Lutsha—Kulumkeleni Ukuphila Ubomi Obumbaxa
‘Vuya, ndodana, ebutsheni bakho . . . Kodwa yazi ukuba ngenxa yezo zinto zonke uThixo uya kukusa ematyaleni.”—INTSHUMAYELI 11:9.
1, 2. Nguwuphi umzekelo esinawo woselula ophila ubomi obumbaxa?
“UKUSUSELA ebusaneni ndakhulela kwikhaya lamaKristu, phakathi kwamaNgqina ka Yehova. Nakuba kwakunjalo, ubomi endandibuphila, naxa ndisekhaya, babuchasene ngokupheleleyo nemilinganiselo yabazali bam kwanendlela ababecinga ngayo. Ubukhulu becala ubomi endandibuphila babubobuvakalala, ubomi bobunjubaqa,” wabhala oko omnye oselula.
2 Lo uselula wachaza ngokubhekele phaya esithi: “Kwanangaphambi kokuba ndifikelele ubudala beminyaka elishumi, ndaqalisa ukuba mbaxa kangangoko ndandinako—ukwamkeleka nokufumana ubuhlobo esikolweni ndize sekunjalo ndamkeleke nakubazali barn. Ndaziqhelanisa kangangoko ndandinako nesimbo kunye nehambo yasesikolweni . . . Kodwa ekhaya ndandahluke ngokupheleleyo. NdandingumKristu owayeziphethe kakuhle abaOOlindele ukuba ndiOO nguye abazali bam.”
3. (a) Yiyiphi intembelo esinayo, kanti yintoni esiyiqondayo? (b) Yintoni esiqhubela ekwalathiseleni kwethu ingqalelo kulutsha?
3 Siyaqonda ukuba ihambo yalo uselula asingomzekelo woko ikuko inkoliso yenu baselula ebandleni. Sinentembelo yokuba, uninzi lwenu lunyanisekile kubazali benu nasebandleni, yaye oku kuyazivuyisa iintliziyo zethu. Kwangaxeshanye, siyazi ukuba bambi bazenza babonakale bethe tye kodwa baze balifihle kangangoko banako ikhondo eliphosakeleyo. Ngenxa yoko kuphakama lo mbuzo: Ngaba uluhlobo lomntu osenza sicinge ukuba ululo, okanye ngaba uphila ubomi obumbaxa? Oku asikubuzi kuba sifuna ukuhlab’ amadlala kodwa, kunoko, ngenxa yokuba sikuthanda ngokwenene yaye sifuna ukukunceda ukuba ubunandiphe ubutsha bakho ngokubuphila ngendlela eya kukholisa uYehova.—INtshumayeli 11:9, 10; 12:14; 2 Korinte 5:10.
4. Kungayiphi indlela abathe nabanye abantu abakhulileyo baphila ubomi obumbaxa ngayo, kodwa yintoni eye yaphawulwa kutshanje kubantu abaselula?
4 Sekunjalo, usenokubuza oku: ‘Kutheni kukhethwa thina baselula? Kuthekani ngabantu abakhulileyo?’ Alithandabuzeki elokuba nabo bamele bakulumkele ukuphila ubomi obumbaxa. UGehazi, umkhonzi kaElisha, wenza ngenkohliso, ezama ukufihla inyaniso yokuba wazamkela izipho zikaNahaman. (2 Kumkani 5:20-26) The uHananiya noSafira, ababengabantu abakhulu, baxoka ngokuthi babelinikele kubapostile lonke ixabiso lentsimi—bezama ukuzenza babonakale belungile—xa ngokwenene babethe bazirhwebeshela enye imali. (IZenzo 5:1-4) Noko ke, isizathu sokuba salathisele ingqalelo kuni baselula sikukuba kuye kwabonakala ukuba le ngxaki iyanda phakathi kwenu.
Isizathu Sokuba Abanye Baphile Ubomi Obumbaxa
5. (a) Kutheni olunye ulutsha luphila ubomi obumbaxa? (b) Ludla ngokuphathwa njani ulutsha oluphila ubomi obuncomekayo, ibe ngoko yintoni eyenziwa lolunye?
