Ukubhencwa ‘Komchasi-Mthetho’
“Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo.”—ISITYHILELO 18:4.
1, 2. (a) Unokufaniswa njani umchasi-mthetho? (b) Iyintoni imbono kaThixo ngabo bazibanga bemkhonza kodwa benetyala legazi?
ILIZWI likaThixo lakuxela kwangaphambili ukufika ‘komchasi-mthetho.’ Lakwaxela kwangaphambili ukuba lo mchasi-mthetho wayeza ‘kubhangiswa’ nguMtshabalalisi kaThixo wasezulwini, uKristu Yesu. (2 Tesalonika 2:3-8) Njengoko amanqaku awandulelayo ebonisa, loo mchasi-mthetho ngabefundisi beNgqobhoko. Kude kudala baye bazityeshela iinyaniso zeLizwi likaThixo baza bamkela iimfundiso zobuhedeni, ezinjengoBathathu Emnye, isihogo somlilo nokungafi komphefumlo. Ukongezelela, imisebenzi yayo ichasene nemithetho kaThixo. Banjengabo uPawulos walumkisa uTito ngokunxamnye nabo esithi, “bayavuma ukuba bayamazi uThixo; kanti ngayo imisebenzi bayamkhanyela, bengamasikizi, bengabangevayo, nakumsebenzi wonke olungileyo bengenakucikideka.”—Tito 1:16.
2 UYesu wathi: “Balumkeleni abaprofeti ababuxoki, abeza kuni ngezambatho zeegusha, ngaphakathi ke beziingcuka eziqwengayo, nobaqonda ngeziqhamo zabo.” Abaprofeti bobuxoki babeya kuvelisa “iziqhamo ezibi.” (Mateyu 7:15-17) Ubungqina beziqhamo ezibi zabefundisi bubonwa kwityala labo elikhulu legazi. Kangangeenkulungwane baye baxhasa iimfazwe zomnqamlezo, iinkqubo zokuncina amakholwa, neemfazwe ekuye kuzo kwaphalazwa igazi lezigidi zabantu. Baye bathandazela baza basikelela omabini amacala eemfazwe ekuthe kuzo amalungu eenkonzo zabo abulalana odwa. Ngokwahlukileyo koko, umpostile uPawulos wakwazi ukuthi: “Ndimsulwa egazini labo bonke.” (IZenzo 20:26) Bona abefundisi abakho msulwa. Ebhekisa kubo uThixo uvakalisa oku: “Nokuba nandise ukuthandaza, andiyi kuva; izandla zenu zizele ngamagazi.”—Isaya 1:15.
3. Ziziphi iziganeko ezibalulekileyo zehlabathi ezisondela ngokukhawuleza? (Mateyu 7:21-23)
3 Alifikanga ligalelekile ixesha lokuba uThixo aphumeze umgwebo wakhe nxamnye nomchasi-mthetho. Kungekudala, njengoko uYesu wayexele kwangaphambili, “kuya kubakho imbandezelo enkulu, ekungazange kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.” (Mateyu 24:21) Elo xesha lenkathazo lingenakufaniswa nanto liya kuqalisa ngokutshatyalaliswa kweBhabhiloni Enkulu, ubukhosi behlabathi bonqulo lobuxoki, obuquka iinkonzo zeNgqobhoko. Amabutho ezobupolitika, ‘aya kuyiphanzisa, ayihlube, ayidle inyama yayo, ayitshise ngomlilo.’ (ISityhilelo 17:16) Imbandezelo enkulu iya kuphela ngokutshatyalaliswa kwenxalenye eseleyo yehlabathi likaSathana eArmagedon, “emfazweni yaloo mini inkulu kaThixo, uSomandla.”—ISityhilelo 16:14, 16; 19:11-21.
