Ukuzabalazela Ukuba “Ngumsebenzi Ongenanto Anokuba Neentloni Ngayo”
Ngokubaliswa Nguandré Soppa
Imfazwe Yehlabathi II yayigquba, kuziindyikityha zokufa nje abantu bethe khunubembe ngeyona ndlela. Njengalowo unikela umqondiso kuMkhosi Waselwandle waseJamani kufutshane naseNarvik, eNorway, ndazibonela ngawam amehlo indlela umntu anokuba nenkohlakalo ngayo komnye umntu. Ebusuku, ndihleli kumachweba alapho, ukubukela ubuhle beenkwenkwezi kwandenza ndacinga nzulu ngobomi. Ndandiqinisekile ukuba uThixo owadala ezo zinto akanakubangela umoya wempambano wemfazwe ololo hlobo.
NDAZALWA ngowe-1923 kwidolophana yaseLassoth (ngoku esePoland), kufutshane nomda waseCzech, yaye ndakhulela kwintsapho engamahlwempu yabalimi. Abazali bam babengamaKatolika, ibe unqulo lwalunempembelelo enkulu ebomini bethu. Noko ke, zisuka nje ndaqalisa ukuba namathandabuzo ngonqulo lwam. Kule dolophana yethu kwakukho iintsapho ezintathu ezingamaProtestanti, yaye zazicekiswa ngabo bangamaKatolika. Ndandingasiqondi isizathu sokwenjenjalo. Esikolweni sasifundiswa ngekathekizim. Kodwa ngenye imini xa ndacela umfundisi ukuba andicacisele ngoBathathu Emnye, impendulo endayifumanayo yaba yimivumbo elishumi ngoswazi. Noko ke, kokuthile okwenzeka xa ndandineminyaka eli-17 ubudala okwandivula amehlo ngecawa yam. Abazali bakamama bafa beshiyana ngenyanga enye omnye emva komnye, yaye umama wayengenamali yaneleyo yokuhlawulela iinkonzo zomngcwabo wecawa. Ngoko wacela kumfundisi ukuba amhlawule kamva. Ephendula wathi: “Andithi abazali bakho bebenezinto? Zithengise, uze loo mali uyisebenzisele umngcwabo.”
Kwiminyaka embalwa ngaphambi koko, emva kokuba uHitler eqalise ukulawula ngowe-1933, sasingavunyelwa ukuba sithethe isiPolish; kwakufuneka sithethe isiJamani. Abo babengavumi okanye bengakwazi ukufunda isiJamani, banyamalala ngokuthe ngcembe—kamva seva ukuba babethunyelwa kwiinkampu zoxinaniso. Kwanegama ledolophana yethu laguqulwa labizwa ngesiJamani kwathiwa, yiGrünfliess. Ndaphuma esikolweni ndineminyaka eli-14 ubudala, yaye kuba ndandingekho kumbutho woLutsha lukaHitler, kwaba nzima ukuba ndifumane umsebenzi. Noko ke, ekugqibeleni ndade ndaqeshwa njengomkhandi weentsimbi osafundayo. Kwala nje ukuba kuqale imfazwe, ecaweni kwathandazelwa uHitler nemikhosi yaseJamani. Ndandizibuza enoba kwakuthandazwa ngendlela efanayo nakwelinye icala kusini na.
Ukusebenza KuMkhosi Waselwandle WaseJamani
NgoDisemba 1941, ndangenelela kuMkhosi Waselwandle waseJamani, yaye ekuqaleni kowe-1942 ndathunyelwa kunxweme lwaseNorway ukuya kusebenza kwinqanawa yookhala. Sasabelwe ukuba sipheleke iinqanawa ezaziphakathi kweTrondheim neOslo, ezithwele imikhosi, izixhobo okanye iimpahla. Kuxa ndandilapho elwandle endeva oomatiloshe ababini bethetha ngesiphelo sehlabathi njengoko kwakuxelwe kwangaphambili eBhayibhileni. Nangona babesoyika ukuthetha phandle, bandixelela ukuba abazali babo babenxulumene namaNgqina kaYehova kodwa abazange balandele umzekelo wabo. Ndandiqala ukuva ngamaNgqina kaYehova.
