Ukuqiqa Okusezindabeni
Impembelelo YobuSathana
Emva kokwenza uphando ngempembelelo yenkqubo yobuSathana kumculo werock nomculo weenkcenkce ezingxolayo werock, umbhali wemihlathi kumaphephandaba waseToronto uTom Harpur ubhala oku kwiThe Sunday Star: “Ndimele ndinikele isilumkiso esiqatha kangangoko kunokwenzeka ngento eyenzekayo. . . . Andizange ndibone nantoni na ekhuthaza inkohlakalo ngolu hlobo. Ezi ngoma zibalaselisa impambano, ubugeza, iidemon, igazi, izithuko, lonke uhlobo logonyamelo, kuquka ukudlwengula, ukuzenzakalisa, ukubulala nokuzibulala. Ukufa nokutshabalalisa, iziprofeto zentshabalalo, ukungavumelani nobukho bezinto ezilungileyo, nokwamkelwa kwako konke okungalunganga nokubi—oko kuyimixholo ephambili.”
Okuhambisana nokwanda komculo wobusathana kukwanda kwephulo lomlingo wobugqwirha kubusathana eUnited States naseKhanada. Linikela ingxelo kwingqungquthela yabakwantsasana yakutshanje ebiseOntario, iThe Globe and Mail, iphephandaba laseKhanada, lithi iinkonzo zobusathana ‘zibandakanyeke kumadini ezilwanyana, kukungahlonelwa kwamangcwaba nenkqubo yokuphathwa kakubi kwabantwana.’ Umcuphi uJames Bradley waseWashington, D.C., wanxulumanisa iimeko ezininzi zokuphathwa kakubi kwabantwana nolwaphulo-mthetho lwenkqubo yobuSathana. Njengoko kucatshulwe kwiThe Globe and Mail, umcuphi uBradley wongezelela ngokuthi kwiminyaka emihlanu edlulileyo, kuye kwafunyanwa iingxelo zokuphathwa kakubi kwabantwana ‘kubantwana, koonontlalo-ntle nakubafundisi-ntsapho abaninzi.”
Ebhekisela ‘kwimihla yokugqibela’ yale nkqubo ingendawo yezinto, umpostile uYohane wabhala oku: “Uhlile weza kuni uMtyholi, enomsindo omkhulu, esazi nje ukuba ixesha analo lincinane.” (2 Timoti 3:1; ISityhilelo 12:12) Impembelelo kaSathana, ‘umphathi wegunya lesibhakabhaka,’ seyingene ngamandla nakumculo othandwayo weli hlabathi. (Efese 2:2) Kungenxa yoko le nto umpostile uPawulos waluleka amaKristu angoowabo ukuba ‘amise awachase amaqhinga kaMtyholi.’—Efese 6:11.
“Alilawuleki”
Xa ibhinqa elineminyaka engama-28 ubudala elalisenza umthambo wokubaleka endleleni labethwa laza ladlwengulwa kuMyezo okuMbindi wesiXeko saseNew York, abantu abazizigidi bothuka baze bakhwankqiswa. Kwakutheni? INew York Post inikela ingxelo yokuba le ntlaselo yenkohlakalo nebulwanyanarha yabangelwa liqela labakwishumi elivisayo ‘okwathi ukuvuyelela kwalo okulinyala nokungakhathali kwalo ngentlungu elayibangelayo ekugqibeleni yaba yeyoyikeka ngokwenene.’ Lumbi lolutsha olwalubandakanyekile kolo lwaphulo-mthetho lwenkohlakalo kuthiwa lwalunokuba neminyaka eli-14 ubudala. Efane wee nkamalala ngenxa yale ntlaselo, omnye umbhali wePost wavuma ukuba ihlabathi liye laba ‘libutho labantu elingaqeqeshekanga, elithanda ukuzifica, elizaliswe ngamakhoboka eziyobisi, elisoloko likhuthaza isini, elineentsapho eziqhekekileyo neliphanjaniswe lugonyamelo’ eliye laba ‘lelingalawulekiyo yaye umbuzo ukukuba: kutheni?’
Enyanisweni, esi sizukulwana sogonyamelo olungenakuthelekiswa nanto sikoko kanye kwaxelwa kwangaphambili ngumpostile uPawulos kweyesi-2 kuTimoti 3:1-5. Apho wachaza ukuba “imihla yokugqibela” yayiya kuphawulwa ngabantu ‘abathanda iziqu zabo, abathanda imali, bezigwagwisa, bengoozwi-labo.’ Okungakumbi kukuba, “baya kunyelisa, bangathobeli bazali, bengabuleli, beluchasa unqulo, bengenabuntu, bengaxoleli mntu, behleba. Baya kuba neengcwangu, bezindlobongela, bayithiye into elungileyo. Baya kuba ngabangcatshi, bafane benze, benekratshi. Baya kuthanda iziyolo kunoThixo.” (iTestamente Entsha Yenguqulelo Entsha YeBhayibhile YesiXhosa) Ngaba eli hlabathi linogonyamelo liya kuhlala ‘lingalawuleki’ ngokungenasiphelo? Akunjalo! UYesu wathi: “Zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.”—Luka 21:28.