Baxhotyiselwe Inkonzo Yobuvangeli Basemazweni Ngeminyaka Yee-1990

KUQALISA ixesha elikhethekileyo kwinkonzo yobuvangeli basemazweni. Ekubeni kukho amathuba avulekayo kwimimandla emininzi emitsha, onke amaNgqina kaYehova athembekileyo alangazelela ukwenza umsebenzi omkhulu ngakumbi.

Ngoko abafundi abangama-24 beklasi yama-89 yeSikolo seBhayibhile seWatchtower saseGiliyadi babenolindelo olukhulu ngoxa babekho kucwangciso lokuphumelela kwabo ngoSeptemba 9, 1990. Abaphulaphuli abangaphezu kwama-5 000 abaziindwendwe ezimenyiweyo namalungu entsapho yaseBheteli bahlanganisana kucwangciso lokuphumelela kwaba bavangeli basemazweni batsha, ababesele bezifumene izabelo zokuya kumazwe alishumi. Luqhutywa kwiHolo yeNdibano yamaNgqina kaYehova ekwisiXeko saseJersey, eNew Jersey, ucwangciso luphela lwakwaviwa nangabo babehlanganisene kwiBheteli yaseBrooklyn, kwiiFama zeWatchtower nakwiZiko Lemfundo leWatchtower elisePatterson, eNew York.

Entloko ngeye–10:00 kusasa, uTheodore Jaracz, ilungu leQumrhu Elilawulayo lamaNgqina kaYehova nowayengusihlalo ngaloo mini, wachaza ingoma yokuvula. Emva koku, uArthur Worsley olilungu lentsapho yaseBheteli eBrooklyn wenza umthandazo. Wandula ke usihlalo wabhekisela kwiZenzo 10:33, apho umthetheli-khulu ongumRoma uKorneli wathi kuPetros: “Sikho thina sonke emehlweni kaThixo, ukuze sizive zonke izinto ozimiselweyo nguThixo.” Kwaphawuleka ukuba iziganeko ezingokwembali ezenzeka ngomhla kaPetros zazivulela indlela yokuba kuvakaliswe iindaba ezilungileyo kubantu beentlanga zonke.

UPhilip D. Wilcox, wakwiiFama zeWatchtower, wanikela eyokuqala kwiintetho ezisixhenxe ezikhuthazayo. Ecaphula kwabaseFilipi 4:7, wakhetha umxholo othi “Uxolo LukaThixo Malunincede Kwisabelo Senu.” Wathi: “UYehova uThixo unguMthombo walo lonke uxolo lokwenyaniso. Unandipha uxolo ngengqiqo epheleleyo, okanye ezeleyo yaye akanalo ixhala, uloyiko okanye ukungonwabi ngokwengqondo okukhathazayo. Ngenxa yoko, kukho ukuzola noxolo olungqonge ubukho obuqaqambileyo bukaYehova etroneni yakhe, njengoko kuboniswe ngumnyama ofana nesmarado owabonwa nguYohane embonweni. (ISityhilelo 4:2, 3) Uxolo lwakhe lufikelela kubo bonke abaya kuluvumela ukuba lubancede. Ngaba niya kuluvumela.” UMzalwana uWilcox wathi gqaba-gqaba ngamancedo amabini abalulekileyo, umthandazo nokukulungela ukulindela kuYehova. (Mika 7:7; Filipi 4:6) Wathi, akukho nto uThixo anokuyivumela enokusenzakalisa ngokusisigxina.

ULloyd Barry, ilungu leQumrhu Elilawulayo, walandela ngomxholo othi “Hlalani Nincumile.” Waqalisa ngentetho ethi, “Ukuhleka liyeza elilungileyo.” Wakhumbula loo mazwi kuba emva phayaa ngowe-1955 ayengumxholo ongaphandle wenkupho yokuqala yephephancwadi uVukani! ukufumaneka ngolwimi lwesiJapan. Kodwa luhlobo olunjani lokuhleka? Akukuko “ukuhleka kwesidenge” intsini-menyo nokungekho ngqiqweni. (INtshumayeli 7:6) Kunoko, kukuhleka okubonakalisa ukuchwayita nokukhululeka kwabavangeli basemazweni nabanye abasabela kwisimemo sikaDavide sokusoloko ‘bevuya kuYehova.’ (INdumiso 32:11) UMzalwana uBarry wathi phezu kwazo nje izilingo eziqatha, uYobhi wayenokuhlala encumile, kuba wayesazi ukuba wayegcine ingqibelelo kuThixo. Abavangeli basemazweni abama beqinile phezu kwawo nje amava alingayo njengakaYobhi baya kufumana intsikelelo engakumbi ekugqibeleni. (Yobhi 29:24; 42:12) Isithethi saqukumbela ngokuthi: “Hlalani nixakekile, hlalani nincumile, yaye nani niya kuzuza uncumo lukaYehova lwenkoloseko olungunaphakade.”

