Indlela Yokunceda Abadandathekileyo Bazuze Uvuyo Kwakhona

UEPAFRODITO, umfundi ongumKristu wenkulungwane yokuqala, wayedandathekile. Wayethunyelwe ukuba aye kunyamekela iintswelo zompostile uPawulos owayesentolongweni kodwa wagula kakhulu. Nangona uEpafrodito waphilayo, wayedandathekile kuba ibandla lakowabo, elalimthumele eRoma, ‘lalivile ukuba wayesifa.’ (Filipi 2:25, 26) Ukuba kude kangako kodwa efuna ukukhulula iingqondo zabo ngalo mba kwezisa udandatheko. Kusenokuba, wayekwavakalelwa kukuba babemgqala njengosilelayo ukwenza izinto. Wayenokuncedwa njani ukuba azuze uvuyo lwakhe kwakhona?

UEpafrodito wabuyiselwa ekhayeni lakhe eFilipi ephethe incwadi eyayivela kumpostile uPawulos. Apho kuyo, uPawulos wayalela ibandla wathi: “Mamkeleni ke ngokwaseNkosini, ninovuyo lonke; nibabeke abo banjalo.” (Filipi 2:27-30) AmaKristu aseFilipi abongozwa ukumsondeza kuwo uEpafrodito ngendlela eyayiya kulufanela uphawu olubonisa obona budlelane bebandla lamaKristu. Amazwi abo athuthuzelayo ayeya kumbonisa ukuba wayexatyiswe kakhulu, ewe, ‘engobekekileyo.’ Le ngqalelo ivuyisayo yayiya kumnceda akhululeke kudandatheko lwasengqondweni awayenalo.

Lo mzekelo ubonisa ukuba nangona amaKristu xa ewonke ‘evuya eNkosini,’ wambi phakathi kwawo aba neentlobo ezahlukahlukeneyo zodandatheko. (Filipi 4:4) Udandatheko olukhulu lwengqondo kukuphazamiseka okunzulu kweemvakalelo okude kwakhokelela ekuzibulaleni. Maxa wambi kubandakanyeka imichiza yengqondo nabanye oothunywashe abangokomzimba. Sekunjalo, ngokufuthi udandathelo lunokuncitshiswa ngoncedo lobulumko olunikelwa ngabanye. Ngaloo ndlela, uPawulos wabongoza wathi: “Bathuthuzeleni abamphefumlo udandathekileyo.” (1 Tesalonika 5:14, NW) Ngoko ke, amabandla amaNgqina kaYehova afanele ngovuyo anikele inkxaso engokweemvakalelo kwimiphefumlo edandathekileyo. Le mbopheleleko yaqondwa yintlangano yamaKristu yanamhlanje emva phayaa ngowe-1903, kuba ngelo xesha IMboniselo (yesiNgesi) yathi ngemiphefumlo edandathekileyo, okanye abamxhelo mncinane: “Abamxhelo mncinane nababuthathaka, bayalufuna uncedo, inkxaso, ukhuthazo.” Kodwa ungayinceda njani imiphefumlo edandathekileyo?

Okokuqala, ngokubonakalisa ‘uvelwano,’ usenokukwazi ukumnceda odandathekileyo ukuba atyhile “unxunguphalo” olusentliziyweni yakhe. Ngemva koko, “ilizwi elihle” elisuka kuwe linokumnceda avuye. (1 Petros 3:8; IMizekeliso 12:25, NW) Ukumyeka nje athethe ngokukhululeka aze abone inkxalabo onayo kunokuzisa intuthuzelo enkulu. UMary, ongudade ongatshatanga owayezamazamana nodandatheko wathi, “Ndandinabahlobo abaliqela endandinokuzityand’ igila kubo. Ndandifuna ubani onokuphulaphula.” Ukuba nothile wokwabelana naye ngeengcinga ezinzulu ezingeembandezelo zobomi kunokuthetha lukhulu.

Noko ke, kufuneka okungakumbi kunokuphulaphula nje uze unikele icebiso elingenabunzulu njengokuthi, “Cinga ngezinto ezintle ebomini” okanye “Cinga ngendlela ekhuthazayo.” Amazwi anjalo asenokubonakalisa ukungabi naluvelwano aze angafuneki nje kwaphela xa omnye umntu edandathekile, njengoko neMizekeliso 25:20 ibonisa ngokuthi: “Olahla ingubo yokwaleka ngemini yengqele, nqwa . . . kwanovuma iingoma kontliziyo imbi.” Amazwi akhuthaza ngokungekho ngqiqweni asekwanokumshiya ubani odandathekileyo eziva ephazamiseke nangakumbi. Ngoba? Kuba imigudu enjalo ayizifikeleli izizathu zodandatheko lwakhe.

