Yiba Nembeko Kwabanye
“Ekuboniseni imbeko omnye komnye khokelani.”—ROMA 12:10.
1, 2. (a) Yintoni esimele siyenze ukuze sibe ngabathobekileyo engqondweni? (b) IBhayibhile idla ngokulisebenzisa njani igama elithi “imbeko,” kwaye ngoobani abakufumanisa kulula ukuba nembeko?
INQAKU lethu elandulelayo ligxininise kwisiluleko esikwiLizwi likaThixo esithi: “Nonke bhinqani ukuthobeka kwengqondo omnye ngakomnye, ngenxa yokuba uThixo ubachasile abo banekratshi, kodwa ubanika ububele obungasifanelanga abo bathobekileyo.” (1 Petros 5:5) Enye indlela esinokubhinqa ngayo ukuthobeka kwengqondo kukuba nembeko kwabanye.
2 Igama elithi “imbeko” lidla ngokusetyenziswa eBhayibhileni ukuchaza ukubahlonela, ukubaphatha ngesidima kunye nokubazelela abanye. Siyababeka abanye xa sibenzela ububele, sihlonela isidima sabo, siphulaphula izimvo zabo, sikulungela ukwenza izinto ezisengqiqweni abazicela kuthi. Ngokuqhelekileyo abo bathobekileyo engqondweni abayi kukufumanisa kunzima ukwenjenjalo. Noko ke, abo babhuqwa likratshi banokukufumanisa kunzima ukuba nembeko yokwenene kwaye kunoko basenokuzama ukufumana amaqithi-qithi kunye neengenelo ezithile ngokuhanahanisa.
UYehova Unembeko Ebantwini
3, 4. UYehova wamphatha ngembeko njani uAbraham, yaye ngoba?
3 UYehova ngokwakhe ungumzekelo wokuba nembeko. Wadala abantu banenkululeko yokuzithandela, yaye akabaphathi ngokungathi baziirobhoti. (1 Petros 2:16) Ngokomzekelo, xa waxelela uAbraham ukuba iSodom yayiza kutshatyalaliswa ngenxa yobungendawo obabuqatsele kuyo, uAbraham wabuza: “Ungade ubhebhethe olilungisa kunye nongendawo yini na? Hi, kwakho amashumi amahlanu amalungisa phakathi komzi; ungade uyibhebhethe, ungayixoleli, loo ndawo yini na, ngenxa yamalungisa amashumi mahlanu akuyo?” UYehova waphendula esithi wosixolela eso sixeko ngenxa yamalungisa angama-50. Emva koko, ngokuthobeka uAbraham wenyuka nengalo. Kuthekani ke ukuba angama-45? xa engama-40? angama-30 wona? angama-20? xa eli-10? UYehova wamqinisekisa uAbraham ukuba wayengayi kuyitshabalalisa iSodom ukuba nje kwakunokufunyanwa amalungisa alishumi kuyo.—Genesis 18:20-33.
4 UYehova wayesazi ukuba kwakungekho malungisa alishumi ngandawo eSodom, ukanti waba nembeko kuAbraham ngokuphulaphula izimvo zakhe nangokuqhubana naye ngentlonelo. Ngoba? Kaloku uAbraham “wakholwa kuYehova; oko wakubalela ebulungiseni kuye.” UAbraham wabizwa ngokuthi “umhlobo kaYehova.” (Genesis 15:6; Yakobi 2:23) Ngaphezu koko, uYehova wabona ukuba uAbraham wayebabeka abanye. Xa abalusi bakhe nabomtshana wakhe uLote babejijisana ngamadlelo, uAbraham waba nembeko kuLote ngokumxelela ukuba akhethe kuqala ummandla awayewufuna. ULote wakhetha umhlaba awayecinga ukuba ngowona ulungileyo, ibe uAbraham wathabatha ndlela yimbi.—Genesis 13:5-11.
