Indima Yendoda
“¡Ropa, zapato, casa, y comida!” La mazwi asuka kwingoma endala yeSpanish edwelisa izinto ezine ezisisiseko indoda elindeleke ukuba izilungiselele intsapho yayo ezizezi: impahla yokunxiba, izihlangu, ikhusi kunye nokutya. Yaye inkoliso yamadoda athembekileyo ngegugu izama ukuwufeza loo mthwalo.
Noko ke, ukuba uyindoda enentsapho, ngaba uyazinyamekela iintswelo zokomoya ezibaluleke ngakumbi zentsapho yakho? Okanye ngaba, njengamanye amadoda amaninzi ucinga ukuba enyanisweni ukunyamekela imicimbi engokonqulo ekhaya akuyondima yendoda? Kwamanye amabutho akulindelekanga kwaphela ukuba amadoda achithe ixesha efundisa abantwana bawo ngoThixo nangeBhayibhile.
ILizwi likaThixo ngokukhethekileyo libeka imbopheleleko kwindoda yekhaya ukutsolisa entsatsheni yayo uthando ngoThixo noxabiso olunzulu ngemilinganiselo yobuthixo. Ngokomzekelo, kwabase-Efese 6:4, iZibhalo ziyala amadoda angamaKristu ngokulandelayo zisithi: “Nani boyise, musani ukubacaphukisa abantwana benu; bondleleni ekuqeqesheni nasekululekeni kweNkosi.”
Abanye, nangona beqhelene nala mazwi, abanakusiqonda ngokupheleleyo eso sibhalo ukuba ngokukodwa sibhekiselwe kubawo, indoda yekhaya. Ngokomzekelo, abanye abantu abathetha iSpanish nesiPhuthukezi basenokuwaqonda amazwi akwabase-Efese 6:4 njengabhekisela kumama nakubawo. Kwezi lwimi igama elithi “oobawo” negama elithi “abazali” athetha into enye. Noko ke, kwindinyana 1 yabase-Efese isahluko 6 umpostile uPawulos wenza imbekiselo kubawo nakumama ngokusebenzisa igama lesiGrike elithi go·neuʹsin, elisuka kwelithi go·neusʹ, elithetha “umzali.” Kodwa kwindinyana 4, kusetyenziswe igama lesiGrike elithi pa·teʹres, elithetha “oobawo.” Ewe, kwabase-Efese 6:4, uPawulos unikela amazwi akhe ngokungqalileyo kumadoda entsatsheni.
Kakade ke, ukuba akukho ndoda entsatsheni ukuba ikhokele, umfazi umele ayithabathele kuye le mbopheleleko. Ngoncedo lukaYehova oomama abaninzi baye ngokunempumelelo bakhulisa abantwana babo ekuqeqesheni nasekululekeni kukaYehova. Phofu ke, xa indoda yomKristu ikho, imele ikhokele. Ukuba iyayityeshela le mbopheleleko, kuba nzima ngakumbi ngentsapho iphela ukuba igcine ucwangciso oluhle lokuzondla ngokomoya. Ngenxa yokutyeshela kwayo indoda enjalo iya kuphendula kuYehova.
Iimbono zikaThixo ziyabonakala kulo mbandela kwiimfaneleko ezingokweZibhalo ezibekelwe abaveleli nezicaka zolungiselelo kwibandla lamaKristu. IBhayibhile ibalula ukuba ofanele amiselwe kwisigxina esinjalo ufanele ‘abe yindoda eyongamela kakuhle eyayo indlu, abantwana bayo beyithobela, benokundileka konke (kuba ukuba umntu akakwazi ukuyongamela eyakhe indlu, angathini na ukuphatha ibandla likaThixo?).’—1 Timoti 3:4, 5, 12; Tito 1:6.
Indoda enentsapho imele ikulungele ukuzincama iziyolo nokulungelwa kobuqu ngenxa yempilo-ntle engokomoya yabantwana bayo. Ngamanye amaxesha kusenokufuneka ukuba icuthe ixesha elichithela kweminye imisebenzi ukuze ibe nexesha elisengqiqweni elichitha ngokuthe rhoqo nabantwana bayo. (Duteronomi 6:6, 7) Sekunjalo, ayinakusiyekela kwabanye eso sabelo isinikwe nguThixo. Uthando nomdla wayo ebantwaneni bayo luya kuba ngaphaya kokubalungiselela iimpahla zokunxiba, izihlangu, ikhusi, nokutya.
Kulucelomngeni ukukhulisa abantwana ‘ekuqeqesheni nasekululekeni kukaYehova.’ Yiyo loo nto ngokuyintloko iyimbopheleleko yendoda. Xa ubawo ongumKristu esenza umsebenzi wakhe kakuhle, ngoko unokubagqala abantwana bakhe aboyika uThixo njengentsikelelo evela kuYehova. Unokuthelela emazwini omdumisi athi: “Njengeentolo esandleni segorha, banjalo oonyana bobutsha. Hayi uyolo lomfo ozalise umphongolo wakhe ngabo.”—INdumiso 127:4, 5.