Indlela Okunokupheliswa Ngayo Ukuhleba Okwenzakalisayo

“Umlomo wam wumisele umlindi, Yehova; misa umgcini emnyango womlomo wam.”—INDUMISO 141:3.

1. Nguwuphi umsebenzi wengqondo esiyinikwe nguThixo?

UYEHOVA usinike ubuchopho, ibe hayi indlela obumangalisa ngayo! Incwadi iThe Incredible Machine ithi: “Kwanezona khompyutha zintsonkothileyo sinokucinga ngazo aziyonto xa zithelekiswa nokuntsonkotha kwanobugocigoci obuphantse bungabi nakulinganiswa bobuchopho bomntu . . . Izigidi zemiqondiso ethunyelwa ebuchotsheni bakho ngalo nangaliphi na ixesha zithwele inkcazelo eninzi ngokukhwankqisayo. Zizisa iingxelo ngemekobume yangaphakathi neyangaphandle yomzimba wakho . . . Njengoko eminye imiqondiso icwangcisa ize ihlahlele inkcazelo, ivelisa iintshukumisa, iinkumbulo, iingcinga okanye amacebo athile akhokelela kwisigqibo. Phantse ngoko nangoko, imiqondiso esuka ebuchotsheni bakho ixelela amanye amalungu omzimba wakho oko afanele akwenze . . . Ngelo thuba ubuchopho bakho bukwahlola ukuphefumla kwakho, ukuhamba kwegazi lakho, ubushushu bomzimba nezinye iinkqubo ezibaluleke kakhulu ongaziphawuliyo konke konke wena.”—Iphepha 326.

2. Nguwuphi umbuzo ngoku esifanele siwunikel’ ingqalelo?

² Ngokuqinisekileyo, eso sipho simangalisa ngolo hlobo esivela kuThixo sifanele singaze sisetyenziswe njengomgqomo wenkunkuma. Kanti, sinokubusebenzisa kakubi ubuchopho ngokuphulaphula nangokusasaza intlebendwane eyenzakalisayo. Sinokuyiphepha njani incoko enjalo size sincede nabanye ukuba bazikhwebule kuyo?

Ukuxabisa Ingqondo Esiyinikwe NguThixo

3. Kutheni le nto umKristu wokwenyaniso engasayi kuze abandakanyeke kwincoko eyenzakalisayo?

³ Ukubonakalisa uxabiso ngengqondo uThixo asinike yona kuya kusithintela ekuphulaphuleni nasekusasazeni intlebendwane eyenzakalisayo. Umoya kaYehova awuyi kushukumisela nabani na ekuzaliseni ingqondo yakhe ngeengcamango ezinjalo aze asebenzise ulwimi lwakhe ekwenzakaliseni nabani na. Kunoko, iLizwi likaThixo lithi: “Ongendawo makashiye indlela yakhe, indoda enobutshinga mayishiye iingcinga zayo.” (Isaya 55:7) Ingqondo yomntu ongendawo izaliswe ziingcamango ezimbi, ibe akaphozisi maseko ekuhlebeni ngokunyelisa othe tye. Kodwa besingayi kuze silindele intetho enjalo kwabo babonakalisa uxabiso ngengqondo abayinikwe nguThixo.

4. Ukuba siyabuxabisa ubuchopho bethu namandla ethu okuthetha, siya kuyisebenzisa njani ingqondo yethu nolwimi lwethu?

⁴ Ukubonakalisa uxabiso olufanelekileyo kuya kusinceda ukuba siphephe ukusebenzisa ingqondo yethu nolwimi lwethu ekukholiseni umzimba wethu onesono. Endaweni yoko, siya kukugcina ukucinga nokuthetha kwethu kukumgangatho ophakamileyo. Sinokukuphepha ukuhleba okwenzakalisayo ngokukholosa ngomthandazo ngaLowo ongcinga zakhe ziphakame lee kunezethu. Umpostile uPawulos waluleka esithi: “Iinto zonke eziyinene [ezingebobuxoki okanye intlebendwane], iinto zonke ezindilekileyo [kungekhona ezibubuvuvu], into zonke ezibubulungisa [kungekhona ezingendawo nezenzakalisayo], iinto zonke ezinyulu [kungekhona ukunyoka abanye nezikrokro], iinto zonke ezithandekayo [kungekhona ezingamasikizi nezihlazisayo], iinto zonke eziludumo lulungileyo [kungekhona ezithob’ isidima], ukuba kukho sidima [kungekhona ububi], ukuba kukho ndumiso [kungekhona ukugxeka], zithelekeleleni ezo zinto.”—Filipi 4:8.

