Isizathu Sokuba Imimangaliso Iyodwa Ingalwakhi Ukholo
SIKHOLWA ngokubona. Le yimbono yabantu abaninzi. Bambi bathi bebeya kukholelwa kuThixo ukuba ebenokuzityhila ngendlela ethile engummangaliso. Mhlawumbi oko kunjalo, kodwa ngaba ukukholwa okunjalo kubonisa ukholo lokwenene?
Khawucinge ngala maSirayeli uKora, uDatan noAbhiram. IBhayibhile ibonisa ukuba babengamangqina okuzibonela imimangaliso ebalaseleyo evela kuThixo: izibetho ezilishumi phezu kwamaYiputa, ukuwela kohlanga lwamaSirayeli uLwandle Olubomvu nokutshatyalaliswa kukaFaro waseYiputa nomkhosi wakhe. (Eksodus 7:19–11:10; 12:29-32; INdumiso 136:15) Kwakhona uKora, uDatan noAbhiram bamva uYehova ethetha kwiNtaba yaseSinayi. (Duteronomi 4:11, 12) Sekunjalo, kamsinya nje emva kokuba loo mimangaliso yenzekayo, la madoda mathathu aphembelela imvukelo nxamnye noYehova nabakhonzi bakhe abanyuliweyo.—Numeri 16:1-35; INdumiso 106:16-18.
Malunga neminyaka engama-40 kamva, kwakhona umprofeti uBhileham wabona ummangaliso. Kwanokungenelela kwengelosi akuzange kumenze arhoxe ekubeni kwicala leentshaba zikaThixo, amaMowabhi. Phezu kwawo nje loo mmangaliso uBhileham waqhubeka elutshaba lukaYehova uThixo nabantu Bakhe. (Numeri 22:1-35; 2 Petros 2:15, 16) Noko ke, ukungabonakalisi lukholo kukaBhileham kungumceph’ ucandiwe nesenzo sikaYuda Sikariyoti. Phezu kwako nje ukuba lidlelane elisondeleyo likaYesu nokuba lingqina lokuzibonela uthotho lwemimangaliso ekhethekileyo, uYuda wamngcatsha uKristu ngamashumi amathathu amaqhosha esilivere.—Mateyu 26:14-16, 47-50; 27:3-5.
Iinkokeli zonqulo zamaYuda nazo zaziyiqonda imimangaliso emininzi kaYesu. Emva kokuba evuse uLazaro, zade zavuma zisithi: “Lo mntu wenza imiqondiso emininzi.” Kodwa ngaba ukubona kwazo uLazaro ngoku ovusiweyo kwazenza zathamba iintliziyo zazo kwaza kwazenza zaba nokholo? Nakanye. Kunoko zabopha iqhinga lokubabulala bobabini uYesu noLazaro!—Yohane 11:47-53; 12:10.
Kwanokungenelela ngokuthe ngqo kukaThixo akuzange kubenze babe nokholo abo bantu bangendawo. Ngesinye isihlandlo xa uYesu wayesetempileni, wathandaza ngokuvakalayo: “Bawo, lizukise igama lakho.” UYehova waphendula ngelizwi elaliphuma ezulwini lisithi: “Kokubini ndilizukisile ibe ndiza kulizukisa kwakhona.” Sekunjalo, esi siganeko singummangaliso asizange sibangele lukholo ezintliziyweni zabo babekho. IBhayibhile ithi: “Nangona wayenze imiqondiso emininzi kangaka phambi kwabo, babengakholwa kuye.”—Yohane 12:28-30, 37; thelekisa eyabase-Efese 3:17.
Isizathu Sokuba Imimangaliso Ingazange Ilwakhe Ukholo
Yintoni eyabangela ukuba abantu bangabi nalukholo phezu kwayo nje imimangaliso emininzi kangaka? Ukungamkelwa kukaYesu ziinkokeli zonqulo zamaYuda kubonakala kudida ngokukhethekileyo xa ucinga ukuba kwasekuqaliseni ubulungiseleli bakhe, onke amaYuda “ayelindele” “uKristu,” okanye uMesiya. (Luka 3:15) Noko ke, ingxaki ikwezo zinto zazilindelwe. Umbhali wesichazi-magama uW. E. Vine ucaphula umphengululi weBhayibhile owaziwayo esithi amaYuda amilisela iingqondo zawo kwingcamango kaMesiya owayeya kubanika “uloyiso lokwexeshana” kunye “nempumelelo ngezinto eziphathekayo.” Ngenxa yoko, babengalindelanga Yesu waseNazarete othobekileyo nongathabath’ icala kwezobupolitika, owavela phakathi kwawo njengoMesiya wokwenene ngowama-29 C.E. Kwakhona iinkokeli zonqulo zazisoyika ukuba iimfundiso zikaYesu zaziza kuphazamisa imekobume eyayikho zize zibeke emngciphekweni izikhundla zazo ezibalulekileyo. (Yohane 11:48) Ingcamango zazo ezazingekaqanduselwa nokuzingca kwazimfamekisa azayiqonda intsingiselo yemimangaliso kaYesu.
