi naye, siya kukulungela ngakumbi ukunikela imbeko kuye. Yiyiphi imivuzo yokwenjenjalo? UYehova uthi, “Abo bandibekayo, ndiya kubabeka.” (1 Samuweli 2:30, NW) Ekugqibeleni uYehova uya kubabeka abanquli bakhe ngokubanika ubomi obungunaphakade elonwabeni, enoba kusezulwini njengabalawuli kunye noNyana wakhe, uYesu Kristu, okanye kumhlaba oyiParadisi.
Uyakhumbula Na?
◻ Ngokuqhelekileyo ngoobani abantu abanikela imbeko kubo, yaye ngubani ngokuqhelekileyo abamtyeshelayo ukumnika imbeko?
◻ Kuthetha ukuthini ukunikela imbeko kuthile, yaye ziziphi iindlela ekunokwenziwa ngazo oku?
◻ Ziziphi ezinye zezizathu ezisisiseko zokuba uYehova uThixo efanelwe kukunikwa imbeko?
◻ Ziziphi ezinye zeendlela esinokunikela ngazo imbeko kuYehova?
◻ Kungaziphi iindlela uYehova avuza ngazo abo banikela imbeko kuye?