Ufundo LweBhayibhile—Eyona Nto Indomeleze Bonke Ubomi Bam

Kubalisa uMarceau Leroy

NDIZIVALELE egumbini lam ndafunda la mazwi: “Ekuqaleni uThixo wadala amazulu nomhlaba.” Kwakutheni ukuze ndifunde ndizimele? Ngokuqinisekileyo utata, owayengakholelwa nakancinci ukuba uThixo ukho, wayengazi kuyithanda incwadi endandiyiphethe—iBhayibhile.

Ndandingazange ndayifunda iBhayibhile ngaphambili, kodwa loo mazwi ayo okugabula izigcawu anditsho ndangathi ndibethwe lizulu. Ndathi, ‘Nantsi ke ingcaciso yemithetho yendalo ebisoloko indimangalisa!’ Ngendlela eyatsaleka ngayo ingqalelo yam ukususela ngeyesibhozo ebusuku, kwada kwabetha eyesine ekuseni ndisafunda. Waqala ngaloo mini ke umkhwa wam wokufunda iLizwi likaThixo. Makhe ndinabe ngendlela ufundo lweBhayibhile oluye lwandomeleza ngayo ukutyhubela iminyaka yobomi bam.

“Kuza Kufuneka Uyifunde Umhla Nezolo”

Ndazalwa ngowe-1926, eVermelles, ilali enemigodi yamalahle ekumntla weFransi. Ebudeni bemfazwe yehlabathi yesibini, imigodi yamalahle yayibaluleke kakhulu kwilizwe lethu. Ngoko ekubeni ndandisemba imigodi, umthetho wawundikhulula ukuba ndingayi emkhosini. Sekunjalo, ukuze ndiphucule ubomi bam, ndaqalisa ukwenza izifundo eziphathelele unomathotholo nombane, nto leyo eyandifundisa ngendlela elungelelene ngayo imithetho yendalo. Xa ndandineminyaka engama-21 ubudala, umfana endandifunda naye eklasini wandinika iBhayibhile yam yokuqala, esithi, “le yincwadi efanele ifundwe.” Ndathi ndigqiba ukuyifunda, ndabe sele ndiqinisekile ukuba iBhayibhile iliLizwi likaThixo, isityhilelo ebantwini.

Kuba ndandicinga ukuba nabamelwane bam bangathanda ukufunda iBhayibhile, ndafuna ezinye iikopi zayo ezisibhozo. Kwathi kanti ndiyinyathele emsileni kuba ndaba sisisulu sokugculelwa nokuchaswa. Izalamane zam ezazineenkolelo zandilumkisa zathi, “Ukuba ukhe waqala ukuyifunda le ncwadi, kuza kufuneka uyifunde umhla nezolo!” Nyhani ke ndayifunda ibe andikaze ndizisole ngaloo nto. Ubomi obu bam bendiphila ngayo.

Bakubona indlela endandiyithanda ngayo iBhayibhile, abanye abamelwane babesithi xa befumana iincwadi zamaNgqina kaYehova bazinike mna. Iincwadana ezifana nethi One World, One Governmenta (eboniswe apha ngesiFrentshi) zazichaza isizathu sokuba iBhayibhile ithi buBukumkani bukaThixo kuphela obulithemba labantu. (Mat. 6:10) Ndandizimisele kakhulu ukuxelela abanye abantu ngeli themba.

Phakathi kwabantu bokuqala endabanika iBhayibhile yayinguNoël, endandikhula naye. Ekubeni wayengumKatolika, walungiselela ukuba sidibane nenye indoda eyayifundela ukuba ngumfundisi. Nangona ndandisoyika, ndandisazi ukuba ngokusuka kwiNdumiso 115:4-8 noMateyu 23:9, 10, uThixo akafuni ukuba kusetyenziswe imifanekiso eqingqiweyo xa kunqulwa okanye kubizwe abefundisi ngezibizo zonqulo. Oku kwandenza ndanenkalipho yokumela ukholo lwam. Imiphumo yaba kukuba, uNoël wayamkela inyaniso, yaye kude kube namhlanje useliNgqina elithembekileyo.