Kufuneka Bathande Abanye
4. Yintoni abo banqula uThixo “ngoMoya nangenyaniso” abamele bayikhumbule?
4 Ekubeni ezi ziganeko zigungqisa ihlabathi sekumbovu ukuba zenzeke kumhlaba omiweyo, yintoni ekufuneka bayenze abo ‘banqula uBawo ngomoya nangenyaniso’? (Yohane 4:23) Phakathi kwezinye izinto, bamele bakhumbule ukuba uYesu wathi: “Ukuba nithi niyigcine imithetho yam, hlalani eluthandweni lwam; njengokuba mna ndayigcinayo imithetho kaBawo, ndahlala eluthandweni lwakhe. . . . Nguwo lo umthetho wam, wokuba nithandane, njengoko ndanithandayo nina. Akukho namnye unalo uthando olungaphezu kolu, lokuba ubomi bakhe abuncamele izihlobo zakhe. Nizizihlobo zam nina, ukuba nithi nikwenze konke endinimisela khona mna.”—Yohane 15:10-14; 1 Yohane 5:3.
5, 6. (a) Yintoni uYesu awayalela abafundi bakhe ukuba bayenze eyayiza kubafanisa? (b) Oku kwakungumthetho omtsha ngayiphi ingqiqo?
5 Ngaloo ndlela amaKristu okwenyaniso kufuneka abathande abanye abantu, ingakumbi abazalwana nodade bawo abangamaKristu abakumazwe onke. (IZenzo 10:34; Galati 6:10; 1 Yohane 4:20, 21) Eneneni, amaKristu angoowabo amele abe “nothandano olunyamekileyo.” (1 Petros 4:8) Olo hlobo lothando lwazwenibanzi lubafanisa njengabanquli bokwenyaniso, kuba uYesu wathi: “Ndiniwisela umthetho omtsha, wokuba nithandane, njengoko ndinithandileyo nina, ukuze nani nithandane. Ngayo le nto baya kwazi bonke, ukuba ningabafundi bam, ukuba nithe nathandana.”—Yohane 13:34, 35.
6 Yintoni eyayintsha ngaloo mthetho? Ngaba amaYuda awayephantsi koMthetho kaMoses ayenganikwanga umthetho othi, “Uze umthande ummelwane wakho ngoko uzithanda ngako”? (Levitikus 19:18) Ewe kunjalo, kodwa uYesu wabonisa into eyongezelelekileyo xa wathi, “Njengoko ndinithandileyo nina.” Uthando lwakhe lwaluquka ukuncamela kwakhe ubomi bakhe abanye, yaye wafundisa abafundi bakhe ukuba bakulungele ukwenza okufanayo. (Yohane 15:13) Lowo yayingumgangatho ophakamileyo wothando, ekubeni ukuzincama okunjalo kwakungeyomfuneko kuMthetho kaMoses.
7. Luluphi unqulo oluye lwawuthobela umthetho wothando kule nkulungwane?
7 Kwinkulungwane yethu, luluphi unqulo oluye lwawuthobela lo mthetho wothando? Ngokuqinisekileyo asizizo iinkonzo zeNgqobhoko, kuba ziye zabulalana ngomlinganiselo wamashumi ezigidi kwiimfazwe ezimbini zehlabathi nakwamanye amadabi. NgamaNgqina kaYehova aye athobela umthetho wothando emhlabeni wonke. Aye ahlala engathabathi cala ngokungqongqo kwiimfazwe zeentlanga, kuba uYesu wathi abalandeli bakhe bamele ‘bangabi ngabo abehlabathi.’ (Yohane 17:16) Ngaloo ndlela, njengoPawulos, banokuthi ‘bamsulwa egazini labo bonke abantu.’ Ngokomzekelo, phawula intshayelelo yesigqibo esamkelwa ngabakhonzi bakaYehova kwindibano eyayingoNovemba 27, 1921, eWashington, D.C.:
“NjengamaKristu azabalazela ngokunyanisekileyo ukulandela iimfundiso zikaKristu Yesu iNkosi yethu nezabaPostile bakhe, sime ngelithi: imfazwe iluphawu lobundlavini, ikukutshatyalaliswa kwemilinganiselo emihle yokuziphatha yaye izisa ugculelo kubantu abangamaKristu; imilinganiselo eyafundiswa yiNkosi uYesu Kristu ithintela amaKristu azinikeleyo ukuba angabandakanyeki kwimfazwe, ekuphalazeni igazi okanye kugonyamelo nangayiphi na indlela.”