5. UYehova waba nembeko njani kuLote?
5 UYehova waba nembeko ngokufanayo nakuLote olilungisa. Ngaphambi kokuba iSodom itshatyalaliswe, waxelela uLote ukuba asabele ezintabeni. Noko ke, uLote wathi akafuni kuya apho yena; esithi kubhetele ukuya eTsohare kude kufuphi nalapho, nangona eso sixeko sasikummandla owawuza kutshatyalaliswa. UYehova wathi kuLote: “Yabona, ndikunonelele nangale nto, ukuba ndingawubhukuqi lo mzi uthethe ngawo.” UYehova waba nembeko kuLote ngokwenza oko wayekucela.—Genesis 19:15-22; 2 Petros 2:6-9.
6. UYehova wamphatha ngembeko njani uMoses?
6 Xa uYehova wathuma uMoses eYiputa ukuba aye kukhupha abantu Bakhe ebukhobokeni aze athethathethane noFaro ngokukhulula abantu Bakhe, uMoses waphendula: “Camagu, Nkosi yam! Andindoda imazwi maninzi nanini na.” UYehova wamqinisekisa uMoses esithi: “Ndoba nomlomo wakho mna, ndikubonise into oya kuyithetha.” Sekunjalo uMoses wayesemadolw’ anzima. Kwathi kwakuba njalo, uYehova wamqinisekisa uMoses waza wenza ilungiselelo lokumthumelela umkhuluwa wakhe, uAron, ukuba abe sisithethi sakhe.—Eksodus 4:10-16.
7. Kutheni uYehova wayekulungele ukubaphatha ngembeko abanye?
7 Kuzo zonke ezo meko, uYehova wabonakalisa ukukulungela ukuba nembeko kwabanye, ngokukodwa kwabo babemkhonza. Nangona loo nto babeyicela yayisenokuba yahlukile kwinjongo yantlandlolo kaYehova, waziphulaphula izicelo zabo waza wenza umnyinyiva othile logama nje zazingangquzulani nenjongo yakhe.
UYesu Waba Nembeko Kwabanye
8. UYesu waliphatha ngembeko njani ibhinqa elaligula gqitha?
8 UYesu waxelisa uYehova ngokuba nembeko kwabanye. Ngenye imini, phakathi kwesihlwele kwakukho ibhinqa elithile elalibe nethombo legazi kangangeminyaka eli-12. Oogqirha baboyisakele ukulinyanga. Phantsi koMthetho kaMoses, ngokwesithethe laligqalwa njengelingahlambulukanga yaye lalingafanelanga ukuba libe lapho. Lajikela emva koYesu, lachukumisa ingubo yakhe laza laphila. UYesu akazange abambelele kubugocigoci boMthetho, elingxolisa ngenxa yoko lakwenzayo. Kunoko, eyazi imeko yalo, waba nembeko kulo, esithi: “Ntombazana, ukholo lwakho lukwenze waphila. Hamba ngoxolo, uze ube sempilweni entle kwisigulo sakho esibuhlungu.”—Marko 5:25-34; Levitikus 15:25-27.
9. UYesu wamphatha ngembeko njani oweeNtlanga?
9 Ngenye imini, ibhinqa laseFenike lathi kuYesu: “Yiba nenceba kum, Nkosi, Nyana kaDavide. Intombi yam iphethwe kakubi yidemon.” Esazi ukuba wayethunywe kuhlanga lwakwaSirayeli kungekhona kwabeeNtlanga, uYesu wathi: “Akulungile ukuthabatha isonka sabantwana [bakwaSirayeli] uze usiphose ezinjaneni [abeeNtlanga].” Eli bhinqa laphendula: “Kodwa ngokwenene izinjana zidla iimvuthuluka eziwa kwitafile yeenkosi zazo.” Emva koko uYesu wathi: “Owu mfazi, ukholo lwakho lukhulu; makwenzeke kuwe njengoko unqwena.” Intombi yalo yaphila. UYesu waba nembeko kweli bhinqa leeNtlanga ngenxa yokholo lwalo. Kwanokusebenzisa kwakhe ibinzana elithi “ezinjaneni,” kunokusebenzisa elithi izinja zasendle, kwabuthibaza ubuzaza balo mbandela kwaza kwabonisa imfesane.—Mateyu 15:21-28.
