Intaba “Eshukumayo”

KWINTSHONA yeIreland, iCroagh Patrick etsobhe ngokungaqhelekanga izivelele iintaba eziyingqongileyo. Nyaka ngamnye, kwiCawa yokugqibela kaJulayi, incochoyi yale ntaba ibonakala ngathi iyashukuma xa abantu abaninzi abamalunga nama-30 000, abaselula nabadala ngokufanayo, besiya encotsheni (eziimitha ezingama-765) kuhambo ngezonqulo lwaminyaka le.

Ngolu suku, abahambi ngezonqulo bayenyuka baze behle ngendlela emxinwa, enezigingqi nakwiindawo eziyingozi. Enyanisweni, indawo yokugqibela enyukayo (emalunga neemitha ezingama-300) imqengqelezi ngokupheleleyo yaye inamatye aqengqelekayo, ngaloo ndlela yenza ukunyuka kube yingozi yaye kudinise.

Bambi baya kunyuka benganxibanga zihlangu, yaye abambalwa baya kude benyuke inxalenye ethile ngamadolo. Kumaxesha angaphambili, olu hambo ngezonqulo lwaluqalisa kwintsunguzi yobusuku.

Kutheni iCroagh Patrick ingamava abalulekileyo nje kwabaninzi?

Yasekwa Kudala Njengendawo Yonqulo

Kwinxalenye yokuqala yenkulungwane yesihlanu C.E., iCawa yamaRoma Katolika yathumela uPatrick eIreland njengomhambisi wevangeli ongubhishophu. Usukelo lwakhe oluyintloko lwalukukuguqulela abemi baseIreland kubuKristu, yaye ebudeni beminyaka yakhe yokushumayela nokusebenza phakathi kwabantu, uPatrick unconywa ngokuseka iCawa yamaKatolika apho.

Umsebenzi wakhe wamenza waya kwiindawo eziliqela kulo lonke eli lizwe. Enye yayiyintshona yeIreland, ngokutsho kweminye imithombo, apho wachitha iintsuku ezingama-40 nobusuku bazo encotsheni yentaba eyathi yabizwa ngaye—iCroagh Patrick (oko kukuthi “iNduli kaPatrick”). Apho wazila ukudla waza wathandazela impumelelo yalo msebenzi wakhe.

Kangangeminyaka kuye kwavela iintsomi ezininzi ngokuphathelele izenzo zakhe. Enye yezona zaziwayo yeyokuba ngoxa wayekuloo ntaba, uPatrick wazishenxisa zonke iinyoka eIreland.

Imbali ingqina ukuba wakha icawa encinane encochoyini. Nangona eso sakhiwo singasekho apho kangangexesha elide, isiseko saso santlandlolo sisekho, yaye esi siza kunye nale ntaba beziyindawo ehanjelwayo ngezonqulo ebudeni beminyaka.

Iimbalasane Ngohambo Ngezonqulo

Ngobani osele ekhulile ngeminyaka okanye ongaqhelananga nokunyuka intaba, ukugqiba nje iikhilomitha ezintlanu enyuka iqhina aze ehle ekhuselekile uphumeze okukhulu.

Kwiindawo ezisemngciphekweni ecaleni kwendlela, amaqela ongxamiseko ahlala elindele ukujamelana neengozi ezahlukahlukeneyo.

Kukho iindawo ezintathu, okanye izikhululo, endleleni apho abahambi ngezonqulo baneenkqubo ezahlukeneyo zokucela ukuxolelwa kwezono. Ezi zicaciswe ngokupheleleyo kwibhodi yezaziso xa uqalisa ukunyuka.—Bona ibhokisi.

Kutheni Benyuka?

Kutheni abantu abaninzi kangaka besenza olu hambo ngezonqulo lunzima? Kutheni bambi bethabatha inkxamleko engaka ukuze benyuke le ntaba?

Ewe, bambi bakholelwa kwelokuba ngokuthandaza ebudeni bohambo ngezonqulo, mhlawumbi izibongozo zabo zeengenelo zokobuqu zinokuviwa. Abanye bayakwenza oku xa befuna ukuxolelwa iziphoso ezithile. Kwabanye, le yindlela yokuvakalisa umbulelo. Ngokuqinisekileyo, abaninzi baya kuba befuna ukubakho kumsitho owenziwayo. Elinye igosa lagqabaza lathi ‘yayiyindlela yokubonisa umoya wentsebenziswano nothando ngabahlali.’ Kwakhona lathi ukunyuka iCroagh Patrick “kwakuyindlela yabo yokulandela ekhondweni likaSt. Patrick nokwamkela isibakala sokuba bafakwa nguye elukholweni.” Lalek’ umsundulo lathi, okubaluleke nangakumbi kukuba, oku kunyuka “luhlobo oluthile lokucela ukuxolelwa izono kuba umgudu obandakanyekileyo ongokomzimba ukukucela ukuxolelwa izono ngokwenene. Ukunyuka okuthe ngcembe okuya encotsheni sisenzo eside senguquko.”

Enye indoda izingomba isifuba yathi yanyuka izihlandlo ezingama-25! Isizathu sokuba ikwenze oku, ithi “ndandizohlwaya ngandlel’ ithile!” Enye indoda yakuchaza ngokulula yathi “Akukho ntlungu, akukho nzuzo!”

Nangona kungeyomfuneko, abaninzi banyuka le ntaba benganxibanga zihlangu. Kutheni besenjenjalo nje? Okokuqala, bawugqala lo mhlaba “ungcwele” yaye ke ngoko bakhulula izihlangu. Okwesibini, kuvisisana nenjongo yabo ‘yokuzohlwaya okuthile.’ Kwakhona oku kucacisa isizathu sokuba bambi bade benze oku beguqe ngamadolo.