5. Yintoni abo babekhonza noPawulos abayibonayo nabayivayo ngaye?

⁵ UPawulos wongezelela ngelithi: “Kwaezo zinto nazifundayo, nazamkela, naziva, nazibona kum, yenzani zona ezo; waye uThixo woxolo eya kuba nani.” (Filipi 4:9) Yintoni abanye abayibonayo nabayivayo ngoPawulos? Zizinto ezinyulu nezakhayo ngokomoya. Akazange azalise iindlebe zabo ngokubahlebela ngemeko yamvanje kaLidiya okanye kaTimoti. Unokuqiniseka ukuba uPawulos akazange aphulaphule aze asasaze amarhe ngamadoda amakhulu aseYerusalem.a Kunokwenzeka ukuba, uPawulos wancedwa kukubonakalisa intlonelo ngengqondo ayinikwe nguThixo okwamncedayo ukuze azinxweme ekubandakanyekeni ekuhlebeni okwenzakalisayo. Siya kuba sixelisa umzekelo wakhe ukuba sibonakalisa uxabiso ngokwenene ngengqondo nolwimi uYehova asinike lona.

Ukuhlonela UThixo NeLizwi Lakhe

6, 7. (a) UYakobi wayibonisa njani imiphumo yolwimi olungalawulekiyo? (b) Yintoni engasayi kuze yenzeke ukuba sihlonela uThixo neLizwi lakhe?

⁶ Kwakhona ukumhlonela ngokusuk’ entliziyweni uThixo neLizwi lakhe eliNgcwele kuya kusinceda ukuba sikuphelise ukuhleba okwenzakalisayo. Eneneni, intlonelo enjalo iya kusishukumisela ekubeni sithobele isiluleko somfundi uYakobi, owachaza imisebenzi yolwimi. (Yakobi 3:2-12) Ukuba umntu unokulubamba ulwimi lwakhe, uya kukwazi ukuwubamba ngomkhala umzimba wakhe uphela, kwanjengokuba umkhala osemlonyeni wehashe unokusilawula eso silwanyana. Njengokuba intlantsana yomlilo inokutshisa ihlathi, ngoko ulwimi oluncinane lunokuba ngumlilo otshabalalisa izinto ezibalulekileyo ebomini. Umntu unokuwadambisa amarhamncwa ehlathi, iintaka, izinto ezirhubuluzayo nezidalwa zaselwandle “ke lona ulwimi alunaye noko amnye ebantwini, unokuludambisa,” watsho njalo uYakobi. Kanti, eso ayisosingxengxezo sokungenzi mgudu wokuphepha ukuhleba okwenzakalisayo.

⁷ Kwakhona uYakobi wathi kwakolu lwimi lunye kuphuma intsikelelo nesiqalekiso. Oku akufanelekanga, kuba umthombo awumpompozi amanzi amnandi nakrakra. Umkhiwane awunakuvelisa iinkozo zomnquma, yaye amanzi amtyuba awavelisi amanzi amnandi. Kambe ke, logama amaKristu engafezekanga, ulwimi alunakuqhotyoshwa ngokugqibeleleyo. Oku kufanele kusenze sibe nenceba kuboni abaguqukayo, sekunjalo oku akukuthetheleli ukuhleba okwenzakalisayo. Ngokuxhomekeke kuthi, asisayi kulusebenzisa ngendlela eyenzakalisa nephosakele ngolo hlobo ulwimi ukuba simhlonela ngokwenene uThixo neLizwi lakhe.

Indlela Onokunceda Ngayo Umthandazo

8. Umthandazo unokusinceda njani ukuba siphelise ukuhleba okwenzakalisayo?

⁸ Isilingo sokuphulaphula kwintlebendwane eyenzakalisayo nesokuyisasaza sinokuba namandla kakhulu. Ngoko ukuba uye wayekelela kwisilingo esinjalo kwixa elidluleyo, ngaba akufanele ucele uxolo noncedo lukaThixo? UYesu wasifundisa ukuba sithandaze sithi: “Ungasingenisi ekulingweni, sihlangule enkohlakalweni.” (Mateyu 6:13) AmaKristu áthandaza ngokunyanisekileyo kuThixo ukuba angawayekeli kwisilingo esinjalo sencoko embi awasayi kunikezela kweli qhinga likaSathana; aya kuhlangulwa kulo mhlebi mkhulu.