8. Ithini ingxelo engokwembali ngamaNgqina kaYehova ebudeni beMfazwe Yehlabathi II?
8 Loo mbono yabonakaliswa njani ebudeni beMfazwe Yehlabathi II? Yabonakaliswa ngohlobo lokuba kuloo mfazwe ibalaseleyo kuyo yonke imbali yoluntu, kwabulawa abantu abamalunga nama-50 ezigidi. Kodwa akukho namnye owabulawa ngomnye wamaNgqina kaYehova! Ngokomzekelo, phantse ukuba bonke abefundisi baseJamani ngokungqalileyo okanye ngokungangqalanga baxhasa ubuNazi. Ngokwahlukileyo koko, amaNgqina kaYehova awayephantsi kolawulo lobuNazi ahlala engoondilele ngokungqongqo yaye ala ukukhahlela kuHitler okanye ukuba yinxalenye yomkhosi wakhe. Ngenxa yoko, awazange abulale namnye wabazalwana bawo bokomoya abakwamanye amazwe, okanye nabani na ongomnye. Yaye amaNgqina kaYehova akuwo onke amanye amazwe nawo ahlala engoondilele.
9. Yintoni eyenzekayo kumaNgqina kaYehova eJamani naseOstriya phantsi kolawulo lobuNazi?
9 AmaNgqina kaYehova amaninzi aye ancama imiphefumlo yawo ngenxa yezihlobo zawo ngokwenjenjalo ethobela umthetho wothando. Ukuhlolisiswa kwencwadi ethi Kirchenkampf in Deutschland (Umlo Weecawa EJamani), nguFriedrich Zipfel, kubonisa oku ngokubhekisele kumaNgqina: “Amashumi asithoba anesixhenxe ekhulwini amalungu eli qela lonqulo lincinane ayengamaxhoba entshutshiso yamaNazi. Isinye kwisithathu sawo sabulawa, ngokutshatyalaliswa, ngezinye izenzo zogonyamelo, ngendlala, zizigulo okanye kukukhotyokiswa. Le mpatho eyayiqatha ngendlela engathethekiyo yayibangelwa lukholo olungagungqiyo olwalungavisisani nengcamango yobuNazi.” EOstriya, kwabulawa ama-25 ekhulwini amaNgqina kaYehova, ebulawa ngokubethwa, okanye ebulawa sisifo okanye kukuphelelwa ngamandla kwiikampu zamaNazi.
10. Babenayiphi intembelo abo bafayo ngenxa yokuthobela umthetho wothando?
10 Abo bafeli-nkolo bathobela umthetho wothando babenentembelo yokuba “Akanantswela-bulungisa uThixo, ukude awulibale umsebenzi [wabo], nomzamo wothando [abawubonakalisa] kulo igama lakhe.” (Hebhere 6:10) Babesazi ukuba “ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.” (1 Yohane 2:17) Babenethemba eliqinisekileyo lokuvuselwa kubomi obungunaphakade.—Yohane 5:28, 29; IZenzo 24:15.
11. Abakhonzi bakaYehova bakhetheke ngayiphi indlela, yaye bazalisekisa siphi isiprofeto?
11 Abakhonzi bakaYehova bawuthobela ngokukhethekileyo umthetho owavakaliswa nguPetros nabanye abapostile kwinkundla ephakamileyo: “Simelwe kukuthi sive uThixo kunokuba sive abantu.” (IZenzo 5:29) Ngenxa yokuba amaNgqina kaYehova ekwenza oku, axhaswa ‘ngumoya oyingcwele, athe uThixo wawunika abo bamvayo.’ (IZenzo 5:32) Lawo ngamandla athi awenze akwazi ukuzalisekisa isiprofeto esikuIsaya 2:2-4. Saxela kwangaphambili ukuba kwixesha lethu unqulo lokwenyaniso lwaluya kumiselwa kwakhona nokuba abantu bazo zonke iintlanga neenkonzo babeya kuthontelana ukuya kulo. Omnye umphumo woku wawuza kuba ngulo: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” Ngenxa yokuba abakhonzi bakaYehova belungiselela ubomi kumhlaba omtsha woxolo, abasayi kuphinda bafunde ukulwa. Bafunda umthetho wothando.—Yohane 13:34, 35.