Ndatyelela nodadewethu. Umyeni wakhe wayeneencwadi zokusebenzelana nemimoya yaye wayekhathazwa ziidemon. Nangona ekuqaleni ndazibona ndingenakumnceda, iindinyana zeBhayibhile ezifana neyamaHebhere 1:14, zandiqinisekisa ukuba ndixhaswa ziingelosi zikaYehova. Xa usibali wam wasebenzisa imigaqo yeBhayibhile waza wahlukana nayo nantoni na enobugqi, wakhululeka kwimpembelelo yeedemon. Benodadewethu baba ngamaNgqina akhutheleyo.

Ngowe-1947, ekhaya kwafika elinye iNgqina laseMerika, uArthur Emiot. Ndizaliswe luvuyo, ndambuza ngendawo ahlanganisana kuyo amaNgqina. Wandixelela ukuba likho iqela eLiévin, ekumgama oziikhilomitha ezilishumi. Ngezo mini ke kwakunzima nokuthenga ibhayisekile le yembala, ngoko kangangeenyanga eziliqela ndandibetha ngezikaTshiwo ukuya nokubuya ezintlanganisweni. Yaba yiminyaka esibhozo umsebenzi wamaNgqina kaYehova uvaliwe eFransi. Kwakukho amaNgqina angama-2 380 kuphela kulo lonke elo lizwe—uninzi luyinzalelwane yasePoland. Kodwa ngoSeptemba 1, 1947, umsebenzi wethu waphinda wavulwa ngokusemthethweni eFransi. Kwaphinda kwamiselwa iofisi yesebe eParis eVilla Guibert. Kuba kwakungekho nokuba abe mnye uvulindlela eFransi, inkupho yeInformant kaDisemba 1947 (ngoku ekuthiwa Bubulungiseleli Bethu BoBukumkani) yahlab’ ikhwelo koovulindlela abathe ngxi, ababeza kushumayela iiyure ezili-150 ngenyanga. (Ngowe-1949 zehliswa ezo yure zali-100.) Ngokuvisisana namazwi kaYesu akuYohane 17:17 athi, “ILizwi [likaThixo] liyinyaniso,” ndabhaptizwa ngowe-1948, ndaza ngoDisemba 1949, ndaba nguvulindlela.

Ndaphuma Entolongweni Ndabuyela EDunkerque

Andizange ndihlale thuba lide kwisabelo sam sokuqala, esasiseAgen, ekumazantsi eFransi. Ngenxa yokuba ndandingasasebenzi emgodini, kwakufuneka ndiye emkhosini. Andizange ndivume ukuya emkhosini, ngoko ndasiwa entolongweni. Nangona ndandingavunyelwa ukuba ndibe neBhayibhile, ndazizamela amaphepha ambalwa encwadi yeeNdumiso. Kwakundikhuthaza ukuwafunda. Ukukhululwa kwam, kwafuneka ndenze esi sigqibo: Ngaba ndimele ndiyiyeke inkonzo yexesha elizeleyo ukuze ndiphangele ndize ndizakhele umzi? Nalapho ndancedwa yinto endayifunda eBhayibhileni. Ndacamngca ngamazwi kaPawulos akweyabaseFilipi 4:11-13, athi: “Ezintweni zonke ndinamandla ngenxa yalowo undomelezayo.” Ndagqiba kwelokuba ndiqhubeke nobuvulindlela. Ngowe-1950, ndafumana isabelo esitsha—eDunkerque, idolophu endakha ndashumayela kuyo ngaphambili.

Ndafika apho ndiyimpula kaLujaca. Loo dolophu yayidlakazwe kanobom yiMfazwe Yehlabathi yesibini, yaye kwakunzima ukufumana indawo yokuhlala. Ndagqiba ekubeni ndindwendwele intsapho endandidla ngokushumayela kuyo yaye umama walapho wavuya kakhulu esithi: “Ude wakhululwa Mnumzana uLeroy! Umyeni wam uthi ukuba ebemaninzi amadoda afana nawe, ngekungazange kubekho mfazwe.” Babenendlu yokufikela abahambi, ngoko bandihlalisa kuyo de kwafika ixesha labahambi. Kwangolo suku, umntakwabo Arthur Emiot, uEvans, wandinika umsebenzi.b Wayeyitoliki kwizibuko lalapho yaye wayefuna unogada weenqanawa ebusuku. Wandazisa kwelinye lamagosa asenqanaweni. Emva kokuphuma kwam entolongweni, ndandibhitye ndingumcinga. Xa uEvans wachaza isizathu, elo gosa lathi manditye ukutya okwakusefrijini. Ngolo suku lunye, ndafumana indawo yokuhlala, umsebenzi nokutya! Ndaba nentembelo engakumbi kumazwi kaYesu abhalwe kuMateyu 6:25-33.

