Ukuphumelela Kwabo BeKlasi Yama-83 YaseGiliyadi Ngenene Kwakusisihlandlo Esonwabisayo
“BULELANI kuYehova, ngokuba elungile; ngokuba ingunaphakade inceba yakhe.” (INdumiso 136:1) Leyo yayiyimvakalelo esuka entliziyweni yabo bonke abali-4 391 ababekho kucwangciso lokuvuyisana nabo babephumelele kwiklasi yama-83 yeSikolo seBhayibhile seWatchtower saseGiliyadi kukwindla oludlulileyo. Iintetho, amava, nomdlalo weBhayibhile ezaqhubeka ebudeni bocwangciso zabangela ukuba bonke bahambe bonwabile. Olu cwangciso lokuvuyisana nabaphumeleleyo lwaqhutywa ngoSeptemba 6, 1987, kwiHolo entle yeNdibano ekwisiXeko iJersey, eyayisaziwa ngaphambili iyiStanley Theater.
Ngemva kwengoma yokuvula nomthandazo owenziwa nguJohn Booth weQumrhu Elilawulayo, usihlalo, uAlbert Schroeder, olelinye lelungu leQumrhu Elilawulayo, wamkela bonke ababeze kwesi sihlandlo sonwabisayo. Abafundi abangama-24 babephuma kumazwe amahlanu, ibe ngoku babethunyelwa kumazwe asibhozo awahlukeneyo. UMzalwan’ uSchroeder wabalaselisa intembelo abantu bakaYehova abanayo ngenxa yokuba ukholo lwabo lusekelwe kwizinto eziqinisekileyo. Ngokomzekelo, bayazi ukuba uYehova unguMongami Wendalo Iphela nokuba iLizwi lakhe, iBhayibhile Engcwele, iyinyaniso epheleleyo. Oku kwahluke ngokuphawulekayo kwiingcamango zabantu ezisekelwe kwizinto ezithandabuzekayo nakuqashiqashi.
Isithethi sokuqala yayinguMartin Poetzinger, okwalilungu leQumrhu Elilawulayo, owachitha iminyaka esithoba kwiikampu zoxinaniso zamaNazi. Umxholo wentetho yakhe wawusithi “Ukholose Ngabani?” ibe yayisekelwe kwiMizekeliso 3:5, 6. Wagxininisa ebhekisa kubafundi imfuneko yokukholosa ngokupheleleyo ngoYehova nangentlangano yakhe ebonakalayo, kuquka nabani na ozingqina ethembekile. Uqeqesho lwabafundi baseGiliyadi lwalusisiseko nje kuphela; ngoku kwakuza kufuneka bakhele phezu kwaso ngokulandela icebiso likaPawulos kumaEfese 5:5, 16. Isithethi sababongoza sisithi, ‘Musani ukuba zizidodo. Niya kuba neengxaki kwisabelo senu sobuvangeli basemazweni ngokuphathelele ulwimi, imozulu, ukutya, njalo njalo; kodwa ngokukholosa ngoYehova, ninokuzicombulula zonke ezo ngxaki. Ukuthanda abantu kuya kunenza niphumelele. Konke okukhuthazayo kuvela kuThixo; konke okudimazayo kuvela kuSathana.’
Isithethi esalandelayo yayinguEldor Timm, ilungu leKomiti yoMzi-mveliso, owasekela amagqabaza akhe kweyesi-2 yabaseKorinte 13:5 ethi: “Zilingeni, ukuba niselukholweni olu na.” Wathi, abafundi bagqibezela izifundo zabo ngokubhala iimviwo, kodwa baya kuqhubeka bejongana nezinye iimvavanyo kwizabelo zabo zobuvangeli basemazweni. Indlela abahlangabezana ngayo nezo mvavanyo iya kubonakalisa impumelelo yabo njengabavangeli basemazweni. Kufuneka bezilindile ekuzithembeni ngokugqithiseleyo ngokuthobela esi siluleko: “Lowo uba umi, makalumke angawi.” (1 Korinte 10:12) Baya kuqhubeka besenza uphuculo ukuba balondoloza isimo sengqondo esihle.