Yomeleza Ngamazwi

Umntu odandatheke ngokunzulu akakho lusizini nje kuphela kodwa ngokunokwenzeka uvakalelwa engento yanto yaye engenathemba. Igama lesiGrike eliguqulelwe ngokuthi: “imiphefumlo edandathekileyo” ngokoqobo lithetha “abamxhelo mncinane.” Omnye umphengululi ongumGrike ulichaza eli gama ngale ndlela: “Uthile obulalekayo kwinkathazo enjalo, ngokokude intliziyo yakhe ityumke ngaphakathi kuye.” Ngaloo ndlela, akanazimvakalelo, yaye ukuzixabisa kwakhe kuphelile.—Thelekisa IMizekeliso 17:22.

Usolusapho uYobhi wathi: “Ndibe ndinganikhaliphisa [ndinganomeleza, NW] ngomlomo wam.” (Yobhi 16:5) Igama lesiHebhere elithi “yomeleza” maxa wambi liguqulelwa ngokuthi “khaliphisa” okanye “qinisa.” Lisetyenziswa ukuchaza indlela itempile ‘eyenziwa yomelela ngayo’ ngokuhlaziywa kwesakhiwo. (Isaya 41:10; Nahum 2:1, NW; 2 Kronike 24:13) Amazwi akho amele ngobuchule akwakhe kwakhona ukuzixabisa komntu odandathekileyo, ngokungathi kunjalo, isitena ngesitena. Ukwenza oku kufuna ukuba ufikelele ‘amandla akhe okuqiqa.’ (Roma 12:1, NW) Inkupho yowe-1903 yeMboniselo ecatshulwe ngaphambilana yathi mayela nabadandathekileyo: “Beswele . . . ukuzixabisa, bafuna ukutyhalelwa phambili kancinane, ukuze kuveliswe ubuchule abanabo ngokwenene, ukuze bakhuthazeke nokuze basikeleleke bonke abendlu yokholo.”

Umzekeliso weBhayibhile kaElikana nenkosikazi yakhe eyayidandathekile uHana ubonisa indlela onokomeleza ngayo ngamazwi, njengoko uYobhi wenzayo. UElikana wayenabafazi ababini. Omnye wabo, uPenina, wayenabantwana abaliqela, kodwa uHana wayeludlolo. Kusenokuba, uHana wayezigqala engento yanto. (Thelekisa iGenesis 30:1.) Ekugqala oku ngokungathi kwakungekokubandezeleka kungako, uPenina wamchunuba ukusa kwinqanaba lokuba walila akafuna nokudla. Nangona uElikana wayengabazi ubunzulu bokuphazamiseka kwakhe, ekuyiboneni imeko yakhe, wafuna ukuqonda: “Hana, ulilelani na? Yini na ukuba ungadli? Yini na ukuba ibe mbi intliziyo yakho?”—1 Samuweli 1:1-8.

Imibuzo kaElikana yobubele nengagxekiyo yanika uHana ithuba lokuvakalisa iimvakalelo zakhe. Enoba waphendula okanye akunjalo, wancedwa ukuba ahlolisise isizathu esisenokuba samenza wavakalelwa kukuba wayengento yanto. Ngoko, umphefumlo odandathekileyo usenokuthi, ‘Ndingumntu nje ombi.’ Usenokubuza uthi, ‘Kutheni uvakalelwa ngolo hlobo nje?’ Yandula ke uphulaphule ngenyameko njengoko ekutyhilela oko akuvayo entliziyweni yakhe.—Thelekisa IMizekeliso 20:5.

Wandula ke uElikana wabuza uHana to mbuzo womelezayo: “Andilungile na kuwe ngaphezu koonyana abalishumi?” UHana wakhumbula uthando lwakhe ngaye, phezu kwabo nje ubudlolo bakhe. Wayemgqala exabisekile, yaye ke ngoko wayenokugqiba ngolu hlobo: ‘Noko, nakuba ndinjalo andinto yanto kangako. Ndithandwa ngokunzulu ngokwenene ngumyeni wam!’ Amazwi akhe amomeleza uHana, kuba waqalisa ukutya waza wahamba waya etempileni.—1 Samuweli 1:8, 9.

