IBhayibhile—Ngaba Ngokwenene Ingcwele?
BANGAPHI abantu namhlanje abayijonga iBhayibhile njengengcwele, njengeliLizwi likaThixo? Kwesi sizukulwana sentandabuzo, abaninzi bayigqala njengephelelwe lixesha nengangeni ndawo kubo, beyithandabuza ukuba ngokwenene ingcwele. Kwaneenkokeli ezithile zonqulo zeNgqobhoko zifundisa ukuba iBhayibhile izele ngamavo nje neentsomi. Ziyathandabuza ‘enoba indlela iBhayibhile eyichaza ngayo imbali yileyo umntu ochubekileyo engqondweni anokuvumelana nayo kusini na.’—The Interpreter’s Dictionary of the Bible, Umqulu 2, iphepha 611.
Abaphengululi ababalaseleyo bahlwayela iimbewu zentandabuzo ngokuphathelele ukufaneleka kokubhekisela kwiBhayibhile njengeLizwi likaThixo. Omnye wathi “ukuba ubani ufuna ukuyibiza ngento efana nokuthi liLizwi likaThixo, indlela efanelekileyo yokubiza iBhayibhile ibiya kuba kukuthi liLizwi likaSirayeli, iLizwi lamaKristu athile awayengawokuqala awayebalasele.” (The Bible in the Modern World, nguJames Barr) Ucinga ntoni wena? Ngaba iBhayibhile iliLizwi likaThixo? Ngaba ngokwenene ingcwele?
Ngubani Owabhala IBhayibhile?
Ngokuqhelekileyo kuthiwa iGenesis, incwadi yokuqala yeBhayibhile, yabhalwa nguMoses, umHebhere owayephila kwiminyaka enokuba ngama-3 500 eyadlulayo. Ngokutsho kweBhayibhile ngokwayo, amadoda amalunga nama-40 awayephila ngeendlela ezahlukeneyo aba nesabelo ekubhaleni zonke ezinye iZibhalo, oko kwaphumela kwingqokelela yeencwadi okanye amacandelo amancinane, angama-66, enza iBhayibhile. Noko ke, la madoda awazange azigqale wona ngokwawo njengabayili bokwenene beBhayibhile. Omnye umbhali wathi: “Sonke iSibhalo siphefumlelwe nguThixo.” (2 Timoti 3:16) Omnye wabhala oku ngababhali beBhayibhile: “Bathi abantu abangcwele bakaThixo bathetha beqhutywa nguMoya oyiNgcwele.”—2 Petros 1:21.
Oku kubabeka ababhali kwinqanaba lokuba ngoonobhala ababelawulwa, okanye ababekhokelwa, nguThixo. Ngokutsho kweBhayibhile, umbhali wayedla ngokuvunyelwa ukukhetha awakhe amagama ekucaciseni inkcazelo ayinikwe nguThixo. (Habhakuki 2:2) Kungoko kukho izimbo ezininzi zokubhala kuyo yonke iBhayibhile. Kodwa ukubhala kwakusoloko kukhokelwa nguThixo.
Kuyavunywa ukuba, into yokuba aba babhali beme ngelithi baphefumlelwe nguThixo ayithi yona ngokunokwayo ibe bubungqina bokuba iBhayibhile isisigidimi sikaThixo eso uMdali wasithumelela uluntu. Noko ke, enoba Osenyangweni unguMyili weBhayibhile okanye akunjalo oko kufanele kubonwe ngokucacileyo ngokuhlolisisa ngenyameko nangeliso elingenamkhethe le ncwadi ngokwayo. Ngaba iBhayibhile inikela ubungqina bokuba yayilwa nguThixo? Ngokwenene, ngaba ngentembelo sinokuthi iBhayibhile ingcwele?