Kulumkele Ukuzenza Olilungisa!

NGENKULUNGWANE yokuqala, abaFarisi babedume ngokuba ngabanquli bakaThixo abangamalungisa. Babengabafundi abanenzondelelo beZibhalo yaye bethandaza ngokuzingisileyo. Bambi abantu babebajonga njengabantu abathantamisayo nabanolwazelelelo. Umbhali-mbali ongumYuda uJosephus wabhala: “AbaFarisi bayathandana yaye bahlakulela imvisiswano nabantu basekuhlaleni.” Mhlawumbi kungenxa yoko le nto babengabona bantu bahlonelwa nabagqalwa njengabaphambili phakathi kwamaYuda ngelo xesha!

Noko ke, namhlanje igama elithi “umFarisi,” namabinzana ayeleleyo kulo akathandeki, anentsingiselo efanayo nokuhanahanisa, ukuzenza olilungisa, ukuba ngungcwele ngcwele, ukuzinikela ngokugqithiseleyo nokunikela inkonzo yomlomo. Kwakutheni ukuze abaFarisi balahlekelwe ludumo lwabo oluhle?

Kwakungenxa yokuba, ngokungafaniyo nenkoliso yamaYuda, uYesu Kristu akazange akhohliswe yimbonakalo yangaphandle yabaFarisi. Wabafanisa “namangcwaba aqatywe ifutha, athi abonakale emahle okunene ngaphandle, kanti ngaphakathi azele ngamathambo abantu abafileyo nokungcola konke.”—Mateyu 23:27.

Liyinyaniso elokuba babesenza imithandazo emide ngoxa bemi kwiindawo zikawonke-wonke, kodwa oku babekwenza ukuze babonwe ngabanye, njengoko uYesu watshoyo. Unqulo lwabo lwaluluhanahaniso. Babezithanda izikhundla eziphakamileyo kwizidlo zangokuhlwa nezihlalo eziphambili kwizindlu zesikhungu. Ngoxa onke amaYuda ayenyanzelekile ukuba enze imiqukumbelo kwiingubo zawo, abaFarisi bazama ukucel’ injezu ngokuyandisa ngokugqithiseleyo imiqukumbelo yeengubo zabo. Babeqhayisa ngamaqhaga abo amakhulu aqulethe iZibhalo awayenxitywa njengamakhubalo. (Mateyu 6:5; 23:5-8) Ukuhanahanisa, ukunyoluka nokuba nekratshi kwabo ekugqibeleni kwabazisela ihlazo.

UYesu wavakalisa indlela uThixo awayebachase ngayo abaFarisi ngokuthi: “Bahanahanisindini, watyapha ukuprofeta ngani uIsaya, esithi, Aba bantu basondela kum ngomlomo wabo, bandibeke ngemilebe yomlomo wabo; kanti intliziyo yabo ikude lee kum; bafumana ke bendihlonela, befundisa iimfundiso eziyimithetho yabantu.” (Mateyu 15:7-9) Ngokwenene babezenza amalungisa. Siyaqondakala isizathu sokuba uYesu walumkisa abafundi bakhe esithi: “Lilumkeleni igwele labaFarisi.” (Luka 12:1) Namhlanje, nathi ngokufanayo simele ‘silumkele’ ukuba ngabazenza amalungisa okanye abahanahanisi bonqulo.

Ngokwenjenjalo, sifanele siqonde ukuba umntu akazenzi olilungisa ngosuku nje olunye. Kunoko, olu tyekelo luthabatha ixesha lusakhela. Ubani ukwanokuba notyekelo olungathandekiyo lwabaFarisi engaqondanga.

Isimo Sengqondo Sokuzenza Mkhulu

Luluphi olunye lotyekelo esimele ‘silulumkele’? Abantu abazenza amalungisa badla “ngokuthetha, beme, baze babonakale ngokungathi abazange benza nto iphosakeleyo,” icacisa isitsho iEncyclopædia of Religion and Ethics. Abantu abazenza amalungisa bayaqhayisa baze baziphakamise, nto leyo eyayiyingxaki eyintloko kubaFarisi.

UYesu wasichaza esi simo sengqondo sabaFarisi ngomzekeliso: “Amadoda amabini enyuka aya etempileni, esiya kuthandaza; enye ingumFarisi, enye ingumbuthi werhafu. UmFarisi, ezimise yedwa, wayethandaza esithi, Thixo, ndiyabulela kuwe, ukuba ndingenjengabanye abantu, abaphangi, abangemalungisa, abakrexezi; ndingenjengaye nalo mbuthi werhafu. Ndizila ukudla kabini ngeveki, ndinikela izishumi zako konke endikuzuzayo.” Ngokwahlukileyo umbuthi werhafu wazivuma ngokuthobeka iziphoso zakhe waza wazingqina elilungisa ngakumbi kunomFarisi owayeqhayisa. Lo mzekeliso uYesu wawenza kwabo “babekholose ngokuthi ngaphakathi kwabo bangamalungisa, [“bebagqala abanye njengabangento,” NW].”—Luka 18:9-14.

