“Sifundise Indlela Yokuthandaza”

“NKOSI, sifundise indlela yokuthandaza.” Eso sicelo senziwa ngomnye wabafundi bakaYesu Kristu. (Luka 11:1) Lo mfundi ungachazwanga igama lakhe ngokuqinisekileyo wayeyindoda eyayiwuxabise ngokunzulu umthandazo. Nanamhlanje abanquli bokwenyaniso bawugqala njengento ebalulekileyo. Ngapha koko, umthandazo yindlela esithetha ngayo noyena Mntu Uphakamileyo kwindalo iphela! Yaye khawucinge nje! ‘UMphulaphuli wemithandazo’ unikela ingqalelo yobuqu kumaxhala ethu. (INdumiso 65:2) Okona kubalulekileyo kukuba ngomthandazo, siyambulela size simdumise uThixo.—Filipi 4:6.

Noko ke, amazwi athi “sifundise indlela yokuthandaza” aphakamisa eminye imibuzo ebalulekileyo. Ehlabathini jikelele iinkonzo ezahlukeneyo zisebenzisa iindlela ezininzi zokuthetha noThixo. Kodwa ngaba ikho indlela echanileyo nephosakeleyo yokuthandaza? Ukuze siphendule lo mbuzo, kuqala makhe siqwalasele ezinye zezithethe zonqulo ezibandakanya umthandazo. Siza kunikela ingqalelo kwezo ziqheliselwa kuMzantsi nakuMbindi Merika.

Imifanekiso Eqingqiweyo ‘Neengcwele Ezikhuselayo’

Ubukhulu becala, kumazwe akuMzantsi nakuMbindi Merika unqulo luthandwa kakhulu. Ngokomzekelo, kulo lonke elaseMexico ubani unokubona uqheliselo lokuthandaza “iingcwele ezikhuselayo.” Enyanisweni, kuyinto eqhelekileyo kwiidolophu zaseMexico ukuba kubekho “iingcwele ezikhuselayo” ezenzelwa imithendeleko ngemihla ethile. NamaKatolika aseMexico athandaza kwiindidi ezininzi zemifanekiso eqingqiweyo. Noko ke, into yokuba yiyiphi na “ingcwele” ekuthandazwa kuyo ixhomekeka kuhlobo lwesicelo anqwenela ukusenza lowo unqulayo. Ukuba ubani ufuna iqabane lomtshato, usenokukhanyisa ikhandlela ‘kwiNgcwele’ uAnthony. Ubani oza kuthabatha uhambo ngenqwelo-mafutha usenokucela inkuselo ‘kwiNgcwele’ uChristopher, umkhuseli wabahambi, ngokukodwa abahamba ngeenqwelo-mafutha.

Noko ke, zavela phi ezi zithethe? Imbali ibonisa ukuba xa abantu baseSpeyin bafika eMexico, bafika abemi balapho bezinikele kunqulo lwezithixo zobuhedeni. Kwincwadi yakhe ethi Los Aztecas, Hombre y Tribu (Ama-Aztec, Abantu Nesizwe), uVictor Wolfgang von Hagen uthi: “Kwakukho oothixo bobuqu, isityalo ngasinye sasinothixo waso, umsebenzi ngamnye unothixo okanye uthixokazi wawo, kwanokuzibulala kwakunothixo wako. UYacatecuhtli wayenguthixo woosomashishini. Kweli lizwe linoothixo abaninzi, bonke oothixo balapho babenotyekelo nemisebenzi yabo eyayichazwa kakuhle.”

Imbonakalo yaba thixo yayinomtsalane gqitha ‘kwiingcwele’ zamaKatolika kangangokuba xa abathimbi baseSpeyin bazama ukuguqulela abemi bomthonyama ‘kubuKristu,’ bayeka ukunqula imifanekiso yabo baza banqula “iingcwele” zecawa. Inqaku leThe Wall Street Journal lavuma ukuba ubuKatolika obuqheliselwa kweminye imimandla yaseMexico babunemvelaphi yobuhedeni. Lathi kwenye indawo, inkoliso ‘kwiingcwele’ ezingama-64 ezazinqulwa ngabantu ifana “noothixo abakhethekileyo bamaMayan.”

INew Catholic Encyclopedia imi ngelithi “kukho iqhina elomeleleyo phakathi kwengcwele kunye nabo bayinqulayo, . . . iqhina elithi, kunokuphazamisa ulwalamano noKristu kunye noThixo, lilukhulise yaye lilwenze lube nzulu ngakumbi.” Kodwa kunokwenzeka njani ukuba iqhina elizicaceleyo ukuba linobuhedeni lilwenze nzulu ulwalamano lukabani noThixo wenyaniso? Ngaba ngokwenene imithandazo eyenziwa kwezo “ngcwele” inokumkholisa uThixo?

Imvelaphi Yerosari

Esinye isithethe esiqhelekileyo sibandakanya ukusetyenziswa kwerosari. IDiccionario Enciclopédico Hispano-Americano (Isichazi-magama Sentyilalwazi SesiHispanic-American) xa ichaza irosari ithi “yintanjana eyenziwe ngamaso angamashumi amahlanu okanye alikhulu elinamashumi amahlanu ahlulahlulwe aba ngamashumi ngamaso amakhudlwana aza adityaniswa ekupheleni ngomnqamlezo, kutshanje odityaniselwa kuyo ngamaso amathathu.”

Ichaza indlela esetyenziswa ngayo irosari, enye impapasho yamaKatolika ithi: “IRosari Engcwele iluhlobo oluthile lokuthandaza ngamazwi nangengqondo ngemiMangaliso yokuhlawulelwa kwethu. Iyilwe ngamacandelo alishumi elinesihlanu. Candelo ngalinye liquka ukucengceleza Umthandazo weNkosi, ooHail Mary abalishumi, kunye noGloria Patri. Kwicandelo ngalinye kucamngcwa ngommangaliso othile.” Imimangaliso ziimfundiso afanele azazi amaKatolika, kule meko zibhekisela kubomi, ukubandezeleka nokufa kukaKristu Yesu.

IThe World Book Encyclopedia ithi: “Iindlela zamandulo zokuthandaza ngerosari zaqalisa kubuKristu ebudeni bamaXesha Aphakathi, kodwa zaqalisa ukusasazeka kwiminyaka ye-1400 neye-1500.” Ngaba irosari isetyenziswa ngamaKatolika kuphela? Hayi. IDiccionario Enciclopédico Hispano-Americano ithi: “Kusetyenziswa amaso afanayo kunqulo lobuSilamsi, ubuLama nobuBhuda.” Enyanisweni, iEncyclopedia of Religion and Religions ithi: “Kuye kwathiwa abalandeli bakaMohammed bayithabatha kumaBhuda iRosari, yaye amaKristu, ayithabatha kubalandeli bakaMohammed ngexesha leeMfazwe Zomnqamlezo.”

Bambi bathi irosari iluncedo ekukhumbuzeni xa kufuneka kuphindaphindwe imithandazo emininzi. Kodwa ngaba uThixo uyakholiswa kukusetyenziswa kwayo?

Akuyomfuneko nokuba sibe sicinga okanye siphikisana ngokufaneleka okanye ngokuchana kwezo zithethe. UYesu waphendula ngegunya xa wayecelwa ukuba afundise abalandeli bakhe indlela yokuthandaza. Oko wakuthethayo kuya kubakhanyisela kuze mhlawumbi kubamangalise abanye abafundi.

[Imifanekiso ekwiphepha 3]

Ngokuqhelekileyo amaKatolika asebenzisa amaso erosari. Ngaba ayevela phi?