Iinkokeli zonqulo zamaYuda nabanye kamva abazange babamkele ubungqina bemimangaliso yokuba abalandeli bakaYesu babenandipha inkoliseko kaThixo. Ngokomzekelo, xa abapostile bakhe baphilisa indoda ethile eyayisisiqhwala kwasekuzalweni kwayo, amalungu enkundla ephakamileyo yamaYuda elugcalagcala ngumsindo abuza: “Siya kwenza ntoni na ngaba bantu? Ngenxa yokuba, enyanisweni, kwenzeke umqondiso ophawulekayo ngabo, lowo ubonakala kubo bonke abemi baseYerusalem; yaye asinakuwukhanyela. Noko ke, ukuze ungasasazeki ngokubanzi ngokubhekele phaya phakathi kwabantu, masibaxelele ngezisongelo ukuba bangathethi kwakhona ngesizinzi seli gama kuye nawuphi na umntu konke konke.” (IZenzo 3:1-8; 4:13-17) Kucacile ukuba lo mmangaliso unomtsalane awuzange wakhe okanye ubangele lukholo ezintliziyweni zabo bantu.
Ukuba namabhongo, ikratshi nokubawa ngoothunywashe abaye bashukumisela abaninzi ukuba bazenze lukhuni iintliziyo zabo. Oku kubonakala kuyimeko efanayo nakuKora, uDatan noAbhiram, abakhankanywe ekuqaleni. Umona, uloyiko neembono ezininzi ezenzakalisayo ziye zabathintela abanye. Kwakhona, sikhunjuzwa ngeengelosi ezingazange zithobele, iidemon, ezakhe zanelungelo lokubona ubuso bukaThixo. (Mateyu 18:10) Azibuthandabuzi ubukho bukaThixo. Eneneni, “needemon ziyakholwa zize zityhwatyhwe.” (Yakobi 2:19) Sekunjalo, azinalukholo kuThixo.
Intsingiselo Yokholo Lokwenyaniso
Ukholo lungaphezulu kokukholelwa nje. Kwakhona lungaphezulu kokusabela kwimvakalelo yommangaliso othile. AmaHebhere 11:1 athi: “Ukholo lululindelo oluqinisekisiweyo lwezinto ezithenjiweyo, imbonakaliso ebonakalayo yezinto zokwenene nangona zingabonwa.” Umntu onokholo weyisekile entliziyweni yakhe ukuba yonke into uYehova uThixo ayithembisayo ifana nezalisekileyo. Ukongezelela, ubungqina obungenakukhanyelwa bezinto zokwenene ezingabonwanga bunamandla kangangokuba ukholo ngokwalo kuthiwa lulingana nobo bungqina. Ewe, ukholo lusekelwe kubungqina. Yaye kumaxesha amandulo, imimangaliso yaba nendima ekukhuliseni ukholo okanye ekulwakheni. Imiqondiso eyenziwa nguYesu yenzelwa ukweyisela abanye ekubeni wayenguMesiya othenjisiweyo. (Mateyu 8:16, 17; Hebhere 2:2-4) Ngokufanayo, izipho ezinjalo zomoya oyingcwele kaThixo okanye amandla asebenzayo, njengemimangaliso yokuphilisa nokuthetha ngeelwimi yayibonisa ukuba amaYuda ayengasenayo inkoliseko kaYehova kodwa ngoku inkoloseko yakhe yayikwibandla lamaKristu, elamiselwa nguNyana wakhe, uYesu Kristu.—1 Korinte 12:7-11.
Phakathi kwezinye iziphiwo zemimangaliso zomoya yayingamandla okuprofeta. Xa abangakholwayo babona lo mmangaliso, bambi bashukunyiselwa ukunqula uYehova bevakalisa besithi: “Ngokwenene uThixo uphakathi kwenu.” (1 Korinte 14:22-25) Noko ke, uYehova uThixo wayengamiselanga ukuba imimangaliso ibe luphawu olusisigxina lonqulo lobuKristu. Ngokuvisisana noko, umpostile uPawulos wabhala: “Enoba kukho iziphiwo zokuprofeta, ziya kubhangiswa; enoba kukho iilwimi, ziya kuyeka.” (1 Korinte 13:8) Ezi ziphiwo kuyabonakala ukuba zaphela nokufa kwabapostile kwanabo bazifumana ngenxa yabo.