12. Yintoni abamele bayenze kwabanye abo bathobela umthetho wothando?
12 Ekubeni uthando lwamaKristu lukwathetha ‘ukuthanda ummelwane wakho njengoko uzithanda,’ abakhonzi bakaThixo abanakuzingca ngoko bakwaziyo. (Mateyu 22:39) Kusekho abanye abaninzi ababeya kufuna ukukhonza uThixo nokuphila kumhlaba wakhe omtsha. Ngoxa kusekho ixesha, nabo aba kufuneka befundile ngomthetho wothando nangeenyaniso ezininzi ezinokuthanani noMongami Wendalo Iphela, uYehova uThixo. Bamele bafundiswe ukuba nguYehova kuphela esimele simnqule baze bafundiswe nendlela esimele simnqule ngayo. (Mateyu 4:10; ISityhilelo 4:11) Abo sele bezifundile ezi zinto kufuneka bazixelele abanye ukuze nabo bakholiseke kuYehova.—Hezekile 33:7-9, 14-16.
Ukubhencwa Komchasi-Mthetho
13. Njengenxalenye yobungqina bethu bazwenibanzi, yintoni esimele siyivakalise, yaye ngoba?
13 UYesu wathi “ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mateyu 24:14) Njengenxalenye yobu bungqina bazwenibanzi kufuneka abakhonzi bakaThixo bavakalise umgwebo wakhe nxamnye nonqulo lobuxoki, ngokukodwa abefundisi beNgqobhoko. Bona babekek’ ityala ngakumbi kuThixo kuba bazibanga bengamaKristu. Bamele babhencwe ukuze abo bafuna ukukhonza uThixo bakhululeke kwimpembelelo yabo nokuze bathabathe amanyathelo afanelekileyo okusinda. Kunjengokuba uYesu wathi: “Inyaniso iya kunikhulula.”—Yohane 8:32.
14. Sisiphi isigidimi esicacileyo esimele sivakaliswe ngokubhekisele kunqulo lobuxoki?
14 Ngaloo ndlela, amaNgqina kaYehova amele avakalise esi sigidimi siphefumlelweyo ngokubhekisele kunqulo lobuxoki: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo. Ngokuba izono zayo ziye zafikelela emazulwini, nezinto zayo zokungalungisi uzikhumbule uThixo. . . . Ziya kufika ngamini-nye izibetho zayo, ukufa, nesijwili, nendlala. Iya kutsha ngomlilo, ngokuba ligorha iNkosi uThixo lowo uyigwebayo.”—ISityhilelo 18:4-8.
15. Unyaka we-1914 waba nayiphi inxaxheba kucwangciso lukaYehova lwexesha, yaye yintoni eyenzekayo emva kweMfazwe Yehlabathi I?
15 Iziprofeto zeBhayibhile zibonisa ukuba ‘imihla yokugqibela, yale nkqubo yezinto yaqalisa ngonyaka wamanqam wowe-1914. (2 Timoti 3:1-5, 13; Mateyu 24:3-13) Ukususela ngaloo nyaka besiphila ‘kwixesha lokuphela.’ (Daniyeli 12:4) Emva nje kweMfazwe Yehlabathi I, ngokuvumelana nocwangciso lukaYehova lwexesha, abakhonzi bakhe babuvakalisa ngokubanzi ngenkalipho uBukumkani bukaThixo njengoko kwakuxelwe kwangaphambili kuMateyu 24:14. Kwakhona baqalisa ukubhenca unqulo lobuxoki ngokunamandla ngakumbi, ngokukodwa udidi lwabefundisi abachas’ umthetho beNgqobhoko ewexukileyo.
