Abavakalisi BoBukumkani Bayabalisa

Iinyaniso ZeBhayibhile Ziyaqhubeka Zishunyayelwa EIreland

KWIMINYAKA yakutshanje ilizwe elihle laseIreland liye lazaliswa ziziphithiphithi. Kwangaxeshanye, abantu baseIreland baye basabela ngomdla kwisigidimi sethemba seBhayibhile abasiphathelwa ngamaNgqina kaYehova. La mava alandelayo avela eIreland ayakungqina oku.

■ EDublin omnye wamaNgqina kaYehova wayeshumayela kwindlu ngendlu nentombazana yakhe eselula. Badibana nebhinqa eligama linguCathy elalixakekiswe gqitha ngabantwana balo abaninzi. Eli Ngqina labuza enoba intombazana yalo, eyayisafunda indlela yokushumayela, yayinokudlulisela kuye isigidimi esifutshane. UCathy wavuma, ibe le ntwazana yanikela intshumayelo ecacileyo, nelungiselelwe kakuhle. UCathy wachukumiseka kukunyaniseka nokuba nentlonelo kwalo mntwana, ibe walamkela iphecana leBhayibhile awalinikwayo.

Kamva uCathy wacingisisa ngokulungiselela kakuhle nesimilo sondwendwe lwakhe oluselula. Wathi: “Ndandichukumisekile kukuba intombazana encinane idlulise isigidimi esibangel’ umdla ngolo hlobo ngaphandle kokuzigwagwisa. Ndagqiba kwelokuba xa amaNgqina kaYehova ebuya kwakhona, ndandiya kuwaphulaphula.”

Ngelo xesha uCathy wafudukela kwidolophana ekumzantsi ntshona weIreland kufuphi nomda wesiphaluka saseCork nesaseKerry. Emva kwexesha elithile amaNgqina kaYehova ankqonkqoza kumnyango wakhe, ibe wawangenisa ngaphakathi. Wasamkela isifundo esithe rhoqo seBhayibhile ibe ngoku uya kwiintlanganiso zebandla nabaliqela kubantwana bakhe. UCathy unombulelo ngomnqweno wokwenene waloo ntwazana wokushumayela iindaba ezilungileyo kuye.

■ Kummandla waseTullamore, amaNgqina ayesiba neengxubusho zeBhayibhile nebhinqa eligama linguJean kangangeminyaka esixhenxe. Maxa wambi wayebonakalisa umdla aze alwamkele uncwadi, kodwa ngamanye amaxesha umdla wakhe wawuphela. Ngenye imini, xa iNgqina eligama linguFrances neqabane lalo latyelela uJean, bamfumana engatyhilekanga. Eli Ngqina linikela le ngxelo: “Nantoni na esasiyithetha yayimenza angatyhileki ngakumbi. Ekugqibeleni, wathi masiphel’ emehlweni waza wambakraza ucango.”

UFrances wazibuza enoba yayiya kuba sesezolo na xa emtyelela kwakhona. ‘Mhlawumbi akuseyomfuneko ukuba simtyelele ukuba akanamdla ngokwenene kwisigidimi,’ wacinga njalo uFrances. Noko ke, waxubusha nomyeni wakhe uThomas ngalo mbandela, ibe yena wayenethemba ngakumbi. Xa babebuyela kuloo mmandla, baphinda bamtyelela uJean. Wayenobubele yaye wayamkela imibhalo yephephancwadi IMboniselo noVukani! Izihlandlo esamtyelela ngazo kwakhona zazimnandi, ibe uThomas noFrances baqalisa isifundo sekhaya seBhayibhile esithe rhoqo naye.

Wayeguqulwe yintoni? UJean uthi ngexesha wayebonakalisa ubukrwada kumaNgqina, wayesandul’ ukufumana usana ibe wayevela esibhedlele. Ngenxa yokuncancisa usana lwakhe olusandul’ ukuzalwa nokutyisa omnye umntwana wakhe omdadlana, wayelala iyure enye nesiqingatha kuphela ebusuku. UJean uthi: “Ndandingakufuni tu kwaphela ukuthetha ngonqulo.”

Kwisithuba seenyanga ezimbini uJean wayesiya kuzo zonke iintlanganiso zebandla, yaye kwisithuba seenyanga ezine wayenesabelo kubulungiseleli basentsimini. Emva kweenyanga ezilishumi eqalise isifundo sakhe seBhayibhile, wabhaptizwa. Ngoku uJean uncedwa ngamava akhe obuqu kubulungiseleli. Uyabalisa: “Xa ndidibana nomntu okrwada gqitha, ndiyazama ukuba ngoqondayo. Ndisoloko ndiqiniseka ngaloo nto. Mhlawumbi imeko iya kutshintsha xa ndibuya; loo mntu usenokuba uya kube eziva bhetele yaye andamkele.”