Ilungu leKomiti yeSebe Lenkonzo, uJoel Adams, waba ngolandelayo. Wathetha ngombandela othi: “Cinga NjengoYesu, Bonisa Umdla Wobuqu Kwabanye.” Onjani wona ukuba mhle umzekelo uYesu awawumiselayo ngokuphathelele le nkalo! Umzekelo wakhe wokungazingci nokuthobeka siwuchazelwa ngokucacileyo kwabaseFilipi 2:3-5. Ukuba abanye basisilingo kuthi ngeentsilelo zabo okanye ngokungabi nabuchule bokwenza okuthile, masiqhubeke sibonakalisa ububele kubo. Ebudeni boqeqesho kwiSikolo saseGiliyadi, abaninzi babonakalisa umdla kubafundi; ngoku yayiza kuba ngabo ababeza kwenza okufanayo kwabanye. Abavangeli basemazweni abaphumelela ngendlela ebalaseleyo bangabo babonakalisa umdla kumasiko abanye, kulwimi, kwiintswelo, njalo njalo.
Emva koko, abafundi bakhuthazwa ngulowo wayengumvangeli wasemazweni kanga-ngeminyaka emininzi, uLloyd Barry, naye okwalilungu leQumrhu Elilawulayo. Wathetha ngomxholo othi “Vumani KuYehova,” owawusekelwe kwiNdumiso 96:1. Abantu bakaYehova bayakunandipha ukucula. Ukucula kuhambisana novuyo, ibe ke ngoko wakhuthaza aba bafundi ukuba bangaze baphulukane novuyo lokuzisa inyaniso kwabanye. Wababongoza esithi, ‘Ukuba kufuneka nifunde ulwimi olutsha, zinikeleni ngentliziyo yenu zisuka nje. UMtyholi uza kuzama ukunidimaza, anenze nikhumbule ekhaya, abangele ukuba ningamanyani nina ngokwenu. Ningaze nimvumele nakancinane!’ UMzalwan’ uBarry wathetha “ngomhlohli oyintloko kwesi sikolo sabavangeli basemazweni,” uEdwin Skinner, oye wakhonza kwesi sabelo sasemazweni eIndiya kangangeminyaka engama-60, nothi ngoku kubudala beminyaka engama-93 aqhubeke esenza umsebenzi wemini yonke. Ngokutsho kukaMzalwan’ uSkinner, into ekwenza uphumelele njengomvangeli wasemazweni isekelwe kula magama mabini: “Ukuthobeka kungundoqo!”
Emva kwala magqabaza, usihlalo wafunda iingcingo eziliqela ezazinamazwi avuyisana naba bafundi yaye zibamkela ngokufudumeleyo. Kwafunyanwa imiyalezo evela eBolivia, eKhanada, e-Ecuador, eHonduras, eSpeyin, eSweden naseTrinidad.
UJack Redford, ongomnye wabahlohli kwesi Sikolo saseGiliyadi, wathetha phantsi komxholo othi “Qhubeka Ungumhlobo KaYehova.” Wagabul’ izigcawu ngamazwi athi kukho amaziko amaninzi ezorhwebo aqeqeshela impumelelo kwezoshishino ngokufumana abahlobo nangokuphembelela abantu. Noko ke, aba bafundi, njengabavangeli basemazweni bexesha elizayo, nabo baye bafundiswa indlela yokufumana abahlobo nokuphembelela abantu, kungekhona ngenzuzo yokuzingca, kodwa khon’ ukuze abantu abanjalo babe zizihlobo zikaThixo. Esi sithethi sathi, ‘Ubomi benu bobokuzincama. Namkele ngesisa, yiphani ngesisa. Akukho lwaneliseko okanye luvuyo lukhulu kunolo lokuphumelela ekuncedeni abantu ekubeni babe zizihlobo zikaThixo. Ubuhlobo noThixo luzuko olukhulu kakhulu oludlula naluphi na olunokuzuzwa siso nasiphi na isidalwa. UYakobi 2:23 usixelela ukuba uAbraham waba ngumhlobo kaYehova ngenxa yokuba nokholo kuThixo. Waya kwilizwe lasemzini ibe akazange akhangele emva; nani bavangeli basemazweni animele nikhangele emva, kodwa, kunoko, khangelani phambili kwiintsikelelo eziya kubakho kwihlabathi elitsha likaThixo.’
