Ngaba Akukho Ndlela Yokuthintela Okungekho Sikweni?
“Phezu kwazo nje zonke ezinye izinto ndisakholelwa ukuba abantu banentliziyo ezilungileyo. Andinakuthembela kwisiseko esididekileyo, sokubandezeleka, nokufa.”—Anne Frank.
UANNE FRANK, intombazana eselula yomYuda eneminyaka eli-15 ubudala, yabhala loo mazwi ahlabayo kwincwadi yayo yeziganeko zemihla ngemihla kungekudala ngaphambi nje kokuba ife. Kangangeminyaka engaphezu kwemibini, intsapho yakowabo yayizifihlile, izimele kwigumbi eliphantsi kophahla eAmsterdam. Amathemba akhe ehlabathi elibhetele aphela xa untamnani othile wachazela amaNazi indawo ababekuyo. Kunyaka olandelayo, ngowe-1945, uAnne wafa ebulawa sisifo seentwala kwinkampu yoxinaniso yaseBergen-Belsen. Amanye amaYuda azizigidi ezintandathu afa ngendlela efanayo.
Iphulo likaHitler lenkohlakalo lokutshabalalisa isizwe sonke lisenokuba sesona siganeko sibi sokungabikho kokusesikweni ngenxa yobuhlanga kule nkulungwane yethu, kodwa asisodwa. Ngowe-1994 ngaphezu kwesiqingatha sesigidi samaTutsi sabulawa eRwanda, kuphela ngenxa yokuba sasingabohlanga “olwahlukileyo.” Yaye ebudeni bemfazwe yehlabathi yokuqala, malunga nesigidi sama-Armenia safa ngenxa yeengxwabangxwaba zobuhlanga.
Iinkalo Ezibangelwa Kukungabikho Kokusesikweni
Ukutshatyalaliswa kohlanga akuyiyo yodwa inkalo yokungabikho kokusesikweni. Ukungabikho kokusesikweni ekuhlaleni kuyinkalo ephambili yohlanga ngenxa yobuhlwempu obuqhubeka ixesha elide. Sekunjalo okona kubi ngakumbi kukuba, iqela lamalungelo abantu iAnti-Slavery International lifumanisa ukuba abantu abangaphezu kwama-200 000 000 basebukhobokeni. Kusenokuba kukho amakhoboka amaninzi namhlanje emhlabeni kunanini na ngaphambili. Asenokungathengiswa efandesini, kodwa indlela asebenza ngayo ngokuqhelekileyo imbi ngakumbi kunaleyo yamaxesha angaphambili.
Ukungabikho kokusesikweni kwabasemthethweni kuthabatha amalungelo ezigidi zabantu. Ingxelo yowe-1996 eyenziwa yiAmnesty International ithi: “Inkohlakalo ephathelele amalungelo abantu yenziwa yonke imihla, kwiindawo ezithile emhlabeni. Abona bantu baninzi bachaphazelekayo ngamahlwempu nabo bangenakuzenzela nto, ingakumbi amabhinqa, abantwana, abantu abakhulileyo neembacu.” Le ngxelo yathi: “Kwamanye amazwe, imeko iwohloke ngokupheleleyo, ayishiyi nalinye igunya elisemthethweni ukuba likhusele abo babuthathaka kwabo bomeleleyo.”
Ebudeni bowe-1996 amashumi amawaka avalelwa aza atshutshiswa kumazwe angaphezu kwekhulu. Ibe kwiminyaka yakutshanje, amakhulu amawaka abantu aye aphel’ emehlweni, ekubonakala ukuba abanye baye bathathwa ngenkani yimikhosi yonqabiseko okanye amaqela abagrogrisi. Kuthelekelelwa ukuba uninzi lwabo lufile.