9. Ukuba sihendelwa ekunyokeni nabani na, sisenokuthandaza sithini?

⁹ Ukuba sihendelwa ekunyokeni nabani na, sisenokuthandaza sithi: “Umlomo wam wumisele umlindi, Yehova; misa umgcini emnyango womlomo wam.” (INdumiso 141:3) Sinokuphulukana namadinga ethu obomi obungunaphakade ngokunikezela kwisilingo nangokuxelisa uMtyholi ongumhlebi onezothe, olixoki nongumbulali. (Yohane 8:44) Umpostile uYohane wabhala oku: “Lowo umthiyileyo umzalwana wakhe usisibulala-mntu; niyazi ukuba akukho sibulala-mntu sinobomi bungunaphakade buhleliyo kuso.”—1 Yohane 3:15.

Uthando Luyakubhangisa Ukuhleba

10. Kunokuba sibahlebe abanye, yintoni esibatyala yona?

¹⁰ Sonke sibatyala okuthile abanye, kodwa asibatyali intiyo ephembelela ukuhleba okwenzakalisayo. “Musani ukuba natyala lanto mntwini, lingelilo elokuthandana,” wabhala watsho uPawulos. (Roma 13:8) Sifanele sihlawule elo tyala imihla ngemihla kunokuba sigxeke abanye size sonakalise udumo lwabo. Ukuba sithi siyamthanda uYehova, asinakumdla izithende umntu esikhonza naye, ‘kuba lowo ungamthandiyo umzalwana wakhe, ambonileyo, akanakumthanda uThixo angambonanga.’—1 Yohane 4:20.

11. Umzekeliso kaYesu wezimvu neebhokhwe usenokusenza sicinge ntoni ngokuphathelele ukuhleba okwenzakalisayo?

¹¹ Phawula umzekeliso kaYesu wezimvu neebhokhwe. Abantu abafana neebhokhwe baxelelwa ukuba oko babekwenza kubazalwana bakaKristu kwathatyathwa ngokungathi babekwenza kuye. Ngaba ubuya kumhleba uKristu? Ukuba ubungenakuyigxeka iNkosi yakho, musa ukubaphatha ngaloo ndlela abazalwana bayo abathanjisiweyo. Musa ukwenza isiphoso njengoko zenzayo iibhokhwe, eziya ‘kumka ziye elubethweni olungunaphakade.’ Ukuba uyabathanda abazalwana bakaYesu, kubonise oko ngoko ukuthethayo ngabo.—Mateyu 25:31-46.

12. Uyintoni umongo weMizekeliso 16:2, yaye ufanele uzichaphazele njani iingcinga zethu, oko sikwenzayo nencoko yethu?

¹² Ekubeni sonke singaboni yaye sifuna idini lentlawulelo likaYesu, ukuba ubani ebefuna ukuthetha izinto ezingathandekiyo ngathi, ebenokufumana into eninzi anokuyithetha. (1 Yohane 2:1, 2) Kambe ke, sisenokucinga ukuba siqhuba kakuhle kakhulu. “Zonke iindlela zendoda ziqaqambile kwawayo amehlo; ke yena umlinganisi womoya nguYehova.” Imilinganiselo kaThixo ayityekelanga ekukhetheni ubuso nakucalucalulo. (IMizekeliso 16:2; IZenzo 10:34, 35) Ugocagoca umoya wethu, aphawule utyekelo lwethu neentshukumisa eziphembelela indlela esicinga ngayo, esenza ngayo izinto nesithetha ngayo. Ngoko, ngokuqinisekileyo besingenakufuna ukuba uThixo asifumane sizijonga ngokuphosakeleyo njengabacocekileyo abanye sibajonga njengabangcolileyo nabafanelwe kukugxekwa ngamazwi awenzakalisayo. NjengoYehova simele singabi namkhethe, kunoko sibe nenceba nothando.

