Imimangaliso KaYesu—Ngaba Iyimbali Okanye Iyintsomi?
“Ngowesine umlindo wobusuku, wesuka waya kubo uYesu, ehamba phezu kolwandle.”—Mateyu 14:25.
KWIZIGIDI ehlabathini jikelele, ukukholelwa ukuba uYesu Kristu wenza imimangaliso kuphantse kubaluleke njengokukholelwa kuThixo. Ababhali beencwadi zeVangeli—uMateyu, uMarko, uLuka, noYohane—babalisa ngemimangaliso kaYesu engama-35. Noko ke, oko bakubhalayo kubonisa ukuba wenza neminye imisebenzi emininzi engaphaya kwamandla omntu.—Mateyu 9:35; Luka 9:11.
Le mimangaliso yayingenzelwa ukonwabisa abantu. Yayixhasa ibango likaYesu lokuba wayenguNyana kaThixo, uMesiya ekudala elindiwe. (Yohane 14:11) UMoses wenza imiqondiso engummangaliso xa wayezazisa kuhlanga lwakwaSirayeli olungamakhoboka. (Eksodus 4:1-9) Ngokusengqiqweni, uMesiya, ekwakuprofetwe ukuba wayeya kuba mkhulu kunoMoses, kwakunokulindelwa ukuba naye enze umqondiso wokuba uxhaswa nguThixo. (Duteronomi 18:15) Ngaloo ndlela iBhayibhile ithi uYesu ‘yindoda eqondakalisiweyo nguThixo [kumaYuda] ngemisebenzi yamandla, nangezimanga, nangemiqondiso.’—IZenzo 2:22.
Kumaxesha adluleyo, abantu abaninzi babengathandabuzi ukuyamkela ingxelo yeBhayibhile yokuba uYesu wayesenza imimangaliso. Kodwa kumashumi eminyaka akutshanje, iingxelo zeVangeli ziye zagxekwa kakhulu ngabahlalutyi. Kwincwadi yakhe ethi Deceptions and Myths of the Bible, uLloyd Graham ubhekisela kwingxelo yeBhayibhile ethetha ngokuhamba kukaYesu phezu kwamanzi ngokokude athi: “Ukukukholelwa ukuba oku kwenzeka ngokoqobo kunokubangelwa bubudenge obugqithisileyo, ukanti, izigidi zikukholelwa ngenene. Kwathina siza kuzibuza ukuba kuqhubeka ntoni kwihlabathi lethu. Belinokuphucuka njani eli hlabathi linokuswela ulwazi okunjalo?”
Ngaba Ayinakwenzeka?
Noko ke, uhlalutyo olunjalo alukho ngqiqweni. IThe World Book Encyclopedia ichaza ummangaliso ‘njengesiganeko esingenakucaciswa ngemithetho yemveli eyaziwayo.’ Ngokwaloo nkcazelo, umabonwakude obonisa ngemibala-bala, icellular phone, okanye ikhompyutha yelaptop ibinokugqalwa njengemimangaliso kwinkulungwane nje edlulileyo! Ngaba kusengqiqweni ukuba neenkani size sithi ayinakwenzeka into ethile kuba nje singakwazi ukuyicacisa ngolwazi lwenzululwazi olukhoyo namhlanje?
Nasi esinye isibakala esimele siqwalaselwe: Kulwimi lwesiGrike lwantlandlolo eyabhalwa ngalo i-“Testamente Entsha,” igama elithetha “ummangaliso” lalisithi dyʹna·mis—ngokusisiseko igama elithetha “amandla.” Likwaguqulelwa ngokuthi ‘imisebenzi yamandla’ okanye ‘amandla.’ (Luka 6:19; 1 Korinte 12:10; Mateyu 25:15) IBhayibhile ithi imimangaliso kaYesu yayibonakalisa “ubungangamela bukaThixo.” (Luka 9:43) Ngaba uThixo ongusomandla ebengenakukwazi ukwenza imisebenzi enjalo—lowo ‘unobukhulu bokomelela’?—Isaya 40:26.
Ubungqina Bokuchana Kwayo
Ukuzihlolisisa ngokusondeleyo iincwadi zeVangeli ezine kunikela ubungqina obungakumbi bokukholeleka kwazo. Phakathi kwezinye izinto, ezi ngxelo zahluke ngokupheleleyo kwiintsomi. Ngokomzekelo, khawucinge ngamabali obuxoki angoYesu awayesasazekile kwiinkulungwane emva kokufa kwakhe. Incwadi engaphefumlelwanga ‘yeVangeli kaThomas’ iyabalisa: “Xa le nkwenkwana inguYesu yayineminyaka emihlanu ubudala . . . , yayinyuka isihla kule dolophana, enye inkwenkwana yayibaleka yaza yamngquba egxalabeni. UYesu waba nomsindo kakhulu waza wathi kuyo: ‘Awusokuze ufike nalapho ubusiya khona’, yaye loo mntwana wawa kwangoko waza wafa.” Libonakala zisuka eyona nto liyiyo eli bali—intsomi kamakhulu. Ngaphezu koko, lo mntwana uliwexuwexu nokhohlakeleyo, ochazwe apha akafani kwaphela noYesu waseBhayibhileni.—Thelekisa noLuka 2:51, 52.
Ngoku khawucinge ngeengxelo ezichanileyo zeVangeli. Azibaxwanga yaye azifani kwaphela neentsomi. UYesu wayesenza imimangaliso xa iyimfuneko ngokwenene, kungekhona ukwanelisa intabatheko. (Marko 10:46-52) UYesu akazange asebenzise amandla akhe ukuze kungenelwe yena. (Mateyu 4:2-4) Yaye akazange awasebenzisele ukuqhayisa. Enyanisweni, xa uKumkani uHerode ofun’ ukwazi wayefuna ukuba uYesu amenzele “umqondiso” ongummangaliso, uYesu “akamphendulanga nento.”—Luka 23:8, 9.