5 Siyintoni isizathu soku? Omnye oselula wayechan’ ucwethe ekuchazeni esona sizathu siyintloko, esithi: “Ndandingafuni ukulahlekelwa ngabahlobo bam ngokuba ngowahlukileyo.” Kuyinyaniso ukuba ukwahluka ngokupheleleyo ngokufuthi kwenza ubani aOO sisisulu sokugculelwa. (Thelekisa eyoku-1 kaPetros 3:16; 4:4.) Ukuze lukuphephe oku nokuze lwamkeleke kumaqabane alo, olunye ulutsha lude lunxile okanye lube neentlobano zesini. Intombazana engeloNgqina eneminyaka eli-13 ubudala, eyayinkqenkqeza phambili ngamanqaku ezifundweni neyayisoloko isiba nenxaxheba kwiingxoxo ezenziwa kwigumbi lokufundela, ngokulusizi yathi: “Amakhwenkwe awasayi kuze abe nomdla kuthile amaziyo ukuba ulungile njengoko ndinjalo mna. . . . Ndicinga ukuwuthoba umgangatho wezifundo zam okanye ndenze enye into eya kuwenza abe nomdla kum.”
6. UPetros waphenjelelwa njani kwihambo ephosakeleyo, ibe ngoko oku kufanele kuyichaphazele njani indlela esilugweba ngayo ulutsha?
6 Okubalulekileyo kukuba, umpostile uPetros naye wakha wacinga ngakumbi ngaye, okanye ngodumo lwakhe, kunokuba acinge ngokwenza oko wayekwazi kulungile. Xa amaKristu angamaYuda awayevelae Yerusalem ayetyelele kwaAntiyokwe, uPetros wakuyeka ukunxulumana namaKristu aziiNtlanga ngenxa yokoyika ukugxekwa ngamaYuda ngenxa yokunxulumana nezi Ntlanga. (Galati 2:11-14) Ekubeni kwanamaKristu akhulileyo eye ngaloo ndlela anikezela kwingcinezelo yamaqabane, ngaba kukho nto imangalisayo ekubeni ulutsha olungenamava lusenza oko nalo?—IMizekeliso 22:15.
7. Yintoni esenokulingela olunye ulutsha ekubeni luphile ubomi obumbaxa?
7 Esinye isizathu esifana neso sokuba bambi babo baselula baphile ubomi obumbaxa sikukuba bakholelwa ekubeni baphoswa lulonwabo oluthile. Baye beve abaselula esikolweni bethetha ngeziyolo zabo—ngendlela ebelilikhulu ngayo itheko, ngomculo oluncuthu, ngokusela, ngeziyobisi, ngendlela eziye zabayoba ngayo! Okanye beva kuthethwa ngendlela abanye abangana kamnandi nabathandana ngayo. Ngoko umnqweno wokuzenza ezi zinto uthi uvuseleleke, baze aba baselula baphenjelelwe ekuOOni bazame ukwenza oko iBhayibhile ikubiza ngokuba ‘kukuxhamla izono okumzuzwana.’—Hebhere 11:24, 25; 1 Korinte 10:6-8.
8. Sisiphi isizathu esisisiseko esenza ukuba ulutsha luphile ubomi obumbaxa?
8 Noko ke, isizathu esisisiseko sokuba ulutsha oluthile luphile ubomi obumbaxa sikukuba uYehova nehlabathi elitsha elizayo ngokucacileyo asizizo izinto zokwenene kulo. Aluwakholelwa ngokwenene amadinga kaYehova okanye izilumkiso ezikhutshwa ngeLizwi lakhe nangentlangano yakhe ebonakalayo ngokuphathelele imiphumo yokungamthobeli uYehova. (Galati 6:7, 8) Alufani noMoses, ethi iBhayibhile ngaye: “Wayekhangele [ngenyameko, NW] ukwamkela umvuzo [kaThixo]. . . . Wakrota, wanga uyambona lowo ungenakubonwa.” KuMoses, uYehova namadinga Akhe ayezizinto zokwenene. Kodwa abo baphila ubomi obumbaxa abanalo obo kholo. Konke abakubonayo koko uSathana afuna bakubone—ukuqaqamba kwenkqubo yakhe. Ibe ngoko bathi bazame ukuxhamla izono okomzuzwana ukanti, kwangaxeshanye, bazama ukubonakala ngokungathi bangcwele.—Hebhere 11:26, 27.
Bazali, Ninokuba Negalelo
9. (a) Abazali banokuba negalelo njani ekuphileni kwabantwana babo ubomi obumbaxa? (b) Yintoni abakhulileyo ekufuneka bayiqonde baze bakuphaphele ukuyenza?
