UYehova Uye Wandizimasa Njengomhlobo

Ngokubaliswa nguMaria Hombach

NJENGENTWAZANA eneminyaka emithandathu, esikolweni ndafunda ingoma eluncuthu yesiJamani eyayisithi: “Ngaba uyazi ukuba zingaphi iinkwenkwezi ezisesibhakabhakeni? . . . UThixo, iNkosi, uzibalile xa zizonke, akukho nanye emlahlekayo . . . Nawe uyakwazi, kwaye ukuthanda ngokwenene.” (Iguqulelwe isuka kwisiJamani.) Ngenye imini xa ndandiyivuma umama wathi: “Nawe uyakwazi kwaye uyakuthanda.” Ukususela ngoko, uThixo waba njengomhlobo kum. Ngembuyekezo ndafikelela esigqibeni sokuba ndimthande. Oku kwakungaphambi kweMfazwe Yehlabathi I xa sasihlala eBad Ems ngakuMlambo iLahn.

Ebudeni beholide yowe-1924, kwiminyaka elishumi elinesixhenxe kamva, ndadibana nentombazana eyintanga yam. Yayingomnye waBafundi BeBhayibhile, ngoku abaziwa njengamaNgqina kaYehova. Kangangeeveki ezine, saba neengxubusho ezishushu ezingonqulo. Kwandula ke kwaphakama umbandela ‘ongesihogo.’ “Ubungenakuze uyiqhotse ikati iphila kwisitovu esitshisayo, ngaba ubungakwenza oko?” yabuza ngelitshoyo le ntombazana. Kwabangathi ndibethwa ngumbane, kwaye ndaqonda ukuba ndandilahlekiswe ngendlela ehlazisayo. Ngoku ndakwazi ukufunda konke ngoThixo—ukuba unjani na ngokwenene, enyanisweni, yonke into endandifuna ukuyazi ngaye ukususela ebuntwaneni!

Kum kwaba ngathi ndifumene ‘ubutyebi obufihlwe entsimini.’ (Mateyu 13:44) Ndakubuyela ekhaya, ngehlombe ndaya kubamelwane bam ngokukhawuleza, intliziyo yam izele yimincili ifuna ukwabelana nabo ngezinto ezintsha endizifundileyo. Kungekudala emva koko, ndafudukela kwidolophu yaseSindelfingen kumzantsi welaseJamani apho kwakuhlala khona iqela laBafundi BeBhayibhile abamalunga nama-20. Ndabathelela ngenzondelelo kulo msebenzi mtsha wokushumayela kwindlu ngendlu.

Kwakungonyaka we-1929 ebudeni bentetho yomzalwana ongumlungiseleli ohambahambayo ekwathi kwaba kokokuqala ukuba ndive ngenkonzo yobuvulindlela. Wabuza ukuba ngubani na obengathanda ukuba nguvulindlela. Ngokuzenzekelayo ndaphakamisa isandla. Ndandingathandabuzi yaye ndandiqinisekile. Intliziyo yam yathi: “Ndikho, thuma mna.”—Isaya 6:8.

Ndawuyeka umsebenzi wam waseofisini ndaza ngo-Oktobha 1, 1928 ndaqalisa inkonzo yobuvulindlela obukhethekileyo, njengoko ibizwa njalo namhlanje, kumzantsi-ntshona welaseJamani. Ngokukhawuleza nangesisa sahlwayela imbewu yenyaniso ngoncwadi olushicilelweyo eLimburg, eBonn, kwiinqanawa zezizwe ngezizwe kwizibuko laseCologne, nakwezinye iindawo.—INtshumayeli 11:1.

