‘Bube Namandla Ububele Bakhe Obunothando’

NGOKUBALISWA NGUJOSÉ VERGARA OROZCO

Ngaba ucinga ukuba unokuba namandla angakumbi ebomini kubudala beminyaka engama-70? Kwaba njalo kanye kum. Yaye oko kwenzeka ngaphezu kweminyaka engama-35 edluleyo.

Ngenxa yobubele bukaYehova obunothando, ukususela ngowe-1962, ndiye ndakhonza njengovulindlela othe ngxi kwaye ukususela ngowe-1972, bendikhonza njengomveleli kwiBandla lamaNgqina kaYehova e-El Carrizal kwilizwana laseJalisco, eMexico. Makhe ndinithele gqaba-gqaba ngemvelaphi yam.

NDAZALELWA kwilizwana laseMichoacán, eMexico, ngoAgasti 18, 1886. UBawo wayelilungu lequmrhu langasese eliyiMason, ngoko intsapho yakuthi yayingayihambi iCawa yamaKatolika, yaye sasingabi nanxaxheba kuyo nayiphi na imibhiyozo yonqulo lwamaKatolika okanye sibe nayo nayiphi na imifanekiso eqingqiweyo yonqulo ekhayeni lethu.

Xa ndandineminyaka eli-16 ubudala, ubawo wemka waya kusebenza eUnited States, kodwa wenza amalungiselelo okuba enye indoda indifundise umsebenzi wezandla. Noko ke emva kweminyaka emibini loo ndoda yandisa kwisiXeko saseMexico ukuze ndiqeqeshwe kwiziko lemfundo lasemkhosini. Emva koko ndaqalisa ukusebenza emkhosini waseMexico.

Emkhosini Nasemva Koko

Ndalwa kwiMvukelo yaseMexico eyaqala ngowe-1910. Sonke thina matyendyana awayekwelo ziko lemfundo sasixhasa uFrancisco I. Madero, owayechasene nolawulo lobuzwilakhe lukaPorfirio Díaz ebudeni bemvukelo. Samxhasa uMadero de kwasekufeni kwakhe ngowe-1913, yaye emva koko, saxhasa uVenustiano Carranza, owaba ngumongameli waloo Riphabliki ukususela ngowe-1915 ukusa kowe-1920. Sasibizwa ngokuba singamaCarranzistas.

Kangangezihlandlo ezine ezahlukeneyo, ndazama iindlela zokuba ndikhululwe emkhosini, kodwa ndatsho phantsi. Ekugqibeleni ndaqhwesha ndaza ndaba yimbacu. Oko kwaphumela ekubeni, ubawo, owayebuyele eMexico, aphoswe entolongweni. Ngenye imini, ndizenza umtshana wakhe, ndamtyelela entolongweni. Sanxibelelana ngokubhala kwiziqwenga ezincinane zamaphepha ukuze abalindi bangasiva. Ukuphepha ukuba kungabikho nabani na ondiqondayo ukuba ndingubani, ndawatya loo maphepha.

Emva kokuba ubawo ekhululwe entolongweni, wandityelela waza wandicela ukuba ndizinikezele kwabasemagunyeni. Ndenjenjalo, yaye into eyandimangalisayo kukuba injengele eyayisebenza ayizange indivalele. Kunoko, yacebisa ukuba ndifudukele eUnited States. Ndalilandela icebiso layo ndaza ndahlala apho ukususela ngowe-1916 ukusa kowe-1926.

Ngowe-1923, ndatshata nebhinqa laseMexico nalo elalikwahlala eUnited States. Ndafunda umsebenzi wezandla ekwakheni, yaye samkela intombazana encinane njengomntwana wethu. Xa yayineenyanga ezili-17 ubudala, sabuyela Mexico saza sahlala eJalpa, eTabasco. Kwaqala ke ‘imvukelo kaCristero’, yaye yaqhubeka ukususela ngowe-1926 ukusa kowe-1929.

AmaCristero ayefuna ukuba ndiwathelele. Noko ke, mna nentsapho yam sakhetha ukubalekela kwiLizwana laseAguascalientes. Emva kokuhlala kwiindawo ezahlukahlukeneyo zeriphabliki yaseMexico, ngowe-1956 sazinza eMatamoros, eTamaulipas, apho ndaqalisa ukongamela imisebenzi yolwakhiwo.