9 Oselula ocatshulwe ekuqaleni waphawula oku: “Oko kwakundenza ndingathandwa esikolweni kwandenza ndamkeleka ndaza ndakholiseka ekhaya. Kodwa ndandifuna okungakumbi kunoko. Ndandifuna uthile endandinokubambelela kuye, ndithethe naye, ndize ndizityand’ igila kuye, ibe ndandingakufumani oko kubazali bam.” Bazali, ngaba nikulumkele ukungabi nagalelo ekuphileni ubomi obumbaxa okwenziwa ngabantwana benu? Ngaba nibanika ingqalelo nokhokelo abalufunayo? Abantu abakhulileyo bamele baziqonde lula iingcinezelo ezinzima, ezilwenza buthathaka ukholo abathi abantwana bethu bajongane nazo esikolweni ibe bamele bakuphaphele ukwenza konke okusemandleni abo ekubeni babakhuthaze baze babancede.—INdumiso 73:2, 3; Hebhere 12:3, 12, 13.
10. (a) Ngumdla wokwazi ntoni oyimbopheleleko yabazali ukuwuzalisa? (b) Yintoni edla ngokuba ngumphumo xa abazali besilela ukunikela ukhokelo?
10 Ngokufuthi imibuzo yoselula iye ibe malunga nolwalamano namalungu esini esahlukileyo, mbandela lowo, abathi ngelishwa, abazali abaninzi bawuphephe. Umfundi oyinzwakazi nonembeko oneminyaka eli-15 ubudala wabalisa oku, “Babengaze babe nodliwanondlebe lwangasese kunye nam. Kwanyanzeleka ukuba ndizifundele ngokwam yonke into ephathelele isini. . . . Ndandineentloni kakhulu ukukuthetha oku nangona zazininzi kakhulu izinto endandifuna ukuzazi.” Waba yintoni umphumo? Wathi: “Olu donga lungabonakaliyo lwaya lusiba luqilima phakathi kwam nabazali barn, ndaza ke ndaba nomdla ovuthayo wokufun’ ukwazi, ndasisidenge nesisulu sentombazana.” Ewe, wanikezela kwizicengo zokuba neendibano zesini nomfana othile, kodwa unokuthi ngubani owafak’ isandla ekubangeleni oku kwenzeke?—IMizekeliso 22:3; 27:12.
11. (a) Abazali banokubonisa njani ukuba bayabathanda abantwana babo? (b) Kunokwenzeka ukuba ulutsha lusabele njani kuthando olunjalo?
11 Kubalulekile ukuba abazali bababonise abantwana babo ukuba babathanda ngokwenene ngokuthi bachithe ixesha kunye nabo, besiba nengxubusho yangasese nabo, bebanikela nemigaqo ekhokelayo. (IMizekeliso 15:22; 20:18) Omnye oselula waphawula oku, “Ndivakalelwa kukuba ukuba babendinyamekela ngokwenene babeya kundibekela imithetho ethile.” Nokuba abaselula bayayicekisa imithetho nemigaqo enibabekela yona ngoku, kamva baya kuyixabisa. Omnye oselula wabhalela unina oku: “Njengalowo wayesoloko efuna ukwaphula imilinganiselo, ekhangela amathuba neendlela zokukhululeka ukuze abhunce kumakhamandela aloo mithetho nemigaqo, ndivakalisa umbulelo ongazenzisiyo ngokuba waba ngqongqo kum.” Ngoko baboniseni ukuba niyabathanda abantwana benu ngokufuna ukuba bathobele imigaqo yenu ekhokelayo. Kwanga ningangaze nibe negalelo ekuphileni kwabo ubomi obumbaxa ngokuthi nisilele ukugcina amaqhina onxibelelwano evulekile okanye ngokusilela ukufumaneka xa benifuna!
12. Sisiphi isimo sengqondo sokungabi nabulumko sabanye abazali esibenza babe negalelo ekuphileni kwabantwana babo ubomi obumbaxa?