U-Ulysses Glass, ongumhlohli eGiliyadi nobhalisa abafundi kwesi sikolo, ngeli thuba yena wathetha ngalo mbandela “Isifundo Sokugqibela.” Wathi aba bafundi baye bafunda ngendlela ethi ngokwenene imithetho kaYehova ifikelele kude nechane ngayo. Esenza umzekelo, walatha kwiinkcukacha ezininzi ezinxulumene nokwenziwa kwamadini ngoMhla Wocamagushelo nezilwanyana ezininzi ezazibandakanyekile apho. (Levitikus, isahluko 16) Wabancoma aba bafundi ngokubonisa kwabo uxabiso olunzulu olusuka entliziyweni waza wathi INdumiso 145:7 isichaza kakuhle isimo sabo sengqondo: “Bompompoza isikhumbuzo sokulunga kwakho okukhulu, bamemelele ngobulungisa bakho.” Ekuqukumbeleni kwakhe, wakwacaphula IMizekeliso 3:5-7, egxininisa imfuneko yokuba ‘bakholose ngoYehova ngentliziyo yabo yonke.’
UMzalwan’ uF. W. Franz, umongameli weSikolo saseGiliyadi oneminyaka engama-94 ubudala nongumongameli we Watch Tower Bible and Tract Society, wanikela intetho yokuqukumbela ngaloo ntsasa. Kuyo wabalisa ngembali yoMbutho ukususela ngexesha lomongameli wokuqala, uC. T. Russell, de kwasekwa iSikolo saseGiliyadi. Udlwabevu lwentetho awalunikela ngehlombe lwaxatyiswa ngabo bonke. Emva kwentetho yakhe, aba bafundi bangama-24 bafumana iziqinisekiso zabo kunye nezipho, wandula ke omnye waba bafundi wafunda incwadi eyayivakalisa uxabiso lwabo ngalo lonke uncedo abaye balufumana kwiQumrhu Elilawulayo nakwintsapho yaseBheteli.
Ngemva kwethuba lonqumamo elalimalunga neeyure ezimbini, uPhil Wilcox, olilungu leKomiti yeeFama zeWatchtower, waqhuba isifundo esishwankathelweyo kwiMboniselo eyayifundisiswa ngelo xesha ekwathi kuso imibuzo yaphendulwa ngabafundi. Esi sifundo salandelwa lucwangciso abathi abafundi kulo babalisa kwakhona amava ababewanandiphile ngoxa babenikela ubungqina ngeemva kwemini zangoLwesithathu kwisiXeko saseNew York. Oku kwakuyinxalenye yoqeqesho lwabo lwaseGiliyadi. Kwakhona bachaza ngokucacileyo iingxaki ezahlukahlukeneyo abanokulindela ukuhlangabezana nazo xa bekwizabelo zakumazwe asemzini.
Njengomqukumbelo ofanelekayo walo lonke olo cwangciso, aba bafundi benza umdlalo weBhayibhile ababenxibe kuwo iimpahla zamandulo yaye uziinxalenye ezimbini, ubalaselisa ukubaluleka kwamaxesha esiphila kuwo. Lo mdlalo wakwenza oku ngokuthelekisa imihla yethu namathuba adlulileyo axa kwakuza kuphunyezwa umgwebo. Nge-4:15 emva kwemini, ngokuculwa kwengoma ethi “Ulwando Lolawulo Lobuthixo” nomthandazo owenziwa lilungu leQumrhu Elilawulayo uMilton Henschel, olo cwangciso luvuyisa kakhulu lwathi lwaqukunjelwa.
[Umfanekiso okwiphepha 23]
Abaphumeleleyo kwiKlasi yama-83 yeSikolo seBhayibhile seWatchtower eGiliyadi
Abakuluhlu olungezantsi, babalwa ngokusuka ngaphambili ukuya emva ibe amagama abhalwe ukusuka ekhohlo ukuya ekunene kumgca ngamnye.
(1) Melin, D.; Goode, M.; Ramos, M.; Chow, N.; Hermanson, A.; Dagostini, D. (2) David, E.; DiPaolo, A.; Neiman, D.; Shephard, J.; Foster, M.; Ramos, R. (3) Foster, W.; Melin, D.; Fristad, D.; Fristad, R.; White, L; Dagostini, F. (4) Neiman, D.; Ness, S.; Shephard, D.; Goode, J.; White, K.; Hermanson, L.