Ubomi Bam Buyaguquka

Ngeli xesha ubomi bam baqalisa ukuguquka. Intombi yam, eyayisele itshatile neyayihlala ngaphaya komda eBrownsville, eTexas, eUnited States, yayidla ngokusityelela kaninzi. Ngenye imini yathi: “Tata, iintsapho ezininzi zihlanganisene kwiholo kawonke wonke kanye ngoku. Masihambe siye kubona ukuba kukho ntoni na.” Yayiyindibano yamaNgqina kaYehova. Mna nentombi yam, umkhwenyana, umzukulwana nomfazi wam sabakho kuzo zonke iintsuku zendibano.

Ukususela ngaloo nyaka, saya kwiintlanganiso zobuKristu zamaNgqina kaYehova. Ndenza inkqubela ngokomoya eMexico, ngoxa intombi yam yayisenjenjalo eUnited States. Kungabanga thuba lide ndandixelela abantu endandisebenza kunye nabo iinyaniso zeBhayibhile endandizifunda. Ndandifumana amaphephancwadi alishumi enkupho nganye yeMboniselo noVukani!, endandiwasasaza kubantu endandisebenza nabo. Abahlanu kwabo baseofisini nabathathu koononjineli kwanabanye abasebenzi baba ngamaNgqina.

Hayi indlela ekwakubanda ngayo ngaloo Disemba 19, 1959, xa ndabhaptizwa emlanjeni! Wonk’ ubani owayebhaptizwa ngaloo mini wagula ngenxa yamanzi awayebanda okomkhenkce. Intombi yam yabhaptizwa ngaphambi kwam, yaye umfazi wam, nangona engazange abhaptizwe, wafikelela kwinqanaba lokwazi inyaniso yeBhayibhile, yaye wayenentsebenziswano.

Ubulungiseleli Bexesha Elizeleyo

Ndaziva ndinetyala kuThixo ngabo bonke ububele bakhe obunothando, ngoko ngoFebruwari 1962, xa ndandineminyaka engama-75 ubudala, ndaqalisa ubulungiseleli bexesha elizeleyo njengovulindlela. Kwiminyaka embalwa kamva, ngowe-1968, umfazi wam wafa. Ngoko ndandifuna ukuya kukhonza kwelinye ilizwe, kodwa ngenxa yobudala bam, abazalwana abazange bakuncomele oko. Noko ke, ngowe-1970, ndanikwa isabelo njengovulindlela eColotlán kwilizwana laseJalisco, apho kwakukho ibandla elincinane.

NgoSeptemba 1972, umveleli wesiphaluka wacebisa ukuba ndifudukele kwidolophu encinane yase-El Carrizal, ekufuphi neColotlán. NgoNovemba waloo nyaka, kwasekwa ibandla apho, yaye ndamiselwa njengomdala. Nakubeni iyidolophu ekwanti, bangama-31 abantu ababakho kwiintlanganiso zebandla.

Phezu kwabo nje ubudala bam, ndisakhuthele kubulungiseleli, ndizama ngamandla ukunceda abantu baqiqe ngeenkolelo zabo. Ngokomzekelo, kwiRosari amaKatolika anyanisekileyo abiza uHail Mary ngokuphindaphindiweyo esithi: ‘Hail, Mary, uzele lubabalo; iNkosi inawe.’ Lo mthandazo uqhubeka usithi: ‘Mariya Ongcwele, Nina kaThixo.’ Ndibabuza oku: ‘Kunokwenzeka njani oko? Ukuba nguThixo osindisa uMariya, unokuba ngunyana wakhe njani kwangaxeshanye?’

Ndineminyaka eli-105 ubudala ngoku yaye ndiye ndakhonza njengomdala nanjengovulindlela othe ngxi e-El Carrizal, eJalisco, phantse kangangeminyaka engama-20. Ndivakalelwa kukuba ibe kukuthanda kukaYehova ukuba ndiphile le minyaka mininzi, ekubeni ngale ndlela ndinokubuyisela ixesha endapuca ngalo xa ndandingamkhonzi.

Enye into endiyifundileyo yeyokuba sifanele ngamaxesha onke sibe nentembelo yokuba uMgwebi wethu Ophakamileyo usijongile kwitrone yakhe yobulungisa yaye uyasilungiselela kwiintswelo zethu. Kunjengokuba INdumiso 117:2 isithi: “Ngokuba inamandla kuthi inceba [“ububele obunothando,” NW] yakhe.”