12 Abazali banokuba negalelo ngendlela eyahluke ngokupheleleyo ekuphileni kwabantwana babo ubomi obumbaxa. Amagqabaza ejaji yenkundla ephakamileyo yesizwe yaseNew Jersey angumzekelo woku. Le jaji yathi, “Abafundisi-ntsapho bayazama ukubohlwaya abantwana ngesenzo esiphosakeleyo esikolweni baze ke abazali babadle luhlaza endaweni yokuba babaxhase.” Kubonakala ngathi abanye abazali ngempazamo bakholelwa ekubeni abantwana babo abanakuyenza into ephosakeleyo. Kwanaxa abadala abangamaKristu okanye abanye abanembopheleleko ebandleni bebaxelela ngesenzo esiphosakeleyo sabantwana babo, abazali bazenza ngathi abeva. Ngokwenza oko, baba negalelo ekubeni mbaxa kwabantwana babo.
Oko Ngokwenene Bukuko Ubomi Obumbaxa
13. Ukuphila ubomi obumbaxa kufana nantoni ngokwenene?
13 Kubalulekile ukuqwalasela oku: Ukuphila ubomi obumbaxa ngokwenene kufana nokuba namaqhinga—ukuba ngumnyhwalazi, umhanahanisi. (INdumiso 12:2; 2 Timoti 3:13) Kufana nokuba nguSathana, ‘ozimilisa okwesithunywa sokukhanya.’ (2 Korinte 11:14, 15) Kukwathetha ukuba njengezo nkokeli zonqulo awathi uYesu ngazo: “Yeha, nina babhali, baFarisi, bahanahanisindini! Ngokuba nifana namangcwaba aqatywe ifutha, athi abonakale emahle okunene ngaphandle, kanti ngaphakathi azele ngamathambo abafileyo nokungcola konke. Ngokukwanjalo nani ngaphandle okunene nibonakala kubantu ningamalungisa, kanti ngaphakathi nizele luhanahaniso nokuchasene nomthetho.” (Mateyu 23:27, 28) Ngokucacileyo, ukuphila ubomi obumbaxa kusisono esinzulu kuThixo.
14. Kutheni ubani efanele afune ukukuphepha ukuphila ubomi obumbaxa?
14 Esinye isibakala esifuna ukuqwalaselwa ngokunzulu sesi: Ikhondo lokuhanahanisa alinakufihlwa ngonaphakade. IBhayibhile ithi, “Nenkwenkwe iyazazisisa ngeentlondi zayo, nokuba kuqaqambile na, nokuba kuthe tye na, ukwenza [isenzo, NW] kwayo.” (IMizekeliso 20:11; Luka 12:1-3) Ewe, isenzo sakho, enoba silungile okanye sibi, ekugqibeleni siya kwaziwa. Yaye iBhayibhile ibonisa ukuba uThixo uya kubohlwaya ngokuqatha abahanahanisi. (Mateyu 24:51) Ngokuqinisekileyo ufanele ufune ukukuphepha ukuphila ubomi obumbaxa!
Indlela Yokukuphepha
15. Yintoni eya kunceda ulutsha lukuphephe ukuphila ubomi obumbaxa?
15 Enye indlela yokuphepha ukuphila ubomi obumbaxa kukwamkela oko ngokwenene kufana nako uze ke uzibuze oku: Ngaba leyo yindlela endifuna ukukhunjulwa ngayo, njengomhanahanisi, njengomntu oxelisa uSathana nabaFarisi? Kakade ke akunjalo! Enye into eya kukunceda ukuphephe ukuphila ubomi obumbaxa kukucinga ngobuhlungu bentliziyo nentlekele engokobuqu oya kuziziselwa bubomi obunjalo. Khumbula oko kwenzeka kuGehazi ngokuzama ukuxoka. Iqhenqa likaNahaman lanamathela kuye, ibe waba ngumntu oneqhenqa ubomi bakhe bonke. Yaye uHananiya noSafira bobabini babethwa nguThixo ngokufa ngenxa yokuzama ukuzenza babonakale bengabantu abanesisa.—2 Kumkani 5:27; IZenzo 5:5, 9, 10.
