Abavakalisi BoBukumkani Bayabalisa

Amandla Aguqulayo ELizwi LikaThixo

WAVUMA ukuba ‘wayengumnyelisi nomtshutshisi nomntu osileyo.’ (1 Timoti 1:13) Kodwa waguquka! Ukuguquka kompostile uPawulos kwakubalasele kangangokuba kamva wakwazi ukuvakalisa oku: “Yibani ngabaxelisa mna, kwananjengoko nam ndingoxelisa uKristu.”—1 Korinte 11:1.

Namhlanje, amakhulu amawaka abanquli abanyanisekileyo ehlabathini jikelele enza iinguqu ezifanayo. Yintoni ebenza bakwazi ukwenjenjalo? Bazondla ngolwazi lweLizwi likaThixo baze balisebenzise ebomini babo. La mava alandelayo abalaselisa amandla aguqulayo eLizwi likaThixo.

ESlovenia isibini esikhulileyo sasihlala sodwa ngaphandle kwedolophana ethile. Indoda, uJože, yayineminyaka emalunga nama-60 ubudala yaye ilikhoboka lotywala elincanyiweyo. Sekunjalo, yayimnyamekela umfazi wayo owayegula, uLjudmila. Ngenye imini uJože watyelelwa ngabavakalisi boBukumkani ababini. Wawangenisa kwikhaya lakhe la maNgqina, apho adibana nomfazi wakhe. Akuva isigidimi soBukumkani, iinyembezi zovuyo zanqumla ubuso bukaLjudmila. NoJože wakuvuyela oko wakuvayo waza wabuza imibuzo emininzi. Emva kokushiya uncwadi lweBhayibhile kwesi sibini, la maNgqina emka.

Emva kwenyanga la maNgqina akwazi ukuphinda abuyele, ibe abona incwadi ethi Unokuphila Ngonaphakade Kwiparadisi Esemhlabeni iphezu kwetafile. Xa wayebuzwa ukuba wayifumana phi, uJože wathi: “Ndibone isibhengezo esikwiphepha elingasemva kumaphephancwadi enandishiyela wona. Ngoko ndiye ndabhalela iofisi yenu eseZagreb ndaza ndacela le ncwadi.” Ngenxa yomdla wakhe, wamenyelwa kwiSikhumbuzo sokufa kukaKristu esasiza kuqhutywa kwiHolo yoBukumkani. Okwawavuyisayo loo maNgqina kukuba wabakho!

Kungekudala kwaqaliswa isifundo seBhayibhile, yaye saba nenkqubela gqitha. Ngokomzekelo, xa uJože waboniswa ukuba iBhayibhile ithi “uze ungazenzeli umfanekiso oqingqiweyo . . . ungaqubudi kwezo nto, ungazikhonzi,” ngokukhawuleza waqokelela yonke imifanekiso eqingqiweyo yonqulo eyayisendlwini, kuquka imifanekiso, waza wayilahla kude.—Eksodus 20:4, 5.

Unxano lwenyaniso yokomoya lukaJože lwalusaneliswa. Noko ke, ngelishwa wayesenolunye unxano. Kangangeminyaka eli-18, wayesela malunga neelitha ezisixhenxe zewayini suku ngalunye. Ngenxa yengxaki yakhe yokusela, wayengayikhathalelanga kangako inkangeleko yakhe. Kodwa emva kokufunda ngembono kaThixo ngokusetyenziswa kakubi kotywala, wazimisela ukuguquka.

Wazabalazela ukuyoyisa ngokuthe ngcembe ingxaki yakhe yokusela, esebenzisa ubungcathu kutywala awayebusela ngosuku. Kungekudala wayengaselilo ikhoboka lewayini. Ebudeni besifundo sakhe seBhayibhile, wafunda nokuba amaKristu okwenyaniso afanele azigcine ecocekile ngokwasemzimbeni. Ngenxa yoko, wanika amaNgqina imali waza wathi: “Hambani niye kundithengela nayiphi na impahla eyimfuneko ukuze ndibe mhle kwiintlanganiso zamaKristu nakwinkonzo yasentsimini!” AmaNgqina abuya ephethe impahla yangaphantsi, iikawusi, izihlangu, iihempe, iisuti, amaqhina nengxowa yokufaka iincwadi.

Emva kokufunda iBhayibhile kangangonyaka, uJože noLjudmila bakufanelekela ukuthelela amaNgqina kumsebenzi wokushumayela kwindlu ngendlu. Kwiinyanga ezintathu kamva bafuzisela uzahlulelo lwabo kuThixo ngokubhaptizwa emanzini kwindibano yesithili yamaNgqina kaYehova. Nangona wayaluphele nempilo yakhe inkenenkene, uJože wayezishumayela rhoqo iindaba ezilungileyo yaye kamva, wakhonza ngokunyanisekileyo njengesicaka solungiselelo ebandleni de kwasekufeni kwakhe ngoMeyi we-1995. Isiqhamo esihle esabakho kule ndoda ithobekileyo nomfazi wayo sinikela ubungqina bamandla aguqulayo eLizwi likaThixo!