Kwakhona imimangaliso kaYesu yahluke mpela kumsebenzi ohlawulelwayo weemboni, abenzi bemilingo nowabaphilisa ngokholo. Imisebenzi yakhe yamandla yayisoloko izukisa uThixo. (Yohane 9:3; 11:1-4) Imimangaliso yakhe yayingenazithethe zivus’ ihlombe, amazwi athile omlingo, ukucel’ injezu, amaqhinga nokulalisa abantu ngomlingo. Xa uYesu wadibana nemfama eyayingqiba egama linguBhartimeyu ikhala isithi, “Rabhoni, ndithanda ukuba ndibone,” uYesu wasuka wathi kuyo: “Hamba uhambe; ukholo lwakho lukusindisile. Yabona kwaoko.”—Marko 10:46-52.
Iingxelo zeVangeli zibonisa ukuba xa wayesenza imisebenzi yamandla uYesu wayengasebenzisi zixhobo, iqonga elicetywe ngokukhethekileyo, okanye ukukhanyisa okukhohlisayo. Yayisenziwa ekuhleni, ngokufuthi phambi kwamangqina okuzibonela amaninzi. (Marko 5:24-29; Luka 7:11-15) Ngokwahlukileyo kwimizamo yabo baphilisa ngokholo namhlanje, imigudu yakhe yokuphilisa ayizange isilele kuba uthile ogulayo kusithiwa akanalukholo. UMateyu 8:16 uthi: “Bonke abafayo wabaphilisa.”
Kwincwadi yakhe ethi “Many Infallible Proofs:” The Evidences of Christianity, uMphengululi uArthur Pierson uthi ngemimangaliso kaKristu: “Inani lezigulo awaziphilisayo, ukunyangwa kwazo ngequbuliso nangokupheleleyo, kwanokungasileli nakwilinge elinye lokuvusa abafi, kwenza le mimangaliso yahluke kakhulu kwimimangaliso yobuxoki yesi sizukulwana okanye neyasiphi na isizukulwana.”
Ubungqina Bemithombo Yehlabathi
UPierson unikela esinye isizathu esixhasa iingxelo zeVangeli xa esithi: “Ayikho into engqinela imimangaliso esesibhalweni ngaphezu kwenzolo yabachasi.” Iinkokeli zamaYuda zazinezizathu ezininzi zokufuna ukumsingela phantsi uYesu, kodwa imimangaliso yakhe yayisaziwa gqitha kangangokuba abachasi abazange bakwazi ukuyikhanyela. Kuphela babenokumnyelisa bathi ezo zenzo uzenza ngamandla eedemon. (Mateyu 12:22-24) Kwiinkulungwane emva kokufa kukaYesu, ababhali beTalmud yamaYuda babesamgqala uYesu njengomntu owayenamandla angummangaliso. Ngokutsho kwencwadi ethi Jewish Expressions on Jesus, aba babhali abazange bamamkele besithi ‘wayesenza imilingo.’ Ngaba ayenokuthethwa amazwi anjalo ukuba eneneni imimangaliso kaYesu yayifanele kukuchaswa njengeyintsomi?
Umbhali-mbali wecawa yenkulungwane yesine uEusebius unikela ubungqina obungakumbi. Kwincwadi yakhe ethi The History of the Church From Christ to Constantine, ucaphula uthile ekuthiwa nguQuadratus owathumela ileta komnye umlawuli ethethelela ubuKristu. UQuadratus wabhala: “Imisebenzi yomSindisi wethu yayisoloko ibonakala, kuba yenzeka ngokwenene—abantu ababephilisiwe nabo babevuswe ekufeni, babengabonwanga nje ngesihlandlo sokuphiliswa okanye sokuvuswa kwabo, kodwa babesoloko bekho, kungekuphela nje xa umSindisi wayekho phakathi kwethu, kodwa kangangexesha elide emva kokumka Kwakhe; enyanisweni bambi kubo baye baphila ukuza kuthi ga kwixesha lam.” Umphengululi uWilliam Barclay wathi: “UQuadratus uthi kwixesha lakhe abantu ababephiliswe ngokungummangaliso babenokubonwa ngokoqobo. Ukuba oko kwakungeyonyaniso kwakunokuba lula gqitha ngorhulumente waseRoma ukuba akutyabeke njengokububuxoki.”
Ukukholelwa kwimimangaliso kaYesu kusengqiqweni, kububulumko, yaye kuvisisana ngokupheleleyo nobungqina. Sekunjalo, imimangaliso kaYesu asiyombali ifileyo. AmaHebhere 13:8 asikhumbuza oku: “UYesu Kristu ukwanguye izolo, nanamhla, ase nakuwo amaphakade.” Ewe, uyaphila namhlanje emazulwini, uyakwazi ukusebenzisa amandla angummangaliso ngendlela ezuke ngakumbi kunaxa wenzayo ngoxa wayesemhlabeni njengomntu. Ngaphezu koko, iingxelo zeVangeli zemimangaliso yakhe (1) zifundisa amaKristu izifundo ezibalulekileyo namhlanje, (2) zityhila iinkalo ezivus’ umdla ngobuntu bukaYesu, yaye (3) zalatha kwixesha elingekude xa kuya kwenzeka iziganeko ezimangalisa ngakumbi!
Inqaku elilandelayo liza kugxininisa kwiingxelo zeBhayibhile ezintathu ezaziwayo ukuphuhlisa ezi ngongoma.