Ukuba Namava Obuhlobo BukaThixo

Xa uAdolf Hitler wamisa ulawulo lwakhe lobuzwilakhe eJamani ngowe-1933, kwafuneka ndiyiyeke inkonzo yobuvulindlela ndaza ndabuyela eBad Ems. Ngokukhawuleza amagunya afumanisa ukuba andizange ndivote kunyulo. Kwiintsuku ezimbini kamva, amapolisa aliqela eza kugqogqa igumbi lam. Kwenye ikona kwakukho umgqomo wenkunkuma owawumi wodwa endathi, kumzuzwana ngaphambi koko, ndaphosa kuwo zonke iidilesi zamaNgqina angoowethu endandinazo lalingekho ixesha lokuzilahla! Amapolisa aphengulula yonke into—ngaphandle kwalo mgqomo.

Enjani indlela endandikuxabisa ngayo ukuba udade wethu uAnna, ebudeni belo xesha, abe naye wayebamkele ubuhlobo noThixo oyinyaniso! Ngowe-1934, safudukela kunye kwidolophu yaseFreudenstadt saze apho saqala ukusasaza uncwadi lweBhayibhile ngenyameko. Ebudeni bekhefu, saphumelela okwesihlandlo esinye ukwenza utyelelo olukhawulezileyo ngololiwe oluya kwidolophu yakokwethu eyiBad Ems, saza apho sasasaza ngokukhawuleza ibhokisi ezeleyo yeencwadi ezinemifanekiso ezingama-240, saza emva koko saphel’ emehlweni. Intshutshiso eyayibangelwa ngamaGestapo eFreudenstadt yasinyanzela ukuba sifudukele kwesinye isixeko, yaye ngowe-1936 saya eStuttgart. Ndilapho, ndazama ukuqhagamshelana neeofisi zethu zolawulo ezazisebenza ngokufihlakeleyo—kwangoko ndanikwa “umsebenzi” ekwakufuneka ndiwenzile. Ndandifumana amaqweqwe emibuliso anemifanekiso rhoqo. Ngokwenene, le mibuliso yayizizigidimi ezifihlakeleyo. Umsebenzi wam wawukukuba ndiyise kwindawo efihlakeleyo esixekweni. Ukuze ungaphazamiseki lo msebenzi, ndaxelelwa ukuba ndingasasazi naluphi na uncwadi: Yonke into yahamba ngokutyibilikayo de kwangoAgasti 1938.

Ngenye imini, ndafumana iqweqwe elandiyalela ukuba ndime phambi kwecawa eyaziwayo ngenye ingokuhlwa. Inkcazelo ebhekele phaya ndandiya kuyifumana apho. Ndaya kwindawo esasiza kudibana kuyo. Kwakumnyama tsiki. Ndoda ithile yazazisa ukuba inguJulius Riffel. Ndandisazi ukuba eli yayiligama lomzalwana othembekileyo owayesebenza emfihlekweni. Engxamile wandixelela ukuba ndiye eBad Ems ngomhla othile ukuze ndidibane nomntu othile. Waphel’ emehlweni ngephanyazo.

Noko ke, kwisikhululo sikaloliwe eBad Ems, ndandilindelwe kuphela ngamaGestapo. Kwakwenzeke ntoni? Indoda eyayiphambi kwecawa—enyanisweni owayesakuba ngumzalwana osuka eDresden, uHans Müller, owayesazi konke ngomsebenzi wasemfihlekweni eJamani yaye owayesele eqalise ukusebenza kunye namaGestapo—wayendenzele umgibe. Kodwa awuzange usebenze. Kungekudala ngaphambi koku, umama wayendazise ukuba uye wahlaselwa sisifo sokushwabana kwamalungu omzimba okwakungamxhalisanga kangako, yaye xa ndamphendulayo, ndamthembisa ukuba ndandiza kumtyelela eBad Ems ngomhla othile. Ngendlela evuyisayo oku kwenzeka ngamhla mnye nolu “thumo”, kwaye iileta zethu zanikela ubungqina bokuzithethelela emva kokuthethwa kwetyala lam. Ukukhululwa kwam kwandenza ndabamb’ ongezantsi. Ewe, ngoFebruwari we-1939, emva kweenyanga ezintlanu ezinesiqingatha ndiseluvalelweni, ndandikhululekile kwakhona!