16. Ukubhencwa komchasi-mthetho kwenziwa njani ngamandla kangangethuba elingaphezu kwama-70 eminyaka?
16 Ngaphezu kwama-70 eminyaka ngoku, ngamandla amakhulu kunanini na ngaphambili, abakhonzi bakaThixo baye balumkisa abantu ngelokuba umchasi-mthetho ungudyakalashe onkone. Ibingamawaka nje ambalwa amaNgqina kaYehova ebesenza oku emva kweMfazwe Yehlabathi I. Kodwa ngoku aye aba “luhlanga olunamandla” olungaphezu kwezigidi ezithathu ezinesiqingatha zabalungiseleli abakhutheleyo abalungelelanisiweyo kumabandla angaphezu kwama-60 000 kumhlaba wonke. (Isaya 60:22) Ngomkhamo owandayo, abakhonzi bakaThixo bavakalisa ngenzondelelo uBukumkani bukaThixo njengobukuphela kwethemba loluntu yaye, kwangaxesha-nye, abhenca abefundisi—njengomchasi-mthetho oyingcuka eyambethe ufele lwegusha.
Kutheni Esebenza Ngamandla Kangaka?
17. Kutheni le nto abakhonzi bakaYehova beye bambhenca ngamandla umchasi-mthetho?
17 Kutheni le nto abakhonzi bakaYehova beye bambhenca ngamandla kangaka umchasi-mthetho kuyo yonke le minyaka? Kungenxa yokuba izigidi zesihlwele esikhulu sezimvu zikaYehova ezisele zisendleleni yosindiso zimele zikhuselwe kwihlabathi likaSathana nakunqulo lwalo lobuxoki. (Yohane 10:16; ISityhilelo 7:9-14) Ngokungakumbi, ukuba abefundisi ababhencwa, abantu abantliziyo zinyanisekileyo abangekabi yiyo inxalenye yomhlambi kaThixo abasayi kuyazi indlela yokuphepha ikhondo eliphosakeleyo. Ngoko bamele baziswe, kanye njengokuba uYesu wazisa abantu xa wathetha oku ngokubhekisele kwiinkokeli zonqulo ezihanahanisayo zomhla wakhe: “Ngabakhokeli beemfama abakwaziimfama; ke kaloku, xa sukuba imfama ikhokela imfama, zombini ziya kweyela emhadini.”—Mateyu 15:14; bona kwaneyesi-2 yabaseKorinte 4:4; 11:13-15.
18. Yintoni abo bafuna inyaniso ekufuneka beyazile?
18 Abefundisi bayinxalenye yehlabathi likaSathana. (Yohane 8:44) Kodwa elo lihlabathi aya kuthi uThixo alitshabalalise kungekudala. (2 Petros 3:11-13; 1 Yohane 2:15-17) Ngoko iLizwi likaThixo liyalumkisa: “Othe ngoko wanga angaba sisihlobo salo ihlabathi, uzenza utshaba lukaThixo.” (Yakobi 4:4) Abefundisi basibetha ngoyaba eso silumkiso baze baqhubeke begxuphuleka kwimicimbi yezobupolitika. Baxelela abalandeli babo ukuba ihlabathi elilunge ngakumbi liya kubakho ngemigudu yamalungu ezobupolitika. Kodwa elo lithemba lobuxoki, ekubeni eli hlabathi lilawulwa nguSathana sele liza kupheliswa. Ngoko abantu abasabeka ithemba labo kweli hlabathi bazidyobha ngentshongo emehlweni. Bafanele baxelelwe inyaniso mayela nendawo elisinge kuyo eli hlabathi kwanoko kuya kulithabathela indawo.—IMizekeliso 14:12; 19:21; Mateyu 6:9, 10; ISityhilelo 21:4, 5.
