Abavakalisi BoBukumkani Bayabalisa

Izimvu ZikaYesu Ziyaliva Ilizwi Lakhe

NJENGOKUBA umsebenzi wokushumayela usanda kuyo yonke imimandla yomhlaba, uYehova ngezithunywa zakhe zezulu walathisa abakhonzi bakhe kwababumvu. Bayaliva ilizwi likaYesu baze bafunde ukumkhonza benethemba lobomi obungunaphakade. KuYohane 10:27, 28 uYesu wathi: “Ezam izimvu ziyaliva ilizwi lam, ndibe nam ndizazi, zindilandela; mna ndizinika ubomi obungunaphakade.” Phawula indlela abaye baliva ngayo ilizwi likaYesu abantliziyo zinyanisekileyo eMadagascar.

Omnye wamaNgqina kaYehova wanika ugqirha owayezokubona uyise ogulayo imibhalo yencwadi ethi Unokuphila Ngonaphakade KwiParadisi Esemhlabeni nethi Ubutsha Bakho—Ukufumana Okona Kulungileyo Kubo.

Lo gqirha wayengumProtestanti yaye wayewachase ngokukrakra amaNgqina, kodwa wayifunda loo ncwadi waza wahlolisisa neZibhalo kwiBhayibhile yakhe. Umfazi wakhe owayengumKatolika, ekwangugqirha, wafunda incwadi ethi Ubutsha izihlandlo eziliqela ngenxa yokuba wathi ibonakala ngathi yabhalelwa yena ngokukhethekileyo. Ingcaciso yoMbutho esekelwe eBhayibhileni ecacisa iziganeko zowe-1914 yabangela umdla kubo bobabini. Indoda yaqhagamshelana neNgqina elayinika ezo ncwadi. Elo Ngqina layinika incwadi ethi Life—How Did It Get Here? By Evolution or by Creation? laza lenza amalungiselelo okuyityelela nomfazi wayo ukuze liphendule imibuzo yabo. Xa labatyelelayo, laqalisa isifundo seBhayibhile esithe rhoqo neso sibini nabantwana baso abathathu. Senza inkqubela ngokukhawuleza ekuqondeni iBhayibhile.

Emva kwesifundo sokuqala, yonke intsapho yaqalisa ukuya kwiintlanganiso kwiHolo yoBukumkani yaye kungekudala emva koko yabhalisa kwiSikolo Sobulungiseleli Sobuthixo. Abantwana bayiphucula ngokubalaseleyo indlela ababeziphethe ngayo. Kwisifundo sabo seBhayibhile, bafunda ukuba umKristu akamele abhiyozele imihla yokuzalwa nezinye iiholide zonqulo; ngenxa yoko, bayeka ukuzigcina. Indoda yala ukunikela ngegazi kwisizalwana sayo, nakubeni okwelo thuba lo mbandela wawungekaxutyushwa kwisifundo seBhayibhile. Kungabanga thuba lide isinxibo sayo sekarati saphela emehlweni kwityesi yayo yeempahla; yasithumela kumthungi weempahla ukuze yenzele abantwana bayo iimpahla. Yawatshisa onke amaphephancwadi neencwadi ezingokuvumisa ngeenkwenkwezi. Kwiinyanga nje ezintathu emva kokuba beqalise ukufundisisa, le ndoda nomkayo baphuma kwiicawa zabo baza bavakalisa umnqweno wabo wokuba nesabelo kumsebenzi wokushumayela. Ngoku babhaptiziwe.

◻ Elinye ibhinqa eThailand lalifuna inyaniso. Nangona lalingumBhuda, alizange lizinikele kunqulo lwalo ngenxa yokuba lalibone uhanahaniso nokubawa okuninzi. Ngokungakumbi, kwakukho amasiko athile elawafumanisa engonwabisi. Lalingayithandi yonke loo nto.

Waza ke, ummelwane walo walicebisa ukuba lilinge amaKristu waza walithabatha walisa kwicawa yamaPentekoste. Noko ke, ebudeni benkonzo eli bhinqa lanqwenela ukuhamba ligoduke ngenxa yengxolo, njengokuba bonke abakhoyo babethandaza bekhwaza. Alizange liphinde liye kuloo cawa.

Kamva, lazama icawa yamaRoma Katolika. Noko ke, emva kokuya kuyo izihlandlo eziliqela, kwakhona laphawula uhanahaniso nokubawa, nendlela etofotofo awayephila ngayo umfundisi walapho. Lakruquka laza layeka ukuya apho. Umfundisi wayefuna ukwazi isizathu esibangele ukuba lihambe. Emva kokusiqonda isizathu, ngendlela egculelayo wathi: “Ukuba unqwenela ukuthelela abona bantu bangqongqo ngokwenene, yiya kumaNgqina kaYehova.” Eli bhinqa labuza: “Aphi?” Umfundisi waphendula: “Akufuphi nendawo ekucocwa kuyo amanzi.” Ngosuku olulandelayo lawakhangela labuya lingawafumananga. Lidanile, sekunjalo lahlala licinga ngamaNgqina kaYehova.

Ngenye imini leva omnye wabamelwane balo ethetha ngendlela egculelayo nomnye esithi: “Uza kuba liNgqina likaYehova kungekudala!” Lathi xa lisiva oko, eli bhinqa labaleka layo kummelwane walo laza labuza: “Ngaba akho amaNgqina kaYehova kufutshane apha?” Impendulo yathi: “Ewe, wambi aza kuza apha elumelwaneni eshumayela kwindlu ngendlu. Uza kuwabona ngendlela ecocekileyo nefanelekileyo anxiba ngayo.” Laphuma kwangoko lisiya kuwakhangela. Alizange liwafumane ekuqaleni kodwa xa lalibuyela endlwini yalo, labona amabhinqa amabini anxibe ngokufanelekileyo ethetha nomnye umntu. Laya kuwo laza lawabuza enoba ayengamaNgqina kaYehova kusini na. Xa athi ayengawo, lawabongoza: “Ncedani nize endlwini yam, ndifuna ukuthetha nani.”

Kwaqaliswa isifundo seBhayibhile, yaye phezu kwako nje ukuchaswa nokugculelwa ngamalungu entsapho, eli bhinqa sele liqalisile ukuya kwiintlanganiso nokunikela ubungqina kwizizalwana zalo.

Ngokwenyaniso uYesu uyazazi izimvu zakhe yaye uzihlanganisela kwintlangano yakhe ukuze zisindele kwihlabathi lakhe elitsha lobulungisa.