Nguwuphi Umthetho Omkhulu?
“KHANGELA apha! Mna andibakhathazi abamelwane bam. Ngokwendlela endicinga ngayo, banokwenza nantoni na abafuna ukuyenza. Kodwa, kakade ke, ukuba basengxakini, bendinokwenza endinokukwenza ukubanceda.” Ngaba yindlela ocinga ngayo leyo? Xa kuvela iingxaki, izenzo zobubele nezenkathalo zisenokuba zininzi, kangangokuba zisenokubothusa abaninzi. Kodwa ngaba oko kwanele?
Ukuba ungumzali, alithandabuzeki elokuba uye waluleka abantwana bakho ukuba bangabaqali abanye abantwana abadlala nabo. Abaninzi bethu baye baneziva abazifumana ekukhuleni kwabo ezibonisa ukuba ukutyeshela kwabo loo mgaqo ukhokelayo kwabazisela impindezelo. Ewe, siye safunda ngobulumko besaci esacaciswa sisilumko saseMpuma uConfucius esathi: “Ongakufuni kwenziwe kuwe musa ukukwenza kwabanye.” Ngoko ke, ngaba ucinga ukuba oku yinguqulelo nje engabalulekanga okanye engachananga yoko kwaziwa ngokuba nguMthetho Omkhulu?
Umthetho Ochanileyo
NgokweWebster’s New Collegiate Dictionary, “umthetho omkhulu” uchazwa “njengomgaqo wehambo yokuziphatha okuhle ekubhekiselwe kuwo ku[Mateyu] 7:12 naku[Luka] 6:31 yaye ubonisa ukuba ubani ufanele enze oko ebeya kuthanda ukuba abanye bakwenze kuye.” Khangela ibhokisi esemazantsi ephepha uze uphawule indlela iinguqulelo ezahlukeneyo zeBhayibhile zikaMateyu isahluko 7, indinyana 12 ezikukhanyisa ngayo ukucaca kwalo mgaqo ukhokelayo.
Nceda phawula ukuba nangona amagama esahluka kwiinguqulelo ngeenguqulelo, umthetho wona awuguquki. Ngapha koko, kunjengokuba uYesu watshoyo ngaphambilana kwiNtshumayelo yaseNtabeni wathi: “Celani, nophiwa; funani, nofumana; nkqonkqozani, novulelwa; kuba wonke umntu ocelayo uyazuza, nalowo ufunayo uyafumana, nalowo unkqonkqozayo uya kuvulelwa.” (Mateyu 7:7, 8) Izenzo zokucela, zokufuna, zokunkqonkqoza, zicacile. UYesu waqhubeka esithi: “Zonke izinto ngoko enisukuba banga bangazenza abantu kuni, yenzani ezikwanjalo nani kubo.”—Mateyu 7:12.
IBhayibhile ibonisa ukuba nabafundi bakaYesu bakuxhasa ukuphila kwangalo mthetho mnye. (Roma 15:2; 1 Petros 3:11; 3 Yohane 11) Noko ke, okungavuyisiyo kukuba, imeko ekhoyo yolwalamano lwabantu ngokubanzi, enoba bangamaKristu okanye akunjalo, ingqina ukuba abawulandeli. Ngaba oku kuthetha ukuba lo mthetho wokuziphatha okuhle awusasebenzi? Ngaba mhlawumbi uphelelwe lixesha?
[Ibhokisi ekwiphepha 3]
“Yenza kwabanye abantu konke obuya kuthanda ukuba bakwenze kuwe.”—The Holy Bible, eguqulelwe nguR. A. Knox.
“Baphathe abanye abantu kanye ngendlela obuya kuthanda ukuba bakuphathe ngayo nawe.”—The New Testament in Modern English, nguJ. B. Phillips.
“Nantoni na onqwenela ukuba bangayenza abantu kuwe, yenza ngokukwanjalo nawe kubo.”—The Amplified New Testament.
“Yenzela abanye yonke into othanda ukuba bakwenzele yona.”—The New Testament in the Language of Today, nguW. F. Beck.
“Ngoko kuzo zonke iinkalo, baphathe abanye abantu ngendlela obuya kunqwenela ukuba bakuphathe ngayo nawe.”—The Four Gospels, eguqulelwe nguE. V. Rieu.
“Umele uqhelisele ukuphatha abanye abantu ngendlela obuya kuthanda ukuba bakuphathe ngayo nawe.”—The New Testament, nguC. B. Williams.