Bashukunyiselwa Ukuxabisa UMdali

Kodwa kuthekani ukuba uluvo lukabani ngonqulo alufani nolwaba bahambi ngezonqulo abanyuka ngosuku olukhethekileyo? Xa imozulu intle nezihlangu zomelele, le ntaba inokunyukwa nangaliphi na ixesha. Asizange sinyuke ngosuku laxa inyambalala yabahambi ngezonqulo yayinyuka. Ebudeni bokunqumama kwethu ngokufuthi ukuba siphumle, sasikwazi ukucinga nzulu ngoku kunyuka nemiphumo okuye kwanayo kwabaninzi. Sicinga ngamawaka abahambi ngezonqulo abanyuka nzima yaye bezohlwaya ngeendlela ezahlukahlukeneyo, saziva sinyanzelekile ukuba sizibuze, ‘Ngaba oku koko kufunwa nguThixo? Ngaba isikhumbuzo sokunyuka okanye sokujikeleza amatye athile ezikhumbuzo ngoxa ucengceleza imithandazo ngokuphindaphindiweyo ngenene kusondeza nabani na kuThixo?’ Kuthekani ngesiluleko sikaYesu ngemilembelele yemithandazo esikuMateyu 6:6, 7?

Ngokuqinisekileyo, asizange sinyuke kule ntaba ukuze sibe namava angokonqulo. Sekunjalo, saziva sisondele kuMdali wethu kuba sasinokuyixabisa indalo yakhe, iintaba naphi na ziyinxalenye yemimangaliso yomhlaba. Sisencochoyini sasibubona kakuhle ubuhle bokuma komhlaba, sibona nonxweme loLwandlekazi iAtlantic. Iziqithi ezincinane zazibengezela kunxweme ngezantsi kwethu kwelinye icala zazahluke ngokucacileyo kumagqagala nomqwebedu wommandla oneentaba okwelinye icala.

Sacinga ngeendawo ezintathu esamisa kuzo. Amazwi kaYesu athi qatha engqondweni, xa waxelela abalandeli bakhe bokwenyaniso oku: “Nithandaza njalo ke, maningenzi milembelele ingeyanto, njengabeentlanga; kuba beba boviwa ngenxa yamazwi abo amaninzi.”—Mateyu 6:7.

Saqonda ukuba le ntaba iye yaba yinxalenye yesithethe esiye sadibanisa amawaka abantu kwisikhumbuzo esingumsebenzi onzima. Sacinga ngendlela oku okwakuchasene ngayo nenkululeko ekwakuthethwe ngayo ngumpostile uYohane xa wathi: “Siyigcine imithetho yakhe [uThixo]; ayinzima ke imithetho yakhe.”—1 Yohane 5:3.

Salunandipha uhambo lwethu, kuquka nokunyuka iCroagh Patrick. Kwasishukumisela ukuba sikhangele phambili kwixesha laxa lonke uluntu luya kukhululeka kwizithethe ezingekho ngokweBhayibhile yaye lukwazi ukunqula uMdali womhlaba onothando “ngoMoya nangenyaniso.”—Yohane 4:24.

[Ibhokisi ekwiphepha 27]

Iimbalasane Eziziintloko Ngohambo Ngezonqulo

Bonke abahambi ngezonqulo abanyuka le ntaba ngoSuku lukaSt. Patrick okanye ngosuku lwesibhozo, okanye nangaliphi na ixesha ebudeni benyanga kaJuni, kaJulayi, kaAgasti nekaSeptemba, yaye BATHANDAZE NGAPHAKATHI OKANYE ECALENI KWENDLU YECAWA bethandazela iinjongo zikaPopu basenokuzuza ukuxolelwa kwezono ngokupheleleyo ukuba bayaya ukuya kwenza iSivumo seZono noMthendeleko oNgcwele eNcochoyini okanye ingekapheli iveki.

INDAWO EKWENZIWA KUZO IZITHETHE

Kukho “iindawo” ezintathu (1) Emazantsi entaba okanye eLeacht Benain, (2) encotsheni, (3) iRoilig Muire, umgama othile emazantsi iLecanvey [idolophu] ecaleni kwale ntaba.

Indawo Yokuqala - ILEACHT BENAIN

Abahambi ngezonqulo bajikeleza isiganga samatye besenza umThandazo weNkosi kasixhenxe, benze uHail Mary kasixhenxe nesiVumo Sokholo kube kanye.

Indawo Yesibini - ENCOCHOYINI

(a) Abahambi ngezonqulo bayaguqa benze umThandazo weNkosi kasixhenxe, benze uHail Mary kasixhenxe nesiVumo Sokholo kube kanye

(b) Abahambi ngezonqulo bathandazela iinjongo zikaPopu ecaleni kweNdlu yeCawa

(c) Abahambi ngezonqulo bajikeleza iNdlu yeCawa kali-15 besenza uMthandazo weNkosi kali-15, uHail Mary kali-15 nesiVumo Sokholo kube kanye

(d) Abahambi ngezonqulo bajikeleza iLeaba Phadraig [iBhedi kaPatrick] kasixhenxe besenza umThandazo weNkosi kasixhenxe, benze uHail Mary kasixhenxe nesiVumo Sokholo kube kanye

Indawo Yesithathu - IROILIG MUIRE

Abahambi ngezonqulo bajikeleza isiganga samatye ngasinye kasixhenxe besenza umThandazo weNkosi kasixhenxe, benze uHail Mary kasixhenxe nesiVumo Sokholo esinye kwisiganga ngasinye [kukho iziganga ezintathu] yaye ekugqibeleni bajikeleza yonke iRoilig Muire kasixhenxe bethandaza.