Indlela Endasabela Ngayo Kubuhlobo Bakhe

Kakade ke, ndandingazimisele ukuhlala ndingasebenzi, ingakumbi njengoko inkoliso yabazalwana babebandezelekile kwiikampu zoxinaniso okanye bebanjiwe kwezinye iindawo.

Emva kokuba abazalwana abanembopheleleko baseJamani bebanjiwe ngenxa yoncedo lukaMüller, uLudwig Cyranek wangena ezihlangwini zabo esasaza ukudla kokomoya. Lo mzalwana, owayesakuba ngumsebénzi waseBheteli eMagdeburg, wayesandula ukukhululwa eluvalelweni, ibe weza kundityelela eBad Ems. Wathi kum: “Mus’ ukuzityhafisa, Maria! Masiqhubeke nomsebenzi.” Wandibuyisela eStuttgart, apho ndafumana umsebenzi wengqesho. Noko ke, ukususela ngoMatshi 1939, owona msebenzi wam wokwenene, waba kukusasaza iisutkeyisi ezizele ngamaphephancwadi akhutshelweyo eMboniselo eStuttgart nakwindawo eziyingqongileyo. Amanye amaNgqina aba nesabelo ngenkalipho kulo msebenzi.

Ngelo xesha, umzalwana uCyranek waligubungela lonke ilizwe ngaphandle komntla-mpuma walo. Ekubeni amakhaya amaNgqina ayebekwe esweni, kwafuneka ahambe ngobulumko obukhulu kwaye ngamanye amaxesha ade alale ematyholweni. Amaxesha ngamaxesha wayesiza eStuttgart ngololiwe okhawulezayo, apho wayendibizela iingxelo ezikhethekileyo ngemeko yethu eJamani. Ndandibhala iileta eziqhelekileyo phakathi kwemigca ndifakele le miyalezo ngeinki engabonakaliyo ndize ndizithumele, ngenye idilesi, ukuze zigqithiselwe kwiBheteli eseNetherlands.

Kulusizi ukuthi, umzalwana wesibini waba ngumngcatshi kuba ebaleka ukuvalelwa. Unyaka kamva, wangcatsha amaqela aseStuttgart nakwezinye iindawo kumaGestapo. NgoFebruwari 6, 1940 sabanjwa. ULudwig Cyranek waya kwigumbi likaMüller eDresden—ecinga ukuba uMüller wayeseliNgqina elinguwabo—kulapho wabanjwa khona. Kamva umzalwana uCyranek wagwetyelwa ukufa waza waxhonywa ngoJulayi 3, 1941.a

Ngoku iintshaba zethu zazikholelwa ukuba ziwuphelisile wonke umsebenzi wethu eJamani. Kodwa amalungiselelo ayesele enziwe ukuqinisekisa ukuba umthombo wenyaniso wawuqhubeka umpompoza, enoba wawuthontsiza nje. Ngokomzekelo, iqela elaliseHolzgerlingen lakwazi ukuhlala likhuthele kwada kwaba sekupheleni kwemfazwe ngowe-1945.

Akaze Abashiye Abahlobo Bakhe

Mna noAnna, sikunye nabanye oodade abathembekileyo, sathunyelwa kwintolongo yaseStuttgart. Ngokufuthi ndandisiva amabanjwa ebethwa. Ukuvalelwa wedwa esiseleni ungenanto unokuyenza kungamava awoyikekayo. Kodwa ekubeni sasingazange siphoswe nayenye intlanganiso yamaKristu kwaye siselula, sakwazi ukukhumbula phantse onke amanqaku eMboniselo. Umphumo waba kukuba, ukholo lwethu lwahlala lomelele, saza sakwazi ukunyamezela.