Ukuphela kwemfazwe, sabanjwa ngamaNgesi aza asinikela kumaMerika ukuze asibuyisele eJamani. Abo kuthi babenamakhaya ayesele ekummandla weSoviet basiwa kwinkampu yamabanjwa eseLiévin kumantla eFransi, ukuya kusebenza kwimigodi yamalahle. Oku kwenzeka ngoAgasti 1945. Ndikhumbula ndibuza omnye wabalindi bethu owayengumFrentshi ngonqulo lwakhe. Waphendula ngokuthi: “NdingumKatolika.” Ekubeni nam ndandingumKatolika, ndambuza ukuba yintoni le siyenzileyo omnye komnye? Wandiphendula wathi: “Akukho sizathu sakufuna ukuqonda. Sekunjalo.” Kum yayingangeni into yokuba abantu bonqulo olunye balwe baze babulalane bodwa.
Ilitha Lokukhanya Kumgodi Wamalahle
Ngosuku lwam lokuqala emgodini ndikunye nabasebenzi, uEvans Emiot othile wandabela kwisonka sakhe. Inkaba yakhe yayiseOhio, eUnited States, kodwa wayesele ehleli eFransi kangangeminyaka eliqela. Wathetha nam ngehlabathi elingenazimfazwe. Ndamangaliswa bububele bakhe. Wayengenabutshaba kum nangona ndandingumJamani yena engumMerika. Asizange siphinde sidibane de kwasekuqaleni kowe-1948 xa wandinika incwadana enomxholo othi “The Prince of Peace.” Ekugqibeleni ndade ndafunda ngoThixo olungileyo oyithiyileyo imfazwe—uhlobo loThixo endandicinga ngaye xa ndandibukele ukukhanya kwesibhakabhaka. Ndandizimisele ukulufuna unqulo olwalufundisa oko. Kodwa ngenxa yokuba uEvans wayesebenza kwelinye icala lomgodi, ndandingakwazi ukudibana naye. Ndaya kuwo onke amaqela eenkonzo ezahlukahlukeneyo awayekule nkampu yamabanjwa, ndaza ndabuzisa enoba kukho uthile unolwazi ngale ncwadana, kodwa akazange abekho.
Ekugqibeleni, ngoAprili 1948 ndakhululwa kwinkampu yamabanjwa ndaza ndangumsebenzi okhululekileyo. KwiCawa elandelayo, ndothuswa kukuva intsimbi encinane ikhala esitratweni. Hayi indlela endavuya ngayo kukubona uEvans! Wayekwiqela lamaNgqina kaYehova begangxe iibhodi ezazipapasha umxholo wentetho yesidlangalala. Elo Ngqina lalikhalisa intsimbi yayinguMarceau Leroy, ngoku olilungu leKomiti yeSebe laseFransi. Bandazisa kummi wasePoland owayethetha isiJamaniOK for Xhosa ogama linguJoseph Kulczak, owayebandezeleke kwiinkampu zoxinaniso ngenxa yokholo lwakhe. Wandimemela kwintlanganiso yangaloo ngokuhlwa. Ndandingayiqondi kakuhle into eyayithethwa apho, kodwa xa babephakamisa izandla bonke abantu ababelapho, ndabuza kowayesecaleni kwam isizathu sokuba benjenjalo. “Ngabo baza kuya kushumayela eDunkerque kwiveki ezayo.” Ndabuza: “Ngaba nam ndingeza?” Waphendula wathi: “Ewe, ungeza!” Ngoko kwiCawa elandelayo ndandishumayela kwindlu ngendlu. Nangona yayingenguye wonke ubani esidibana naye owayevumelana nathi, ndandonwabe gqitha yaye kungekudala ndandishumayela rhoqo.
Ukufunda Ukulawula Umsindo
Kungekudala emva koko, amaNgqina aqalisa ukushumayela kwizindlu ezazihlala amabanjwa akhululekileyo aseJamani. Oku kwakungelula kum, ekubeni ndandisaziwa kakuhle apho ngokuba nalo weqaqa umsindo. Xa umntu engandiphulaphuli, ndandimtyityimbisel’ umnwe ndithi: “Ukuba akulumkanga, uya kuba sengxakini.” Ngasihlandlo sithile xa ndandisasebenza emgodini, ndabetha omnye umntu ngenqindi owayegculela uYehova.