Ngoko ngaba abantu babeya kusala bengenaso isiseko sokholo? Akunjalo, kuba uPawulos wathi: “[UThixo] engazange azishiye yena ngokwakhe ngaphandle kobungqina ngokuba wathi wenza okulungileyo, eninika iimvula ezivela ezulwini namaxesha emveliso, ezizalisa iintliziyo zenu zizale kukutya nakukuchwayita.” (IZenzo 14:17) Eneneni, kubantu abanyanisekileyo abakulungeleyo ukuvula iingqondo neentliziyo zabo kubungqina obusingqongileyo, iimpawu zikaYehova uThixo “ezingabonakaliyo zibonwa ngokucacileyo ukususela ekudalweni kwehlabathi kuse phambili, ngenxa yokuba ziqondeka ngezinto ezenziweyo, kwanamandla angunaphakade nobuThixo bakhe, khon’ ukuze bangabi nakungxengxezeleka.”—Roma 1:20.
Kufuneka okungakumbi kunokukholelwa nje kubukho bukaThixo. UPawulos wabongoza: “Yekani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Oku kunokwenziwa ngokuzifundisisa ngenkuthalo iZibhalo ngoncedo lweempapasho zamaKristu, ezinjengeli phephancwadi. Ukholo olusekelwe kulwazi oluchanileyo lweLizwi likaThixo, iBhayibhile, alukho buthathaka okanye alukho luncinane. Abo bakuqondayo ukuthanda kukaThixo baze bakwenze ngokholo banikela kuThixo inkonzo engcwele.—Roma 12:1.
Ukukholwa Nangona Ungaboni
Umpostile uTomas wayenobunzima bokubonisa ukholo kuvuko lukaYesu kwelabafileyo. UTomas wathi: “Ngaphandle kokuba ndibone ezandleni zayo iziva zezikhonkwane ndize ndifake umnwe kwiziva zezikhonkwane ibe ndifake isandla sam ecaleni layo, ngokuqinisekileyo andizi kukholwa.” Xa kamva uYesu wambatha umzimba wenyama owabonisa amanxeba awayehlatywe kuwo, uTomas wasabela kakuhle kulo mmangaliso. Noko ke, uYesu wathi: “Banoyolo abo bangaboniyo ukanti bayakholwa.”—Yohane 20:25-29.
Namhlanje, izigidi zamaNgqina kaYehova ‘zihamba ngokholo, kungekhona ngokubona.’ (2 Korinte 5:7) Nangona engazange ayibone imimangaliso ebhalwe eBhayibhileni, akholelwa ngokuqinileyo ukuba yenzeka. AmaNgqina abonisa ukholo kuThixo nakwiLizwi lakhe. Ngoncedo lomoya wakhe, ayakwazi ukuziqonda iimfundiso zeBhayibhile nomxholo owayo oyintloko—ukuthethelelwa kolongamo lukaYehova uThixo ngoBukumkani bakhe basezulwini. (Mateyu 6:9, 10; 2 Timoti 3:16, 17) La maKristu okwenene asebenzisa isiluleko seBhayibhile sobulumko ebomini bawo nto leyo eyingenelo kuwo. (INdumiso 119:105; Isaya 48:17, 18) Ayabamkela ubungqina obungenakuphikiswa bokuba iziprofeto zeBhayibhile zibonisa amaxesha ethu ‘njengemihla yokugqibela,’ yaye ayakholwa ukuba idinga likaThixo lehlabathi elitsha lisemnyango. (2 Timoti 3:1-5; Mateyu 24:3-14; 2 Petros 3:13) Kuwo kuluvuyo ukwabelana nabanye ngolwazi lukaThixo. (IMizekeliso 2:1-5) Ayazi ukuba abo bamfuna ngokwenene uThixo banokumfumana kuphela ngokufundisisa iZibhalo.—IZenzo 17:26, 27.
Usamkhumbula uAlbert, okhankanywe kwinqaku elandulelayo? Kwiintsuku ezimbalwa emva kokuthandazela ummangaliso ongazange uphendulwe, watyelelwa ngomnye wamaNgqina kaYehova, ixhegokazi elamshiyela uncwadi olusekelwe eBhayibhileni. Emva koko uAlbert wasamkela isifundo seBhayibhile sekhaya sesisa. Njengoko wayesiya eqhelana ngakumbi nesigidimi seBhayibhile, udano awayenalo lwaguquka lwaba yimihlali. Waqalisa ukuqonda ukuba ekugqibeleni umfumene uThixo.
IZibhalo zibongoza zisithi: “Funani uYehova esenokufunyanwa; mbizeni esekufuphi.” (Isaya 55:6) Unako ukukwenza oku, kungekhona ngokulindela ummangaliso wezi mini osuka kuThixo, kodwa ngokuzuza ulwazi oluchanileyo lweLizwi lakhe. Oku kuyimfuneko, kuba imimangaliso iyodwa ayilwakhi ukholo.
[Picture On Page 5]
Kwanommangaliso ongokuvuswa kukaLazaro awuzange ushukumisele iintshaba zikaYesu ukuba zibonise ukholo
[Pictures On Page 7]
Ukholo lumele lusekelwe kulwazi oluchanileyo lweBhayibhile