13. (a) Isibakala sokuba ‘uthando luzeka kade umsindo yaye lunobubele’ sinokunceda njani ekupheliseni ukuhleba okwenzakalisayo? (b) Yintoni eya kusinceda ukuba siphephe ukugxeka ubani ofumana ilungelo lenkonzo esingenalo thina?

¹³ Ukusebenzisa oko kwathethwa nguPawulos kweyoku-1 yabaseKorinte 13:4-8 kunokusinceda ukuba siphelise ukuhleba okwenzakalisayo. Wabhala oku: “Uthando luzeka kade umsindo, lunobubele.” Udade otshutshiswayo kwintsapho eyahluleleneyo usenokungasibulisi echwayitile. Okanye bambi basenokuba ngabanwabulukayo ekwenzeni izinto, mhlawumbi bebangelwa yimpilo enkenenkene. Ngaba uthando alufanele lusishukumisele ekubeni nomonde nobubele kubantu abanjalo endaweni yokuba sibenze amaxhoba entlebendwane yokugxeka? ‘Uthando alunamona, alugwagwisi, alukhukhumali.’ Ngaloo ndlela, ukuba omnye umKristu ufumana ilungelo lenkonzo esingenalo thina, uthando luya kusithintela ekumhlabeni amadlala nasekuboniseni ukuba akawufanelekelanga loo msebenzi. Kwakhona uthando luya kusithintela ukuba singaqhayisi ngezinto esiziphumezileyo, kuba incoko enjalo inokubenza bazive bephantsi abo bahlelelekileyo.

14. Yiyiphi enye inkalo yothando eya kuchaphazela oko sikuthethayo ngabanye?

¹⁴ Kwakhona uPawulos wathi ‘uthando alwenzi okuziintloni, alufuni okukokwalo kodwa, alucaphuki, alunanzondo.’ Kunokuba sithi ngokungenantlonelo sithethe izinto ezingezozabuKristu, sifanele sivumele uthando lusishukumisele ekuthetheni kakuhle ngabanye nokuba siphawule izinto abanomdla kuzo. Luyasithintela ekucaphukeni nasekugxekeni abantu abaye basenzakalisa ngokoqobo okanye esicingela ukuba basenzakalisile. Ekubeni ‘uthando lungavuyeli kungalungisi kodwa luvuyisana nenyaniso,’ luyasithintela ekubandakanyekeni ekuhlebeni okwenzakalisayo nasekuhlebeni abantu abachasene nokuthile abathi ngenxa yoko baphathwe ngokungekho sikweni.

15. (a) Sifanele sisichaphazele njani isibakala sokuba ‘uthando lukholelwa luze luthembe iinto zonke’? (b) Ziziphi iinkalo zothando ezinokusinceda ukuba sinamathele kwintlangano kaYehova kwanokuba abanye bayasigxeka?

¹⁵ Uthando ‘lukholelwa luze luthembe iinto zonke’ eziseLizwini likaThixo luze lusishukumisele ekubonakaliseni uxabiso ngokudla kokomoya okulungiselelwa ludidi ‘lomkhonzi othembekileyo,’ kunokuba siphulaphule intlebendwane eyenzakalisayo yabawexuki abaxokayo. (Mateyu 24:45-47; 1 Yohane 2:18-21) Ekubeni ‘uthando lunyamezela iinto zonke yaye lungaze lutshitshe,’ lukwasinceda ukuba sihlale sithembekile entlanganweni kaThixo kwanokuba “abazalwana ababuxoki” okanye abanye bayayigxeka yona okanye amalungu ayo.—Galati 2:4.

Intlonelo Ithintela Ukuhleba

16. UPawulos waphathwa njani ngabazalwana bobuxoki kwelaseKorinte?

¹⁶ Ukuhlonela amakholwa angoowethu kukwasinceda ukuba siphelise ukuhleba okwenzakalisayo. Ekubeni amkelekile kuThixo, ngokuqinisekileyo asifanele siwanyelise. Masingaze sifane ‘nabazalwana bobuxoki’ uPawulos awadibana nabo. Ngokungathandabuzekiyo, bathetha izinto ezimbi ngaye. (2 Korinte 11:26) Nabawexuki bamele ukuba babe bamnyelisa. (Thelekisa uYuda 3, 4.) KwelaseKorinte bambi bathi: “Iincwadi ezi zakhe okunene zinzima, zinamandla; kodwa ke akubakho ngenkqu akanamandla, nokuthetha kwakhe akunto yanto.” (2 Korinte 10:10) Abantu abathethi ngaloo ndlela ngabo babathandayo.