Noko ke, ngoncedo lukaYehova ndakwazi ukwenza utshintsho kubuntu bam. Ngenye imini sisashumayela kwakwezo zindlu, iqela elithile lamadoda awayenxile eludaka laqhwaya udushe kwamanye amaNgqina. Besazi umsindo wam okhawulezayo abazalwana bazama ukundithintela ndingangeneleli, kodwa enye yaloo madoda yanditsibela indisongela yaza yatyeda ibhatyi yayo. Ndehla ebhayisekileni yam, ndayinika ukuba iyibambe, ndaza ndafaka izandla epokothweni. Yamangaliswa gqitha koko kangangokuba yandiphulaphula. Ndayixelela ukuba mayigoduke iye kulala ukuze ivuke ize kwintetho yesidlangalala. Kanye ngentsimbi yesi-3:00 emva kwemini, yaba lapho! Ekugqibeleni, amabanjwa anokuba ngama-20 asamkela isigidimi. Mna ke ndabhaptizwa ngoSeptemba 1948.
Ucwangciso Oluxakekileyo Kodwa Olunomvuzo
Ndathwaliswa imbopheleleko yokunyamekela intsimi esasimele siyishumayele ndize ndikhangele iindawo esasinokuqhubela kuzo iintetho zesidlangalala. Ukuze ndiphumeze oko maxa wambi ndandihamba malunga nama-50 eekhilomitha ngesithuthuthwana sam, phambi kokuba ndiye emsebenzini ngokuhlwa emgodini. Sasisandula ke ngeempela-veki, siye kuloo ntsimi ngoduladula size sothule abavakalisi ababini okanye abane nesithethi. Kwiidolophu ezinkulu sasisithi sakuba sifumene indawo efanelekileyo, sifumbe iisutikheyisi zethu sisenza iqonga lesithethi. Amaxesha amaninzi sasigangxa iibhodi ukubhengeza umxholo wentetho yesidlangalala esibamemela yona abantu.
Kwakungowe-1951 xa ndadibana noJeannette Chauffour, iNgqina laseReims. Sathandana nje siqala ukubonana, yaye emva konyaka ngoMeyi 17, 1952, satshata. Safudukela ePecquencourt, idolophu enemigodi kufuphi naseDouai. Noko ke, kungekudala ndaqala ukugula. Ndafunyaniswa ukuba ndinethayisisi, isifo samalungu okuphefumla esibangelwa kukusebenza emgodini, kodwa ndandingafumani naluphi na uhlobo lomnye umsebenzi. Ngoko ngowe-1955 xa sasikwindibano yezizwe ngezizwe eNuremberg, eJamani, sacelwa ukuba sincede ibandla elincinane eliseKehl, idolophu encinane yezorhwebo eRhine, sasikulungele ukuya apho. Ngelo xesha, babengama-45 kuphela abavakalisi kwelo bandla. Ngaphezu kweminyaka esixhenxe sisebenza nelo bandla, inani labavakalisi landa laya kutsho kuma-95.
Amalungelo Angakumbi Enkonzo
Sakubona ukuba ibandla lizinzile, sacela kuMbutho isabelo sokuya kushumayela eFransi njengoovulindlela abakhethekileyo. Samangaliswa ngeyona ndlela, kuba wasabela eParis. Iinyanga ezisibhozo esazichitha apho zazisivuyisa gqitha. SinoJeannette sasiqhuba izifundo zeBhayibhile ezingama-42. Abahlanu kwizifundo zethu babhaptizwa ngoxa sasiselapho, yaye abali-11 bayamkela inyaniso kamva.
Ekubeni sasihlala kwiLatin Quarter, ngokufuthi sasidibana neenjingalwazi zaseSorbonne. Injingalwazi kwintanda-bulumko eyayisidla umhlala-phantsi neyayiphilisa ngomoya yafundisisa iBhayibhile yaza ekugqibeleni yaba ngomnye wamaNgqina kaYehova. Ngenye imini ndaqalisa ingxubusho yeBhayibhile nenye injineli eyayiqhagamshelana nabafundisi bamaJesuit. Yeza kwindawo esihlala kuyo ngentsimbi yesithathu emva kwemini yaza yemka ngentsimbi yeshumi ebusuku. Singalindelanga, yaphinda yankqonkqoza emva nje kweyure enesiqingatha. Yayithethe nomJesuit owayengazange akwazi ukuphendula imibuzo yayo ngokuphathelele isiprofeto seBhayibhile. Ngentsimbi yokuqala ekuseni, yagoduka, yaza yabuya ngentsimbi yesixhenxe. Ekuhambeni kwexesha, nayo yaba liNgqina likaYehova. Ukunxanelwa inyaniso okunjalo kwakusikhuthaza kakhulu nomfazi wam.