Xa kwafika ixesha labahambi, mna nomzalwana endandinguvulindlela kunye naye, uSimon Apolinarski, saya kufuna enye indawo yokuhlala, kodwa sasizimisele ukuhlala kwisabelo sethu. Safumana indawo kwisitali samahashe esidala, apho sasilala koomatrasi abenziwe ngeendiza. Sasiba sentsimini imihla ngemihla. Sashumayela kumnini sitali, yaye waba phakathi kwabantu abaninzi abamkela inyaniso. Akuzange kube kudala, kwaphuma inqaku kwiphephandaba lasekuhlaleni, lilumkisa abahlali baseDunkerque “ngokuhlasela kwamaNgqina kaYehova kulo mmandla.” Sekunjalo, yayindim noSimon neqaqobana lamaNgqina kuphela ababelapho! Xa sasijongene nobunzima, sasikhuthazwa kukucamngca ngethemba esinalo njengamaKristu nangokucinga ngendlela uYehova awayesoloko esixhasa ngayo. Ngowe-1952, ukutshintsha kwam isabelo, kwakusele kukho abavakalisi abashumayela ngokuqhubekayo abangama-30 eDunkerque.

Ndomelezelwa Iimbopheleleko Ezintsha

Emva kokuhlala ixesha nje elingephi kwisixeko saseAmiens, ndamiselwa njengovulindlela okhethekileyo ukuze ndiye kukhonza eBoulogne-Billancourt, ihlomela-dolophu laseParis. Ndandinezifundo zeBhayibhile ezininzi, yaye ezinye zazo zathatha inkonzo yexesha elizeleyo nomsebenzi wobuvangeli basemazweni. Omnye umfana, ogama linguGuy Mabilat wamkela inyaniso waza wakhonza njengomveleli wesiphaluka nanjengomveleli wesithili. Kamva, waba ngumveleli womsebenzi wokwakhiwa koomatshini bokushicilela kwiBheteli ekhoyo ngoku eLouviers, ekumgama ukusuka eParis. Iingxubusho zeBhayibhile eziliqela endandisiba nazo entsimini zalibethelela iLizwi likaThixo engqondweni yam, yaye zazindivuyisa, zindenza ndikwazi ukuphucula ubuchule bam bokufundisa.

Ngowe-1953, ndathi ndingalindelanga ndamiselwa njengomveleli wesiphaluka eAlsace-Lorraine, ndawo leyo ethe phakathi kowe-1871 nowe-1945, yathinjwa kabini yiJamani. Ngenxa yoko kwafuneka ukuba ndifunde ulwimi lwesiJamani. Ukuqala kwam umsebenzi wesiphaluka, iimoto, oomabonwakude, okanye oomatshini bokuchwetheza babembalwa kuloo ndawo, ndingasathethi ke ngoonomathotholo neekhompyutha zobuqu. Kodwa mna ndandiphila ubomi obulula yaye ndonwabile. Eneneni, elo yayilelona xesha limnandi. Ngelo xesha, zazimbalwa izinto ezazinokuphazamisa umntu enkonzweni kaYehova nasekulandeleni isiluleko seBhayibhile sokugcina ‘iliso lingenakumbi,’ kunokuba kunjalo namhlanje.—Mat. 6:19-22.

INdibano ‘YoBukumkani Obeyisayo’ yowe-1955 eyayiseParis, yaba sesona sihlandlo ndingasoze ndisilibale. Kulapho ndadibana khona nowayeza kuba ngumfazi wam, uIrène Kolanski, owaqalisa inkonzo yexesha elizeleyo kunyaka ongaphambi kwalowo ndaqala ngawo. Abazali bakhe abangamaPolish babenexesha elide bengamaNgqina akhutheleyo. EFransi batyelelwa nguAdolf Weber. Wayenyamekela igadi kaMzalwan’ uRussell yaye wayeze kushumayela iindaba ezilungileyo eYurophu. Mna noIrène satshata ngowe-1956 saza senza umsebenzi wesiphaluka. Uye wandixhasa ngokwenene ukutyhubela iminyaka!

