Ngaba Uyakhokela Ekuboniseni Imbeko Kwamanye AmaKristu?

“Ngokuphathelele uthando lobuzalwana yibani nomsa omnye komnye. Ekuboniseni imbeko omnye komnye khokelani.”—ROMA 12:10.

1, 2. (a) Kwileta yakhe awayibhalela abaseRoma, uPawulos ubabongoza esithini? (b) Yiyiphi imibuzo esiza kuyiqwalasela?

KWILETA awayibhalela abaseRoma, umpostile uPawulos ugxininisa ukubaluleka kokuba thina njengamaKristu sibonise uthando ebandleni. Usikhumbuza ukuba uthando lwethu lufanele ‘lungabi naluhanahaniso.’ Uthetha ‘nangothando lobuzalwana’ yaye uthi lufanele lubonakaliswe ‘ngomsa.’—Roma 12:9, 10a.

² Kakade ke, uthando lobuzalwana alufanele luphelele nje entliziyweni. Kunoko olo thando lufanele luhambe nezenzo. Ngapha koko, akukho mntu unokwazi ukuba siyamthanda ngaphandle kokuba sikubonakalise oko ngezenzo. Ngenxa yoko, uPawulos wongezelela athi: “Ekuboniseni imbeko omnye komnye khokelani.” (Roma 12:10b) Yintoni ebandakanyekileyo ekubonakaliseni imbeko? Kutheni kubalulekile ukukhokela ekuboniseni imbeko kwabanye? Sinokukwenza njani oko?

Intlonelo Nembeko

3. Ngokolwimi lweBhayibhile lwamandulo, igama elithi “imbeko” linayiphi intsingiselo?

³ Igama lesiHebhere elithi “imbeko” ngokoqobo lithetha “ubunzima.” Umntu ophathwa ngembeko ugqalwa njengomntu onzima okanye obalulekileyo. EZibhalweni, eli gama linye lesiHebhere lidla ngokuguqulelwa ngokuthi “uzuko,” nto leyo ibonisa indlela ahlonelwa ngayo loo mntu uphathwa ngembeko. (Gen. 45:13) Igama lesiGrike eliguqulelwe ngokuthi ‘imbeko’ eBhayibhileni lidlulisela ingcamango yokuxabiseka. (Heb. 2:9) Ngoko abantu esibahlonelayo siyabaxabisa.

4, 5. Ukubonisa imbeko kunxibelelene njani nentlonelo? Yenza umzekelo.

⁴ Kubandakanya ntoni ukubonisa imbeko kwabanye? Kuqala simele sibahlonele. Eneneni igama elithi “intlonelo” nelithi “imbeko” adla ngokusetyenziswa omabini kuba anxibelelene. Ukuphatha umntu ngembeko kubonisa ukuba uyamhlonela. Ngamany’ amazwi, intlonelo ibhekisela kwindlela omjonga ngayo umzalwana wakho ngoxa imbeko ibhekisela kwindlela omphatha ngayo.

⁵ UmKristu unokuyibonisa njani imbeko kwabanye xa engabahloneli ngokusuk’ entliziyweni? (3 Yoh. 9, 10) Kanye njengokuba isityalo sichuma size sikhule xa iingcambu zendele emhlabeni omhle, nomntu onentlonelo esuk’ entliziyweni unokukwazi ukubonisa imbeko ngokunyanisekileyo. Ekubeni imbeko yenkwalambisa ingaqhutywa yintlonelo, iphelel’ emoyeni. Kungenxa yoko le nto, xa uPawulos wayethetha ngokubonisa imbeko wathetha la mazwi angqalileyo: “Uthando lwenu malungabi naluhanahaniso.”—Roma 12:9; funda eyoku-1 kaPetros 1:22.

Bonisa Imbeko Kwabo Badalwe “Ngomfanekiso KaThixo”

6, 7. Kutheni sifanele sibonise intlonelo kwabanye?

⁶ Ekubeni xa ubonakalisa imbeko ufanele ube nentlonelo esuk’ entliziyweni, sifanele sihlale sikhumbula izizathu ezingokweZibhalo zokuhlonela abazalwana bethu. Makhe siqwalasele ezibini zazo.

