Isizathu Sokuba Babhenele Kugonyamelo
IMVEKU, eyabelekwa kwiiveki ezingama-27 ngaphambi kwexesha layo, yazalelwa eDenver, eColorado, eUnited States. Le nkwenkwana yaphila, yaye emva kwenyanga ezintathu isesibhedlele, yagoduswa yasiwa kubazali bayo. Kwadlula nje iiveki ezintathu, le nkwenkwana yabuyiselwa esibhedlele. Kwakonakele phi ngoku? Ukudlikidlwa kwayo nguyise kwayonzakalisa kanobom ebuchotsheni. Isikhalo solu sana samza entloko lo bawo. Le nkwenkwana yatyhaphaka emehlweni yaye yaba nesiphene. Unyango lwale mihla lwakwazi ukuyisindisa kwingxaki eyayizelwe inayo kodwa aluzange luyisindise kugonyamelo lukayise.
Baninzi abantwana abaxhatshazwayo, babethwe, okanye babulawe kwenye yezona ndawo zakha zanogonyamelo emhlabeni—ikhaya! Abanye baqikelela ukuba bamalunga nama-5 000 abantwana ababulawa ngabazali babo ngonyaka eUnited States kuphela! Yaye asingobantwana kuphela abangamaxhoba. Ngokutsho kwephephancwadi iWorld Health, “ukuxhatshazwa kwabafazi ngoyena nobangela uyintloko wokwenzakala kwabasetyhini abasexabisweni lokuzala kule mihla” eUnited States. Kuthekani ngamanye amazwe? “Kunikelwa ingxelo yokuba ibhinqa elinye kwamathathu ukuya kutsho kwangaphezulu kwesiqingatha salawo kuye kwenziwa uphando kuwo [kumazwe asakhasayo] liyabethwa liqabane lalo.” Ewe, ugonyamelo lwaphul’ izikeyi, ingakumbi ekhaya.
Amadoda nabafazi abaninzi baye bazame ukuzinzisa ukungavisisani ngogonyamelo. Kwamanye amazwe, abazali nabafundisi-ntsapho basebenzisa ugonyamelo ukuze bakhuphele umsindo wabo ebantwaneni. Ukuze bazonwabise abavuyeleli bahlisa besenyusa abo bangamatyutyusi, bebaphatha ngogonyamelo. Yintoni le ibangela ukuba abantu babe nogonyamelo olungaka?
Isizathu Sokuba Abantu Babe Nogonyamelo
Bambi bathi abantu badalwe benogonyamelo. Ngoxa ugonyamelo nolwaphulo-mthetho lulonke luye lwathomalala eUnited States, luye lwaqatsela kwabaselula. Yaye bambi balufuna nasemanzini ugonyamelo. Izikhululo ezikhulu ezithathu zikamabonwakude ziye zaliphinda kabini inani lamabali olwaphulo-mthetho zaza zaliphinda kathathu elawokubulala. Ewe, ulwaphulo-mthetho lunengeniso! Ugqirha wezigulo zengqondo uKarl Menninger, wathi: “Asilunyamezeli nje kuphele ugonyamelo, kodwa luba kwimixholo yamaphephandaba ethu. Inkqubo enye kwezintathu okanye kwezine kumabonwakude ilusebenzisa ukuze yonwabise abantwana bethu. Kaloku ngoku asisaluqwabazeli liso nje kuphela! Bantakwethu, siyaluthanda.”
Izifundo zenzululwazi zakutshanje zibonisa ukuba imo yengqondo nemeko-bume inegalelo elikhulu kubundlobongela babantu. UGqr. Markus J. Kruesi weUniversity of Illinois Institute for Juvenile Research uthi: “Iya isithi thaa kuthi into yokuba iimeko ezinobungozi abachanabeke kuzo abantwana abaninzi, enyanisweni, zibangela ukwanda kogonyamelo. Ngokwenene iimeko ezibangelwa ziziganeko ezithile zidala utshintsho kwiimolekyuli zobuchopho nto leyo edala ukuba abantu benze izinto abangazicinganga.” Incwadi ethi Inside the Brain ithi iimeko ezinjalo “ezinjengokuwohloka kweentsapho, ukwanda kweentsapho ezinomzali omnye, ubuhlwempu obuqhubekayo, nokusetyenziswa kakubi kweziyobisi kunokuyenzakalisa kanobom ingqondo kuze kuyenze ibe ndlongondlongo—into ekwakha kwacingwa ukuba ayinakuze yenzeke.”
Kuthiwa iinguqulelo ezenzeka engqondweni ziquka ukuhla kweserotonin, umchiza wengqondo ekukholelwa ukuba ulawula ubundlongondlongo. Izifundo zibonisa ukuba utywala busenokuyihlisa iserotonin engqondweni, nto leyo efika ixhase abenzululwazi xa benxibelelanisa ugonyamelo nokusetyenziswa kakubi kotywala.
Sekunjalo kukho enye inkalo enegalelo kulwando logonyamelo namhlanje. “Khumbula,” ilumkisa ngelitshoyo incwadi yesiprofeto enokuthenjwa, iBhayibhile, ukuba “kuya kubakho amaxesha anzima ngemihla yokugqibela. Abantu baya kuzingca, babawe, baqhayise, yaye babe nekratshi; . . . abayi kuba nabubele, abayi kuba nanceba, baya kuba ngabahlebi, babe nogonyamelo, yaye babe neengcwangu; baya kukuthiya ukulunga; babe ngabangcatshi, bangakhathali, bakhukhumale likratshi, . . . Yahlukana nabantu abanjalo.” (2 Timoti 3:1-5, Today’s English Version) Ewe, ugonyamelo esilubonayo namhlanje kukuzaliseka kwesiprofeto seBhayibhile ‘esingemihla yokugqibela.’
Kukho nenye into ebangela ukuba eli xesha libe lelinogonyamelo ngokukhethekileyo. IBhayibhile ithi: “Yeha kuwo umhlaba nakulo ulwandle, ngenxa yokuba uMtyholi uhlile weza kuni, enomsindo omkhulu, esazi ukuba unesihlandlo esifutshane sexesha.” (ISityhilelo 12:12) UMtyholi nehlokondiba leedemon baye bakhutshelwa ngaphandle kwamazulu yaye ngoku wonke umsindo abanawo bawukhuphela eluntwini. ‘Njengomphathi wegunya lomoya,’ uMtyholi usebenzisa “umoya ngoku osebenza koonyana bokungathobeli,” ebangela umhlaba ube yeyona ndawo inogonyamelo olwandayo.—Efese 2:2.
Ngoko ke, namhlanje sinokuwunyamezela njani lo “moya” wehlabathi unogonyamelo? Yaye sinokuzizinzisa njani iimbambano ngaphandle kogonyamelo?
[Umfanekiso okwiphepha 3]
Baninzi abantwana abaxhatshazwayo, babethwe, okanye babulawe kwenye yezona ndawo zakha zanogonyamelo emhlabeni—ikhaya!