Isithethi esalandelayo sasinguRichard E. Abrahamson, owakhetha umxholo othi “Ukuthantamisa Kwenu Makwazeke Kubantu Bonke,” owawusekelwe kwabaseFilipi 4:5. NgokwesiGrike samandulo, igama elithi “ukuthantamisa” linokudlulisela ingqiqo “yokuyekelela.” Abanye abavangeli basemazweni baye baneengxaki ngenxa nje yokhetho lobuqu. Omnye wothuswa yindlela umvangeli wasemazweni awayesebenza naye awasika ngayo iqhekeza lesonka samasi etafileni. Emva kweminyaka engama-22 yenkonzo yobuvangeli basemazweni, lowo wothuswayo waphawula ukuba iingxaki ezininzi ziqalisa ngemibandela engabalulekanga kangako kunendlela omnye asisika ngayo isonka samasi. Isithethi sacebisa ngokuthi: “Zifundiseni ukuziqhelanisa neemeko, njengomthi kwisaqhwithi somoya. Kukho iingenelo ezininzi ekubeni ngoyekelelayo, ezinjengokukwazi ukunyamezela izilingo kakuhle kakhulu nokunamathela kukabani kwisabelo sakhe enoxolo lwengqondo.”

UMilton G. Henschel, weQumrhu Elilawulayo, waxubusha umxholo othi “Umnyango Omkhulu Okhokelela Emsebenzini Uvulekile.” UMzalwana uHenschel wathi uYesu wayebathanda abantu, ebavela usizi, yaye ebafundisa izinto ezininzi. Ese-Efese umpostile uPawulos wabhalela abaseKorinte oku: “Ndivulelwe umnyango omkhulu okhokelela emsebenzini, kodwa kukho abachasi abaninzi.” (1 Korinte 16:8, 9, NW) Phezu kwayo nje le nkcaso, uPawulos wafundisa esikolweni sikaTirano iminyaka emibini, kangangokuba isigidimi soBukumkani saziwa kulo lonke elaseAsiya. (IZenzo 19:9, 10) Umnyango ovulekileyo wakhokelela ekubeni ukushumayela kwakhe kube yimpumelelo. Ibandla lase-Efese lalisaqhubeka ekupheleni kwenkulungwane yokuqala.—ISityhilelo 2:1-7.

UJack D. Redford, umyaleli waseGiliyadi, wathetha ngomxholo othi “Zilingeni Ngokwenu Oko Nikuko.” (2 Korinte 13:5) Abavangeli basemazweni baseGiliyadi bavule amasimi amatsha baza bomeleza amabandla asele esekiwe kade, benyamezela okuninzi yaye bechasa izihendo uMtyholi azibekileyo ukuze abatyekise. Yaye abatsha bayaqhubeka bebathelela. Ngamava acacileyo ezihlandlo ezahlukeneyo umyaleli wachaza indlela ekubaluleke ngayo ukuba ubani avavanye ukholo lwakhe. Omnye umvangeli wasemazweni waphulukana namalungelo akhe emva kokuba ethe ngekratshi akasikhathalela isiluleko esilumkisayo ngekhondo eliphosakeleyo. Ngokwahlukileyo koko, omnye wahlala kwisabelo sakhe ngovuyo, nangona kwiinyanga zakhe zokuqala elapho, wabhitya waba ngumcinga sisigulo esamenza wavuthulukelwa ziinwele yaye akakwazi nokuva. Uselapho emva kweminyaka engama-42 yaye, ngezifundo zeBhayibhile, uye wanceda abantu abangama-156 ukuba babhaptizwe. UMzalwana uRedford waqukumbela ngokuthi: “Mchaseni uMtyholi yaye wonibaleka. Ningaze nizamkele izinto ahenda ngazo. Zilingeni ngokwenu. UYehova uya kuninyamekela.”