Ngenye imini, kwafika amadoda amabini angamaGestapo esuka eDresden eze kusithabatha mna noGertrud Pfisterer (ngoku onguWulle) owayengumbanjwa onguwethu ukuze siye kufaniswa. Ngokuqhelekileyo, amabanjwa ayevunyelwa ukuba ahambe ngoololiwe abacothayo kuphela, ababehamba iintsuku. Kodwa thina salungiselelwa igumbi lonke lokulala kuloliwe okhawulezayo, nangona wayezele emi ngeembambo. Amagosa avakala esithi: “Nina nibaluleke gqitha kuthi. Asithandi ukuphulukana nani.”

EDresden, amaGestapo andimisa ubuso ngobuso phambi komngcatshi wesithathu owayephume kuthi. Ndaqonda ukuba ikho into ephosakeleyo, ndaza ndathi cwaka, andambulisa nokumbulisa. Emva koko ndaziswa ukuba ndijamelane ubuso ngobuso nofafa olude, isigantsula sendoda enxibe impahla yobujoni: uMüller, ongumngcatshi endandidibene naye phambi kwecawa. Ndemka kwelo gumbi ndingakhuphanga nelimdaka. AmaGestapo akazange afumane nento le kum.

Ngamnye kwaba bangcatshi waba nesiphelo esibi. Njengoko esitsho amaNazi, athanda isenzo sokungcatsha kungekhona umngcatshi. Bobathathu bathunyelwa emdeni osempuma ukuba bengazange baphinde babuye. Hayi indlela izinto ezaba nomphumo owahluke ngayo kwabo bangazange babuncame ubuhlobo babo noThixo nabantu bakhe! Uninzi lwabathembekileyo, phakathi kwabo ekukho uErich Frost noKonrad Franke, abathi beva ubunzima obukhulu ngenxa yeNkosi nabathi kamva bangabaveleli besebe eJamani, babuya bephila kwiziko elibumlilorha lentshutshiso.b

AmaGestapo aseStuttgart—ezingca kakhulu ngenxa “yexhoba”—acela abalingane bawo ababeseDresden ngoMeyi 1940 ukuba basibuyise. Amatyala ethu ayeza kuvavanyelwa kumzantsi welaseJamani. Kodwa kubonakala ngathi amaGestapo asemantla ayengavani kakuhle nalawo asemazantsi, ngenxa yoko iofisi yaseDresden yala ukusithumela, ekwathi lawo aseStuttgart eza ngokobuqu asithabatha emka nathi. Kwenzeka ntoni ngoku? Uhambo oluya kwisikhululo sikaloliwe lwaba loluyolisayo lugqitha ecaleni komlambo iElbe; kwizisele zethu sasingazange sibone mithi iluhlaza nasibhakabhaka kangangexesha elide. Njengoko bekunjalo ngaphambili, lonke igumbi lokulala likaloliwe lagcinelwa thina kuphela, sade savunyelwa ukuvuma neengoma zoBukumkani. Xa sasitshintsha oololiwe, safumana isidlo kwindawo yokutyela yalapho esikhululweni. Khawufan’ ucinge, kusasa sasifumene kuphela nje iqhekeza lesonka esomileyo, kanti ngoku sifumana oku!

Ityala lam lathethwa enkundleni yomthetho eStuttgart ngoSeptemba 17, 1940. Ngokubhala nangokuthumela iincwadi zikaLudwig Cyranek, ndazisa abantu ababehlala kwamanye amazwe ngomsebenzi wethu wasemfihlekweni nangokutshutshiswa kwethu. Oku yaba kukungcatsha umbuso, okusigwebo sako sikukufa. Ngoko ke yabonakala njengommangaliso into yokuba mna, njengommangalelwa oyintloko eStuttgart, ndigwetywe iminyaka emithathu enesiqingatha kuphela ndivalelwe ndedwa! Ngokucacileyo, igosa lamaGestapo elinguSchlipf, owayesithanda nonesazela esasimkhathaza, waba nempembelelo. Wayekhe wayikhankanya into yokuba akakwazi nokulala ngenxa yethu “mantombazana.” EDresden ndandingenakunikwa isigwebo esilula ngolu hlobo.