Emva kokukhonza eParis, ndamenyelwa ukuya kukhonza njengomveleli ohambahambayo kwimpuma yeFransi. Kwakusivuyisa ngokwenene ukutyelela amabandla athetha isiFrentshi nesiJamaniOK for Xhosa, sisomeleza abazalwana. Ngoxa sasityelele ibandla laseRombas, eLorraine, ndadibana noStanislas Ambroszczak. Wayengummi wasePoland owayekuMkhosi waMazwe Amanyeneyo emfazweni owawusilwa kulwandle lwaseNorway. Sasikumacala awahlukeneyo nalwayo ngoxa sasikulwandle olunye. Ngoku sasingabazalwana sisebenza kunye sikhonza uThixo wethu, uYehova. Ngesinye isihlandlo kwindibano eyayiseParis, ndabona umntu endandimnakana. Yayingumphathi wenkampu endandivalelwe kuyo kumntla weFransi. Hayi indlela esavuya ngayo kukusebenza kunye endibanweni! Anjalo ke amandla eLizwi likaThixo aguqula abantu ababeziintshaba babe ngabazalwana nabahlobo abasenyongweni!
Okubuhlungu kukuba, emva kweminyaka eli-14 ndikumsebenzi wokuhambahamba, kwafuneka ndiyeke ngenxa yempilo yam enkenenkene. Noko ke, mna nomfazi wam sasizimisele ukukhonza uYehova kangangoko sinako. Ngoko safumana indawo yokuhlala nomsebenzi kwidolophu yaseMulhouse, ekwimpuma yeFransi, saza sangoovulindlela (abashumayeli bexesha elizeleyo).
Okunye obekundivuyisa kakhulu kangangeminyaka kukubandakanyeka kwam kulwakhiwo lweeHolo ZoBukumkani. Ngowe-1985 ndacelwa ukuba ndilungelelanise iqela labakhi kwimpuma yeFransi. Ngokusebenzisa amagcisa anobuchule nokuqeqesha amatsha-ntliziyo azinikeleyo, sabumba iqela elancedisa ekwakheni okanye ekuhlaziyeni iiholo ezingaphezu kwama-80, zisenziwa zifanelekele ukunqula uYehova. Yaye hayi indlela endavuya ngayo ngowe-1993, xa ndandisebenza kulwakhiwo lweHolo YeNdibano neeHolo ZoBukumkani ezintlanu eFrench Guiana, eMzantsi Merika!
Ukutyhalela Phambili Phezu Kwazo Nje Iimvavanyo
Ndinokutsho ngokuqinisekileyo ukuba ngaphezu kweminyaka engama-50 yomsebenzi wobuthixo, bendivuya ngeyona ndlela ibe ndixhamla amalungelo enkonzo. Okubuhlungu kukuba, ngoDisemba 1995 umfazi wam endimthandayo, nendandichithe naye iminyaka engama-43, wafa. Ngoxa elo yayilixesha elibuhlungu gqitha—ibe kusebuhlungu kude kube ngoku—uYehova uyandomeleza, yaye abazalwana bam noodade bokomoya baye babonakalisa uthando nenkxaso eye yadambisa intlungu ekuhambeni kwexesha.
Ndisawakhumbula kakuhle amazwi omnye umzalwana othanjisiweyo kwindibano eyayiseMunich, eJamani ngowe-1963. Wathi: “André, ungakhangeli ngasekhohlo okanye ngasekunene. Abazalwana ababekwiinkampu zoxinaniso banyamezela iimvavanyo. Ngoku lixesha lokuba sityhalele phambili. Asimele sizisizele. Ngoko tyhalela phambili!” Kusoloko kunkenteza engqondweni oku. Ngoku ekubeni ndingasenakwenza nto ingako ngenxa yempilo nokwaluphala, ndisoloko ndithuthuzelwa ngamazwi afumaneka kumaHebhere 6:10 athi: “Kuba uThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.” Ewe, ukusebenza kwinkonzo kaYehova lelona lungelo likhulu umntu anokuba nalo. Kangangeminyaka engama-50 edluleyo, usukelo lwam yayikukuba “ngumsebenzi ongenanto anokuba neentloni ngayo,” yaye nangoku kusenjalo.—2 Timoti 2:15.
[Umfanekiso okwiphepha 22]
Uhlobo lwephenyana endandisebenza ngalo kumachweba aseNorway
[Umfanekiso okwiphepha 23]
Ukushumayela ngebhayisekile kumantla eFransi
[Umfanekiso okwiphepha 23]
Imfumba yeesutikheyisi ezenze iqonga lentetho yesidlangalala
[Imifanekiso ekwiphepha 24]
Mna nomfazi wam, uJeannette emtshatweni wethu ngowe-1952