Njengabantu abangafezekanga ngamanye amaxesha sisenokuvakalelwa kukuba sibhetele kunabanye ngenxa yobuchule obungokwemvelo okanye amalungelo esinawo. Kodwa amaKristu afanele aziphelise ngoko nangoko ezo ngcinga. Usenokuba uneminyaka emininzi yamava obomi bobuKristu. Usenokuba ungumfundisi weBhayibhile onobuchule kakhulu. Okanye mhlawumbi uzibanga ungothanjiselwe ukuya kulawula noKristu ezulwini. Bambi ebandleni banandipha amalungelo akhethekileyo anjengokuba ngabalungiseleli bexesha elizeleyo, abadala, okanye izicaka zolungiselelo. Khawuzibuze: ‘Ebenokuvakalelwa njani uYehova ukuba bendiza kusebenzisa oko andinike kona njengesiseko sokuziva ndimkhulu kunabanye?’ Ngokuqinisekileyo, oko bekungayi kumkholisa.—Filipi 2:3, 4.

Xa umKristu ebonakalisa isimo sengqondo sokuba mkhulu ngenxa yobuchule abuphiwe nguThixo, amalungelo, okanye igunya, enyanisweni uhlutha uThixo uzuko olufanele Yena kuphela. IBhayibhile iwabongoza ngokucacileyo amaKristu ukuba ‘angazicingeli ngaphezu koko amelwe kukuzicingela ngako.’ Iyasibongoza: “Cingelanani nto-nye; musani ukucinga izinto eziphakamileyo, tsalelanani kwezithobekileyo. Musani ukuba ziingqondi ngokwenu.”—Roma 12:3, 16.

“Yeka Ukugweba”

Ngokutsho kwenye intyilalwazi yeBhayibhile, umntu ozenza ilungisa “uzigqala njengoziphethe kakuhle okanye onokuma okuhle noThixo ngenxa yokunamathela kwakhe kumthetho obekiweyo engakhange ayiqonde intsingiselo yawo yokwenene.” Enye incwadi ichaza abantu abazenza amalungisa “njengabantu abazinikele ngokugqithiseleyo kunqulo abachitha ixesha elininzi bejonga ubungendawo kwabanye.”

AbaFarisi babenetyala loku. Ekugqibeleni imithetho yabo ebekwe ngabantu yabonakala ibaluleke ngakumbi kunemithetho nemigaqo kaThixo. (Mateyu 23:23; Luka 11:41-44) Bazimisela njengabagwebi yaye babenotyekelo lokugweba nabani na owayengahlangabezani nemilinganiselo yabo yokuzenza amalungisa. Isimo sabo sengqondo sokuba bakhulu nokuzihlonela okubaxiweyo kwabenza bafuna ukulawula abanye abantu. Ukungakwazi kwabo ukumlawula uYesu kwabacaphukisa, ngoko baceba ukumbulala.—Yohane 11:47-53.

Hayi indlela ekungathandeki ngayo ukunxulumana nomntu ozenza umgwebi, osoloko ejonga iziphoso, ahlole aze alawule wonke umntu anxulumana naye. Ngokwenene, akukho namnye ebandleni onegunya lokunyanzelisa kwabanye iimbono zakhe okanye imithetho azenzele ngokwakhe. (Roma 14:10-13) AmaKristu alungeleleneyo ayaqonda ukuba zininzi izinto ezichaphazela izigqibo zobuqu kubomi bemihla ngemihla. Ngokukodwa abo banotyekelo lokufuna ukuba izinto zenziwe ngokugqibeleleyo nabanyanzelisayo bamele bakuphephe ukugweba abanye.

Kuyinyaniso ukuba ibandla lamaKristu ligunyaziswe ukuba libe nolwalathiso oluxhasa ukuhamba ngokutyibilikayo kwezinto kwintlangano kaYehova yasemhlabeni. (Hebhere 13:17) Kodwa bambi baye bayigqwetha le migaqo okanye bongezelela eyabo imithetho. Komnye ummandla bonke abazalwana kwiSikolo Sobulungiseleli Sobuthixo babefanele banxibe iisuti baze bawaqhoboshe amaqhosha eebhatyi xa benikela intetho. Umfundi owayesilela ukwenjenjalo wayengakufanelekeli ukunikela iintetho kwixesha elizayo. Kunokuba kwenziwe imithetho enzima ngolo hlobo, ngaba bekungayi kuba sengqiqweni ngakumbi yaye kungqinelane nomoya weLizwi likaThixo ukunikela ngobubele, ukhokelo lobuqu njengoko luyimfuneko?—Yakobi 3:17.