Ukungenelwa Kubuhlobo Obuhlala Buhleli

Nangona ukutya kwasentolongweni kwakungekubanga njengoko kwakwiikampu zoxinaniso, ndaphelelwa sisiqu kwaye ekugqibeleni ndandibhitye ndingamathambo. Yadlula iminyaka yowe-1940 ukusa kowe-1942, yaye ngokufuthi ndandifikelwa ziingcinga ezithi: ‘Xa sele usigqibile isigwebo sakho, baya kukufaka kwikampu yoxinaniso apho uya kuba noodade bakho ungabi saba lilolo.’ Ukuba ndandisazi.

Abalindi bakhwankqiswa kanobom xa samkelwayo isicelo sokukhululwa kwam, esasenziwe ngabazali bam abangamaKatolika. (Ngokuphindaphindiweyo ndandikwala ukusenza ngokwam isicelo esilolo hlobo.) Nangona amakholwa angoowethu ayephoswe kwiikampu zoxinaniso, mna—ndigwetyiwe ngokungcatsha umbuso kwaye ngaphandle kwako nakuphi na ukulalanisa—ndandiza kuphuma ngokulula nje! Ngoko ngowe-1943 ndandikhululekile kwakhona kwaye ngaloo ndlela ndikulungele ukufumana umbandela wobuthixo ngeyona nyameko inkulu ukusuka eHolzgerlingen. Emva kokuba ndiwukhuphele, ndawufihla kumaleko weflaski eyayizele yikofu ndaze ndawusa kubazalwana abahlala ngakumlambo iRhine kwanakwicandelo iWesterwald yaseJamani. Ukususela ngelo xesha ukusa ekupheleni kwemfazwe, ndakwazi ukusebenza ndingaphazanyiswa nto. Kamva ndeva ukuba amapolisa awayenobuhlobo kuthi awayefumene izaziso zokusincetheza awazange azithumele kumaGestapo.

Kwenzeka ntoni emva kowe-1945? Ndandinomnqweno wokuba nguvulindlela kwakhona ngokukhawuleza kangangoko kwakunokwenzeka. Ngokungalindelekanga ndafikelwa sesona simemo sichwayitisayo kwendakhe ndazifumana. Andizange ndibe nayo nasemaphupheni ingcamango yokumenyelwa ukusebenza eBheteli eseWiesbaden!

Bendilapho eBheteli ukususela ngoMatshi 1, 1946, (ngoku eseSelters/Taunus). Kangangeminyaka ndibe novuyo lokusebenza kwiofisi eyayisonganyelwa nguKonrad Franke owayesakuba ngumveleli wesebe. Kwakhona ndiye ndasebenza ngovuyo nakwamanye amasebe, ngokomzekelo, apho kuhlanjwa impahla. Nanamhlanje, kubudala bama-87, ndisasebenza apho iiyure eziliqela ngeveki ndisonga iitawuli. Ukuba wawukhe watyelela kwiBheteli yethu, mhlawumbi sakhe sabonana.

Ekuhambeni kwexesha, ndibe nelungelo lokunceda abantu abaninzi bamkele inyaniso, kuquka umama nomnye udade wethu. Amazwi kamama athi, “Nawe uyakwazi kwaye uyakuthanda,” ndiwafumanise ukuba ayinyaniso, njengokuba ayenjalo amazwi omdumisi athi, “yena wokuzimasa.” (INdumiso 55:22) Olunjani uvuyo ekube lulo ukuthanda uYehova ngoxa endizimasa njengomhlobo!

[Imibhalo esemazantsi]