10. Sisiphi isifundo esinamandla uYesu awasifundisa abafundi bakhe, yaye kutheni sasiyimfuneko?
10 UYesu waqhubeka efundisa abafundi bakhe ngemfuneko yokuthobeka kwengqondo neyokuba nembeko kwabanye, ekubeni babesenesimo sengqondo sokuba ngabokuqala ezintweni. Ngenye imini emva kokuba beye baxoxisana, uYesu wabuza: “Benixoxisana ngantoni endleleni?” Bathi cwaka, kuba “babexoxisana phakathi kwabo ngokuba ngubani omkhulu ngakumbi.” (Marko 9:33, 34) Kwanangobusuku bangaphambi kokufa kukaYesu, “kwavela nempikiswano eshushu phakathi kwabo mayela nokuba nguwuphi na kubo obonakala engoyena mkhulu.” (Luka 22:24) Ngoko ebudeni besidlo sePasika, uYesu “wafaka amanzi esityeni waza waqala ukuhlamba iinyawo zabafundi.” Esinjani ukuba namandla isifundo! UYesu wayenguNyana kaThixo, inguYehova kuphela omkhulu kunaye kwindalo iphela. Ukanti, wafundisa abafundi bakhe isifundo esihle ngokuhlamba iinyawo zabo. Wathi: “Ndinibekela isizekelo, ukuba, kanye njengoko ndenjenjalo kuni, nifanele nenjenjalo nani.”—Yohane 13:5-15.
UPawulos Waba Nembeko
11, 12. Emva kokuba uPawulos eye wangumKristu, yintoni awayifundayo, yaye kutheni wasebenzisa esi sifundo ngokunxibelelene noFilemon?
11 Njengowayexelisa uKristu, umpostile uPawulos waba nembeko kwabanye. (1 Korinte 11:1) Wathi: “Besingafuni naluzuko luvela ebantwini . . . Ngokwahlukileyo koko, saba ngabathantamisayo phakathi kwenu, njengaxa umama oncancisayo ebaphatha ngononophelo abakhe abantwana.” (1 Tesalonika 2:6, 7) Umama oncancisayo uyabakhathalela abantwana bakhe. Emva kokuba uPawulos eye wangumKristu, wafunda ukuthobeka engqondweni waza waba nembeko kwamanye amaKristu ngokuwathantamisa. Ngokwenjenjalo, wahlonela nenkululeko yawo yokuzikhethela, njengoko kwabonakala kwisiganeko esenzeka xa wayelibanjwa eRoma.
12 Khoboka lithile elaliqhweshile elalibizwa ngokuba nguOnesimo laphulaphula imfundiso kaPawulos. Laba ngumKristu laza laba ngumhlobo kaPawulos. Inkosi yeli khoboka yayinguFilemon, owayekwangumKristu, ehlala eAsia Minor. Kwincwadi eyayisiya kuFilemon, uPawulos wamchazela indlela awayeluncedo ngayo uOnesimo kuye, esithi: “Bendingathanda ukumnkonya.” Ukanti, uPawulos wambuyisela uOnesimo kuFilemon, kuba wabhala esithi: “Andifuni kwenza nantoni na ngaphandle kwemvume yakho, khon’ ukuze isenzo sakho esilungileyo, singabi njengesokunyanzelwa, kodwa sibe sesokuthanda kwakho.” UPawulos akazange abambelele kwinto yokuba yena ungumpostile, kodwa waba nembeko kuFilemon ngokungaceli ukumgcina eRoma uOnesimo. Ngaphezu koko, uPawulos wabongoza uFilemon esithi abe nembeko kuOnesimo, amphathe “njengongakumbi kunekhoboka, njengomzalwana oyintanda.”—Filemon 13-16.
