Imibuzo Yabafundi

Ngaba Ikamva Lethu Limiselwe Kwangaphambili?

Bambi bathi umhla wokufa kwethu umiselwe kwangaphambili. Abanye bona bathi uThixo ubeke imini aza kufa ngayo umntu ngamnye. Ukongezelela, abo bantu bacinga ukuba izinto ezenzeka ebomini azinakuphepheka. Ngaba nawe ucinga ukuba kunjalo?

Usenokuzibuza le mibuzo ilandelayo: ‘Ukuba nyhani akukho nto sinokuyenza ngekamva lethu, ukuba uThixo sele esenzile isigqibo ngesiphelo sobomi bethu, sisathandazela ntoni? Ukuba isiphelo sethu sele simiselwe, kutheni sifanele sizikhusele? Sisalinxibela ntoni ke ibhanti xa sihamba ngemoto? Yaye kutheni singamele sisele xa siza kuqhuba?’

IBhayibhile ayikukhuthazi ukungakhathali ngolo hlobo. Kunokuba ithi izinto mazishiyelwe kumabona ndenzile, iBhayibhile yayalela amaSirayeli ukuba aluphaphele ukhuseleko. Ngokomzekelo, kwathiwa ayefanele azakhele ungqameko lodonga izindlu zawo. Injongo yalo yayikukukhusela umntu angawi xa eseluphahleni. UThixo ke wayenokuwukhupha njani umyalelo onjalo ukuba kanti wayemisele kwangaphambili ukuba abantu bawe kolo phahla ngenye imini baze bafe?—Duteronomi 22:8.

Kuthekani ngabantu ababulawa ziintlekele zemvelo okanye zizinto ezithile ezingaphaya kwamandla abo? Ngaba bebemiselwe “imini yabo yokufa”? Akunjalo kuba umbhali weBhayibhile uKumkani uSolomon usixelela ukuba “bonke [thina] behlelwa lixesha nasisihlo esingenakubonwa kwangaphambili.” (INtshumayeli 9:11) Ngoko enoba iimeko afe phantsi kwazo umntu aziqhelekanga kangakanani, bezingamiselwanga kwangaphambili.

Noko ke, abanye bavakalelwa kukuba le ndinyana iyaphikisana nento ethethwe nguSolomon ngaphambili yokuba: “Yonke into inexesha layo elimisiweyo, nomcimbi wonke unexesha lawo phantsi kwamazulu: kukho ixesha lokuzalwa nexesha lokufa.” (INtshumayeli 3:1, 2) Kodwa ngaba uSolomon wayexhasa uluvo lokuba isiphelo sethu simiselwe kwangaphambili? Makhe siwaphonononge la mazwi.

USolomon akazange athi ukuzalwa nokufa zizinto ezimiselwe kwangaphambili. Kunoko, ingongoma awayeyiphuhlisa yayikukuba, ukuzalwa nokufa njengazo zonke ezinye izinto kuya kusoloko kukho. Ngokuqinisekileyo, ubomi buya kuhlala bunamahla ndinyuka abo, uSolomon uthi “kukho . . . ixesha lokulila nexesha lokuhleka.” USolomon ubonisa ukuba iziganeko ezilolo hlobo nezingenakubonwa kwangaphambili zixhaphakile ebomini ‘kumcimbi wonke phantsi kwamazulu.’ (INtshumayeli 3:1-8; 9:11, 12) Eyona nto ayitshoyo ke ngoko kukuba asifanele sixakeke kakhulu zizinto zobu bomi kangangokuba side sityeshele uMdali.—INtshumayeli 12:1, 13.

Nangona uMdali ebazi ngokupheleleyo ubomi kunye nokufa, akalimiseli kwangaphambili ixesha esiza kufa ngalo. IBhayibhile ifundisa ukuba uThixo uvulele ngamnye wethu ithuba lokuphila ngonaphakade. Kodwa ke uThixo akasinyanzeli ukuba senze into efunekayo ukuze sibufumane obo bomi. Kunoko iLizwi lakhe lithi: “Lowo uthandayo makawathabathe amanzi obomi ngesisa.”—ISityhilelo 22:17.

Ewe, siwathabatha ngokuzithandela “amanzi obomi.” Ngoko ikamva lethu alimiselwanga kwangaphambili. Izigqibo, izimo zengqondo, nendlela esenza ngayo izinto zifaka isandla kwikamva lethu.