Noko ke, iimfazwe, ngokungaphephekiyo azinabulungisa, kodwa ziya sisiba njalo ngakumbi. Iimfazwe zanamhlanje zibulala abahlali, kuquka amabhinqa nabantwana. Ibe oku akubangelwa kukudutyulwa kwebhombu ngokungakhethiyo. Ukudlwengulwa kwamabhinqa namantombazana kujongwa njengenxalenye yemisebenzi yasemkhosini, yaye amaqela amaninzi avukelayo athabatha abantwana ngenkani ukuze abaqeqeshele ukuba babe ngababulali. Zigqabaza ngotyekelo olunjalo, kwingxelo yazo ethi “Impact of Armed Conflict on Children” iZizwe Ezimanyeneyo zithi: “Imilinganiselo yokuziphatha kwehlabathi iwohlokile.”
Alithandabuzeki elokuba le milinganiselo yokuziphatha ifayo iye yakhokelela kwihlabathi elizaliswe kukungabikho kokusesikweni—enoba kungobuhlanga, ngokwasekuhlaleni, ngokomthetho, okanye ngokwasemkhosini. Noko ke, oku akunto intsha. Ngaphezu kweminyaka engamawaka amabini anamakhulu amahlanu eyadlulayo, umprofeti ongumHebhere wakhalaza esithi: “Ngenxa yoko uyekelelwe umyalelo, ukuze kungaveli naphakade okusesikweni; kuba abangendawo bayawarhawula amalungisa; ngenxa yoko okusesikweni kuphuma kujikekile.” (Habhakuki 1:4) Nangona ukungabikho kokusesikweni bekusoloko kuxhaphakile, inkulungwane yama-20 yeyona ichaphazeleka ngakumbi njengoko ukungabikho kokusesikweni kufikelela kwinqanaba eliphezulu.
Ngaba Ukungabikho Kokusesikweni Kunomsebenzi?
Kunomsebenzi xa wena ngokobuqu ubandezeleka ngenxa yokungabikho kokusesikweni. Kunomsebenzi ngenxa yokuba kuhlutha uluntu oluninzi ilungelo lokonwaba. Yaye kwakhona kunomsebenzi ngenxa yokuba ukungabikho kokusesikweni ngokuqhelekileyo kubangela ungquzulwano oluphumela ekuphalazweni kwegazi, okuye kuthi, ekugqibeleni kubangele ukungabikho kokusesikweni kuhlale kukwinqanaba eliphezulu.
Uxolo nonqabiseko zisondelelene kakhulu nokusesikweni, kodwa ukungabikho kokusesikweni kutshabalalisa ukuba nethemba. Njengokuba uAnne Frank wakufumanisa oko kabuhlungu, abantu abanakukwazi ukuba nethemba kwisiseko esididekileyo, sokubandezeleka nokufa. Njengaye, silangazelela okubhetele.
Lo mnqweno uye wakhokelela abantu abanyanisekileyo ukuba bazame ukuzisa okusesikweni ngomlinganiselo othile eluntwini. Ukuze kufikelelwe oko, iUniversal Declaration of Human Rights eyasekwa ngowe-1948 yiNgqungquthela yeZizwe Ezimanyeneyo, yathi: “Bonke abantu bazalwa bekhululekile yaye belingana ngesidima nangamalungelo. Banikwe amandla okuqiqa nesazela yaye bafanele baphathane ngomoya wobuzalwana.”
Ngokuqinisekileyo la ngamazwi abalulekileyo, kodwa uluntu lusekude ekubeni luqonde olo sukelo luxabisekileyo—ibutho elinobulungisa apho bonke abantu banandipha amalungelo alinganayo yaye wonke umntu ephatha omnye umntu njengomzalwana wakhe. Ukuphunyezwa kolu sukelo njengentshayelelo yeSigqibo seZizwe Ezimanyeneyo kubonisa ukuba, luya kuzisa “inkululeko, okusesikweni noxolo emhlabeni wonke.”
Ngaba ukungabikho kokusesikweni kubethelelwe nzulu kwinkalo ethile yoluntu engenakuze isuswe? Okanye ngandlel’ ithile kuya kumiselwa isiseko esomeleleyo senkululeko, sokusesikweni nesoxolo? Ukuba kunjalo, ngubani onokusimisela aze aqiniseke ukuba baya kungenelwa bonke?
[Inkcazelo Ngomfanekiso okwiphepha 3]
UPI/Corbis-Bettmann