Abavakalisi BoBukumkani Bayabalisa
Ukwanelisa Abalambileyo Ngokomoya—Esikolweni
“BANOYOLO abangamahlwempu ngomoya,” watsho njalo uYesu kwiNtshumayelo yakhe yaseNtabeni. (Mateyu 5:3) Abantwana besikolo abaninzi banxanelwe ukwazi ngoThixo nangeenjongo zakhe ezimangalisayo. Bafuna iimpendulo kwimibuzo enxulumene nobomi yaye bafuna ukwazi indlela abafanele baphile ngayo ukuze bakholise uThixo nokuze bonwabe. Oku kwabonakala kwisikolo esikwiBritish Virgin Islands. Elinye iNgqina likaYehova apho libalisa lisenjenje:
“Ndandiye kwintlanganiso yabazali nabafundisi-ntsapho kwisikolo sasekuhlaleni, yaye kwathethwa okuninzi ngeziyobisi, ukusela, ukwenza amadinga, ukubukela umabonwakude, amanqaku, neminye imicimbi, ngoko ndagqiba kwelokuba ndithabathe incwadi ethi Abantu Abaselula Bayabuza—Iimpendulo Eziluncedo ndize ndiyinike inqununukazi. Emva kokuba iyihlolisisile le ncwadi, yathi ikoko kanye babekufuna yaza yacela ukuba isikolo sifumanele umfundi ngamnye kwabali-120 umbhalo wakhe. Lo mcimbi waxutyushwa nabadala bebandla, yaye bagqiba kwelokuba banikele ngezi ncwadi esikolweni njengesipho. Xa sakukhankanyayo oku, abafundisi-ntsapho basicela ukuba sizinikele ezi ncwadi kubafundi ababehlanganisene ndawonye. AmaNgqina amabini aya kubo, yaye igumbi lalizele ngabafundi ababewalindele. Abazalwana bathetha kangangesiqingatha seyure, yaye kwafundwa amava kumaphephancwadi eWatch Tower Society abonisa indlela le ncwadi ebancede ngayo abaselula nabakhulileyo. Emva koko iincwadi zanikezelwa kubafundi ababezilindele ngolangazelelo.”
Kuluvuyo ukwazi ukuba esi sikolo sigqibe ekuyisebenziseni le ncwadi njengenxalenye yezifundo eziqhutywa rhoqo zebanga lesibini nelesithathu. Ngenene iya kuphendula imibuzo aba bafundi abanayo ngobomi nangekamva.
Ukwanelisa Abalambileyo Ngokomoya—EPapua New Guinea
La mava alandelayo afunyanwa kumveleli ohambahambayo. Abonisa indlela abantu abalambe ngayo ngokomoya kwelo lizwe nendlela iimpapasho zethu ezisekelwe eBhayibhileni eziphumelela ngayo ekwaneliseni ukulamba kwabo.
◻ Umveleli wathi, “Njengoko ndandingenakukwazi ukutyelela idolophana yaseKamberatoro, ixesha lam ndalichithela ekusebenzeni nebandla elincinane laseVanimo. Umdla mkhulu apho. Abantu abaliqela abasuka eBewani baluthabatha uncwadi. Enye indoda yandicela ukuba ndize kutyelela le dolophana, yaye yayiza kundilungiselela indawo yokuhlala. Abantu abaninzi baqhelene noncwadi lwethu. Sihlandlo ngasinye siphumile saya kwidolophu yaseVanimo, besilutshayela kuthi tu uncwadi nakubeni besiphatha iibhokisi ezintathu zeencwadi. Incwadi ethi Incwadi Yam Yamabali EBhayibhile ijongwa njengexabiseke okwegolide. Abantu bayayifuna. Iincwadi endandiziphethe zahamba ngokukhawuleza gqitha. Xa abantu sasibabonisa uncwadi lwethu, bambi babedla ngokubuza: ‘Iphi laa ncwadi imthubi?’ Enye indoda yaodola iincwadi ezintandathu. Yandinika igama nedilesi yayo yaza yandicela ukuba ndenze isaziso kunomathotholo xa sele ndizifumene. Ngoko yayiza kusuka kwidolophana yayo ukuza kuziphuthuma.” Umveleli ohambahambayo walek’ umsundulo esenjenje: “Ndafumanisa ukuba abantu abaninzi eVanimo babeyithabatha incwadi ethi Iphulo Loluntu Lokufuna UThixo nethi Imibuzo Yabantu Abaselula—Iimpendulo Eziluncedo.”
Oku kubonisa indlela abantu abantliziyo zinyanisekileyo abakulambele ngayo ukudla kokomoya okufumaneka eBhayibhileni nakwiimpapasho uYehova azilungiselela ‘ngomkhonzi othembekileyo noqondayo.’ (Mateyu 24:45-47) Hayi indlela avuya ngayo amaNgqina kaYehova kuba ekwazi ukunceda aba bantu balambele inyaniso!
[Umfanekiso okwiphepha 19]
Ukunikela ubungqina ePapua New Guinea