Kanye njengokuba uElikana wangqalayo waza watsalela ingqalelo yenkosikazi yakhe kwisizathu esivakalayo sokuba izive ivuya ngesiqu sayo, abo banga banganceda abantu abadandathekayo bamele benze ngokufanayo. Ngokomzekelo, umKristu ogama linguNaomi wathetha okulandelayo ngoko kwamncedayo ukuba azuze uvuyo lwakhe kwakhona: “Ezinye zezihlobo zancoma indlela endamkhulisa ngayo unyana wam, indlela endandiligcina ngayo ikhaya, kwanendlela endandizigcina ndikhangeleka ngayo phezu kwalo nje udandatheko endandinalo. Olu khuthazo lwathetha lukhulu!” Ewe, ukuncoma okufanelekileyo kuyawunceda umphefumlo odandathekileyo ukuba ubone iimpawu zawo ezintle uze ube nomlinganiselo ofanelekileyo wokuzixabisa.

Ukuba inkosikazi yakho idandathekile, kutheni ungafuni ukuyakha ngokuvisisana namazwi eMizekeliso 31:28, 29? Apho sifunda oku: “Iyasuka indoda yakhe imdumise; ithi, Zininzi iintombi ezenza ngokunesidima; ke wena uzidlule zonke ziphela.” Sekunjalo, inkosikazi edandathekileyo isenokungakwamkeli ukunconywa okunjalo, ekubeni isenokuvakalelwa kukuba iyasilela ukwenza izinto ngenxa yokungakwazi ukunyamekela imisebenzi yasendlwini ngendlela ecinga ukuba imele yenze ngayo. Noko ke, ngokuyikhumbuza uhlobo lomfazi enguye ngaphakathi, nendlela eyayiyiyo ngaphambi kokuba idandatheke, unganako ukuyenza yeyiseke kukuba ukuncoma kwakho akuyonkohliso. Usekwanokuyazisa ukuba oko ikwenzayo ngoku kubonisa umgudu omkhulu. Usenokuthi: ‘Ndiyayazi indlela ekube nzima ngayo ngawe ukwenza oku. Hayi indlela oncomeka ngayo kuba usenza umgudu ongaka!’ Ukunconywa nokudunyiswa liqabane nabantwana bakabani, abo bamazi kakuhle ubani, kubalulekile ukuze kwakhiwe ukuzixabisa kwakhona.—Thelekisa eyoku-1 yabaseKorinte 7:33, 34.

Ukusetyenziswa kwemizekelo yeBhayibhile kunokumnceda umntu odandathekileyo ukuba abone iinguqulelo ezisenokufuneka kwindlela yokucinga. Ngokomzekelo, mhlawumbi uthile ukhathazeka ngokukhawuleza ziimbono zabanye. Usenokuxubusha naye umzekelo kaEpafrodito uze ubuze: ‘Ucinga ukuba siyintoni isizathu sokuba adandatheke xa wafumanisa ukuba ibandla lakowabo lalivile ngokugula kwakhe? Ngaba ngenene wayesilela ukwenza izinto? Kutheni le nto uPawulos wathi mabambeke? Ngaba ukubaluleka ngokwenene kukaEpafrodito kwakuxhomekeke kwilungelo lenkonzo awayenalo?’ Imibuzo enjalo isenokumnceda umKristu odandathekileyo ukuba ayisebenzise ngokobuqu aze aqonde ukuba akangomntu usilelayo ukwenza izinto.

“Baxhaseni Ababuthathaka”

IBhayibhile iyabongoza: “Baxhaseni ababuthathaka.” (1 Tesalonika 5:14, NW) Ubukho bothungelwano lwabahlobo abangamaKristu abanokunikela inyameko esebenzisekayo kuyenye ingenelo yonqulo lokwenyaniso. Abahlobo bokwenene ngabo ‘bazalelwe imbandezelo,’ ibe banamathelana ngokwenyaniso nomntu odandathekileyo. (IMizekeliso 17:17) Xa umpostile uPawulos waziva “edakumbile”, (TE) yaye ‘enoloyiko ngaphakathi,’ wathuthuzeleka “ngokufika kukaTito.” (2 Korinte 7:5, 6) Ngokufanayo, amatyelelo awenziwa ngokuqhutywa yintliziyo nokutsal’ umnxeba ngamaxesha afanelekileyo kusenokuxatyiswa kakhulu yimiphefumlo edandathekileyo. Usenokubuza enoba akukho ndlela onokunikela ngayo uncedo olusebenzisekayo na, njengokuya kuthenga izinto evenkileni, ukwenza umsebenzi wasendlwini, okanye okufanayo.a UmKristu ogama linguMaria uthi: “Xa ndandidandathekile, umhlobo wandibhalela izihlandlo eziliqela ibe wayesoloko equka izibhalo ezikhuthazayo. Ndandiyiphindaphinda ukuyifunda ileta, ndikhala njengoko ndiyifunda. Iileta ezinjalo zazinjengegolide kum.”

