Wamkelekile KwiiNdibano ZeSithili “Zabathwali Bokukhanya”
KWAKUSUKU lokuqala lokudala emhlabeni kwadalwa ukukhanya. Sifunda ukuba uYehova wathi: “Makubekho ukukhanya.” (Genesis 1:3) Oku kuyavumelana noko kwabhalwa ngumpostile uYohane xa wathi: “UThixo ukukukhanya, akukho bumnyama kuye nakanye.”—1 Yohane 1:5.
Ekubeni uNyana kaThixo emanyene noYise, akumangalisi ukuba uYesu wakhe wathi: “Ndilukhanyiselo lwehlabathi.” (Yohane 9:15) Singaphuma ebumnyameni singene ekukhanyeni ngokuba nokholo kuYehova uThixo nakuNyana wakhe. Kwakhona uYesu wanikela obu bungqina: “Mna, lukhanyiso, ndifikile ehlabathini, ukuze bonke abakholwayo kum bangahlali ebumnyameni.” (Yohane 12:46) Ngoko ke, ngokufanelekileyo, uYesu Kristu wathi kubalandeli bakhe bokwenyaniso: “Nina nilukhanyiselo lwehlabathi. . . . Malukhanye ngokunjalo ukhanyiselo lwenu phambi kwabantu; ukuze bayibone imisebenzi yenu emihle, bamzukise uYihlo osemazulwini.”—Mateyu 5:14, 16.
Hayi indlela ekuyintsikelelo ngayo ukuba nenyaniso, ukuliqonda iLizwi likaThixo njengoko licaciswa ‘ngumkhonzi othembekileyo noqondayo’! (Mateyu 24:45-47) Asisadidekiswanga kukukholelwa kuBathathu Emnye; asisaminxaniswanga iingqondo sisizathu sokuvumela kukaThixo ububi nogonyamelo; asisayithandabuzi imeko yabafi. Ukukhanya kusinike ithemba, ithemba loBukumkani. Kuye kwasazisa indlela azuke ngayo uThixo onguMdali. Ukukhanya kwenyaniso kuye kwasinika injongo ebomini, ukufeza injongo esadalelwa yona kwasekuqaleni, ukuzukisa uMenzi wethu, uYehova uThixo. Oku sikwenza ngokuba ngabathwali bokukhanya. Ukuba ngabathwali bokukhanya kuluzuko nelungelo elikhulu, kodwa kukwayimbopheleleko enzulu. Ukuyifeza ngokufanelekileyo le mbopheleleko, sifanele silusebenzise uncedo uYehova alulungiselelayo. Ngoko hayi indlela ekufaneleke ngayo ukuba iindibano zethu zesithili zowe-1992 zibizwe ngokuba ziiNdibano ZeSithili “Zabathwali Bokukhanya”!
Ukuze siphucule ubuchule bethu size sandise uxabiso lwethu ngendima yethu njengabathwali bokukhanya, siya kuzabalazela ukubakho ubuncinane kwenye yezi ndibano, sibekho xa kuvulwa ngengoma size sibekho de kube ngumthandazo wokuqukumbela. Kwaye sifuna ukunikela ingqalelo kuko konke okuthethwa eqongeni, enoba ziintetho, udliwano-ndlebe, amava, okanye umdlalo waseqongeni. Ukubhala amanqaku akusiniki nje kuphela into esingabhekisela kuyo kamva ukuzikhumbuza kodwa kukwasinceda kakhulu ukuze similisele ingqondo koko kuthethwayo. Ewe, kulo lonke ixesha ebudeni bocwangciso lwendibano, sifuna ‘ukukulumkela ukuva esiva ngako.’—Luka 8:18.