⁷ Ngokungafaniyo nezinye izidalwa ezisemhlabeni, abantu badalwe “ngomfanekiso kaThixo.” (Yak. 3:9) Ngenxa yoko, sineempawu zikaThixo ezinjengothando, ubulumko nokusesikweni. Phawula olunye uphawu esilufumene kuMdali wethu. Umdumisi uthi: “Owu Yehova . . . , isidima sakho siphela sibaliswa ngaphezu kwamazulu! . . . Wamenza [umntu] wangaphantsi kancinane kwabo banjengothixo, waza wamthwesa ngozuko nobungangamsha [‘imbeko,’ ngokweKing James Version].” (INdu. 8:1, 4, 5; 104:1)a UThixo uthwese bonke abantu isidima, uzuko nembeko. Ngenxa yoko, xa siphatha abanye ngesidima sibonisa ukuba sihlonela uYehova, onike abantu isidima. Ngoko, ukuba sinezizathu zokuhlonela bonke abantu, kukangakanani ke ngamanye amaKristu!—Yoh. 3:16; Gal. 6:10.

Singamalungu Entsapho Enye

8, 9. Sisiphi isizathu esichazwa nguPawulos sokuhlonelana kwamaKristu?

⁸ UPawulos uchaza esinye isizathu sokuba sihlonele abanye. Ngaphambi nje kokuba anikele isiluleko ngokubonisa imbeko, uthi: “Ngokuphathelele uthando lobuzalwana yibani nomsa omnye komnye.” Ibinzana lesiGrike eliguqulelwe ngokuthi ‘umsa’ libhekisela kwintsapho ethandanayo nemanyeneyo. Ngenxa yoko, ngokusebenzisa eli binzana, uPawulos wayegxininisa ukuba ebandleni, abazalwana bafanele babe nolwalamano oluqinileyo njengentsapho ethandanayo nemanyeneyo. (Roma 12:5) Ngapha koko, simele sikhumbule ukuba la mazwi kaPawulos ayebhekiswa kumaKristu athanjisiweyo, angabantwana abanoBawo omnye, onguYehova. Ngoko ayeyintsapho emanyeneyo. Ngenxa yoko, amaKristu athanjisiweyo exesha likaPawulos ayenesizathu esivakalayo sokuhlonelana. Kunjalo nangabathanjiswa banamhlanje.

⁹ Kuthekani ngabo ‘bezinye izimvu’? (Yoh. 10:16) Nangona bengekabingabo abantwana bakaThixo, banokubizana ngokuthi mzalwana nangokuthi dade ngenxa yokuba bayintsapho yamaKristu emanyeneyo. (1 Pet. 2:17; 5:9) Ngenxa yoko, ukuba abo bezinye izimvu bayasiqonda isizathu sokuba babizane ngokuthi “mzalwana” okanye “dade,” ngoko nabo banesizathu esivakalayo sokuba bahlonelane ngokusuk’ entliziyweni.—Funda eyoku-1 kaPetros 3:8.

Kutheni Kubalulekile Ukubonisa Imbeko?

10, 11. Kutheni kubalulekile ukubonisa intlonelo nembeko?

¹⁰ Kutheni kubalulekile ukubonisa intlonelo nembeko? Ngenxa yesi sizathu: Xa sibonisa imbeko kubazalwana noodadewethu, sifak’ isandla kumanyano lwebandla.

¹¹ Kakade ke, siyaqonda ukuba eyona nto isomelezayo njengamaKristu okwenyaniso kukuba nolwalamano olusondeleyo noYehova nokuxhaswa ngumoya wakhe. (INdu. 36:7; Yoh. 14:26) Kwangaxeshanye, kuyasikhuthaza ukubona ukuba amanye amaKristu ayasixabisa. (IMize. 25:11) Xa umntu ebonakalisa uxabiso nentlonelo kuthi siziva sihlaziyekile. Kuyasomeleza ukuze sikwazi ukuqhubeka sihamba ngovuyo nangokuzimisela kwindlela esa ebomini. Ngokuqinisekileyo nawe uvakalelwa ngaloo ndlela.

12. Yintoni esinokuyenza ukuze kubekho uthando ebandleni?

¹² Ngoko ekubeni uYehova esazi ukuba siyakufuna ukuhlonelwa, eLizwini lakhe usibongoza ukuba ‘sikulangazelele ukubonisa intlonelo omnye komnye.’ (Roma 12:10, ngokweToday’s English Version; funda uMateyu 7:12.) Onke amaKristu asisebenzisayo eso siluleko abangela ukuba kubekho uthando phakathi kwabazalwana abangamaKristu. Ngenxa yoko, sifanele sizibuze, ‘Ndagqibela nini ukubonisa intlonelo esuk’ entliziyweni ngamazwi nangezenzo kumzalwana okanye udade osebandleni?’—Roma 13:8.