Ukuba Nembeko Kumhla Wethu
13. EyabaseRoma 12:10 isixelela ukuba senze ntoni?
13 ILizwi likaThixo liyaluleka: “Ekuboniseni imbeko omnye komnye khokelani.” (Roma 12:10) Oku kuthetha ukuba asifanele silinde ukuba ibe ngabanye abaqala ukuba nembeko kuthi, kodwa ifanele ibe sithi abaqalayo. “Ngamnye makathi gqolo efuna, kungekhona okwakhe ukulungelwa, kodwa oko komnye umntu.” (1 Korinte 10:24; 1 Petros 3:8, 9) Ngaloo ndlela, abakhonzi bakaYehova bakhangela amathuba okuba nembeko kumalungu entsapho, kwamanye amaKristu asebandleni nakwabo bangengomalungu ebandla.
14. Indoda nomfazi babekana njani?
14 IBhayibhile ithi: “Intloko yayo yonke indoda nguKristu; ngokulandelayo intloko yomfazi yindoda.” (1 Korinte 11:3) UYehova uyalela indoda ukuba iphathe inkosikazi yayo ngendlela uKristu aliphatha ngayo ibandla. Kweyoku-1 kaPetros 3:7, indoda iyalelwa ukuba inike inkosikazi yayo “imbeko njengesitya esibuthathaka ngakumbi, esobukhomokazi.” Inokwenjenjalo ngokukulungela ngokwenene ukuphulaphula nangokuwaphulaphula amacebiso enkosikazi yayo. (Genesis 21:12) Isenokulandela ukhetho lwayo xa umbandela ungenzulu, yaye iyenzele izinto ize iyiphathe ngobubele. Ngokufanayo, “umfazi ufanele abe nentlonelo enzulu ngendoda yakhe.” (Efese 5:33) Uyayiphulaphula, akasoloko etsalela kwelakhe icala, akayideli okanye asoloko eyichukela. Uba nengqondo ethobekileyo ngokungazami ukuyithi nqo ngempumlo indoda yakhe, kwanaxa enobuchule obungaphezulu kobayo kwizinto ezithile.
15. Bagqalwa njani abakhulileyo, yaye bafanele basabele njani?
15 Ebandleni lamaKristu, kukho abo bakufanelekela ngokukhethekileyo ukubekwa, abanjengabakhulileyo. “Suka ume ebusweni bengwevu, ububeke ubuso bexhego [okanye bexhogokazi].” (Levitikus 19:32) Kumele kube njalo ngokukodwa kwabo baye bamkhonza uYehova ngokuthembeka kangangeminyaka emininzi kuba “isithsaba sokuhomba zizimvi, sifunyanwa endleleni yobulungisa.” (IMizekeliso 16:31) Abaveleli bafanele bamisele umzekelo ngokuwanika intlonelo ewafaneleyo amanye amaKristu amadala kunabo. Kakade ke, nabo bakhulileyo bafanele babahlonele abancinane kunabo, ngokukodwa abo banesabelo kwimbopheleleko yokwalusa umhlambi.—1 Petros 5:2, 3.
16. Abazali nabantwana baphathana njani ngembeko?
16 Abaselula bafanele babe nembeko kubazali babo: “Bantwana, bathobeleni abazali benu ngokumanyene neNkosi, kuba oku kububulungisa: ‘Beka uyihlo nonyoko’; wona lowo ngumyalelo wokuqala onesithembiso esithi: ‘Ukuze kukuhambele kakuhle uze uhlale ixesha elide emhlabeni.’ ” Ngokufanayo, abazali bayababeka abaselula babo, kuba baxelelwa ukuba ‘bangabacaphukisi abantwana babo, kodwa baqhubeke bebakhulisela kwingqeqesho nasekweyiselweni kwengqondo kuYehova.’—Efese 6:1-4; Eksodus 20:12.