17. UDiyotrefe wayethetha ngamazwi anjani ngompostile uYohane?

¹⁷ Khawuphawule umpostile uYohane, owagxekwa nguDiyotrefe. UYohane wathi: “Ndalibhalela ibandla; ke usuke lowo uthanda ukuzenza mkhulu kubo, uDiyotrefe, angasamkeli. Ngenxa yoko, ukuba ndithe ndafika, ndomkhumbuza imisebenzi yakhe ayenzayo, ephololoza ngathi ngamazwi angendawo.” (3 Yohane 9, 10) Oko kuphololoza kwakungumbandela onzulu kakhulu, yaye ukuba siphulaphula okanye sisasaza intetho efanayo namhlanje, sifanele siyeke ngokukhawuleza ukwenjenjalo.

18. UDemetriyo wayahluke njani kuDiyotrefe, ibe lo mahluko usenokuyichaphazela njani ihambo yethu?

¹⁸ Embongoza ukuba abahlonele abathe tye, uYohane wamxelela oku uGayo: “Musa ukulandela okubi, landela okulungileyo. Lowo wenza okulungileyo ungokaThixo; ke lowo wenza okubi akambonanga uThixo. UDemetriyo ungqinelwe ngabo bonke, nayiyo inyaniso; nathi ke siyangqina; niyazi ukuba ubungqina bethu buyinene.” (3 Yohane 1, 11, 12) Ngamnye wethu unokuzibuza oku: Ngaba ndinguDiyotrefe ophololozayo okanye ngaba ndinguDemetriyo othembekileyo? Ukuba siyawahlonela amakholwa angoowethu, asisayi kuthetha amazwi okuwagxeka, sinika abanye isizathu sokuba basijonge njengamapholopholo.

19. Abazalwana bobuxoki bazama njani ukunyelisa uC. T. Russell?

¹⁹ Abazalwana bobuxoki abazange babekho kuphela ngenkulungwane yokuqala. Ebudeni beminyaka yee-1890, amatshijolo awayenxulumene nentlangano kaThixo athi azama ukulawula iWatch Tower Society. Amenzela iyelenqe uCharles Taze Russell, ezama ukumguzula ekubeni ngumongameli wokuqala woMbutho. Emva kokuba liyiliwe kwisithuba esimalunga neminyaka emibini, eli yelenqe lavela ngowe-1894. Izityholo zabo zobuxoki zazisekelwe ngokuyintloko kwisikrokro sabo sokunganyaniseki kukaRussell emsebenzini. Ezinye zezityholo zobudenge zayibhenca injongo yaba bamangaleli—ukunyelisa uC. T. Russell. AmaKristu angakhethi buso ayihlolisisa imicimbi aza amfumanisa emsulwa. Ngaloo ndlela, eli yelenqe “lokubhangisa uMnu. Russell nomsebenzi wakhe” lasilela. Ngoko, njengoPawulos, uMzalwan’ uRussell wanyeliswa ngabazalwana bobuxoki, kodwa esi silingo sagqalwa njengeqhinga likaSathana. Emva koko abo benzi beyelenqe bagqalwa bengakufanelekelanga ukunandipha ubudlelane bobuKristu.

Imisebenzi Emihle Iyakuphelisa Ukuhleba Okwenzakalisayo

20. Sisiphi isiphoso uPawulos awasifumanisa kwabanye abahlolokazi abaselula?

²⁰ UPawulos wayesazi ukuba ukuhleba okwenzakalisayo ngokufuthi kwakuhlobene nokonqena ukusebenza, nokungabi nemisebenzi emihle emininzi. Wayengakholiswa yinto yokuba bambi abahlolokazi abaselula babefunde “ukungasebenzi nto, bethungelana nezindlu; banganeli kungasebenzi nto kodwa, basuka kwananjalo babe ngamapholopholo, bazifake kwizinto zabanye, bathethe izinto ezingafanelekileyo.” Sasiyintoni isicombululo? Sasikukwenza umsebenzi oyolisayo. Ngaloo ndlela, uPawulos wabhala oku: “Ngoko ndinga abahlolokazi abatsha bangenda, bazale, babe ngabanikazi-mizi, bangamniki ochasayo nalinye ithuba lokutshabhisa.”—1 Timoti 5:11-14.