Isabelo Sethu Sonke

13. (a) Ngoobani abafanele bakhokele ekuboniseni imbeko? (b) Amazwi kaPawulos akweyabaseRoma 1:7 abonisa ntoni?

¹³ Ngoobani abafanele bakhokele ekuboniseni imbeko? Kwileta awayibhalela amaHebhere, uPawulos uchaza abadala abangamaKristu ‘njengabo bakhokelayo phakathi kwenu.’ (Heb. 13:17) Kuyinyaniso ukuba abadala bayakhokela kwimisebenzi emininzi. Kodwa, njengabalusi bomhlambi bafanele bakhokele ekuboniseni imbeko kwamanye amaKristu—kuquka abanye abadala. Ngokomzekelo, xa abadala benentlanganiso bexubusha imibandela yebandla, babonisa imbeko ngokuphulaphulana. Ngaphezulu, babonisa imbeko ngokuhlola iimbono zabo bonke abadala xa besenza izigqibo. (IZe. 15:6-15) Noko ke, sifanele sikhumbule ukuba xa uPawulos wayebhalela amaRoma wayengabhekiseli kubadala kuphela kodwa wayebhalela ibandla liphela. (Roma 1:7) Ngenxa yoko, isibongozo sokukhokela ekuboniseni imbeko sibhekisela kuthi sonke namhlanje.

14. (a) Yenza umzekelo obonisa umahluko phakathi kokubonisa imbeko nokukhokela ekuboniseni imbeko. (b) Nguwuphi umbuzo esinokuzibuza wona?

¹⁴ Cinga nangale nkalo yesiluleko sikaPawulos. Wabongoza amaKristu aseRoma ukuba angabonakalisi imbeko nje kuphela kunoko akhokele ekuboniseni imbeko. Yintoni umahluko? Cinga ngalo mzekelo. Ngaba utitshala unokukhuthaza abafundi abakwaziyo ukulesa ukuba bafunde ukulesa? Akunjalo. Sele bekwazi ukulesa. Kunoko utitshala unokunceda abafundi ukuba baphucule indlela abalesa ngayo. Ngokufanayo, ukuthandana kwethu okusenza sibonise imbeko kubonisa ukuba singamaKristu okwenyaniso. (Yoh. 13:35) Noko ke, kanye njengokuba abafundi abakwaziyo ukulesa benokuphucula indlela abalesa ngayo, nathi sinokuphucula ngokukhokela ekuboniseni imbeko. (1 Tes. 4:9, 10) Sonke sinikwe eso sabelo. Ngoko sisenokuzibuza, ‘Ngaba ndiyakwenza oko—ndiyakhokela ekuboniseni imbeko kwabanye ebandleni?’

Bonisa Imbeko ‘Kwabo Basweleyo’

15, 16. (a) Xa sibonakalisa imbeko, ngoobani esifanele sibaquke? (b) Yintoni enokubonisa ukuba sibahlonela ngokusuk’ entliziyweni bonke abazalwana noodadewethu?

¹⁵ Xa sibonisa imbeko, ngoobani esifanele sibaquke? ILizwi likaThixo lithi: “Obabala isisweli uboleka uYehova, yaye impatho yakhe uya kumbuyekeza ngayo.” (IMize. 19:17) Umgaqo ofumaneka kula mazwi ufanele usiphembelele njani xa sizama ukukhokela ekuboniseni imbeko?

¹⁶ Siyayazi into yokuba kulula kubantu abaninzi ukubonisa imbeko kubantu abakwizikhundla eziphezulu kunezabo, kodwa ababaphathi ngentlonelo abantu ababajongela phantsi. Kodwa uYehova akanjalo. Uthi: “Abo bandibekayo ndiya kubabeka.” (1 Sam. 2:30; INdu. 113:5-7) UYehova ubaphatha ngembeko abo bamkhonzayo nababonisa imbeko kuye. Akabatyesheli abo ‘basweleyo.’ (Funda eyoku-1 kaSamuweli 2:8; 2 Kron. 16:9) Ngoko ke, sifuna ukuxelisa uYehova. Ngenxa yoko, ukuba sifuna ukubona enoba sinyanisekile kusini na kwindlela esibonisa ngayo imbeko, sifanele sizibuze, ‘Ndibaphatha njani abo bangenazimbopheleleko ebandleni?’ (Yoh. 13:14, 15) Impendulo yalo mbuzo inokusenza sibone ukuba sibahlonela ukusa kuwuphi na umkhamo abanye.—Funda eyabaseFilipi 2:3, 4.