17. Ngoobani abafanelwe kukunikwa “imbeko ephindiweyo”?
17 Abanye abafanelwe yimbeko ngabo basebenza nzima bekhonza ibandla: “Amadoda amakhulu awongamela ngendlela entle makabalelwe ekuthini afanelwe yimbeko ephindiweyo, ngokukodwa lawo asebenza nzima ekuthetheni nasekufundiseni.” (1 Timoti 5:17) Enye indlela esingababeka ngayo kukwenza oko kuchazwa ngamaHebhere 13:17, athi: “Bathobeleni abo bakhokelayo phakathi kwenu nize nibalulamele.”
18. Yintoni esifanele siyenze kwabo bangengomalungu ebandla?
18 Ngaba sifanele sibe nembeko kwabo bangengomalungu ebandla? Ewe. Ngokomzekelo, siyalelwa oku: “Yonke imiphefumlo mayiwathobele amagunya awongamileyo.” (Roma 13:1) Aba ngabalawuli beli hlabathi abavunyelwe nguYehova ukuba balawule de uBukumkani bakhe bubashenxise. (Daniyeli 2:44) Ngoko ‘sinika bonke oko kubafaneleyo, lowo kufuneka irhafu kuye, simnika irhafu; lowo kufuneka unikelo kuye, simnika unikelo; lowo kufuneka uloyiko kuye, simnika uloyiko olo; lowo kufuneka imbeko kuye, simnika imbeko leyo.’ (Roma 13:7) Simele ‘sibeke abantu bazo zonke iintlobo.’Ok for X—1 Petros 2:17.
19. ‘Sinokukusebenza njani oko kulungileyo’ kwabanye size sibe nembeko kubo?
19 Ngoxa kuyinyaniso kona ukuba simele sibe nembeko nakwabo bangengomalungu ebandla, phawula oko iLizwi likaThixo likubethelelayo: “Lo gama sinexesha elilungileyo loko, masisebenze oko kulungileyo kubo bonke, kodwa ngokukodwa kwabo bahlobene nathi elukholweni.” (Galati 6:10) Kakade ke, eyona ndlela ilungileyo ‘esinokusebenza oko kulungileyo’ kwabanye ngayo kukuhlakulela nokwanelisa iintswelo zabo zokomoya. (Mateyu 5:3) Oku sinokukwenza ngokuthobela isikhumbuzo sikampostile uPawulos esithi: “Yenza unako-nako ukuba uzinikele ukholekile kuThixo, ungumsebénzi ongenanto anokuba neentloni ngayo, uliphatha ngokufanelekileyo ilizwi lenyaniso.” Xa siwasebenzisa ngobuchule onke amathuba esiwafumanayo okunikela ubungqina, ‘sibufeza ngokuzeleyo ubulungiseleli bethu,’ asaneli kubenzela okulungileyo kuphela kodwa sibaphatha ngembeko.—2 Timoti 2:15; 4:5.
Ukuba Nembeko KuYehova
20. Kwenzeka ntoni kuFaro nakwimikhosi yakhe, yaye ngoba?
20 UYehova uziphatha ngembeko izidalwa zakhe. Kusengqiqweni ke ngoko ukuba nathi sibe nembeko kuye. (IMizekeliso 3:9; ISityhilelo 4:11) Kwakhona iLizwi likaYehova lithi: “Ondizukisayo ndiya kumzukisa, abandidelayo bacukucezwe.” (1 Samuweli 2:30) Xa uFaro waseYiputa waxelelwa ukuba akhulule abantu bakaThixo, ngekratshi waphendula: “Ngubani na uYehova, ukuba ndiphulaphule izwi lakhe?” (Eksodus 5:2) Xa uFaro wafunza umkhosi wakhe ukuba uye kuwacim’ igama amaSirayeli, uYehova wawahlula amanzi oLwandle Olubomvu esenzela amaSirayeli. Kodwa xa amaYiputa alandelayo, uYehova wenza ukuba amanzi abuyelane. “Iinqwelo zokulwa zikaFaro nempi yakhe [uYehova] waziphosa elwandle.” (Eksodus 14:26-28; 15:4) Ngoko ukwala kukaFaro ngekratshi ukuba nembeko kuYehova kwakhokelela kwisiphelo esimanyumnyezi.—INdumiso 136:15.