Emva kokukhuthaza ibandla ukuba lincede ‘imiphefumlo edandathekileyo,’ uPawulos uthi: “Yibani nokuzeka trade umsindo kubantu bonke. Lumkani, kungabikho bani ubuyekeza ububi ngobubi nakubani.” (1 Tesalonika 5:14, 15) Umonde ubalulekile, kuba ngenxa yentlungu engokwengqondo, ukucinga okudimazayo, nokudinwa ngenxa yokungalali ngokwaneleyo, umntu odandathekileyo usenokusabela ‘ngokubhuda,’ njengoko wenzayo uYobhi. (Yobhi 6:2, 3) URachelle, umKristu ononina owathi wadandatheka ngokunzulu, watyhila oku: “Izihlandlo ezininzi umama wayeye athethe into engathandekiyo. Inkoliso yezi zihlandlo, ndandiye ndizame ukuzikhumbuza ngohlobo lomntu uMama alulo ngenene—onothando, onobubele nonesisa. Ndafumanisa ukuba abantu abadandathekileyo bathetha izinto ezininzi ebebengazimiselanga kuzithetha. Eyona nto imbi umntu anokuyenza kukubuyisela amazwi okanye izenzo ezibi.”

Bambi abafazi abangamaKristu akhulileyo basenokuba kwimeko elunge ngakumbi yokunikela intuthuzelo kwabanye abafazi ababandezelekileyo ngokweemvakalelo. (Thelekisa eyoku-1 kuTimoti 5:9, 10) Aba bafazi banobuchule bangamaKristu banokuqinisekisa ukuba bathetha ngokuthuthuzelayo nabanjalo ngezihlandlo ezifanelekele oko. Maxa wambi kufaneleka ngakumbi ukuba ibe ngoodade abangamaKristu akhulileyo abaqhubeka benceda umfazi kunokuba ibe ngabazalwana. Ngokulungelelanisa imicimbi nokuyivelela kakuhle, abadala abangamaKristu banokuqinisekisa ukuba imiphefumlo edandathekileyo inyanyekelwa ngokuyimfuneko.

Abadala Abanolwimi Lwabafundileyo

Ngokukodwa abalusi bokomoya bamele babe ‘nolwazi nengqiqo’ ukuze ‘bakwazi ukuzimasa otyhafileyo.’ (Yeremiya 3:15; Isaya 50:4) Noko ke, ukuba umdala akalumkanga, unokuthi kungenganjongo amenze umntu odandathekileyo azive edandatheke ngakumbi. Ngokomzekelo, abahlobo bakaYobhi abathathu kuthiwa baya kuye ukuze “bamkhuze, bamthuthuzele.” Kodwa amazwi abo, eshukunyiswe yimbono ephosakeleyo ngemeko elusizi awayekuyo uYobhi, ‘amtyumza’ kunokuba amthuthuzele.—Yobhi 2:11; 8:1, 5, 6; 11:1, 13-19; 19:2.

Amanqaku awahlukahlukeneyo kwiimpapasho zeWatch Tower aye andlala imigaqo enokusetyenziswa ekululekeni abantu ngabanye.b Abadala abaninzi baye bayisebenzisa inkcazelo enjalo. Kanti, kwezinye iimeko iintetho ezingacingwanga ngabadala—ngokobuqu okanye ezintethweni—ziye zenzakalisa kakhulu. Ngoko abadala abamele ‘baphololoze njengokuhlaba kwekrele’ kodwa bamele bathethe ‘ngolwimi oluphilisayo lwezilumko.’ (IMizekeliso 12:18) Ukuba umdala uyacinga ngempembelelo anokuba nayo amazwi akhe ngaphambi kokuba athethe, amazwi akhe anokuba ngathuthuzelayo. Ngoko ke, badala, yenzani msinya ukuphulaphula nenze trade ukwenza izigqibo ningakhange nibe nombono opheleleyo.—IMizekeliso 18:13.