Emva kweminyaka emibini, kwenzeka enye into emangalisayo—ndamiselwa njengomveleli wesithili. Sekunjalo, ndaqhubeka ndityelela amanye amabandla njengomveleli wesiphaluka, kuba babembalwa abazalwana abafanelekayo. Ndandingazange ndixakeke ngolo hlobo ngaphambili! Ukongezelela kwiiyure ezili-100 endandizishumayela ngenyanga, kwakufuneka ndinikele iintetho veki nganye, ndityelele izifundo zencwadi ezithathu, ndihlole iingxelo zamabandla ndize ndibhale iingxelo. Ndandiza kuzongela njani ixesha lokufunda iLizwi likaThixo? Ndacinga ngesicombululo esinye—ukusika amaphepha kwiBhayibhile endala ndize ndizigcinele amanye. Nanini na kufuneka ndilinde umntu othile endiza kumbona, ndandifunda loo maphepha. Ezo zihlandlo zifutshane zihlaziyayo endandifunda ngazo iBhayibhile zandikhuthaza ukuba ndihlale kwisabelo sam.

Ngowe-1967, mna noIrène sacelwa ukuba sibe ngamalungu asisigxina entsapho yaseBheteli eBoulogne-Billancourt. Ndasebenza kwiSebe Lenkonzo, yaye sekuyiminyaka engaphezu kwama-40 ndisebenza apho. Eyona nto ndiyithanda gqitha ngomsebenzi endiwenzayo kukuphendula iileta ezinemibuzo yeBhayibhile. Kundiyolisa ngokwenene ukuphanda nzulu kwiLizwi likaThixo ndize ‘ndithethelele iindaba ezilungileyo’! (Fil. 1:7) Ndikwayoliswa nakukuqhuba iingxubusho zeBhayibhile kwinkonzo yasekuseni ngaphambi kokutya. Ngowe-1976, ndamiselwa njengelungu leKomiti Yesebe laseFransi.

Eyona Ndlela Isemagqabini Yobomi

Nangona ndiye ndajongana neemeko ezinzima ngamanye amaxesha, elona xesha lingumnqantsa ebomini bam ngoku kukwaluphala nempilo enkenene eye ibangele ukuba mna noIrène singabi namandla okwenza ezinye izinto. Sekunjalo, ukufunda iLizwi likaThixo kunye kusinceda sihlale sicinga ngethemba esinalo. Siyakuvuyela ukuya kwintsimi yebandla lethu ngebhasi ukuze sixelele abanye ngeli themba. Iminyaka yethu sikwinkonzo yexesha elizeleyo xa idibene ingaphaya kwe-120, yaye isenza sikhuthaze ngomphefumlo uphela bonke abanqwenela ukusukela ubomi obubangela imincili, obonwabisayo nobunenjongo. Xa uKumkani uDavide wabhala amazwi akwiNdumiso 37:25, ‘wayemdala,’ kodwa njengaye, nam “andikaboni nabani na olilungisa eshiywe ngokupheleleyo.”

Ukutyhubela iminyaka endiyiphilileyo, uYehova uye wandomeleza ngeLizwi lakhe. Izalamane zam zatsho kwiminyaka engaphezu kwama-60 eyadlulayo ukuba ukufunda iBhayibhile kwakuya kuba ngumkhwa wobomi bonke. Babechanile. Kuye kwaba ngumkhwa wamihla le nendingazange ndazisola ngawo!

[Imibhalo esemazantsi]

[Umfanekiso okwiphepha 5]

Ndim noSimon

[Umfanekiso okwiphepha 5]

IBhayibhile efana neyokuqala endayifumanayo

[Umfanekiso okwiphepha 5]

Xa ndandingumveleli wesiphaluka

[Umfanekiso okwiphepha 6]

Ngemini esatshata ngayo

[Umfanekiso okwiphepha 6]

Mna noIrène siyakuthanda ukufunda iLizwi likaThixo