Uyamenywa KwiNdibano Yesithili “Yabathandi Benkululeko”
UKUSUSELA ngoNovemba 1989, umbandela wenkululeko uye wabalaseliswa ngaphezu kunanini na ngaphambili. Izizwe ezihlala kumazwe aseMpuma Yurophu ziye ngokukhethekileyo zanandipha inkululeko engakumbi kwezobupolitika kwezakhe zanayo kwiminyaka engama-40 okanye engaphezulu eyadlulayo.
Kodwa kukho inkululeko ebaluleke ngakumbi kunayo nayiphi na inkululeko yezobupolitika. Sinokufunda ngayo kwiLizwi likaThixo, iBhayibhile. UYesu Kristu wakhe wathi: “Naniya kuyazi inyaniso, yaye inyaniso iya kunikhulula.” (Yohane 8:32) Ewe, amaKristu azahluleleyo akhululekile ekoyikeni abantu nakubukhoboka besono nokufa, njengoko sifunda kwabaseRoma 6:18, 22. Kwakhona sifunda ukuba “apho ke akhoyo uMoya [kaYehova, NW], kubakho inkululeko.” (2 Korinte 3:17) Enyanisweni, iLizwi likaThixo linikela ithemba eliqaqambileyo “lokuba nendalo ngokwayo iya kukhululwa ebukhobokeni bokonakala, isingiswe enkululekweni yozuko lwabantwana bakaThixo.”—Roma 8:21.
Ukuba nabani na unqwenela ukuzuza inkululeko enanditshwa ngamaKristu kweli xesha siphila kulo, umele enze umgudu onyanisekileyo. Asingombandela nje olula wokuya ngakwicala umoya oya ngakulo. Yaye ukuze uqhubeke unandipha le nkululeko kufuneka umgudu owongezelelekileyo, ngenxa yemikhosi engxangele ukusiphulukanisa naloo nkululeko: uSathana uMtyholi, ihlabathi lakhe elingendawo notyekelo lwethu lwesono esiluzuz’ ilifa. UYehova uThixo usilungiselele uncedo ngeLizwi lakhe eliphefumlelweyo, ngomoya wakhe oyingcwele nangentlangano yakhe ebonakalayo.—Luka 11:13.
Ukuze kuncedwe bonke abo bathanda inkululeko ukuze babambelele ngokuthe nkqi kule nkululeko, ngokufanelekileyo iindibano zesithili zamaNgqina kaYehova zalo nyaka zibalaselisa umxholo othi “Abathandi Benkululeko.” Ezi iya kuba ziindibano zeentsuku ezintathu, ziqala ngentsasa yangoLwesihlanu nge-9:30 zize ziqhubeke ukusa kweye-4:00 emva kwemini ngeCawa. Bonke abo bezileyo kwezi ndibano baya kuhlaziywa ngokomoya baze bakhiwe ludlwabevu lweentetho, udliwano-ndlebe olubangel’ umdla, imiboniso enentsingiselo nomdlalo ochukumisayo wezi mini; singasathethi ke ngovuyo olubangelwa kukunxulumana ngothando nabahlobo esabagqibela kudala nabatsha, uvuyo lokuthelela amawakawaka abanye ekuvumeni iingoma zethu zoBukumkani, nokubakho kwimithandazo yasekuhleni esuk’ entliziyweni.
Ngamana bonke abakhonzi abazahluleleyo bakaYehova bangangavumeli nantoni na ukuba iphazamisane nokufika kwabo ngexesha ngentsasa yangoLwesihlanu xa ezi ndibano ziqalisa. Kwaye qiniseka ukuba akuphathi nje iBhayibhile neculo kuphela kodwa kwanento yokubhala nencwadi ukuze ubhale amanqaku. Kwakhona, yiza uyiphaphele ngokwenene intswelo yakho yokomoya njengomnye wabantu abasenkululekweni.—Mateyu 5:3, NW.