Xa abadala benomdla wokwenyaniso kubantu abadandathekileyo, abantu abanjalo baziva bethandwa yaye bexatyisiwe. Inkathalo enjalo yokungazingci isenokubashukumisela aba Bantu ekubeni bangawasi so nawaphi na amazwi adimazayo. (Yakobi 3:2) Abantu abadandathekileyo ngokufuthi bagutyungelwa yimvakalelo yokuba netyala, ibe abadala banokubanceda ukuba babe nembono elungeleleneyo ngemicimbi. Naxa kwenziwe isono esinzulu, inyameko yokomoya yabadala inokunceda ‘into eqhwalelayo iphiliswe.’—Hebhere 12:13.

Xa abantu abadandathekileyo bevakalelwa kukuba imithandazo yabo ayisebenzi, abadala banokuthandaza nabo baze babathandazele. Ngokufunda kunye nabo amanqaku angodandatheko asekelwe eBhayibhileni, abadala ‘banokubathambisa’ aba Bantu ngamazi okomoya athuthuzelayo. (Yakobi 5:14, 15) Abadala bakwanokumnceda ubani odandathekileyo ukuba athabathe amanyathelo angokweZibhalo ukuzinzisa nakuphi na ukungavisisani ngokobuqu asenokuba unako nothile, ukuba ingxaki yileyo. (Thelekisa uMateyu 5:23, 24; 18:15-17.) Ngokufuthi, ungquzulwano olunjalo, ngokukodwa entsatsheni, luba sisizekabani sodandatheko.

Qonda ukuba ukubuyela empilweni kuthabath’ ixesha. Kwanemigudu yothando kaElikana ayizange imkhulule kwangoko uHana kudandatheko awayenalo. Imithandazo yakhe yobuqu kwaneziqinisekiso zombingeleli omkhulu ekugqibeleni zakhokelela ekuphileni. (1 Samuweli 1:12-18) Ngenxa yoko, yiba nomonde ukuba intsabelo ayiyiyo ekhawulezileyo. Kambe ke, ngokuqhelekileyo abadala abangabo oogqirha yaye ke ngoko basenokufumanisa ukuba imigudu yabo ilinganiselwe kwimeko ezithile. Bona, kunye namalungu entsapho yomntu odandathekileyo, kusengafuneka ukuba bamkhuthaze lowo ukuba afune uncedo lwengcali. Ukuba kuyimfuneko, abadala okanye amalungu entsapho banokuyichazela ngokucacileyo nayiphi na ingcali ukubaluleka kokuhlonela iinkolelo ezingokonqulo zikabani odandathekileyo.

De kufike ihlabathi elitsha likaThixo, akukho namnye uya kuphila ngokugqibeleleyo ngokomzimba, ngokwengqondo, okanye ngokweemvakalelo. Okwangoku, nawuphi na umKristu ophulukana novuyo lwakhe ngenxa yodandatheko unokomelezwa kungekuphela nje libandla lamaKristu kodwa kwananguBawo wethu, “othuthuzela abadandathekileyo.”—2 Korinte 7:6, New American Standard Bible.

[Imibhalo esemazantsi]

[Ibhokisi ekwiphepha 29]

INDLELA YOKUTHETHA NGOKUTHUTHUZELAYO

◻ PHULAPHULA NGENYAMEKO—Ngemibuzo enengqiqo ‘rhola’ iimvakalelo zentliziyo yaloo mntu. Yenza msinya ukuphulaphula wenze trade ukufikelela kuzo naziphi na izigqibo ngaphambi kokuba nombono opheleleyo.—IMizekeliso 20:5; 18:13.

◻ BONISA UVELWANO—‘Uvelwano’ lumele luhambisane’nothando olunyamekileyo’ njengoko uzama ukuzibeka ngokweemvakalelo kwimeko yalowo udandathekileyo. ‘Lila nolilayo.’—1 Petros 3:8; Roma 12:15.

◻ YIBA NOKUZEKA KADE UMSINDO—Kusenokufuneka iingxubusho eziphindaphindiweyo,ngoko yiba nomonde. Musa ukukusa so ‘ukubhuda’ kodandathekileyo ngenxa yokatyo.—Yobhi 6:3.

◻ YOMELEZA NGAMAZWI—Nceda ubani odandathekileyo ukuba abone iimpawu zakhe ezintle. Mncome ngokungqalileyo. Mbonise ukuba iingxaki, amava amabi exesha elidlulileyo, okanye iintsilelo azimiseli kuxabiseka kukabani. Mcacisele isizathu sokuba uThixo emthanda yaye emkhathalele.—Yobhi 16:5.