16. Yintoni eyenzekayo komnye oselula owabandakanyeka kwindlela yobomi yehlabathi?
16 Kukwakho nemizekelo yanamhlanje. Omnye oselula waseUnited States wayeqalise ukufundisisa iBhayibhile nokuhamba iintlanganiso kwiHolo yoBukumkani. Kodwa wathi waqalisa ukungena nzulu kwindlela yehlabathi yobomi waza waluphelisa unxulumano lwakhe. Kwaqengqeleka iminyaka ethile, waza wabhala oku: “Malunga neenyanga ezimbini ezidluleyo ndiye ndacela uThixo ukuba andithumelele iNgqina kuba ndaziva ndinomnqweno wokuqalisa kwakhona. Ndandisele ndiqalisile ukufunda kwakhona xa kwathi kwehl’ intlekele. Kwinyanga edlulileyo ndandixilongiwe ndaza ndafunyaniswa ndineKaposi’s sarcoma, inxalenye yesifo esisandul’ ukuvela nesinganyangekiyo seAIDS.” Waqukumbela ngelithi: “Ukuba nje ndandilandele ndaza ndathobela izilumkiso zeZibhalo emva apho, ngendingekho kule meko namhlanje.” Ngokuqinisekileyo uyakufuna ukuyiphepha nayiphi na imiphumo emibi ngolo hlobo! Ihlabathi ngokwenene alinanto ixabisekileyo linokukunika yona.—1 Yohane 2:15-17.
17. Kukuphi ukuqwalasela okubhekele phaya okufanele kuncede ulutsha luphephe ukuphila ubomi obumbaxa?
17 Enye into ekwanokukunceda ukuphephe ukuphila ubomi obumbaxa kukuqwalasela umphumo oko okuya kuba nawo kwigama likaYehova. Oselula okhankanywe kwintshayelelo wathi umntu owayembone esamkela umdiza wagqabaza oku: “Ndandingazi ukuba amaNgqina kaYehova angatshaya. AkuloNgqina na wena?” Kamva wathi loo mbuzo wamenza waziva eneentloni kuba oko wayekwenza kwakusizisa ugculelo kuYehova. Ngaba ufuna oko? Ngaba umjongela phantsi kangako uThixo wethu ngokokude njengoSirayeli wamandulo ongathembekanga ube uya kuhlazisa igama lakhe?—INdumiso 78:36, 37, 41; Hezekile 36:22.
18. (a) Abazali kunokwenzeka ukuba basabele njani xa befumanisa ukuba umntwana wabo ebephila ubomi obumbaxa? (b) Kutheni oko kufanele kuluthintele ulutsha olungamaKristu ekuphileni ubomi obumbaxa?
18 Ngaphandle koko, cinga ngegama neemvakalelo zabazali bakho. Oselula okhankanywe ngasentla wabhala wathi, “Lwasa lona olungaliyo ekwathi ngalo abazali bam bafumanisa oko ndandikuko ngokwenene. Kwabothusa oko. The kwakukokokuqala ebomini barn ukuba ndibone umama notata bekhala. Oko ndandikwenzile kwakubenzakalise kakhulu.” Abazali bakho nabo mhlawumbi bangakhala, ukuba banokufumanisa ukuba ubuphila ubomi obumbaxa. Ngaba oko koko ukufunayo? “Igama elilungileyo linqwenelwa ngakumbi kunobutyebi obuninzi,” itsho njalo iBhayibhile. (IMizekeliso 22:1, The Jerusalem Bible) Ngokuphila ubomi obumbaxa, utshabalalisa igama lakho elilungileyo. Kodwa oko akupheleli apho. Ukwangcolisa negama elilungileyo labazali bakho yaye ulinyathelela phantsi, ubenza bahlazeke baze baphoxeke.—IMizekeliso 10:1; 17:21.
19. Ihambo embi yoonyana bakaYakobi yamenza wabonakala engumntu onjani, ibe sisiphi isifundo esinokufundwa koku?
19 Oonyana bakaYakobi bayibonisa ngokuchanileyo indlela abantwana abanokulitshabalalisa ngayo igama elilungileyo labazali babo. Xa intombi kaYakobi uDina yathi yadlwengulwa, abantakwayo babulala amadoda ornzi baza baphanga nesixeko, bebangela uYakobi avakalise oku kabuhlungu: “Nindihlisele ishwangusha, ukuze ndinuke phakathi kwabemi belizwe eli.” UThixo wade wamalathisela uYakobi ekubeni awushiye loo mmandla. (Genesis 34:30; 35:1) Nawe unokwenza igama likayihlo nelikanyoko linuke, ubenza babe neentloni zokujongana nabamelwane nabahlobo babo. Eneneni, kunjengokuba iBhayibhile isithi: “Bubuhlungu bukayise unyana osisinyabi; ububukrakra kurnzalikazi wakhe.”—IMizekeliso 17:25.