19. Ukugxuphuleka kwabefundisi abathile kwimicimbi yehlabathi kuye kwabhencwa njani kumaziko eendaba kumaxesha akutshanje?
19 Ukugxuphuleka kwabefundisi abathile kwimicimbi yehlabathi kuye kwabhencwa kwanakumaziko eendaba kumaxesha akutshanje, njengoko ngokomzekelo kuye kwabhekiselwa kubomi bokuziphatha okuvakalala nobutofotofo obuphilwa ngabefundisi abathile ababonakala kumabonwakude. Enye imvumi yezi mini engumqambi weengoma yaqamba ingoma ethi: “Ngaba UYesu Wayengayinxiba IRolex [iwotshi yama-R28 000] Kumboniso Wakhe Okumabonwakude?” Le ngoma iyaqhubeka isithi: “Ngaba uYesu wayeza kungenelela kwezobupolitika ukuba ebebuyele emhlabeni kwakhona, abe nekhaya Lakhe lesibini [elitofotofo] ePalm Springs aze azame ukubufihla ubutyebi Bakhe?” Ukongezelela, abefundisi abangakumbi nangakumbi bayabamkela okanye babuqhelisele ubufanasini. Kwanangoku iCawa yamaKatolika eUnited States ihlawula izigidi zeerandi zokuhlangabezana nomonakalo owenziwe ngabefundisi abanetyala lokuxhaphaza abantwana ngokwesini.—Roma 1:24-27; 1 Korinte 6:9, 10.
20. Kutheni le nto abakhonzi bakaThixo bemele baqhubeke bebhenca umchasi-mthetho?
20 Ububi obunjalo abunakubethwa ngoyaba ngabakhonzi bakaThixo kodwa bumele bubhencwe ukuze kuncedwe abanye. Isihlwele esikhulu sezinye izimvu simele sikhuselwe kwabo baya kuzama ukusikhokelela ekwaphuleni imithetho kaThixo. Yaye abo ‘bagcumayo, nabancwinayo ngenxa yamasikizi onke awenzekayo’ bafanele bafunwe ngokucokisekileyo baze bahlanganiselwe kulwalathiso olukhuselayo loMalusi Omkhulu, uYehova uThixo, ‘nolomalusi olungileyo’, uKristu Yesu.—Hezekile 9:4; Yohane 10:11; IMizekeliso 18:10.
21. Yintoni amaNgqina kaYehova aya kuqhubeka eyivakalisa?
21 Ngoko ke, abantu bakaThixo abasayi kuphozisa maseko ekuvakaliseni impindezelo yakhe nxamnye nalo lonke ihlabathi likaSathana, kuquka umchasi-mthetho walo, abefundisi beNgqobhoko. Baya kusivakalisa ngamandla amakhulu isigidimi sesithunywa sezulu esikwiSityhilelo 14:7 esithi: “Moyikeni uThixo, nimzukise; ngokuba lifikile ixa lokugweba kwakhe.” Yaye kwesi sibhengezo baya kuquka isilumkiso esingxamisekileyo seSityhilelo 18:4 ngokubhekisele kunqulo lobuxoki: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo.”
Imibuzo Yempinda:
◻ Liliphi ishwangusha eliya kufikela umchasi-mthetho, yaye ngoba?
◻ Yintoni ekufuneka bayenze abakhonzi bakaYehova ngokubhekisele kwabanye?
◻ Abantu bakaYehova baye bahlala njani bemsulwa egazini labo bonke abantu?
◻ Yintoni esimele siyenze ngokubhekisele kwiBhabhiloni Enkulu?
◻ Kutheni le nto siya kuqhubeka sivakalisa isigidimi sethu esinamandla ngokubhekisele kumchasi-mthetho?
[Umfanekiso okwiphepha 23]
Abapostile baxelela inkundla ephakamileyo oku: “Simelwe kukuthi sive uThixo kunokuba sive abantu”
[Umfanekiso okwiphepha 24]
Abantu abanyanisekileyo kufuneka bazi apho lisinge khona eli hlabathi neenkonzo zalo