21. Yiyiphi inkalo ekweyoku-1 yabaseKorinte 15:58 emayela nokuphepha imigibe yokuhleba okwenzakalisayo?

²¹ Ukuba amabhinqa anyamekela iintsapho, aqeqesha abantwana ngokuvisisana nemilinganiselo kaThixo, aze abandakanyeke kwezinye izinto ezilusukelo olufanelekileyo, aya kuba nexesha elincinane lencoko nje engenamsebenzi enokukhokelela ekuhlebeni okwenzakalisayo. Namadoda aya kuba nexesha elincinane lencoko enjalo ukuba azixakekisa ngemisebenzi emihle. ‘Ukuhlala siphuphuma umsebenzi weNkosi’ kuya kusinceda sonke ukuba siphephe imigibe yokuhleba okwenzakalisayo. (1 Korinte 15:58) Ngokukodwa ukubandakanyeka ngentliziyo iphela kubulungiseleli bamaKristu, kwiintlanganiso zebandla nakwezinye izilangazelelo zikaThixo kuya kuzigcina iingqondo zethu kwimicimbi yokomoya ukuze singabi ngabahlebi abaswele into yokwenza abahamba begxuphuleka kwimicimbi yabanye.

22. Ithini IMizekeliso 6:16-19, ngendlela uThixo abajonga ngayo abo babadla izithende abanye?

²² Ukuba sizigcina sixakekile kwimisebenzi yokuhlonel’ uThixo size sifune ukuba yintsikelelo yokomoya kwabanye, siya kuba ngabahlobo abanyanisekileyo, kungekhona abahlebi abanganyanisekanga. (IMizekeliso 17:17) Yaye ukuba siyakuphepha ukuhleba okwenzakalisayo, siya kuba noyena Mhlobo ubalaseleyo kunabo bonke—uYehova uThixo. Masikhumbule ukuba izinto ezisixhenxe ezingamasikizi kuye “ngamehlo aqwayingayo; lulwimi oluxokayo; zizandla eziphalaza igazi elimsulwa; yintliziyo eyila iingcinga zobutshinga; ziinyawo ezikhawulezayo ukugidimela ebubini; lingqina elixokayo, elifutha amanga; nongenisa ingxabano phakathi kwabangabazalwana.” (IMizekeliso 6:16-19) Abahlebi bayazibaxa baze bazigqwethe izinto, yaye abantu ababadla izithende abanye banolwimi oluxokayo. Amazwi abo axhokonxa oonothand’ iindaba ukuba bahambe bephololoza. Phantse ngalo lonke ixesha, oku kuphumela kwimbambano. Kodwa ukuba siyakuthiya oko uThixo akuthiyileyo, siya kukuphepha ukuhleba okwenzakalisayo okunokumonakalisa othe tye kuze kumchwayitise umhlebi omkhulu, uSathana uMtyholi.

23. Ngokubhekisele kwincoko yethu, sinokuyivuyisa njani intliziyo kaYehova?

²³ Ngoko ke, masiyivuyise intliziyo kaYehova. (IMizekeliso 27:11) Masiyiphephe incoko ayithiyileyo, sikugatye ukuphulaphula intlebendwane, size senze unakonako ekupheliseni ukuhleba okwenzakalisayo. Ngokuqinisekileyo, sinokwenjenjalo ngoncedo loThixo wethu ongcwele, uYehova.

[Umbhalo osemazantsi]

Unokuphendula Uthini?

◻ Ukuthandaza kunokusinceda njani ukuba siphephe ukunyoka abanye?

◻ Ukusebenzisa eyoku-1 yabaseKorinte 13:4-8 kunokusinceda njani ukuba siphelise ukuhleba okwenzakalisayo?

◻ Ukuzihlonela kunokusinceda njani ukuba sithintele nasiphi na isilingo sokuhleba amakholwa angoowethu?

◻ Yiyiphi inkalo ekweyoku-1 yabaseKorinte 15:58 emayela nokuphepha izilingo zokuhleba okwenzakalisayo?

[Inkcazelo Ngomfanekiso okwiphepha 17]

U.S. Forest Service photo