Sibonakalisa Imbeko Kwabanye Ngokuchitha Ixesha Nabo

17. Yiyiphi indlela ebalaseleyo esinokukhokela ngayo ekuboniseni imbeko yaye ngoba?

¹⁷ Yiyiphi indlela ebalaseleyo esinokukhokela ngayo ekuboniseni imbeko kuwo onke amalungu ebandla? Ngokuchitha ixesha kunye nawo. Kutheni sisitsho nje? NjengamaKristu sixakekile yaye sichitha ixesha elininzi sinyamekela iimbopheleleko ezininzi zebandla. Ngenxa yoko, ixesha lethu libalulekile. Siyaqonda nokuba asifanele sinyanzele abazalwana noodadewethu ukuba bachithe ixesha elininzi kunye nathi. Ngokufanayo, nathi siyavuya xa amanye amalungu ebandla eqonda ukuba akafanele asinyanzele ukuba sichithe ixesha kunye nawo.

18. Njengoko kuboniswe kumfanekiso okwiphepha 18, sinokubonisa njani ukuba sikulungele ukuchitha ixesha nabanye?

¹⁸ Sekunjalo, siyaqonda nokuba (ingakumbi thina bangabalusi ebandleni) xa sisithi xha kancinane kwimisebenzi yethu ukuze sichithe ixesha nabanye abazalwana sibonisa ukuba siyabahlonela. Ngayiphi indlela? Xa siyeka imisebenzi yethu ukuze sichithe elo xesha nabazalwana bethu, kufana nokuba sithi kubo, ‘Ubaluleke gqitha kum kangangokuba eyona nto ibalulekileyo kukuba ndichithe ixesha kunye nawe kunokuba ndiqhubeke nento ebendiyenza.’ (Marko 6:30-34) Kuyafana naxa sisenza ngendlela eyahlukileyo kuleyo. Ukuba simathidala ukuyeka umsebenzi esiwenzayo ukuze sichithe elo xesha nomzalwana, sinokumenza azive engaxabisekanga. Kakade ke, siyayiqonda into yokuba maxa wambi kubakho imicimbi engxamisekileyo ekungenakuba lula ukuyiyeka phakathi. Sekunjalo, indlela esisabela ngayo xa abanye befuna sichithe ixesha elithile kunye nabo ibonisa umkhamo esibahlonela ngawo abazalwana noodadewethu.—1 Kor. 10:24.

Zimisele Ukukhokela

19. Ngaphandle kokuchitha ixesha kunye nabazalwana bethu, yiyiphi enye indlela esinokubonisa ngayo imbeko kubo?

¹⁹ Zikho nezinye iindlela ezibalulekileyo esinokubonisa ngazo imbeko kwabanye. Ngokomzekelo, xa sikunye nabo sifanele sibaphulaphule ngenyameko. UYehova usimisela umzekelo nakule nkalo. Umdumisi uDavide uthi: “Amehlo kaYehova akumalungisa, neendlebe zakhe zibhekiswe ekukhaleleni kwawo uncedo.” (INdu. 34:15) Sizama ukuxelisa uYehova ngokunikela ingqalelo ngokupheleleyo kubazalwana bethu ingakumbi abo bafuna sibancede. Xa sisenjenjalo, sibonisa imbeko.

20. Zintoni esifanele sizikhumbule ngokuphathelele ukubonisa imbeko?

²⁰ Njengoko siye sabona, sifanele sikhumbule isizathu sokubonisa intlonelo kwabanye abazalwana ngokusuk’ entliziyweni. Ngaphezulu, sifanele sikhangele amathuba esinokubonisa ngawo imbeko kubo bonke, kuquka abasweleyo. Xa sisenjenjalo, siya kwenza kubekho uthando nomanyano ebandleni. Ngoko ke, masiqhubeke sibonisa kungekhona nje imbeko kodwa masikhokele ekuboniseni imbeko kwabanye. Ngaba uzimisele ukwenza oko?

[Umbhalo osemazantsi]

Ngaba Uyakhumbula?

• Ukubonisa imbeko kunxulumene njani nentlonelo?

• Ziziphi izizathu ezisenza sibonise imbeko kwamanye amaKristu?

• Kutheni kubalulekile ukubonisa imbeko kwabanye?

• Ziziphi iindlela esinokubonisa ngazo imbeko kwamanye amaKristu?

[Umfanekiso okwiphepha 18]

Sinokuyibonisa njani imbeko kwamanye amaKristu?