21. Kwakutheni ukuze uYehova amchase uBheleshatsare, yaye waba yintoni umphumo?
21 UKumkani uBheleshatsare waseBhabhiloni akazange abe nambeko kuYehova. Ebudeni betheko elithile ekwakunxilwa kulo, wagculela uYehova ngokuselela iwayini kwizitya ezingcwele zegolide nezesilivere ezazithatyathwe kwitempile yaseYerusalem. Wathi esenjenjalo nje wabe enqula noothixo babahedeni. Kodwa umkhonzi kaYehova uDaniyeli wamxelela oku: “Akuyithobanga intliziyo yakho . . . Uziphakamisile ngaphezu kweNkosi yamazulu.” Ngobo busuku kanye uBheleshatsare wabulawa, kwaye ubukumkani bakhe bahluthwa kuye.—Daniyeli 5:22-31.
22. (a) Ingqumbo kaYehova yazifikela njani iinkokeli zakwaSirayeli nabantu bazo? (b) Ngoobani uYehova awakholiswa ngabo, yaye waba yintoni umphumo?
22 Ngenkulungwane yokuqala yeXesha lethu Eliqhelekileyo, uKumkani uHerode wayenikela intetho kwisihlwele, ibe sakhwaza sisithi: “Lilizwi lothixo elo, yaye asilamntu!” Esi saphuselana sokumkani asizange siyichase loo nto kunoko sazifunela uzuko. Kwathi kusenjalo, “ingelosi kaYehova yamxabela, ngenxa yokuba engamnikanga uzuko uThixo.” (IZenzo 12:21-23) UHerode wabeka isiqu sakhe, akambeka uYehova, ibe wabethwa wafa. Iinkokeli zonqulo zelo xesha azizange zimbeke uThixo ngokwenza iyelenqe lokubulala uNyana wakhe, uYesu. Abanye abalawuli babesazi ukuba uYesu ufundisa inyaniso kodwa bengafuni kumlandela, “kuba babethanda uzuko lwabantu ngakumbi kunozuko lukaThixo.” (Yohane 11:47-53; 12:42, 43) Lonke olo hlanga aluzange lumbeke uYehova okanye uMmeli wakhe omiselweyo, uYesu. Ngenxa yoko, uYehova wayeka ukulubeka, waluyekela lona netempile yalo lwatshatyalaliswa. Kodwa wabasindisa abo bambekayo nababeka uNyana wakhe.—Mateyu 23:38; Luka 21:20-22.
23. Yintoni esimele siyenze ukuze siphile kwihlabathi elitsha likaThixo? (INdumiso 37:9-11; Mateyu 5:5)
23 Bonke abo bafuna ukuphila kwihlabathi likaThixo elitsha emva kokutshatyalaliswa kwale nkqubo yezinto bamele babe nembeko kuThixo nakuNyana wakhe, uKristu uYesu, baze bamthobele. (Yohane 5:22, 23; Filipi 2:9-11) Abo bangenayo imbeko enjalo ‘bonqunyulwa ezweni.’ Kwelinye icala, abathe tye abambekayo uThixo noKristu “baya kulima ilizwe.”—IMizekeliso 2:21, 22.
Impinda
◻ Kuthetha ukuthini ukubeka abanye, yaye uYehova ukwenza njani oku?
◻ UYesu noPawulos bababeka njani abanye?
◻ Ngoobani abafanelwe kukubekwa kumhla wethu?
◻ Kutheni simele sibeke uYehova noYesu?
[Umfanekiso okwiphepha 17]
UYehova wamphatha ngembeko uAbraham ngokusinanza isicelo sakhe
[Umfanekiso okwiphepha 18]
Kwimitshato ephumelelayo, indoda nomfazi bayabekana