Ezona Ngxaki Zijamelana Nazo Iintsapho Zomtshato Wesibini
ZINOKUBAKHO IINTSAPHO ZOMTSHATO WESIBINI EZONWABILEYO! NJANI?
Kwimimandla emininzi emhlabeni intsapho yomtshato wesibini iye yayindlela yokuphila. Ukanti, iintsapho zomtshato wesibini zineengxaki ezahlukahlukeneyo. Alithandabuzeki elokuba eyona ngxaki inkulu kukukhulisa abantwana. Noko ke, njengokuba amanqaku amabini alandelayo eya kubonisa kunokwenzeka ukukhulisa abantwana ngokunempumelelo kwintsapho yomtshato wesibini.
NGOKUSISISEKO, OOTATA NOOMAMA BOMTSHATO WESIBINI ABATHANDWA. XA SASINGABANTWANA, uninzi kumazwe aseNtshona lweva ibali elingoCinderella, owaphathwa kakubi ngunina womtshato wesibini owayekhohlakele. Kwakhona, abantwana eYurophu bafunda ngentsomi ethi Snow White and the Seven Dwarfs. Kwathi kanti umama womtshato wesibini kaSnow White uligqwirhakazi elingendawo!
Ngaba iintsomi ezinjalo zinikela imbono echanileyo ngeentsapho zomtshato wesibini? Ngaba bonke abazali bomtshato wesibini bakhohlakele? Akunjalo. Inkoliso yabo ibafunela okuhle kodwa abo bantwana ibafumene kumtshato wesibini. Kodwa bamele bajamelane neengxaki ezinzima ezibakho kubomi bomtshato wesibini.
Iingxaki Zokukhulisa Abantwana
Xa umtshato wokuqala ungaphumeleli, ngokufuthi isizathu iba kukungakhuli kwamaqabane. Kumtshato wesibini, ukubakho kwabantwana kungalwenza lube nzima olo lwalamano. Ezinye iingxelo zithi imitshato engaphezu kwemine kwelishumi yeentsapho ezinomzali womtshato wesibini ezixubeneyo igqibela ngokuqhawulwa kungaphelanga neminyaka emihlanu.
Abo basandul’ ukutshata basenokungayiqondi ingxaki engokwemvakalelo, ukungaqiniseki kulowo bafanele bathembeke kuye, ubukhwele nentiyo ababa nayo abantwana bomtshato wokuqala xa kufika umzali womtshato wesibini. Aba bantwana basenokuvakalelwa kukuba lo mzali wesibini uze kuthabatha lonke uthando lomzali wabo. Ukongezelela, ngenxa yokuba umzali wokwenene eye washiywa lelo qabane usenokukufumanisa kunzima ukusiqonda isizathu sokusondelelana kwabantwana neqabane langaphambili. Enye inkwenkwe yazama ukucacisa indlela eyayinolwalamano oluhle ngayo noyise, isithi, “Mama ndiyazi ukuba uTata ebekuphethe kakubi, kodwa ebendithanda mna!” Amazwi anjalo, ngoxa enyanisekile, anokwenza umama amcaphukele ngakumbi uyise womntwana.
Omnye ubawo womtshato wesibini wavuma esithi: “Ndandingazimiselanga kwaphela ukuhlangabezana nazo zonke iingxaki ezinxulumene nokukhulisa abantwana bam bomtshato wesibini. Ndacinga ukuba ngenxa yokuba nditshate nonina, ndinguyise. Yayilula nje ngolo hlobo! Andizange ndikuqonde ukusondelelana okwakukho kubantwana noyise wabo wokwenene, yaye ndenza iimpazamo ezininzi.”
Kunokubakho ingxwabangxwaba engakumbi ngokuphathelele ukuqeqesha. Abantwana bafuna ukuqeqeshwa ngothando, kodwa maxa wambi baye bavukele enoba luvela kumzali wokwenene. Hayi indlela ekunzima ngayo ukulwamkela xa luvela kumzali womtshato wesibini! Ngokuqhelelekileyo, xa kufuneka eqeqeshiwe, umntwana womtshato wesibini usenokusabela ngokuthi, “Akungotata wam!” Hayi indlela anokumdimaza ngayo amazwi anjalo umzali womtshato wesibini oneenjongo ezintle!
Ngaba abantwana banokukhuliswa ngendlela ephumelelayo kwintsapho exubeneyo? Ngaba abazali bomtshato wesibini banokuba nendima ebalulekileyo ekwakheni intsapho yomtshato wesibini eya kuphumelela? Impendulo kuyo yomibini le mibuzo nguewe ukuba bonke abo babandakanyekileyo balandela isiluleko esiseLizwini eliphefumlelwe nguThixo, iBhayibhile.
[Caption on page 3]
“Akungotata wam!”