20. Sisiphi isipho esizukileyo abathe abazali abangamaKristu basenza safumaneka ebantwaneni babo?
20 Noko ke, sinentembelo yokuba akufuni ukuba abazali bakho beve ubuhlungu nobukrakra. Ngoko qwalasela imiphumo yezenzo zakho kubo. Kwakhona, ukuba ube nelungelo lokuba nabazali abangamaKristu, cinga ngoko baye bakunika kona—kungekuphela nje ubomi—kodwa into exabiseke ngakumbi. IBhayibhile ithi ngo Yehova: “Inceba yakho ilungile ngaphezu kobomi.” (INdumiso 63:3) Ngokukukhulisela enyanisweni, abazali bakho baye bakwenza wafumana inceba kaThixo, bekunceda ukuba ube nolwalamano kunye naye. Ukuba nako oku kulunge ngakumbi kunokuba nobomi kuba nokuba ufanele ufe, uThixo uya kukubuyisela kubomi obungunaphakade eParadisi.
Nceda Abanye Bakuphephe
21. (a) Yiyiphi imbopheleleko olunayo ulutsha olusaz1Yo isenzo esiphosakeleyo solunye? (b) Nguwuphi umzekelo omhle owanikelwa ngomnye oneminyaka eli-13 ubudala?
21 Kuthekani ukuba wazi uthile ophila ubomi obumbaxa? Kuqala, mkhuthaze loo mntu abonane nabadala. Ibe kuthekani ukuba akavumi ukukwenza oko? Ngoko kuyimbopheleleko yakho engokweZibhalo ukukuxela oko. (Levitikus 5:1) Siyaqonda ukuba oku akunakuba yinto elula, kodwa kuyinto efanelekileyo ukuba yenziwe. “Akholekile amanxeba omhlobo,” itsho njalo iBhayibhile. (IMizekeliso 27:6) Emva kokuva intetho eyayichaza ngembopheleleko yayo engokweZibhalo, intombazana eneminyaka eli-13 ubudala yaya kumhlobo eyayimazi ukuba wayebandakanyeke kwisenzo esiphosakeleyo yaza yamxelela ukuba wayefanele akuxele oko kubadala. Le ntombazana ibhala oku: “Ndaqinisekisa enoba wayethethile naye nawuphi na umdala. Wayengakwenzanga oko. Ngoko ndahamba ndaya kuthetha nomnye wabo.” Le ntwazana yabuza: “Ngaba ndandenze into efanelekileyo ngokuya kumxela ‘owayesakuba ngumhlobo wam osenyongweni?’” Ewe wayenze into efanelekileyo! Ngoxa okokuqala imiphumo yokwenza oku inokubangela ubuhlungu, kamva inokuzisa uvuyo, de ibe yesindis’ ubomi kulowo wenze okuphosakeleyo.—Hebhere 12:11.
22. Liliphi ikhondo lobulumko ulutsha olukhuthazwa ukuba luhambe ngalo, ibe uya kuba yintoni umphumo walo?
22 Kanti konke oku kunokuphetshwa ukuba akuphili bomi bumbaxa kwasekuqaleni. Ngoko ke lumka. Yakha ulwamano lobuqu olomeleleyo noThixo, njengoko ubunokwenza njalo nomhlobo osenyongweni. K wenze oku ngokuthandaza kuye rhoqo, ngokucela uncedo lwakhe nangokulifundisisa ngokukhutheleyo iLizwi lakhe, iBhayibhile, ukuze uziqonde ngokwenene iimpawu zakhe. Lutsha, niya kuthi ke nisikelelwe ibe niya kuzivuyisa iintliziyo zabazali benu. Kodwa okude kubaluleke ngakumbi kukuba, niya kuvuyisa intliziyo ka Yehova.—IMizekeliso 27:11.
Unokuphendula Njani?
◻ Kutheni olunye ulutsha luphila ubomi obumbaxa?
◻ Abanye abazali baba negalelo njani ekuphileni kwabantwana baba ubomi obumbaxa?
◻ Ukuphila ubomi obumbaxa ngokwenene kufana nantoni?
◻ Ulutsha lunokukuphepha njani ukuphila ubomi obumbaxa?
◻ Yiyiphi imbopheleleko ulutsha olunayo ukuba luyabazi abanye abaselula abaye benza izono ezinzulu?
[Umfanekiso okwiphepha 18]
Ukuthetha ngemicimbi yangasese kubonisa uthando lomzali
[Umfanekiso okwiphepha 20]
Ukuba uyazi ukuba omnye wenze isono esinzulu, mkhuthaze lowo ukuba aye kusixela