Ngokulandelayo, omnye umyaleli, u-Ulysses V. Glass, wathetha ngomxholo othi “Bunabathozamileyo Ubulumko.” (IMizekeliso 11:2) Wasebenzisa iwotshi yesihlahla esebenza ngelahle elifumana amandla elangeni ukuzekelisa ukuba ukukhanya kweLizwi likaThixo kunokusigcina “sinamandla.” Wathi: “Kodwa ulwazi lulodwa aluniki bulumko. UThixo ufuna nokuthozama.” (Mika 6:8) Ukuthozama kuya kusikhokelela ekoyikeni uThixo, yaye “yingqalo yokulumka ukoyika uYehova.” (IMizekeliso 9:10) Enyanisweni, simele sicinge okuthile ngathi; ukuzigweba kunokusenza siphelelwe ngamandla okuzixabisa njengabantu. UYehova uye wanika abathile amandla akhethekileyo, njengoko wenzayo ebudeni bokwakhiwa komnquba, kodwa kumele kusetyenzelwe ukuthozama ngokuthembekileyo. UMzalwana uGlass waxelela iklasi oku: “Ebudeni bexesha lezifundo, ninikele ubungqina bokuthembeka nobentlonelo. Bonakalisani oku kuthembeka kufanayo kwisabelo senu, yaye uThixo uya kunisikelela.”

UAlbert D. Schroeder, weQumrhu Elilawulayo, wanikela intetho eyimbalasane enomxholo othi “Niyixhotyiselwe Kakuhle Inkonzo Yobuvangeli Basemazweni Ngeminyaka Yee-1990.” Waqalisa ngokuthi: “Iminyaka yee-1990 sele iqale ngeziganeko eziphawulekayo. Izizwe ezininzi zaseMpuma Yurophu ziye zagungqiswa. Kwiinyanga eziliqela ezidluleyo uDonga lwaseBerlin lwadilizwa. IThe New York Times yayinalo mxholo ubalaseleyo: ‘UAgasti 1990, Inyanga Eye Yagungqisa Ihlabathi.’ Ngoko, nina baphumeleleyo niphila kwixesha leziganeko ezigungqisayo. Ngaba iinyanga zenu ezintlanu zokufundisisa ziye zanilungiselela kona? Ngokuqinisekileyo kunjalo!” Wandula ke wakhankanya ezinye iimbalasane eziluncedo zeNew World Translation of the Holy Scriptures—With References nendlela isifundo sayo esiye salenza iLizwi likaThixo laphila ngayo. Esinye isixhobo esinamandla esiye saxhobisa abafundi yincwadi ethi “All Scripture Is Inspired of God and Beneficial,” ngoku kuhlelo lwayo oluhlaziyiweyo lowe-1990. Impapasho yakutshanje ethi Iphulo Loluntu Lokufuna UThixo ikwafanele ibe luncedo olunamandla lwabavangeli basemazweni. UMzalwana uSchroeder waqukumbela ngokuthi: “Ke ngoko, bazalwana, mbuleleni uYehova ngemfundo emangalisayo nexabiseke kakhulu eniye nayifumana—ezinzileyo nengenakugungqiswa. Tyhalelani phambili nentsikelelo kaYehova nize nibe nentembelo ezeleyo kuye nakwiNkokeli yethu ebalaseleyo, uYesu Kristu. Amazwi esinawo eZibhalweni eneneni aphefumlelwe yaye aya kunikhokela aze analathise kumsebenzi wobuvangeli basemazweni.”

Kwafundwa imibuliso evela kumazwe ali-11. Abafundi bafumana iziqinisekiso zabo, yaye omnye wabo wafundela iQumrhu Elilawulayo nentsapho yaseBheteli incwadi yoxabiso olusuka entliziyweni.

Ucwangciso lwasemva kwemini lwaquka ushwankathelo lwesifundo seMboniselo, esasiqhutywa nguDavid L. Walker, ilungu leKomiti yeeFama zeWatchtower. Emva koko abafundi basebenzisa umxholo okhuthazayo othi “Amandla Omthandazo Ekushumayeleni” ekwenzeni umdlalo obonisa amava asentsimini. Ibandla lasekuhlaleni lenza umdlalo okhuthazayo othi Bakhululekile Ukuze Bahambisele Phambili Unqulo Lokwenyaniso, osekelwe ekubuyeleni kukaEzra eYerusalem ukuya kuxhasa unqulo lokwenyaniso. UMzalwana uFrederick W. Franz, umongameli weSikolo saseGiliyadi, waqukumbela ngomthandazo ochukumisayo.

[Umfanekiso okwiphepha 24]

Abaphumelele Kwiklasi Yama-89 YeSikolo SeBhayibhile SeWatchtower SaseGiliyadi