Abavakalisi Bobukumkani Bayabalisa
aNgqina Athetha Ekuhleni EFransi
UKUSUSELA ngeeyure zasekuseni ngoLwesihlanu, ngoJanuwari 29, 1999, nasebudeni bempela-veki, amaNgqina kaYehova eFransi asasaza ngokunenzondelelo ezitratweni yaye kamva kwindlu ngendlu, imibhalo yephecana ezizigidi ezili-12 elithi People of France, You Are Being Deceived! Kwakutheni ukuze kubekho iphulo elinjalo?
Kwinkomfa yoonondaba eParis ngaloo ntsasa yangoLwesihlanu, kwanikelwa isizathu selo phulo. Isithethi esiliNgqina sacacisa sathi: “Into esifuna ukuyenza namhlanje kukuba saziwe ukuba singabantu abanjani yaye siphelise nezityholo ezithethwayo ngathi. Sikulungele ukugxekwa, kodwa asisafuni ukuphulaphula ubuxoki namazwi onakalisa udumo lwethu.”
Nangona amaNgqina kaYehova elunqulo lwamaKristu lwesithathu ngobukhulu eFransi, abantwana abaninzi abangamaNgqina baye bathukwa baza banyeliswa ezikolweni. Abantu abadala baye balahlekelwa yimisebenzi yabo yaye baye bagrogriswa ngenxa yonqulo lwabo. Okungakholelekiyo kukuba, kwiminikelo yawo yonqulo kuye kwafunwa irhafu yama-60 ekhulwini. Eli phulo laqhubana njani nolu calu-calulo?
Eli phecana lithi: “AmaNgqina kaYehova angama-250 000 nabo banxulumana nawo eFransi AKHALAZELA ukunganyaniseki okukhoyo xa unqulo lwawo lwamaKristu, obelukho eFransi ukususela ngowe-1900, luye lwahlanganiswa namahlelo ayingozi ukususela ngowe-1995. . . . AKHALAZELA ukusoloko ephethwe kakubi.” Izityholo zobuxoki atyatyekwa zona amaNgqina aseFransi namaqhinga aye enziwa ngabagxeki befuna ukusasaza ubuxoki zadandalaziswa ekuhleni. Eli phecana laqukumbela ngokuthi: “Namhlanje, amaNgqina kaYehova angaphezu kwezigidi ezibini nezinxulumani zawo ahlala eYurophu. Ayayihlonela imithetho yooRhulumente yaye angabahlali abaphila ngemigaqo efumaneka kwincwadi yeVangeli. Bantu baseFransi, eyona nyaniso yile. Ngumsebenzi wethu ukuyichaza njengokuba injalo!”
Intsabelo Entle, Nekhawulezileyo
Kwakhutshwa izigidi zamaphecana ngosuku lokuqala. EParis nje kuphela, emin’ emaqanda amaNgqina angaphezu kwama-7 000 ayesele ehambise amaphecana azizigidi ezingaphezu kwesi-1,3 ebantwini. Ukubona amaNgqina amaninzi kangaka ehambisa amaphecana ezitratweni ngokuqinisekileyo kwakuyinto ababeqala ukuyibona abantu. Ijelo leendaba kuquka amaphephandaba asekuhlaleni nawamanye amazwe nomabonwakude, asabela ngendlela entle kwelo phulo. Iphephandaba iLe Progrès de Lyon lathi: “Eli phulo . . . liye lakuphelisa ukungaqondwa kakuhle kwegama elithile. Kule minyaka ilishumi, igama elithi ‘ihlelo’ . . . liye lanentsingiselo engentle, ethetha into eyingozi neyenzakalisayo. . . . AmaNgqina kaYehova akayongozi esenokubaphazamisa abanye abantu.”
Abo bawaziyo amaNgqina kaYehova bayakuxabisa ukuzola kwawo nokubahlonela kwawo ngokunzulu abanye abantu. Ngaloo ndlela, abaninzi ezitratweni babonisa uxabiso nenkxaso yabo kumawaka amaNgqina awayenenxaxheba kweli phulo. Ngokukhawuleza kwafunyanwa iminxeba, iifax, neeleta ezivela abantwini zibonisa umbulelo ngeli phecana. Ngaphezu kwako konke, abo bantliziyo zinyanisekileyo banikwa ithuba lokuba baphulaphule izibakala ezingamaNgqina ngokuchasene nezinto ezazithethwa ngawo ezibubuxoki nezingekho ngqiqweni, nabo iinkolelo zabo ziye zanyeliswa baye bakwazi ukubonakalisa indlela abavakalelwa ngayo ngoko bakuxabisayo.