Kwakhona ukuzenza ilungisa kusenokuphakamisa imbono yokuba ukuba umKristu uneengxaki zobuqu ezininzi, umele ukuba ubuthathaka ngokomoya. Oku koko kanye kwakucingwa nguElifazi, uBhiledadi noTsofare ababezenza amalungisa ngoYobhi owayethembekile. Abazange bayiqonde kakuhle imeko, ngoko yayikukuzikhukhumalisa okwakubangela ukuba batyhole uYobhi ngokuba wonile. UYehova wabohlwaya ngenxa yokuzijonga ngendlela ephosakeleyo izilingo zikaYobhi.—Bona uYobhi, isahluko 4, 5, 8, 11, 18, 20.

Inzondelelo Ephosakeleyo

Ukuzenza olilungisa nenzondelelo ngokufuthi ziyanxibelelana. Umpostile uPawulos wathetha ngamaYuda awayetyekele kunqulo ‘njenganenzondelelo kuThixo, koko engamzondeleli ngokokwazi okukuko. Kuba ayesithi, engabazi ubulungisa bukaThixo, efuna nokumisa obawo ubulungisa, awabululamela ubulungisa bukaThixo.’ (Roma 10:2, 3) NjengomFarisi, uPawulos wayenenzondelelo egqithiseleyo, nangona inzondelelo yakhe yayiphosakele, ingasekelwanga kubulungisa bukaYehova.—Galati 1:13, 14; Filipi 3:6.

IBhayibhile ibongoza ngokufanelekileyo isithi: “Musa ukuba lilungisa ngokukhulu, ungabi sisilumko ngokugqithiseleyo; yini na ukuba uziphanzise?” (INtshumayeli 7:16) Ebandleni umKristu unokuqala ngokuba nenkathalo, kodwa inkathalo nenzondelelo yakhe zinokuguqukela ekubeni zimenze azenze olilungisa. Inzondelelo yonqulo inokubenza buhlungu abanye xa iphenjelelwa bubulumko babantu kunokuba iphenjelelwe bubulungisa bukaYehova. Njani?

Ngokomzekelo, abazali basenokuxakeka gqitha ukuba banyamekele iintswelo zokomoya zabanye, yaye ngoxa besenjenjalo basenokutyeshela iintswelo zentsapho yabo. Okanye abazali basenokuba nenzondelelo egqithiseleyo, benyanzela abantwana babo ukuba benze okungaphezu koko banokukwenza. (Efese 6:4; Kolose 3:21) Bambi abantwana, bengakwazi ukuhlangabezana nolindelo olungekho ngqiqweni, basabela ngokuphila ubomi obumbaxa. Umzali onolwazelelelo uya kubonakalisa ukuziqonda iintsilelo zentsapho yakhe aze enze uhlengahlengiso olufanelekileyo.—Thelekisa iGenesis 33:12-14.

Kwakhona inzondelelo egqithiseleyo inokusibandeza ubuchule bokuthetha, uvelwano nokuthantamisa, mpawu ezo ezibalulekileyo xa siqhubana nabanye. Umntu usenokuzibhokoxa ehambisela phambili izilangazelelo zoBukumkani. Noko ke, inzondelelo yakhe egqithiseleyo inokubenza buhlungu abanye ebudeni belo thuba. UPawulos wathi: “Ndingafanelana ndinabo nobuprofeto, ndizazi iimfihlelo zonke, ndinako konke ukwazi; ndingafanelana ndinalo lonke ukholo, ngokokude ndisuse iintaba, uthando ke ndingenalo, andinto yanto. Ndingafanelana ndisamkelisa amahlwempu ngempahla yam yonke, nokuba ndithe umzimba wam ndawunikela ukuba utshiswe, uthando ke ndingenalo, akundincedi lutho.”—1 Korinte 13:2, 3.

UThixo Uthanda Abathobekileyo

NjengamaKristu kufuneka sisazi isisongelo sokuzenza olilungisa ngaphambi kokuba sikhule. Simele siphephe isimo sengqondo sokuzenza mkhulu, umkhwa wokugweba abanye, nenzondelelo emfamekileyo esekelwe kubulumko babantu.

Njengoko ‘silumkela’ isimo sengqondo sabaFarisi, kunokuba sigwebe abanye njengabazenza amalungisa, kuya kusilungela ngakumbi ukuba sinikela ingqalelo kutyekelo nakubuthathaka bethu. Kuyinyaniso ukuba uYesu wabagweba abaFarisi esithi ‘bayinzala yamarhamba’ efanelwe yintshabalalo kanaphakade. Kodwa uYesu wayenokuzifunda iintliziyo zabantu. Thina asikwazi.—Mateyu 23:33.

Masifune ubulungisa bukaThixo singafuni obethu. (Mateyu 6:33) Kungoko kuphela esinokuthi sifumane inkoliseko kaYehova, kuba iBhayibhile isibongoza sonke isithi: “Ninxibe ukuthobeka kwentliziyo; ngokuba uThixo uyabachasa abanekratshi, abababale ke abazithobileyo.”—1 Petros 5:5.