Imibuzo Evela Kubafundi
Yathanjiswa nini ‘iNgcwele yeeNgcwele,’ njengoko kwaxelwa kwangaphambili kuDaniyeli 9:24?
UDaniyeli 9:24-27 sisiprofeto esingokuvela ‘kweNkokeli enguMesiya’—uKristu. Ngoko, ukuthanjiswa okwaxelwa kwangaphambili ‘kweNgcwele yeeNgcwele,’ akubhekiseli ekuthanjisweni kwegumbi letempile yaseYerusalem eliyiNgcwele kaNgcwele. Kunoko, ibinzana elithi ‘iNgcwele yeeNgcwele’ libhekisela kwindawo ahlala kuyo uThixo ezulwini—iNgcwele kaNgcwele yasezulwini—kwitempile yokomoya enkulu kaYehova.a—Hebhere 8:1-5; 9:2-10, 23.
Yaqalisa nini ukusebenza itempile yokomoya kaThixo? Kaloku, khawucinge ngoko kwenzekayo xa uYesu wazinikela ukuba abhaptizwe ngowama-29 C.E. Ukususela ngoko ebomini bakhe, uYesu wazalisekisa amazwi akwiNdumiso 40:6-8. Kamva umpostile uPawulos wabonisa ukuba uYesu wathandaza kuThixo esithi: “Akufunanga mbingelelo namnikelo, kodwa undilungiselele umzimba.” (Hebhere 10:5) UYesu wayesazi ukuba uThixo ‘wayengafuni’ kuqhutyekwe kusenziwa imibingelelo yezilwanyana etempileni eYerusalem. Kunoko, uYehova walungiselela uYesu umzimba womntu ofezekileyo ukuba awunikele njengombingelelo. Evakalisa umnqweno wakhe osuka entliziyweni, uYesu waqhubeka wathi: “Khangela! Ndiyeza (emqulwini wencwadi kubhaliwe ngam) ukuza kwenza intando yakho, Thixo.” (Hebhere 10:7) Yaye wasabela njani uYehova? IVangeli kaMateyu ithi: “Emva kokuba ebhaptiziwe uYesu ngoko nangoko wenyuka emanzini; yaye, khangela! amazulu avuleka, waza wabona umoya kaThixo usihla njengehobe phezu kwakhe. Khangela! Kwakukho ilizwi eliphuma emazulwini lisithi: ‘Lo nguNyana wam, oyintanda, endikholisiweyo nguye.’”—Mateyu 3:16, 17.
Ukwamkela kukaYehova uThixo umzimba kaYesu njengombingelelo kwathetha ukuba kwabakho isibingelelo esikhulu kuneso sokoqobo setempile yaseYerusalem. Esi yayisisibingelelo “sentando” kaThixo, okanye ilungiselelo lokwamkela ubomi bukaYesu njengombingelelo. (Hebhere 10:10) Ukuthanjiswa kukaYesu ngomoya oyingcwele kwakuthetha ukuba uThixo wayeliqalisile ilungiselelo lakhe liphela letempile yokomoya.b Ngenxa yoko, ebudeni bokubhaptizwa kukaYesu, indawo ahlala kuyo uThixo ezulwini yathanjiswa, okanye yabekelwa bucala, ‘njengeNgcwele yeeNgcwele’ kwilungiselelo letempile enkulu yokomoya.
[Imibhalo esemazantsi]
a Ukuze ufumane ingxubusho malunga neenkalo ezahlukahlukeneyo zetempile yokomoya kaThixo, bona iphepha 14-19 leMboniselo kaJulayi 1, 1996.
b Oku kwathethwa ngako kwiphepha 195 lencwadi ethi Nikela Ingqalelo Kwisiprofeto SikaDaniyeli!
[Umfanekiso okwiphepha 27]
“INgcwele yeeNgcwele” yathanjiswa xa uYesu wabhaptizwayo